Leftemap Jeova Taem Yu Mekem Ol Samting We Hem i Wantem

“Bambae mi stap talem tangkiu long hem blong leftemap hae nem blong hem.”—OL SAM 69:30.

1. (a) ?From wanem i stret we ol man oli leftemap Jeova? (b) ?Olsem wanem yumi talem tangkiu blong leftemap Jeova?

 JEOVA hem i God ya we i Gat Olgeta Paoa, hem i Masta blong Heven mo Wol, mo Man ya we i Wokem Olgeta Samting. From we hem i holem olgeta taetel ya, i stret we yumi leftemap nem blong hem mo ol stamba tingting blong hem. Leftemap Jeova i min se yumi tinghae long hem, yumi presem hem tru long ol tok mo wok blong yumi. Blong mekem samting ya mo “talem tangkiu long hem” yumi mas gat tangkiu from ol samting we hem i stap mekem long yumi naoia mo ol samting we bambae hem i mekem long fiuja. Revelesen 4:11 i soem tingting we yumi mas gat long saed ya. Vas ya i tokbaot ol spirit man long heven, we oli holemstrong long bilif mo we oli stap tokbaot Jeova oli se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” ?Wanem samting we yumi mas mekem blong leftemap Jeova? Yumi mas kasem save long hem mo mekem ol samting we hem i wantem yumi blong mekem. Yumi mas gat sem filing ya we man blong raetem Sam i gat taem hem i talem se: “Yu yu God blong mi, plis yu tijim mi blong mi mekem ol samting we yu yu wantem.”—Ol Sam 143:10.

2. ?Jeova i mekem wanem long ol man we oli leftemap hem mo ol man we oli no leftemap hem?

² Jeova i tinghae long ol man we oli leftemap hem. Taswe hem i stap “givim gudfala pei long ol man we oli stap traehad blong faenem hem.” (Hibrus 11:6, NW ) ?Wanem pei ya? Long wan prea we Jisas i mekem i go long Papa blong hem long heven, hem i se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Yes, olgeta ya we oli “stap talem tangkiu [long Jeova] blong leftemap hae nem blong hem,” bambae “oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) Defren long olgeta ya, “bambae i no gat fiuja long wan rabis man.” (Ol Proveb 24:20, NW ) Mo long ol las dei ya, i impoten tumas we yumi kam slak blong leftemap Jeova from we i no longtaem bambae hem i spolem ol rabis man mo sevem ol stret man. “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:17; Ol Proveb 2:21, 22.

3. ?From wanem yumi mas lesin long ol tok blong buk blong Malakae?

³ Baebol i save soemaot ol samting we Jeova i wantem yumi blong mekem, from we “olgeta tok blong Baebol oli kamaot long God.” (2 Timoti 3:16) Tok blong God i talem fulap stori blong ol man we Jeova i blesem olgeta from we oli leftemap hem, mo i soem tu wanem i hapen long ol man we oli no mekem olsem. Wan long ol stori ya i hapen long Isrel long taem blong profet Malakae. Raonabaot long yia 443 B.K.T., *  taem Nehemaea i distrikejen blong Juda, Malakae i raetem buk ya we i karem nem blong hem. Ol save mo profet tok insaed long buk ya oli pulum intres blong man mo oli gat bigfala paoa. Buk ya i blong “wekemap yumi ya we yumi stap laef tede, we Lasdei blong wol i klosap.” (1 Korin 10:11) Ol tok blong Malakae oli save halpem yumi blong reregud from “bigfala dei blong Jeova we i mekem ol man oli fraet,” taem we Hem i spolem rabis wol ya. Taswe, i gud blong lesin long ol tok blong buk ya.—Malakae 4:5, NW.

4. ?Malakae japta 1 i pulum tingting blong yumi i go long wanem sikis poen?

⁴ Malakae i raetem buk blong hem bitim 2,400 yia bifo finis. ?Weswe hem i save halpem yumi ya, long ol yia 2000, blong mekem yumi rere from bigfala dei blong Jeova we i mekem man i fraet? Faswan japta i pulum tingting blong yumi i go long sikis impoten poen we oli givhan long yumi blong leftemap Jeova mo talem tangkiu long hem. Fasin ya i save mekem we hem i glad long yumi mo yumi save kasem laef we i no save finis: (1) Jeova i lavem ol man blong hem. (2) Yumi mas tinghae long ol samting we oli tabu. (3) Jeova i wantem we yumi givim bes blong yumi long hem. (4) Trufala wosip i no stanap long fasin griri, be i stanap long lav we i mekem man i no tingbaot hem wan nomo. (5) Wok we God i wantem yumi blong mekem i no wan baden blong karem. (6) Yumi wanwan i mas pembak kaon blong yumi long God. Trifala stadi long Wajtaoa ya oli stanap long buk blong Malakae, taswe long faswan stadi ya, bambae yumi lukluk moa long japta 1 blong buk blong Malakae mo tokbaot ol sikis poen ya wanwan.

