?Hu Bambae i Sef Long Dei Blong Jeova?
?Hu Bambae i Sef Long Dei Blong Jeova?
“Dei ya i stap kam we i hot olsem faea.”—MALAKAE 4:1, NW.
1. ?Malakae i tokbaot jajmen blong rabis wol ya olsem wanem?
PROFET MALAKAE i kasem tabu spirit blong God blong raetem ol profet tok long saed blong sam nambawan samting we bambae oli kamaot long fiuja. Ol samting ya bambae oli gat paoa long laef blong evri man long wol. Malakae 4:1 (NW ) i talemaot se: “ ‘!Luk! Dei ya i stap kam we i hot olsem faea blong bonem silva. Mo ol flas man mo olgeta we oli stap mekem ol rabis fasin, oli mas kam olsem gras we i drae finis. Mo dei ya we i stap kam bambae i kakae olgeta, we bambae i no gat wan rus no branj blong olgeta i stap.’ Hemia nao tok blong Jeova blong ol ami.” ?Jajmen agensem rabis wol ya bambae i go kasem wanem mak? Bambae hem i sem mak olsem we man i bonem rus blong wan tri blong mekem we hem i neva save gru bakegen.
2. ?Sam narafala vas blong Baebol oli tokbaot dei blong Jeova olsem wanem?
2 Maet yu askem se, ‘?Be wanem “dei” ya we profet Malakae i stap tokbaot?’ Hem i semfala dei we Aesea 13:9 (NW ) i tokbaot. Vas ya i talem se: “!Yufala i luk! Dei blong Jeova i stap kam. Dei ya i nogud from we i fulap long panis mo kros blong God. Samting we bambae hem i mekem long ples ya, bambae ol man oli sek from. Bambae hem i spolem ol man nogud long ples ya.” Sefanaea 1:15 (NW ) i givim klia pija long saed ya i se: “Dei ya hem i dei blong kros, wan dei blong bigfala trabol mo blong ol man oli harem nogud, wan dei blong hariken mo dei blong spolem olgeta samting, wan dei blong tudak mo ples i no klia, wan dei blong ol klaod mo ol bigfala smok.”
“Bigfala Trabol Tumas”
3. ?“Dei blong Jeova” hem i wanem?
3 Taem profet tok blong Malakae i kamtru long namba tu taem blong hem, “dei blong Jeova” bambae hem i wan taem blong “bigfala trabol.” Jisas i talemaot se: “Bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Matiu 24:21) Tingbaot ol hadtaem we wol ya i kasem finis, antap moa i stat long 1914. (Matiu 24:7-12) !Tru ya, Wolwo Tu, hem wan nomo, i kilim i ded bitim 50 milian man! Be, “bigfala trabol” ya we i stap kam, bambae i mekem trabol we i bigwan moa, mekem se olgeta narafala trabol oli nating nomo. Faet blong Amagedon bambae i makem en blong taem ya, we i sem mak long dei blong Jeova, nao ol las dei blong rabis wol ya i finis.—2 Timoti 3:1-5, 13; Revelesen 7:14; 16:14, 16.
4. ?Taem dei blong Jeova i finis, wanem samting bambae i hapen?
4 Long en blong dei ya blong Jeova, wol blong Setan mo ol man blong hem bambae oli lus olgeta. Faswan samting blong lus, hemia ol giaman skul. Biaen, jajmen blong Jeova bambae i go agensem wol blong bisnes mo politik we Setan i bos long hem. (Revelesen 17:12-14; 19:17, 18) Profet tok blong Esikel i talem se: “Bambae oli sakem silva blong olgeta long ol rod, mo gol blong olgeta bambae i kam olsem wan samting we i nogud. Silva mo gol blong olgeta bambae i no save sevem olgeta long dei blong kros blong Jeova.” (Esikel 7:19, NW ) Sefanaea 1:14 (NW ) i tokbaot dei ya i se: “Bigfala dei blong Jeova i klosap. Hem i klosap, mo hem i hareap tumas.” From we Baebol i tokbaot dei blong Jeova olsemia, yumi mas gat strong tingting blong mekem ol samting we oli laenap gud wetem ol stretfala rul blong God.
