Wan Kwestin

?I stret sipos yumi kam klosap long God long prea be yumi no talem tok ya “long nem blong Jisas”?

Baebol i soemaot se ol Kristin we oli wantem kam klosap long Jeova long prea, oli mas prea long nem blong Jisas. Jisas i talem long ol disaepol blong hem se: “I no gat man i save kam long Papa blong mi, sipos mi mi no tekem hem i kam.” Mo bakegen se: “Mi mi Pikinini blong hem, mo sipos yufala i askem samting long nem blong mi, nomata wanem samting, be bambae mi mi mekem, blong ol wok ya blong mi i save leftemap nem blong Papa blong mi. Nao sipos yufala i askem samting long mi long nem blong mi, bambae mi mi save mekem.”—Jon 14:6, 13, 14.

Buk ya Cyclopedia of Biblical, Theological, and Ecclesiastical Literature i tokbaot spesel wok ya blong Jisas i se: “Yumi prea i go long God nomo, tru long Jisas Kraes we i olsem man blong tekem yumi i go joen wetem God. Taswe, sipos yumi prea i go long ol tabu man no long ol enjel, hemia i blong nating nomo, mo i olsem we yumi tok nogud long God tu. Sipos yumi mekem wosip long wan man we God i wokem, nating se man ya i hae olsem wanem, be yumi stap mekem wosip long aedol. Long loa blong God, i tabu blong mekem olsem.”

?Olsem wanem sipos wan gudfala samting i hapen long wan man, nao man ya i talem, “Tangkiu Jeova” be i no talem “long nem blong Jisas”? ?Fasin olsem i no stret? Maet i oraet. Tingbaot sipos wantaem nomo wan Kristin i fesem wan denja mo hem i singaot se: “!Jeova, plis yu givhan long mi!” Nating sipos hem i no talem “long nem blong Jisas,” be bambae God i mas halpem man we i givim laef blong hem i go long Hem finis.

Be, yumi mas makem se, taem yumi jes toktok olsem nomo long God wetem strong voes, hemia i no wan prea. Tingbaot taem we Jeova i jajem Ken from hem i kilim brata blong hem Ebel i ded. Ken i talem se: “Naoia yu wantem ronemaot mi long ples ya, blong mi no moa save stap long fes blong yu. Bambae i no moa gat ples blong mi long wol ya, oltaem long laef blong mi, bambae mi stap wokbaot olbaot nomo. !Be sipos wan man i faenem mi, bambae i kilim mi ya!” (Jenesis 4:13, 14) Nating se Ken i stap toktok long Jeova, be hem i stap komplen nomo from nogud frut blong sin blong hem.

Baebol i talem se: “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” Sipos yumi toktok long Man we i Hae Olgeta olsem we hem i wan man blong wol ya nomo, hemia i soemaot se yumi no gat tingting daon nating. (Jemes 4:6; Ol Sam 47:2; Revelesen 14:7) Mo sipos yumi save wanem we Tok blong God i talem long saed blong bigfala wok we Jisas Kraes i mekem, be yumi prea long fasin we yumi no luksave samting ya, ale hemia tu i soem se yumi no gat respek.—Luk 1:32, 33.

Hemia i no minim se Jeova i wantem blong yumi folem wan spesel stael blong prea. Stamba samting we i impoten, hemia hat blong man. (1 Samuel 16:7) Konilias i wan kapten blong ami blong Rom long faswan handred yia K.T. * Hem ‘i stap prea long God oltaem.’ Hem i no man Isrel, i no sakomsaes, mo hem i no givim laef blong hem i go long Jeova. Taswe, ating hem i no askem ol prea blong hem long nem blong Jisas. Nating se i olsem, ‘God i harem ol prea blong hem, . . . mo hem i stap tingbaot hem.’ ?From wanem? From we Bigman we i “stap skelem olgeta samting long hat blong man,” i luk we Konilias i wan “man blong prea. Hem [i] . . . stap mekem wosip long God.” (Ol Wok 10:2, 4; Ol Proveb 17:3, NW ) Taem Konilias i kasem save long “Jisas, man Nasaret ya,” tabu spirit i kam long hem mo hem i baptaes olsem wan disaepol blong Jisas.—Ol Wok 10:30-48.

Blong ademap ol samting ya, i no ol man we oli naf blong talem wanem prea we God i harem. Sipos wan Kristin i bin toktok long God samtaem be i no talem “long nem blong Jisas,” i no nid blong hem i harem se i gat bigfala fol long fes blong God. Jeova i save gud se yumi save mestem samtaem, mo hem i wantem givhan long yumi. (Ol Sam 103:12-14) Yumi save trastem se sipos yumi stap soemaot bilif long “Pikinini blong God . . . , [nao] yumi askem samting long hem we i stret long tingting blong hem, hem bambae i harem prea blong yumi.” (1 Jon 5:13, 14) Be taem ol trufala Kristin oli mekem prea long fored blong ol narafala, oli mas luksave wok we Baebol i talem se Jisas i mekem long saed blong stamba tingting blong Jeova. Mo wetem fasin obei, oli mekem prea blong olgeta long God i pastru long Jisas, blong givim ona long hem.

[Futnot]