?God Hem i Hu?

“BUK ya, The Encyclopedia Americana, i talem se: “Tok ya God, hem i nem we oli givim long Hemia we i bigfala stamba mo paoa blong heven mo wol mo we wosip blong ol man i go long Hem.” Wan diksonari i eksplenem tok ya “God” se “Hemia we i hae olgeta mo i bigfala moa.” ?Wanem fasin blong Man ya we i mekem yumi sapraes?

?Olsem wanem? ?God hem i wan paoa nomo no hem i man we i rili stap? ?Hem i gat wan nem? ?Hem i wan god we i gat tri man long hem, wan triniti, olsem plante man oli bilif? ?Bambae yumi kasem save long God olsem wanem? Baebol i givim trufala ansa long ol kwestin ya, we i save mekem yumi glad. Hem i leftemap tingting blong yumi blong lukaot God, i se: “God ya i no stap longwe long yumi nating.”—Ol Wok 17:27.

?Wan Paoa Nomo No Wan Spirit Man?

Plante man we oli bilif long God oli tingbaot hem olsem wan paoa be i no olsem wan man. Olsem, long samfala kastom, ol man oli bilif se i gat ol defdefren god oli stap insaed long ol samting raonabaot long yumi. Sam narafala oli luk ol pruf we ol sayentis oli faenemaot long saed blong heven mo wol mo ol laef samting long wol ya, nao oli talem se i mas gat Wan Samting we i mekem se olgeta laef samting ya i stap. Be oli no sua se Samting ya hem i wan man.

Be, taem yumi luk ol samting we oli stap raon long yumi we oli wok long wan fasin we i had, hemia i soemaot se Samting ya i gat bigfala save. Blong gat save i nidim wan bren. Bigfala bren we i mekem plan blong olgeta samting we i stap, hem i blong God. Yes, God i gat wan bodi, i no wan bodi blong man olsem yumi, be wan spirit bodi. Baebol i talem se: “I gat bodi we i blong laef long wol ya, mo long sem fasin, i gat bodi we i blong laef wetem God.” (1 Korin 15:44) Baebol i tok klia blong eksplenem se God i olsem wanem, i se: “God, hem i Spirit.” (Jon 4:24) Wan spirit man i gat laef we i defren olgeta long hemia blong yumi, mo ae blong yumi i no naf blong luk hem. (Jon 1:18) I gat ol narafala spirit man tu. Olgeta ya oli ol enjel—“ol pikinini blong tru God.”—Job 1:6, NW; 2:1.

From we God i wan man we i stap olwe mo hem i gat spirit bodi, i mas gat wan ples we hem i stap long hem. Baebol i tokbaot ples blong ol spirit man mo i talem se heven i ‘hom blong God.’ (1 King 8:43) Mo tu, Pol, we i man blong raetem Baebol, i talem se: ‘Kraes i go insaed long heven stret, mo naoia hem i stap stanap long fes blong God blong toktok long saed blong yumi.’—Hibrus 9:24.

 Long Baebol, tok ya “spirit” i gat narafala mining tu. Man blong raetem ol Sam i prea long God i se: “Taem yu givim [“spirit,” NW ] blong yu long olgeta, yu mekem olgeta oli laef.” (Ol Sam 104:30) Spirit ya i no God hem wan be hem i wan paoa we God i stap sanem, no i stap yusum, blong mekem eni samting we Hem i wantem. God i yusum spirit ya blong wokem heven, wol, mo olgeta laef samting. (Jenesis 1:2; Ol Sam 33:6) Baebol i singaot spirit blong hem se, tabu spirit. God i yusum tabu spirit blong hem blong pusum ol man we oli raetem Baebol. (2 Pita 1:20, 21) Taswe, tabu spirit hem i paoa blong God we yumi no save luk, we God i yusum blong mekem ol stamba tingting blong hem oli kamtru.

God i Gat Wan Nem

Man blong raetem Baebol, Agur, i askem se: “?I gat man finis i holemtaet win long han blong hem? ?I gat man finis we i karem wota long kaliko? ?I gat man finis we i makem ol ples we wol i go finis long hem? Sipos yu save we i gat man olsem i stap, i gud yu talemaot nem blong hem long mi, wetem nem blong pikinini blong hem, blong mi mi save.” (Ol Proveb 30:4) Blong talem stret, Agur i stap askem se, ‘?Yu yu save nem no famle blong man we i wokem olgeta samting ya?’ God nomo i naf blong bos long ol paoa raonabaot long yumi, olsem win, faea, mo ol narafala samting olsem. Nating se ol samting raonabaot long yumi we God i wokem oli soemaot se God i stap, be oli no talemaot wanem nem blong Hem. Sipos God hem wan i no talemaot nem blong hem long yumi, bambae yumi neva save long nem ya. Be Hem i talemaot. Man ya we i Wokem olgeta samting i talem se: “Mi mi Jeova. Hemia nao nem blong mi.”—Aesea 42:8, NW.