5. ?Ol man we oli fraetgud long nem blong Jeova oli kasem wanem?
5 Afta we Malakae i tokbaot wanem we dei blong Jeova bambae i mekem long wol blong Setan, Malakae 4:2 (NW ) i talemaot tok blong Jeova we i se: “Yufala we i fraetgud long nem blong mi, bambae san blong stret fasin i saenaot, wetem meresin long wing blong hem. Mo bambae yufala i go mo wokbaot long graon ya olsem ol yangfala buluk we oli fatfatgud.” “San blong stret fasin” hemia Jisas Kraes. Hem i “laet blong ol man long wol,” wan laet long saed blong spirit. (Jon 8:12) Jisas i stap saenaot blong hilim man, hemia wan hiling long saed blong spirit we yumi stap harem gud long hem finis tede. Biaen bambae hem i hilim man fulwan long saed blong bodi, long niufala wol. Olsem we Jeova i talem, ol man we oli kasem hiling ya bambae oli “wokbaot long graon ya olsem ol yangfala buluk we oli fatfatgud.” Yes ol man ya bambae oli jamjam from we oli glad blong go fri.
6. ?Ol man blong God bambae oli glad blong joen long wanem lafet?
6 ?Olsem wanem long olgeta we oli no kea long ol samting we Jeova i askem? Malakae 4:3 i talem se: “Long dei ya, taem we mi mi jajem ol man, bambae yufala [ol man blong God] i winim ol man nogud, nao yufala i stap purumpurumbut long olgeta i godaon long graon. Mi mi Hae God, mi gat olgeta paoa, mo hemia tok blong mi.” Ol man blong God long wol ya bambae oli no joen long faet blong spolem rabis wol ya blong Setan. Be, tok ya se bambae oli ‘purumpurumbut long ol rabis man’ i min se, afta long dei blong Jeova, bambae oli joen long lafet blong glad from we God i win. Afta we ol ami blong Fero oli ded long Red Si, ol man Isrel oli mekem wan bigfala lafet. (Eksodas 15:1-21) Taem Setan mo wol blong hem i lus long taem blong bigfala trabol, bambae i gat wan bigfala lafet tu from we God i win. Ol gudfala man blong God we oli laef tru long taem ya, bambae oli singaot bigwan se: “Yumi save harem gud, yumi save glad, from we hem i sevem yumi.” (Aesea 25:9) !Bigfala glad bambae i kamaot taem hae rul blong Jeova i win mo wol ya i klingud blong man i laef long hem wetem pis!
Krisendom i Mekem Olsem Nesen Blong Isrel
7, 8. ?Ol man Isrel long taem blong Malakae oli olsem wanem long saed blong spirit?
7 Ol man we oli gat gudnem long fes blong Jeova hemia ol man we oli mekem wok blong hem. Oli defren olgeta long ol man we oli no mekem olsem. Sem samting i hapen taem Malakae i raetem buk blong hem. Long yia 537 B.K.T., wan smol grup blong ol man Isrel oli kambak long kantri blong olgeta afta we oli kalabus long Babilon blong 70 yia. Be long ol handred yia we oli kam, nesen ya i stat folem fasin blong apostasi * mo oli mekem rabis fasin bakegen. Bighaf blong ol man long nesen ya oli no ona nating long nem blong Jeova; oli ting nating long ol stretfala loa blong hem; oli sakem doti long tempol blong hem taem oli givim sakrefaes blong ol anamol we oli blaen, handikap, mo sik; mo oli stap mekem divos long ol waef blong yangtaem blong olgeta.
