Jeova i No Laekem Nating Man We i Brekem Promes
Jeova i No Laekem Nating Man We i Brekem Promes
‘Yumi no mas brekem ol promes ya we yumi nomo i mekem long yumi.’—MALAKAE 2:10.
1. ?God i askem wanem long yumi blong bambae yumi save kasem laef we i no save finis?
?YU YU wantem laef olwe? Sipos yu bilif long promes ya we Baebol i tokbaot, ating bambae yu ansa se, ‘Yes mi wantem tumas.’ Be sipos yu wantem we God i glad blong givim laef ya long yu long niufala wol blong hem, yu mas mekem ol samting we hem i wantem. (Prija 12:13; Jon 17:3) ?From we ol man oli gat sin, i stret blong ting se oli naf blong mekem ol samting we God i wantem? Yes, i stret nomo from we Jeova i talem tok ya we i leftemap tingting se: “Mi mi no wantem fasin ya we yufala i stap kilim anamol blong mekem sakrefaes long mi, mi wantem we oltaem, yufala i stap lavem mi. Mi wantem we yufala i save mi long laef blong yufala. Fasin ya i gud tumas long mi, i winim we yufala i stap bonem sakrefaes blong givim presen i kam long mi.” (Hosea 6:6) Taswe, nating se ol man oli stap mestem plante taem, oli naf blong mekem ol samting we God i wantem.
2. ?Olsem wanem plante man Isrel oli brekem promes we oli mekem wetem Jeova?
2 Be, i no olgeta man evriwan we oli wantem mekem ol samting olsem we Jeova i wantem. Hosea i talem se plante man Isrel tu oli no bin wantem mekem olsem. Olsem wan nesen, olgeta ya oli bin agri blong joen long wan kontrak wetem God. Long kontrak ya oli agri blong obei long olgeta loa blong hem. (Eksodas 24:1-8) Be i no longtaem biaen, oli no moa folem ol loa blong hem. Taswe, Jeova i talem se ol man Isrel ya oli “brekem promes” we oli mekem wetem hem. (Hosea 6:7) Hemia sem samting we plante man oli mekem kam kasem tede. Be Jeova i no laekem nating ol man we oli brekem promes blong olgeta, nating sipos oli mekem agensem hem stret no agensem ol man we oli lavem hem mo we oli mekem wok blong hem.
3. ?Wanem samting we bambae yumi lukluk moa long hem long stadi ya?
3 Profet Hosea i talemaot tingting we God i gat long saed blong ol man we oli brekem promes blong olgeta. I gud we yumi kasem sem tingting ya sipos yumi wantem kasem wan laef we i hapi. Be i no profet Hosea nomo we i tokbaot samting ya. Long faswan stadi yumi tokbaot sam haf blong profet tok blong Malakae, we i stap long japta 1 blong buk ya. Naoia bambae yumi luk namba tu japta blong buk ya mo faenemaot moa long saed blong tingting we God i gat long ol man we oli brekem promes blong olgeta. Malakae i tokbaot samting we i hapen long ol man blong God plante yia afta we oli bin aot long kalabus long Babilon. Be namba tu japta ya i save givhan bigwan long yumi tede tu.
Ol Pris We Oli Nidim Fasin Stretem
4. ?Wanem woning we Jeova i givim long ol pris?
4 Japta 2 i stat wetem tok panis we Jeova i talem agensem ol pris blong ol man Jiu from we oli no moa folem ol stretfala rod blong hem. Sipos oli no obei long advaes blong hem mo oli no stretem rod blong olgeta, bambae oli kasem bigfala trabol. Ridim tufala faswan vas ya: “Ol pris. Tok blong mi long yufala i olsem. Yufala i mas ona long mi long olgeta laef blong yufala. Sipos yufala i no harem tok blong mi, bambae mi mekem we trabol i kam kasem yufala. Bambae mi mekem we trabol i kam kasem ol gudgudfala samting we yufala i stap kasem.” Sipos ol pris oli bin tijim ol man long loa blong God mo sipos oli bin folem gud ol loa ya, bambae oli save kasem blesing. Be from we oli ting nating long ol samting we God i wantem, oli mas kasem trabol, no panis nomo. Ol tok ya tu we ol pris oli talem blong blesem ol man, be God bambae i mekem we oli no karem blesing.
5, 6. (a) ?From wanem ol pris nao oli gat fol? (b) ?Olsem wanem Jeova i talemaot kros blong hem long ol pris?
