?Yu Yu Wokemaot Praes We Yu Mas Pem?

JISAS KRAES i givim hop long ol disaepol blong hem blong laef foreva. Be, hem i pusum olgeta tu blong wokemaot praes we bambae oli mas pem blong kam wan Kristin. Hem i makem poen ya long wan pijatok, taem hem i askem long olgeta se: “?Hu long yufala we i wantem wokem wan bigfala haos we i hae, be i no sidaon fastaem blong wokemaot praes blong olgeta samting blong hem, blong luk se mane blong hem bambae i naf no i no naf?” (Luk 14:28) ?Wanem ya praes we Jisas i tokbaot se oli mas wokemaot?

Olgeta Kristin evriwan oli fesem traem—sam long ol traem ya oli strong tumas. (Ol Sam 34:19; Matiu 10:36) Taswe, long saed blong spirit mo long tingting yumi mas rere long ol traem. Long rod ya, bambae yumi no sapraes tumas taem yumi kasem fasin agens no sam narafala problem. Yumi wokemaot finis se ol traem ya oli olsem praes we yumi mas pem from we yumi kam ol disaepol blong Kraes. Yumi save se pei we bambae yumi kasem—hemia blong kam fri long sin mo ded—i bigwan moa bitim eni narafala samting we wol blong naoia i save givim long yumi. Yes, sipos yumi gohed blong mekem wok blong God, i no gat wan samting we God i letem blong i kasem yumi—olsem ded—we bambae i save spolem yumi blong olwe.—2 Korin 4:16-18; Filipae 3:8.

?Olsem wanem blong mekem bilif blong yumi i kam strong? Evri taem we yumi mekem wan disisen we i stret, yumi stanap strong long ol Kristin rul, mo yumi mekem samting we i laenap wetem wil blong God, bilif blong yumi i kam strong moa. Hemia i tru moa sipos long taem ya wan samting i traem yumi blong agensem rul blong God. Mo tu, bilif blong yumi i kam strong moa, taem Jeova i blesem yumi from we yumi stap tru long hem. Sipos yumi mekem olsem, yumi folem eksampol blong Jisas, ol faswan disaepol blong hem, mo olgeta man mo woman blong bilif long ol yia we oli pas, we oli “wokemaot praes” we oli mas pem blong mekem wok blong God.—Mak 1:16-20; Hibrus 11:4, 7, 17, 24, 25, 32-38.