Jeova i Lavem Ol Man Blong Hem

5, 6. (a) ?From wanem Jeova i lavem Jekob? (b) ?Sipos yumi folem fasin blong Jekob blong holem bilif, bambae yumi sua long wanem?

⁵ Ol faswan vas blong Malakae oli soemaot klia se Jeova i lavem ol man blong hem. Buk ya i stat wetem toktok ya: “Ol tok blong buk ya, Hae God i givim long Profet Malakae, blong hem i go talemaot long ol laen blong Isrel.” Nao, God i talem se: “Oltaem mi mi lavem yufala.” Mo long semfala vas ya, Jeova i givim wan eksampol i se: ‘Mi lavem Jekob.’ Jekob i wan man we i gat bilif long Jeova. Biaen, Jeova i jenisim nem blong Jekob i kam Isrel, mo Jekob i kam papa blong nesen ya blong Isrel. From we Jekob i wan man blong bilif, Jeova i lavem hem. Jeova i lavem olgeta man long nesen blong Isrel, we oli soem sem tingting ya olsem Jekob.—Malakae 1:1, 2.

⁶ Sipos yumi lavem Jeova mo stap tru oltaem long ol man blong hem, bambae yumi harem gud long ol tok ya blong 1 Samuel 12:22, se: “Hae God i mekem wan strong promes finis long yufala, se hem bambae i no save lego yufala. Hem i talem finis se yufala i man blong hem.” Jeova i lavem ol man blong hem mo i blesem olgeta. Wan long ol nambawan blesing ya we bambae hem i givim long olgeta, hemia laef we i no save finis. Taswe yumi ridim se: “Yu mas trastem Hae God, mo yu mas mekem ol fasin we i gud, blong yu save stap long graon ya, nao yu harem gud from we yu yu sef. Yu mas luk long Hae God blong i mekem yu yu glad, nao bambae hem i givim long yu ol samting we yu yu wantem tumas.” (Ol Sam 37:3, 4) Sipos yumi lavem Jeova, i gat wan narafala samting tu we yumi mas mekem. Hemia i laenap wetem namba tu poen we Malakae japta 1 i tokbaot.

Tinghae Long Ol Samting We Oli Tabu

7. ?From wanem Jeova i no laekem nating Esao?

⁷ Taem yumi ridim Malakae 1:2, 3, yumi luk se, afta we Jeova i talem, ‘Mi lavem Jekob moa,’ hem i se, ‘Be Esao, mi no laekem hem nating.’ ?From wanem hem i mekem i defdefren long tufala ya? Jekob i leftemap Jeova, be twin brata blong hem, Esao i no leftemap Jeova. Narafala nem blong Esao, hemia Edom. Malakae 1:4 i kolem kantri blong Edom se, kantri blong ol man blong mekem nogud mo God i tok strong agensem  ol man blong kantri ya. Esao i karem nem ya Edom (we i minim “Red”) afta we hem i salem raet blong hem olsem fasbon i go long Jekob, blong kakae supsup we oli wokem long red bin. Jenesis 25:34 i talem se, “Esao i no tinghevi nating long ol samting ya we hem nomo i gat raet blong mekem from we i fasbon blong papa blong hem.” Aposol Pol i givim woning long ol Kristin brata blong oli lukaot se “i no gat wan long [olgeta] i kam olsem man we i slip olbaot, no i ting nating long ol samting we oli tabu, olsem Esao i mekem, taem hem i wantem tumas blong kakae nao i salem raet blong hem olsem fasbon.”—Hibrus 12:14-16, NW.

8. ?From wanem Pol i talem se fasin blong slip olbaot i sem mak long fasin blong Esao?