8 From samting ya, Jeova i talem long olgeta se: “Taem mi mi kamtru long yufala blong jajem ol man, bambae mi no save tektaem blong talemaot ol poen agens long olgeta. Hemia olgeta we oli stap wokem majik, mo olgeta we oli lego ol woman blong olgeta, oli go mared long ol narafala woman, mo olgeta we oli mekem ol giaman toktok, mo ol masta we oli ravem ol boe blong olgeta from pei blong olgeta, mo olgeta we oli stap spolem ol wido wetem ol pikinini we ol papa blong olgeta i ded, mo ol strenja. Bambae mi jajem olgeta man nogud ya we oli no ona long mi. Mi mi Hae God, mo mi no save jenis samtaem.” (Malakae 3:5, 6) Nating se i olsem, Jeova i singaot i go long eni man we maet oli wantem tanraon from rabis fasin blong olgeta, i se: “Sipos yufala i tanem tingting blong yufala, yufala i kambak long mi, mi bambae mi save kambak long yufala bakegen.”—Malakae 3:7.
9. ?Profet tok blong Malakae i kamtru fastaem long hu?
9 Ol tok ya blong Malakae oli kamtru long faswan handred yia K.T. * Wan grup blong man Jiu we oli mekem wok blong Jeova oli kam haf blong wan niufala “nesen” we ol memba blong hem oli man we tabu spirit i makemaot olgeta. Ol hiten man tu oli kam blong joen long nesen ya. Be bighaf blong ol prapa man Isrel oli bin sakemaot Jisas. Taswe, Jisas i talem long nesen ya blong Isrel i se: “Yufala i luk. God i lego yufala finis, ples blong yufala i emti i stap.” (Matiu 23:38; 1 Korin 16:22) Long 70 K.T., wan “dei . . . we i hot olsem faea” i kamtru long nesen blong Isrel, olsem we Malakae 4:1 i bin tokbaot. Jerusalem mo tempol blong hem i lus olgeta, mo ol ripot oli soem se bitim wan milian man oli ded from kakae i sot, ol raorao blong kasem paoa, mo faet we ami blong Rom oli mekem. Be ol man we oli mekem wosip long Jeova oli gat janis blong ronwe long trabol ya.—Mak 13:14-20.
10. ?Olsem wanem ol man long wol mo ol lida blong skul oli folem fasin blong ol man Isrel long faswan handred yia?
10 Ol man blong wol, antap moa Krisendom, * oli folem fasin we i sem mak nomo long nesen blong Isrel long faswan handred yia. Ol lida mo memba blong jos blong Krisendom oli laekem moa blong folem ol tingting blong jos blong olgeta i bitim trutok blong God we Jisas i tijim. Ol lida blong skul nao oli gat moa fol from fasin ya. Oli no wantem yusum nem blong Jeova, ale oli girap oli tekemaot nem ya long ol Baebol we skul blong olgeta i prentem. Oli no ona nating long Jeova from we oli tijim ol bilif we oli blong hiten man olsem helfaea, Triniti, sol we i no save ded, mo evolusen. * Taem oli mekem olsem, oli pulum ol man blong no moa presem Jeova, olsem ol pris long taem blong Malakae oli mekem.
11. ?Ol skul blong wol oli soem klia hu ya masta blong olgeta taem oli mekem wanem?
11 Taem ol lasdei oli stat long 1914, ol skul blong wol, antap moa olgeta ya we oli talem se oli Kristin, oli soem klia se hu nao masta blong olgeta. Long tufala bigfala faet ya blong wol, ol skul oli pulum ol memba blong olgeta blong go faet long nem blong kantri blong olgeta, nating se hemia i min se bambae oli kilim narafala man blong skul blong olgeta. Tok blong God i talemaot klia hu nao i stap obei long Jeova mo hu i no stap obei long hem, i se: “Fasin blong man i stap soemaot i klia, se hu i pikinini blong God, mo hu i pikinini blong Setan. Man we i no stap mekem ol fasin we i stret, no we i no lavem Kristin brata no sista blong hem, hem i no pikinini blong God, hem i pikinini blong Setan. Tok we yufala i harem taem gud nius i kamtru long yufala fastaem, i talem se yumi mas lavlavem yumi. I nogud yumi kam olsem man ya Ken bifo. Hem i wan man blong Setan, nao hem i kilim brata blong hem i ded.”—1 Jon 3:10-12.
