Wan Pikinini Boe We i Halpem Papa Blong Hem

JAMES blong Inglan, i gat bitim 30 yia. Hem i slo bigwan long tingting blong hem. Mo antap long samting ya hem i kasem wan sik long tingting we i mekem se hem i no save joengud wetem ol narafala. Be, blong plante yia hem i folem mama mo sista blong hem taem oli go long ol miting blong ol Witnes blong Jeova. Papa blong hem i neva intres long bilif blong olgeta. Wan naet long wan miting, oli lukluk wan pleplei we i soemaot olsem wanem blong singaot wan fren i kam long Memoriol blong ded blong Kraes. Taem oli kambak long haos afta long miting ya, kwiktaem nomo James i go long rum blong hem. From we mama i wari long hem, hem i biaen long hem, mo i faenem we James i stap lukluk long ol olfala Wajtaoa mo Wekap! James i jusum wan we i gat invitesen blong Memoriol i stap long laswan pej blong hem, nao hem i spid i go luk papa blong hem. Hem i soem pija fastaem mo biaen hem i poen i go long papa blong hem mo i talem se “!Yu!” Mama mo papa, tufala i lukluk tufala from we tufala i sapraes tumas. Tufala i kasem save wantaem nomo se James i singaot papa blong kam long Memoriol. Papa blong hem i talem se maet bambae hem i kam.

Long naet blong Memoriol, James i go long kabod blong papa, i jusum wan traoses, mo i karem i kam long papa blong hem. Hem i mekem saen wetem han blong soem se papa i mas werem traoses ya. Papa i ansa se bambae hem i no go long miting ya. Ale, James mo mama blong hem, tufala nomo i aot i go long Haos Kingdom.

Be, sam taem biaen, James i mekem hadtaem long mama blong hem taem mama i rerem hem blong go long ol miting blong kongregesen. Hem i wantem stap long haos nomo wetem papa blong hem. Wan Sande moning bakegen, James i no wantem we mama blong hem i rerem hem blong go long miting. Be mama i sapraes tumas taem papa i askem long hem se: “?James, sipos mi mi go long miting tede, bambae yu tu yu go?” James i glad tumas. Hem i putum han blong hem i goraon long papa blong hem mo i talem se “!Yes!” mo trifala tugeta i go long Haos Kingdom.

I stat long dei ya, papa blong James i gohed blong joen long ol miting long Sande. I no longtaem biaen hem i talemaot se sipos hem i wantem gohed hem i mas joen long ol narafala miting tu. (Hibrus 10:24, 25) Hemia nao samting we hem i mekem. Tu manis biaen hem i stat blong stadi Baebol. Hem i gohed kwiktaem, i mekem ol jenis long laef blong hem, mo i no longtaem biaen hem i joen long wok blong talemaot Kingdom. Wan yia afta we hem i stat blong stadi, hem i givim laef blong hem i go long Jeova, mo i soemaot samting ya taem hem i baptaes long wota. Naoia hem i stap mekem wok long kongregesen blong hem, olsem man blong givhan. Yes, naoia famle ya i stap joen tugeta long wok blong Jeova.