⁸ ?From wanem Pol i joenem fasin blong slip olbaot wetem fasin blong Esao? From we fasin blong tingting olsem Esao i save lidim wan man blong no gat tangkiu from ol samting we oli tabu. Tingting olsem i save pulum man ya blong mekem sam bigfala sin, olsem fasin ya blong slip wetem man no woman bifo mared. Taswe, wanwan long yumi i save askem se: ‘?Samtaem mi harem se mi wantem lego gudfala presen we i blong ol Kristin—hemia laef we i no save finis—jes from we mi wantem tumas wan samting we i stap smoltaem nomo olsem red supsup ya? ?Olsem wanem? ?Maet mi no luksave se sloslo mi no moa tinghae long ol samting we oli tabu?’ Esao i no save wet blong fulumap bel blong hem, hemia wan samting we bodi blong hem i wantem tumas. Hem i talem long Jekob se: “!Yu hareap, yu givim red supsup ya i kam blong mi kakae!” (Jenesis 25:30, NW ) Sore tumas, sam man blong God oli mekem sem mak, i olsem we oli talem se: “!Yumitu hareap! I no nid blong wet go kasem taem we yumitu mared.” Oli wantem tumas blong harem gud long saed blong seks, ale oli rere blong sakemaot evri samting from wan plet blong red supsup nomo.

9. ?Olsem wanem blong holemtaet fasin blong ona mo fraetgud long Jeova?

⁹ I nogud yumi gat fasin ya blong ting nating long ol samting we oli tabu. Yumi mas tinghae long fasin blong stap klin go kasem mared, yumi mas tinghae long fasin blong holemstrong long God, mo long ol gudfala samting we yumi gat long saed blong spirit. I nogud yumi mekem olsem Esao, be yumi mas mekem olsem Jekob we i man blong holem bilif. Hem i holemtaet fasin blong ona mo fraetgud long God taem hem i soem se hem i rili tinghae long ol samting we oli tabu. ?Olsem wanem yumi save mekem samting ya? Yumi save mekem olsem sipos yumi traehad blong wokbaot folem ol samting we God i wantem. Samting ya i lidim yumi i go long namba tri poen we i kamaot long Malakae japta 1. ?Wanem ya namba tri poen?

Givim Bes Blong Yumi Long Jeova

10. ?Long wanem wei ol pris oli no stap tinghae long olta blong Jeova?

¹⁰ Ol pris blong Juda we oli wok long haos tempol blong Jerusalem long taem blong Malakae oli no stap givim ol beswan sakrefaes long Jeova. Malakae 1:6-8 i talem se: “Oltaem, pikinini i save ona long papa blong hem, mo man blong wok i save ona gud long masta blong hem. Mi mi papa blong yufala. ?Be from wanem yufala i no save ona long mi? Mo mi mi Masta blong yufala. ?Be from wanem yufala i no save obei long mi? Oltaem yufala i stap lukluk rabis long mi.” Nao ol pris oli askem se: “?Mifala i lukluk rabis long yu olsem wanem?” Jeova i ansa se: “Taem yufala i stap tekem ol kakae we i nogud i kam, blong mekem sakrefaes long mi long olta blong mi.” Ol pris oli askem bakegen se: “?Mifala i no stap tinghevi long yu olsem wanem?” Ale, Jeova i talem long olgeta se: “Mi mi talem stret long yufala. Yufala i no stap tinghevi long mi, long fasin ya we yufala i stap lukluk rabis long olta blong mi.” Ol pris ya oli soem se oli no tinghae long olta blong Jeova evri taem we oli mekem sakrefaes long wan anamol we i sik, mo oli stap tingting se: “I no gat wan samting i nogud.”

11. (a) ?Jeova i talem wanem long saed blong ol sakrefaes ya we hem i no wantem? (b) ?From wanem ol man long nesen blong Isrel oli gat fol tu?

 ¹¹ Jeova i yusum sam eksampol blong mekem man i tingting blong soemaot we i rong blong givim ol sakrefaes olsem, hem i se: “Yufala i traem tekem wan anamol olsem, nao yufala i go givim long haeman blong yufala. ?Yufala i ting se hem bambae i glad long hem?” Nogat. Haeman ya bambae i no save glad nating long wan presen olsem. ?Taswe, olsem wanem long Haefala Masta blong Heven mo Wol? !Hem tu i no save akseptem wan sakrefaes olsem! Be i no ol pris nomo we oli gat fol. I tru se oli no stap soem respek long Jeova taem oli mekem ol sakrefaes ya. Be ol man long nesen blong Isrel, olgeta tu oli gat fol from. Olgeta nao oli stap jusum anamol we i blaen, no we wansaed leg blong hem i nogud, no we i sik, mo olgeta nao oli stap tekem anamol ya i kam long ol pris blong mekem sakrefaes. !Oli sin bigwan agensem God!

12. ?Wanem i halpem yumi blong givim bes blong yumi long Jeova?