Mekem Ol Profet Tok Oli Kamtru
12, 13. ?Wanem profet tok we ol man blong God oli mekem i kamtru long taem blong yumi?
12 Long en blong Wolwo Wan, long 1918, ol man blong Jeova oli luksave se God i jajem Krisendom wetem olgeta narafala giaman skul finis. Ale, stat long taem ya i go, tok i goaot long olgeta man we oli gat gud hat se: “Nao mi harem wan narafala toktok i kamaot long heven, i talem se, ‘Ol man blong mi, yufala i kam. Yufala i kamaot long hem. I nogud yufala i stap joen wetem hem long ol sin ya we hem i stap mekem, mo i nogud we bambae yufala i joen wetem hem blong kasem panis wetem hem. Ol sin ya blong hem i stap hivap i go kasem heven, mo God i stap tingbaot ol rabis fasin blong hem.’ ” (Revelesen 18:4, 5) Ol man we oli wantem mekem wok blong Jeova oli stat klinimaot doti blong giaman skul long laef blong olgeta mo oli stat blong talemaot gud nius long fulwol se Kingdom i stanap finis. Wok ya i mas finis bifo we en blong rabis wol ya i kam.—Matiu 24:14.
13 Wok ya i mekem profet tok blong Malakae 4:5 (NW ) i kamtru. Long ples ya Jeova i talem se: “!Yufala i luk! Bambae mi sanem long yufala profet ya Elaeja, bifo long bigfala dei blong Jeova we i mekem ol man oli fraet.” Profet tok ya i kamtru fastaem long wok we Jon Baptaes i mekem, we hem i pija blong Elaeja. Jon i mekem wan wok we i sem mak long wok blong Elaeja taem hem i baptaesem ol man Jiu we oli tanem tingting blong olgeta from sin we oli mekem agensem kontrak blong Loa. Be samting we i moa impoten, Jon hem i rerem rod blong Mesaea we bambae i kam. Wok blong Jon hem i mekem wan haf nomo blong profet tok blong Malakae i kamtru. Taem Jisas i talem se Jon hem i olsem namba tu Elaeja, hem i soem se long fiuja bambae i gat wan narafala wok blong “Elaeja”.—Matiu 17:11, 12.
14. ?Wanem impoten wok i mas gohed bifo we rabis wol ya i lus?
14 Profet tok blong Malakae i soem se bigfala wok ya blong Elaeja bambae oli mas mekem bifo long “bigfala dei blong Jeova we i mekem ol man oli fraet.” Dei ya bambae i finis taem Amagedon i kam, hemia faet blong bigfala dei blong God ya we i gat Olgeta Paoa. Hemia i min se wan wok we i sem mak long wok blong Elaeja bambae i mas gohed bifo we rabis wol ya i lus mo bifo long Taosen Yia Rul blong Kingdom blong God long heven we Jisas Kraes i rul long hem. Olsem profet tok ya i talem, bifo we Jeova i spolem rabis wol ya, grup blong man we i mekem wok olsem Elaeja tede, wetem ol milian narafala Kristin man ya we bambae oli laef long wol mo we oli stap sapotem grup ya, oli glad tumas blong mekem wok we i stanemap trufala wosip bakegen, i leftemap nem blong Jeova, mo i tijim ol trutok blong Baebol long ol man we oli olsem sipsip.
Jeova i Blesem Ol Man Blong Hem
15. ?Olsem wanem Jeova i rimemba ol man blong hem?