5 ?From wanem ol pris nao oli gat fol? Vas 7 i givim klia ansa se: “Wok blong yufala ol pris, i blong tijim ol man blong oli savegud mi. Mo from we yufala i man blong wok blong mi, i stret nomo blong ol man oli kam long yufala blong lanem fasin blong mi long yufala.” Wan taosen yia bifo long taem ya, God i givim ol loa blong hem long Isrel tru long Moses. Loa ya i talem se ol pris oli gat wok ya blong ‘tijim ol man blong Isrel long ol loa ya we hem i givim long Moses.’ (Levitikas 10:11) Sore tumas be, long ol yia biaen, man we i raetem 2 Kronikel 15:3, i ripotem se: “Ol olfala bubu blong yumi oli stap longtaem we oli no mekem wosip long hem. Olgeta oli no gat pris blong tijim olgeta, mo oli no save ol loa blong God tu.”
6 Long taem blong Malakae, hemia long ol yia fo handred B.K.T., sem samting i stap hapen. Ol pris oli no stap tijim Loa blong God long ol man. Taswe ol pris ya oli gat kaon blong pembak long God. Makem strongfala tok ya we Jeova i talemaot agensem olgeta. Malakae 2:3 i talemaot se: “Bambae mi ravem fes blong yufala long ol doti blong ol anamol ya we yufala i mekem sakrefaes long olgeta. Mo bambae mi tekem yufala, mi sakem yufala i go long ples blong doti.” !Hemia wan strong tok ya! God i bin talem se doti blong ol anamol ya we oli kilim blong mekem sakrefaes, oli mas karem i go afsaed olgeta long ples ya we ol man oli stap long hem, mo oli mas bonem ol doti ya. (Levitikas 16:27) Be naoia Jeova i talem se bambae hem i ravem doti blong ol anamol ya long fes blong olgeta. Hemia i min se hem i no glad nating mo i sakemaot ol sakrefaes ya wetem ol man we oli givim ol sakrefaes ya tu.
7. ?From wanem Jeova i kros wetem ol tija blong Loa?
7 Plante handred yia bifo long taem blong Malakae, Jeova i givim wan wok long ol Livaet. Wok ya hem i blong lukaot long haos tapolen, mo biaen haos prea tu, mo oli mas mekem ol tabu wok. Oli ol tija blong nesen blong Isrel. Sipos oli bin mekem gud wok blong olgeta, hemia i minim laef mo pis blong olgeta mo blong ful nesen. (Namba 3:5-8) Be ol Livaet oli lusum fasin we oli gat fastaem, hemia fasin fraetgud long God. Taswe, Jeova i talem long olgeta se: “Yufala i tanem baksaed finis long stret fasin. Mo ol samting we yufala i stap tijim ol man long hem, i mekem plante man oli gorong. Mo promes ya we mi mekem wetem yufala, yufala i brekem finis . . . yufala i no obei long ol samting we mi mi talem.” (Malakae 2:8, 9) From we ol pris oli no tijim trutok mo oli no soem gudfala eksampol, oli lidim plante man Isrel oli gorong. Taswe, i stret we Jeova i kros long olgeta.
Holem Ol Rul Blong God
8. ?Ol rul blong God oli strong tumas blong ol man oli folem? Eksplenem.
8 I no stret blong ting se God i mas soem sore mo i mas fogivim ol pris ya from we oli sin man nomo mo oli no naf blong holem stret olgeta rul blong God. Tru tumas, ol man oli save holem ol loa blong God, from we Jeova i neva askem samting long olgeta we bambae oli no naf blong mekem. I sua se i gat sam pris long taem ya bifo, we oli bin holem ol rul blong God, mo biaen long olgeta ya i gat wan we yumi save gud se hem i bin mekem olsem, hemia Jisas, namba wan “Hae Pris” ya. (Hibrus 3:1) Long saed blong hem, Baebol i save talem stret se: “[Hem i] stap tijim ol man blong oli folem ol stret fasin nomo. Mo long taem ya, oltaem, [hem] i stap fren gud wetem mi. Fasin blong [hem] i stret gud long fes blong mi, mo oltaem, [hem i] stap givhan long ol narafala man blong oli lego ol rabis fasin blong olgeta.”—Malakae 2:6.
9. ?Long taem blong yumi, hu i gohed strong blong karem trutok i go long ol man?