¹² Taem yumi givim bes blong yumi long Jeova, yumi soem se yumi rili lavem hem. (Matiu 22:37, 38) Ogenaesesen blong Jeova tede, i defren olgeta long ol pris long taem blong Malakae. Hem i givimaot plante gudfala tijing blong Baebol we i halpem yumi blong mekem ol samting we God i wantem nao yumi save leftemap Jeova mo soem we yumi tangkiu long hem. Malakae japta 1 i givim namba fo poen we i joen long hemia.

Trufala Wosip i Stanap Long Lav, i No Griri Fasin

13. ?Wanem samting we ol pris oli mekem i soem se oli griri tumas?

¹³ Ol pris long taem blong Malakae oli tingbaot olgeta nomo, oli no gat lav, mo oli griri from mane nomo. ?Olsem wanem yumi save samting ya? Malakae 1:10 i talem se: “ ‘?Hu long yufala we bambae i satem ol doa ya? Taem yufala i laetem faea long olta blong mi, i no gat wan long yufala we i wantem mekem wok ya fri nomo. Mi mi no glad nating long yufala, mo mi no glad nating long presen ya we yufala i givim olsem sakrefaes i kam long mi.’ Hemia nao tok blong Jeova blong ol ami.” Yes, ol pris ya oli griri tumas, oli stap askem man blong pem olgeta taem oli mekem wan wok long tempol, nating we wok ya i smol nomo olsem wok blong satem doa mo laetem faea blong olta. !Yumi no sapraes se Jeova i no glad nating long ol sakrefaes we oli mekem!

14. ?From wanem yumi save talem se lav i pusum ol Witnes blong Jeova long wok we oli mekem?

¹⁴ Fasin blong ol pris ya long Jerusalem bifo, we oli griri mo oli tingbaot olgeta nomo, i mekem yumi tingbaot Tok blong God we i talem se, ol man we oli griri bambae oli no save kasem Kingdom blong God. (1 Korin 6:9, 10) Taem yumi tingting gud long fasin blong ol pris ya we oli tingbaot olgeta nomo, i pulum yumi blong tinghae moa long wok blong prij we ol Witnes blong Jeova oli mekem raon long wol. Oli mekem wok ya fri nomo, oli neva askem man blong pem olgeta. Tru ya, yumi no mas “yusum tok blong God olsem rod blong winim mane.” (2 Korin 2:17) Yumi save talem tru nomo, olsem Pol, se: “Taem mi mi stap talemaot gud nius blong God long yufala, [“mi mi glad mo,” NW ] mi no mekem yufala i pem wan samting.” (2 Korin 11:7) Makemgud we Pol i ‘glad blong talemaot gud nius blong God.’ Hemia i laenap wetem namba faef poen we Malakae japta 1 i soemaot long yumi.

Wok Blong God i No Wan Baden

15, 16. (a) ?Wanem tingting blong ol pris long saed blong wok blong givim sakrefaes? (b) ?Olsem wanem ol Witnes blong Jeova oli givim sakrefaes?

¹⁵ Ol pris blong Jerusalem bifo oli no strong long bilif, oli luk ol sakrefaes olsem wan wok we i hevi tumas blong mekem. Wok ya i wan baden. Long Malakae 1:13 yumi makem we God i talem long olgeta se: “Oltaem yufala i stap talem se, ‘Mifala i taed finis long ol samting ya,’ nao yufala i stap spet long fes blong mi.” Ol pris ya oli stap spet, no oli stap tok nogud,  long saed blong ol tabu samting blong God. Yumi mas prea strong se neva yumi kam olsem olgeta ya. Be i gud yumi soemaot sem tingting ya we i stap long tok blong 1 Jon 5:3: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.”

¹⁶ I gud yumi glad blong givim ol sakrefaes long saed blong spirit i go long God, mo neva yumi mas luk olgeta olsem baden we yumi taed blong karem. I gud yumi folem tok ya blong wan profet, we i se: “Yufala evriwan, talem long [Jeova], ‘Plis yu fogivim mastik blong mifala; mo akseptem wanem we i gud, mo from samting ya bambae mifala i givim maot blong mifala olsem ol yangfala buluk we mifala i givim blong mekem sakrefaes.’ ” (Hosea 14:2, NW ) Tok ya “maot blong mifala olsem ol yangfala buluk” i minim ol sakrefaes long saed blong spirit, no ol tok we yumi talem blong presem Jeova mo ol stamba tingting blong hem. Hibrus 13:15 (NW ) i talem se: “Tru long hem [Jisas], oltaem yumi mas mekem wan sakrefaes long God, we i blong presem hem. Sakrefaes ya i olsem frut blong maot blong yumi we i talemaot nem blong hem long ol man.” Yumi glad we ol sakrefaes we yumi mekem long saed blong spirit, oli stanap long lav we yumi gat long God. Yumi mekem ol sakrefaes ya wetem fulhat blong yumi, i no from wan fasin nomo blong wosip we i olsem baden long yumi. Hemia i karem yumi i kam kasem namba sikis poen we yumi save lanem long Malakae japta 1.