15 Jeova i blesem ol man we oli mekem wok blong hem. Malakae 3:16 (NW ) i talem se: “Long taem ya, olgeta we oli fraet gud long Jeova oli stap toktok tugeta, wanwan long fren blong hem. Mo Jeova i stap harem toktok ya mo i lesin gud. Nao oli stat raetem tok long buk blong rimemba we i stap long fored blong hem, blong rimemba long olgeta we oli fraet gud long Jeova, mo olgeta we oli tingbaot nem blong hem.” God i no save fogetem olgeta man we i stret blong oli kasem laef we i no save finis. Stat long Ebel finis, i olsem we God i stap raetem nem blong ol man ya long buk blong hem. Long olgeta ya, Jeova i talem se: “Taem yufala i gat ten hip blong sam samting, tekem wan hip i kam insaed long haos blong kipim ol samting, blong bambae i save gat kakae insaed long haos blong mi. Mo testem mi, plis, long samting ya, . . . yu luk bambae mi mi openem doa blong heven blong bambae ol blesing oli kamdaon long yufala mo bambae mi givim olgeta samting ya long yufala gogo yufala i no moa nidim.”—Malakae 3:10, NW.
16, 17. ?Olsem wanem Jeova i blesem ol man blong hem mo wok we oli mekem?
16 Yes, Jeova i rili blesem ol man we oli mekem wok blong hem. ?Hem i mekem samting ya olsem wanem? Wan blesing hemia taem hem i givim moa save long olgeta long saed blong stamba tingting blong hem. (Ol Proveb 4:18; Daniel 12:10) Wan narafala blesing hemia taem hem i mekem we oli karem plante gudfala frut long wok blong prij. Plante man we hat blong olgeta i gud oli joen long trufala wosip. Mo olgeta ya oli mekemap “bigfala hip blong ol man, we . . . oli kamaot long olgeta kala, mo long olgeta kantri, mo long olgeta laen, mo long olgeta lanwis. . . . Oli singaot bigwan, oli talem se, ‘God blong yumi, hem i King, i stap sidaon long bigfala jea blong hem. Hem wetem Smol Sipsip ya, tufala ya nao i wokem rod blong sevem mifala.’ ” (Revelesen 7:9, 10) Bigfala kampani ya i gru long wan fasin we i nambawan tumas, mo olgeta we naoia oli stap mekem wok blong Jeova oli bitim sikis milian man long bitim 93,000 kongregesen raon long wol.
17 Yumi luksave tu se Jeova i blesem ol Witnes blong Jeova from we long ol yia we oli pas oli wokem mo seremaot moa buk long saed blong Baebol i winim eni narafala grup. Naoia, yumi stap wokem 90 milian kopi blong Wajtaoa wetem Wekap! evri manis, Wajtaoa i kamaot long 144 lanwis mo Wekap! i kamaot long 87 lanwis. Buk ya Trutok blong Soemaot Rod blong Itenel Laef, we yumi yusum blong mekem Baebol stadi long ol man, i kamaot long 1968, mo oli prentem bitim 107 milian kopi blong hem long 117 lanwis. Buk ya Yu Save Laef Foreva Long Paradaes Long Wol, we oli wokem long 1982, i kamaot long 131 lanwis mo oli wokem 81 milian kopi blong hem. Buk ya Save Blong Lidim Yu Long Laef We i No Save Finis, i kamaot long 1995, mo kam kasem naoia oli prentem finis bitim 85 milian kopi blong hem long 154 lanwis. Buklet ya ?Wanem Samting We God i Wantem Yumi Blong Mekem? we i kamaot long 1996, mo kam kasem naoia yumi seremaot 150 milian kopi blong hem finis long 244 lanwis.
18. ?From wanem yumi kasem gudfala blesing long saed blong spirit nating se ol man oli agensem yumi?