9 Blong bitim wan handred yia nao, ol brata blong Kraes, we oli gat hop blong laef long heven, oli stap mekem wok blong God olsem ol ‘tabu pris blong God we oli mekem sakrefaes we God i glad blong tekem.’ (1 Pita 2:5) Olgeta ya oli lidim wok blong karem trutok blong Baebol i go long olgeta man. Yu yu bin lanem ol trutok ya we oli stap tijim. ?Olsem wanem? ?Yu yu luksave se oli stap tijim ol man blong folem trutok? Oli givhan long ol man blong tanem baksaed long rong we ol skul oli mekem. From samting ya, plante milian man raonabaot long wol oli lanem trutok blong Baebol mo oli gat hop blong kasem laef we i no save finis. Ale, olgeta ya tu oli gat blesing ya blong tijim loa blong trutok long plante moa milian man.—Jon 10:16; Revelesen 7:9.
From Wanem Yumi Mas Lukaotgud
10. ?From wanem yumi mas lukaotgud?
10 Be, yumi mas lukaotgud. I nogud yumi mestem lesen we i stap long Malakae 2:1-9. ?Yumi wan, yumi lukaotgud we maot blong yumi i no talem eni samting we i rong? Eksampol: ?Famle blong yumi i save trastem evri samting yumi stap talem? ?Ol Kristin brata mo sista blong yumi long kongregesen oli save trastem tok blong yumi? I isi blong lanem wan fasin blong toktok we yu stap talem ol tok we i stret, be rili hem i giaman from we yu tanem toktok blong yu long wei we i trikim man. No taem yumi mekem bisnes, i nogud blong bitim mak long toktok blong yumi no blong haedem sam samting long saed blong bisnes ya. ?Yu ting se Jeova i no save luk samting ya? ?Mo sipos yumi stap mekem samting olsem, hem i save glad long ol tok blong presem hem we oli kamaot long maot blong yumi?
11. ?Hu i nidim moa blong lukaotgud?
11 Ol tok blong Malakae 2:7 oli mas olsem wan woning long olgeta we oli gat wok blong tijim Tok blong God long ol kongregesen tede. Vas ya i talem se oli mas ‘tijim ol man blong oli savegud God, mo i stret nomo blong ol man oli kam long olgeta blong lanem fasin blong God.’ Ol tija ya oli holem wan bigfala wok ya, from we Jemes 3:1 i talem se ‘sipos God i jajem olgeta, bambae hem i save mekem i strong moa long olgeta, i winim fasin we bambae i mekem blong jajem ol narafala man.’ Oli mas tij wetem paoa mo strong bilif, be tijing blong olgeta i mas stanap nomo long Tok blong God, Baebol, mo wanem we ogenaesesen blong Jeova i talem. Long rod ya bambae oli “naf blong tijim ol narafala man.” Taswe oli kasem advaes ya se: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.”—2 Timoti 2:2, 15.
12. ?Ol man we oli gat wok blong tij oli nidim blong lukaot long wanem?
12 Sipos yumi no lukaotgud, bambae yumi stat blong tijim prapa tingting blong yumi no samting we yumi nomo yumi wantem. I isi tumas long man we i trastem hem wan nomo blong stat tijim prapa tingting blong hem, nating se i no laenap wetem ol tijing blong ogenaesesen blong Jeova. Malakae japta 2 i soemaot se i stret blong ting se ol tija blong kongregesen oli holem save blong God i bitim prapa tingting blong olgeta, we i save mekem ol sipsip oli foldaon. Jisas i talem se: “Sipos wan man i mekem wan long ol pikinini ya we oli bilif long mi i foldaon long sin, man ya bambae i kasem bigfala panis. Sipos oli fasem wan bigfala ston long nek blong hem, nao oli draonem hem long medel solwota, hemia i moa gud long hem, i winim panis ya we bambae hem i kasem.”—Matiu 18:6.
Mared Long Wan Man We i No Bilif
13, 14. ?Wanem wan fasin we Malakae i tokbaot se hem i brekem promes wetem God?
13 Stat long vas 10 blong Malakae japta 2, woning agensem fasin blong brekem promes i kam strong moa. Malakae i pulum tingting i go long tu fasin we hem i tokbaot se oli fasin blong brekem promes. Fastaem, makem se taem Malakae i givim advaes blong hem, hem i stat wetem kwestin ya se: “Yumi evriwan i kamaot long wan papa nomo. Mo God we i mekem yumi, hem i wan nomo. ?Sipos i olsem, be from wanem yumi stap brekem ol promes ya we yumi nomo i mekem long yumi? ?Mo from wanem yumi stap lukluk rabis long promes ya we God i mekem wetem ol bubu blong yumi bifo?” Ale, long vas 11 (NW ) hem i gohed i se, taem Isrel i brekem promes blong hem, hem i lukluk rabis long “ples ya we i tabu i blong Jeova hem wan.” ?Wanem samting we oli stap mekem we i nogud tumas? Vas ya i tokbaot wan long ol nogud fasin ya we oli stap mekem: Oli stap “mared long ol woman blong ol narafala kantri we oli stap mekem wosip long ol narafala god.”
