?Yu Yu Rimemba?
?Yu Yu Rimemba?
?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:
• ?Olsem wanem yu save yusum Bigfala Toktok antap long hil long laef blong yu blong mekem we yu no gat tumas wari?
Evri dei, i gud we yu ridim wan long ol stamba tijing blong Jisas long toktok ya, no long wan blong ol Gospel. Sipos yu tingting dip long tijing ya mo yu traehad blong mekem hem i wok long laef blong yu, bambae yu save glad, mo wari i godaon.—12/15, pej 12-14.
• ?Yu save givim tri gudfala risen from wanem ol elda oli mas trenem ol man blong givhan blong oli holem moa wok insaed long kongregesen?
From we namba blong ol Witnes blong Jeova i kam antap bigwan, yumi nidim moa man blong halpem ol niuwan we oli jes baptaes, blong oli gohedgud long saed blong spirit. Sam brata we oli bin mekem wok blong elda blong plante yia oli kam olfala no oli gat problem long helt blong olgeta, nao oli no save mekem plante wok olsem bifo. Mo sam elda we oli naf, oli kasem moa responsabiliti antap long wok we oli gat finis long kongregesen, mekem se oli no save spenem plante taem long wok blong kongregesen olsem fastaem.—1/1, pej 29.
• ?Olsem wanem ol man oli trastem ol giaman god?
Plante man oli wosipim ol god blong skul blong olgeta, be hemia ol god we oli no gat laef mo ol god ya oli olsem Bal long taem blong Elaeja, oli no gat paoa blong sevem man. (1 King 18:26, 29; Ol Sam 135:15-17) Sam narafala man oli givim ona, respek, mo oli tinghae tumas long ol bigman blong sinema no ol jampion blong spot, be olgeta ya oli no save givim wan gudfala fiuja long man we i lukluk i go long olgeta. Defren olgeta, Jeova i rili stap mo i save mekem olgeta promes blong hem oli kamtru.—1/15, pej 3-5.
• ?Yumi save lanem wanem long fasin blong Ken taem Jeova i givim woning long hem?
God i wokem yumi we yumi fri blong jus, mo i moa gud yumi jusum blong mekem wanem we i gud, i bitim we yumi gowe long ol fasin we oli gud, olsem Ken i bin mekem. Mo stori ya long Baebol i soem tu se Jeova i panisim olgeta we oli no wantem tanem tingting from sin blong olgeta.—1/15, pej 22-23.
• ?From wanem i impoten tumas blong stap klin tede?
Fasin blong laef blong man i jenis, mo from samting ya plante man oli no moa spenem plante taem blong klinim haos blong olgeta olsem bifo. Man we i ting nating long fasin blong klinim kakae mo wota we hem i yusum, hem i save kasem sik from. Antap long fasin klin long saed blong bodi, Baebol i talem se i impoten tumas blong stap klin long wosip, fasin, mo tingting blong yumi.—2/1, pej 3-6.
• Pol i tokbaot ol witnes we oli laef bifo long taem blong Kraes, se “olgeta ya tu oli kam stret gud olgeta.” ?Samting ya i kamtru olsem wanem? (Hibrus 11:40)
Long Rul blong Wan Taosen Yia, Kraes mo ol tabu brata blong hem long heven, we oli wok olsem king mo pris, bambae oli mekem ol blesing we oli kamaot from ransom sakrefaes i kam long olgeta man we oli laef bakegen. Nao olsem Hibrus japta 11 i talem, ol man ya we oli holem bilif bambae “oli kam stret gud olgeta.”—2/1, pej 23.
• ?Pol i minim wanem taem i talem long ol man Hibru se: “I no gat wan long yufala yet we . . . blad blong hem i ron from faet ya”? (Hibru 12:4)
Hem i min se man i holem bilif go kasem ded. I gat plante eksampol blong ol man we oli bin holemstrong long bilif gogo kasem we oli ded. Nating se ol man Hibru we Pol i raet long olgeta oli no bin fesem hadtaem olsemia, be oli mas kam bigman long saed blong spirit, oli mas mekem bilif blong olgeta i kam strong moa blong oli naf blong fesem enikaen traem.—2/15, pej 29.
• ?From wanem i moa gud we yumi no talem se fasin sore blong Jeova i slakem stretfasin blong hem blong jajem man?
Long sam lanwis, tok ya “slakem” i save gat mining blong daonem, no blokem. Jeova hem i wan God blong stretfasin mo sore, mo taem hem i yusum ol gudfala fasin ya, tufala i joengud tugeta. (Eksodas 34:6, 7; Dutronome 32:4; Ol Sam 116:5; 145:9) Fasin blong Jeova blong jajem man i no strong tumas taswe hem i no nidim blong daonem paoa blong hem wetem sore.—3/1, pej 30.
• ?I stret long wan Kristin blong blokem dedbodi blong wan famle blong hem blong dedbodi ya i no save roten?
Fasin blong blokem dedbodi blong hem i no save roten, hemia wan rod blong mekem dedbodi i stap longtaem. Sam man blong bifo oli folem kastom ya from bilif blong skul blong olgeta. Be ol trufala man blong wosip long God oli no mekem samting ya from bilif blong olgeta. (Prija 9:5; Ol Wok 24:15) Fasin blong blokem dedbodi blong i no save roten i no naf blong blokem samting we bambae i mas kamtru long dedbodi ya, hemia se bambae i kam graon bakegen. (Jenesis 3:19) Be ating i stret blong wokem dedbodi blong i no save roten sipos hemia loa blong ples blong yu, no sipos sam famle i wantem olsem, no sipos famle blong yu oli kam longwe mo oli wantem luk dedbodi ya.—3/15, pej 29-31.
• ?Wanem eksampol long Baebol i soem we Jeova i welkamem ol man blong olgeta nesen?
Jeova i sanem profet Jona i go blong givim woning long ol man Nineve, mo i pulum Jona blong akseptem gudfala fasin blong ol man Nineve taem oli tanem tingting blong olgeta. Long tok blong hem mo long fasin blong hem, Jisas i leftemap tingting blong ol man Jiu blong oli lavem ol man Sameria. Aposol Pita wetem aposol Pol, tufala i joen long wok ya blong talemaot gud nius blong Kingdom long olgeta we oli no man Jiu. Ol eksampol ya oli soem long yumi se yumi mas traehad blong halpem ol man we oli kamaot long ol defdefren kantri.—4/1, pej 21-24.