18 Ol gudfala blesing ya long saed blong spirit oli kasem yumi nomata we wol blong Setan i agensem yumi bigwan blong longtaem finis. Hemia i soem se tok blong Aesea 54:17 i tru nomo se: “Ol samting ya blong mekem faet bambae oli no save mekem yufala i karekil. Mo bambae yufala i gat ansa tu blong givim long olgeta we oli gat poen long yufala. Yufala i man blong wok blong mi, mo bambae mi blokemgud yufala, mi mekem yufala i win. Mi mi Hae God, mo hemia tok blong mi.” Ol man blong Jeova oli harem gud tumas blong save se ol tok blong Malakae 3:17 oli stap kamtru fulwan long olgeta. Vas ya i talem se: “Nao hem [Jeova blong ol ami] i talem se, ‘Olgeta ya bambae oli man blong mi, mo long taem ya we bambae mi jajem ol man, bambae mi mekem olgeta oli spesel man blong mi.’ ”
Mekem Wok Blong Jeova Wetem Glad
19. ?Wanem i mekem we ol man blong wok blong Jeova oli defren long ol man we oli no mekem wok blong hem?
19 Moa we taem i pas, moa we i kam klia fulwan se ol man blong wok blong Jeova oli defren olgeta long ol man long wol blong Setan. Malakae 3:18 (NW ) i bin talemaot se: “Bambae yufala i save luk bakegen wanem nao i stap mekem stret man i defren long rabis man, mo wanem nao i stap mekem man we i mekem wok blong God i defren long man we i no bin mekem.” Wan samting we i mekem man blong God i defren long man blong wol, hemia se ol man we oli mekem wok blong Jeova oli glad long wok ya. Wan risen from wanem oli glad hemia se oli gat nambawan hop long fiuja. Oli trastem Jeova fulwan taem hem i talem se: “Bambae mi mi mekem niufala heven mo niufala wol bakegen. Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta. Bambae yufala i glad tumas long ol niufala samting ya we bambae mi mi mekem, mo bambae yufala i harem gud, gogo i no save finis.”—Aesea 65:17, 18; Ol Sam 37:10, 11, 29; Revelesen 21:4, 5.
20. ?From wanem yumi wan grup blong man we i hapi?
20 Yumi bilif long promes blong Jeova se ol gudfala man blong hem bambae oli sef long bigfala dei blong hem mo bambae oli go insaed long niufala wol. (Sefanaea 2:3; Revelesen 7:13, 14) Maet sam long olgeta ya oli ded bifo long taem ya from we oli olfala, oli sik, no oli kasem wan akseden. Be Jeova i promes se bambae hem i mekem olgeta oli laef bakegen blong kasem laef ya we i no save finis samtaem. (Jon 5:28, 29; Taetas 1:2) I tru, yumi evriwan i kasem ol trabol mo traem, be taem yumi stap go from dei blong Jeova, yumi gat plante risen blong stap glad i winim ol man blong wol ya.
[Ol Futnot]
^ Fasin blong lego trufala bilif mo agensem hem.
^ K.T. i minim Kristin Taem.
^ Ol skul we oli giaman se oli Kristin.
^ Bilif ya se laef i stat long wan smol samting mo i stap jenis gogo i kam olgeta laef samting.
?Yu Yu Ansa Olsem Wanem?
• ?Wanem ya “dei blong Jeova”?
• ?Olsem wanem ol skul blong wol oli sem mak long Isrel bifo?
• ?Wanem profet tok we ol man blong Jeova oli mekem i kamtru?
• ?Olsem wanem Jeova i blesem ol man blong hem?
[Kwestin]
[Tok blong pija long pej 21]
Jerusalem blong faswan handred yia i ‘bon olsem faea’
[Tok blong pija long pej 23]
Jeova i givim samting we ol man blong hem oli nidim
[Tok blong pija long pej 24]
Ol man blong Jeova oli rili glad from nambawan hop we oli gat