14 Yes, sam man Isrel, we oli blong nesen ya we i givim hem wan finis i go long Jeova, oli stap mared wetem ol man no woman we oli no wosip long hem. Ol vas raonabaot oli halpem yumi blong kasem save from wanem sin ya i no wan samting nating nomo. Vas 10 i talem se nesen blong Isrel i kamaot long wan man nomo. Hemia i no minim Jekob (we biaen i kam Isrel) mo i no minim Ebraham no Adam tu. Malakae 1:6 i soem se Jeova nao hem i ‘papa blong olgeta.’ Nesen blong Isrel i joen wetem Jeova, oli haf blong wan kontrak we God i mekem wetem ol bubu blong olgeta bifo. Wan long ol loa blong kontrak ya, hemia: “Bambae yufala i no mas letem ol boe blong yufala oli go mared long ol gel blong olgeta, mo ol boe blong olgeta oli kam mared long ol gel blong yufala.”—Dutronome 7:3.
15. (a) ?Samfala oli ting se i stret blong maredem wan man we i no bilif from wanem risen? (b) ?Jeova i talemaot wanem tingting blong hem long saed blong mared?
15 Sam man tede maet oli gat tingting olsem: ‘Man [no woman] ya we mi laekem hem, hem i gat gudfala fasin. Mi sua se bambae hem i mas joen long trufala wosip.’ Tingting ya i laenap stret wetem woning ya long Baebol we i se: “Hat i save giaman long yumi moa bitim ol narafala samting mo i wantem win.” (Jeremaea 17:9, NW ) Malakae 2:12 (NW ) i talemaot tingting blong God long saed blong olgeta we oli mared wetem man no woman we i no bilif, i se: “Bambae Jeova i kilim i ded evri man ya we oli mekem fasin olsem.” Taswe, ol Kristin oli kasem advaes ya se oli mas mared nomo long wan “man blong Masta.” (1 Korin 7:39) Sipos wan man i stap aninit long Kristin fasin blong laef be biaen i go mared wetem wan we i no bilif olsem hem, i tru se God bambae i no ‘kilim hem i ded’ wantaem. ?Be yet, sipos hemia we man ya i maredem i no lego bilif blong hem mo i no joen long trufala wosip, wanem bambae i hapen long hem taem God i spolem rabis wol ya?—Ol Sam 37:37, 38.
Mekem i No Stret Long Hasban No Waef
16, 17. ?Wanem fasin no stret we samfala oli mekem?
16 Nao Malakae i tokbaot namba tu fasin blong brekem promes: hemia fasin blong mekem i no stret long hasban no waef, antap moa, fasin blong divos from ol samting olbaot nomo. Vas 14 (NW ) long japta 2 i talem se: “Jeova i stap witnes long saed blong yu mo waef we yu tekem long yang taem blong yu. Hem i luk we yu stap mekem i no stret long woman ya, nating we hem i prapa fren blong yu, mo waef we i gat kontrak wetem yu.” Taem ol man Jiu oli mekem i no stret long woman blong olgeta, no oli brekem promes blong olgeta, i olsem we “wota blong ae” i kavremapgud olta blong Jeova. (Malakae 2:13) Ol man ya oli stap askem divos from sam samting we oli nating nomo. Oli lego waef we oli bin tekem taem oli yang yet, from we maet oli wantem mared wetem ol yangfala gel no ol hiten woman. !Mo ol pris we oli gat kruked fasin, oli letem nomo blong oli mekem olsem! Be Malakae 2:16 (NW ) i talem klia se: “Jeova i no laekem nating fasin blong divos.” Hemia nao tok blong Jeova, God blong Isrel.” Biaen, Jisas i soem se i gat wan samting nomo we i save mekem we man i divos long woman blong hem, hemia sipos wan long tufala i slip wetem narafala man no woman. Long taem ya, hemia we i no mekem rong, hem i fri blong mared bakegen wetem wan narafala man no woman.—Matiu 19:9.