Evri Man i Mas Pembak Kaon Blong Hem Long God

17, 18. (a) ?From wanem Jeova i givim panis long man we ‘i ravem hem’? (b) ?Ol man we oli ravem God oli no tingbaot wanem?

¹⁷ Ol man we oli laef long taem blong Malakae oli gat kaon blong pembak from olgeta samting we oli mekem. Hemia i sem mak long yumi. (Rom 14:12; Galesia 6:5) From samting ya, Malakae 1:14 i talem se: “Man we i gat wan gudfala sipsip we i promes finis blong givim long mi, be hem i girap, i ravem mi, i tekem narawan we i nogud blong mekem sakrefaes long mi, man olsem bambae trabol i mas kasem hem from.” Wan man blong lukaot sipsip i no gat wan sipsip nomo, nogat. Hem i gat fulap sipsip we hem i save jusum. Taem hem i wantem jusum wan anamol blong givim olsem sakrefaes hem i no nid blong jusum wan we i blaen, we wansaed leg blong hem i nogud, no we i sik. Be nao, sipos hem i jusum wan anamol olsem, hem i soem se hem i no tinghae long plan we Jeova i putumap long saed blong sakrefaes. Tru ya, i no hadwok tumas long wan man we i gat fulap sipsip blong faenem wan we i gud.

¹⁸ Taswe i stret nomo we Jeova i givim panis long man we i traem ravem hem mo karem wan anamol we i blaen, we wansaed bodi i nogud, no we i sik, i kam long pris blong givim olsem sakrefaes—antap moa we man ya i mas fosem anamol olsem blong kam kasem tempol. Mo antap long hemia, i luk olsem se i no gat wan pris we i talemaot long ol man se Loa blong God i agensem fasin blong givim anamol we wan samting i rong long bodi blong hem. (Levitikas 22:17-20) Ol man we oli tingting stret, oli save finis se sipos oli trikim wan haeman blong i karem wan anamol we i nogud, bambae oli save kasem trabol. Taswe long saed blong ol sakrefaes ya, ol man oli mas tingbaot se oli stap dil stret wetem Haefala Masta blong Heven mo Wol, hemia Jeova, we hem i hae we hae moa i winim eni haeman blong wol ya. Malakae 1:14 i soem samting ya i se: “Mi mi Hae God, mi gat olgeta paoa, mo mi talem olsem from we mi nomo mi Hae King we olgeta man long wol ya oli stap ona gud long mi.”

19. ?Wanem samting we yumi mas wantem tumas blong luk, mo yumi mas mekem wanem naoia?

¹⁹ Yumi ol man blong wok blong God, yumi wantem stap tru long hem oltaem. Yumi wantem tumas blong luk dei ya we olgeta man blong wol oli ona long Bigfala King ya Jeova. Long taem ya, “bambae wol ya i fulap tru long save blong Jeova olsem we ol wota oli kavremap solwota.” (Aesea 11:9, NW ) Be bifo long taem ya, yumi mas traehad blong mekem ol samting we Jeova i wantem mo folem wanem we Sam ya i talem, we i se: “Bambae mi stap talem tangkiu long hem blong leftemap hae nem blong hem.” (Ol Sam 69:30) Blong kasem mak ya, Malakae i givim sam moa advaes bakegen we oli save givhan long yumi. Long nekis tufala stadi bambae yumi tingting gud long sam narafala haf blong buk blong Malakae.

[Futnot]

?Yu Yu Rimemba?

• ?From wanem i stret blong leftemap Jeova?

• ?From wanem Jeova i no glad long sakrefaes we ol pris oli givim long taem blong Malakae?

• ?Olsem wanem yumi save givim sakrefaes blong presem Jeova?

• ?Trufala wosip i stanap long wanem?

[Kwestin]

[Tok blong pija long pej 9]

Profet tok blong Malakae i laenap long taem blong yumi

[Tok blong pija long pej 10]

Esao i no tinghae long ol samting we oli tabu

[Tok blong pija long pej 11]

Ol pris mo ol man oli givim sakrefaes we God i no agri long hem

[Tok blong pija long pej 12]

Long fulwol, ol Witnes blong Jeova oli wok fri nomo blong presem God, hemia i olsem wan sakrefaes