17 Tingting gud long ol tok ya blong Malakae, mo luk olsem wanem we oli tajem hat blong yumi mo pulum yumi blong gat kaen fasin. Malakae i tokbaot “prapa fren blong yu, mo waef we i gat kontrak wetem yu.” Ol man ya we Malakae i tokbaot, oli bin jusum woman blong olgeta long nesen blong Isrel, ol woman ya oli wosipim semfala God olsem olgeta. Oli jusum ol woman ya blong oli bes fren blong olgeta, mo bambae oli stap olsem fren blong olgeta long ful laef blong olgeta. Maet ol man mo woman ya, oli mared taem oli yang yet. Taem ol yia oli pas, oli kam olfala, be hemia i no minim se kontrak blong olgeta blong mared i finis nao. Nogat.
18. ?Olsem wanem advaes we Malakae i givim agensem fasin blong brekem loa i stret tede tu?
18 Ol advaes long saed ya oli impoten yet long yumi tede. Sem tumas long olgeta ya we oli ting nating long oda blong God se oli mas mared nomo long Masta. Mo sore tumas long olgeta ya we oli no wokhad blong holem promes blong mared blong olgeta. Olgeta ya oli stap mekem eskius, oli stap folem wan rod we God i no laekem nating taem oli mekem divos we i no laenap wetem Baebol from we oli wantem maredem narafala man no woman. Taem oli mekem olsem, oli stap ‘mekem Jeova i taed gud’ long olgeta. Long taem blong Malakae, ol man we oli no wantem folem ol advaes blong God oli jikim Hem from we oli ting se lukluk blong Jeova long saed ya i no stret gud. Tru ya, oli stap talem se: “?Wehem Hae God ya we oli stap tokbaot hem, se bambae i jajem man long stret fasin?” !Tingting ya i rong we i rong olgeta! I nogud yumi foldaon long trap olsem olgeta ya.—Malakae 2:17.
19. ?Olsem wanem ol hasban mo waef oli save kasem tabu spirit blong God?
19 Be tok blong Malakae i leftemap tingting from we hem i talem se i gat sam hasban we oli no stap brekem promes we oli bin mekem wetem waef blong olgeta. Hem i se olgeta ya oli gat ‘haf blong [tabu] spirit blong God we i stap yet long olgeta.’ (Vas 15, NW ) Yumi hapi tumas we long ogenaesesen blong God tede, i gat fulap man olsemia we oli ‘givim ona long waef blong olgeta.’ (1 Pita 3:7, NW ) Ol man ya oli no kilim waef blong olgeta mo oli no sakem ol rabis tok long olgeta, oli no fosem woman blong olgeta blong slip wetem olgeta long fasin we i no stret, mo oli soem respek long woman blong olgeta from we oli no pleplei wetem ol narafala woman mo oli no lukluk ol rabis pija long saed blong seks. Ogenaesesen blong Jeova i glad tu blong gat plante gudfala Kristin waef we oli stap tru oltaem long God mo ol loa blong hem. Ol man mo ol woman olsem, oli savegud wanem samting we God i no laekem nating, tingting blong olgeta i laenap wetem tingting blong God mo oli folem fasin we i stret. I gud sipos yu yu gohed blong mekem olsem olgeta ya, we yu ‘obei long God olsem hae jif blong yu’ mo kasem ol blesing we tabu spirit i save karem i kam long laef blong yu.—Ol Wok 5:29.
20. ?Wanem taem i stap kam klosap naoia?
20 I no longtaem, bambae Jeova i jajem olgeta man blong wol ya. Evri man wanwan bambae i mas givim ansa long hem folem bilif mo fasin we hem i bin mekem. “Bambae yumi evriwan i mas talemaot olgeta fasin blong yumi long fes blong God.” (Rom 14:12) Taswe wan kwestin we yumi intres long hem naoia, hemia se: ?Hu bambae i sef long dei blong Jeova? Namba tri stadi blong yumi bambae i tokbaot poen ya.
?Yu Save Eksplenem?
• ?From wanem bigfala risen nao, Jeova i tok panisim ol pris blong Isrel?
• ?From wanem i rong blong ting se man i no naf blong mekem ol samting we God i wantem?
• ?From wanem yumi mas lukaot gud long tijing blong yumi tede?
• ?Jeova i tok aot strong agensem wanem tufala fasin?
[Kwestin]
[Tok blong pija long pej 15]
Long taem blong Malakae, Jeova i tok panisim ol pris from we oli no holem ol loa blong hem
[Tok blong pija long pej 16]
Yumi mas meksua se yumi tijim ol rod blong Jeova, mo no leftemap prapa tingting blong yumi wan
[Tok blong pija long pej 18]
Jeova i tok agensem ol man Isrel we oli divosem waef blong olgeta from samting nating nomo blong maredem ol hiten woman
[Tok blong pija long pej 18]
Ol Kristin man mo woman oli tinghae long promes blong mared we oli mekem