Long hibru haf blong Baebol, nem blong God, Jeova, i stap klosap 7,000 taem. Jisas Kraes i mekem ol narafala man oli save long nem ya, mo hem i presem nem ya long fored blong olgeta. (Jon 17:6, 26) Yumi faenem nem ya long laswan buk blong Baebol. Hem i haf blong tok ya “Hallelujah,” we i minim “presem Jah.” Mo “Jah” i sotfala nem blong “Jeova.” (Revelesen 19:1-6, futnot) Nating se i olsem, plante Baebol blong tede oli no yusum nem ya. Plante oli yusum tok ya “MASTA” no “GOD,” we oli raetem long bigbigfala leta blong makem se hem i defren long “Masta” mo “God” we oli yusum blong singaot enikaen man nomo. Sam man blong stadi long bisnes ya oli talem se maet ol man bifo oli bin talem nem blong God se Yahweh.

 ?From wanem ol man oli gat plante defdefren tingting long nem blong Man ya we i hae moa long heven mo wol? Problem ya i stat plante handred yia bifo, taem ol man Jiu oli stop blong talem nem blong God from sam giaman bilif we i mekem olgeta oli fraet blong yusum. Biaen, taem oli ridim Baebol mo oli luk nem blong God, oli yusum tok ya “Haefala Masta.” From we lanwis Hibru we oli raetem olfala Baebol long hem i no gat ol leta a, e, i, o, u long hem, yumi no save stret se Moses, Deved, mo ol narafala man long taem bifo oli talem nem blong God olsem wanem. Be, blong plante handred yia finis, long Inglis oli talem nem blong God se, Jehovah. Tede, nem ya i stap long plante lanwis, mo fulap man oli save long hem.—Eksodas 6:3; Aesea 26:4, King James Version.

Nating se yumi no save stret rod blong talem nem blong God long lanwis Hibru, mining blong hem i no wan tok haed long yumi. Nem blong hem i minim se “Hem i Mekem i Kamaot.” Nem ya i soemaot se Jeova God i Bigfala Man we i Mekem ol Stamba Tingting Blong Hem oli Kamtru. Oltaem hem i mekem ol stamba tingting mo promes blong hem oli kamtru. Trufala God nomo i gat paoa blong mekem olsem, taswe hem nomo i gat raet blong karem nem ya.—Aesea 55:11.

I sua se nem ya Jeova i stap blong soemaot se God ya we i Hae olgeta i defren long ol narafala god. From samting ya nao nem ya i kamaot plante taem long Baebol. Nating se plante Baebol oli no yusum nem blong God, Ol Sam 83:18 i talem klia se: “Yu nomo yu [“Jeova,” NW ], yu nao yu hae king blong olgeta ples long wol.” Taem Jisas Kraes i stap prij long wol, hem i tijim ol man we oli biaen long hem i se: “Taem yufala i prea bambae yufala i prea olsem. ‘Papa blong mifala. Yu yu stap long heven. Nem blong yu i tabu.’ ” (Matiu 6:9) Taswe, yumi mas yusum nem blong God taem yumi prea, taem yumi tokbaot hem, mo taem yumi presem hem long fored blong ol narafala.

?Jisas Hem i God?

Jeova God hem wan i soemaot klia se Pikinini blong hem i hu. Matiu i talem se taem Jisas i baptaes, “God i tok i talem se, ‘Hemia pikinini blong mi, we mi lavem hem tumas. Mi mi glad tumas long hem.’ ” (Matiu 3:16, 17) Jisas Kraes i Pikinini blong God.

Be, samfala man blong skul oli talem yet se Jisas i God. Sam narafala oli talem se God i wan Triniti. Folem tijing ya, “Papa hem i God, Pikinini hem i God, mo Tabu Spirit hem i God. Oli no tri God, be wan nomo.” Oli talem se trifala “oli no save lus samtaem mo oli sem mak.” (The Catholic Encyclopedia) ?Ol tingting ya oli stret?

Baebol i talem long saed blong Jeova se: “Yu yu God we yu stap we yu stap, mo bambae yu save stap oltaem, gogo i no save finis.” (Ol Sam 90:2) Hem i “King we rul blong hem i stap oltaem nomo, gogo i no save finis”—we hem i no gat stat no en blong hem. (1 Timoti 1:17) Be Jisas hem i “stamba blong olgeta samting we God i mekem.” “Hem i faswan long olgeta samting we God i wokem.” (Kolosi 1:13-15; Revelesen 3:14, NW ) Jisas i singaot God se Papa blong hem. Hem i se: “[Papa] i hae moa long mi.” (Jon 14:28) Jisas i eksplenem tu se i gat sam samting we hem mo ol enjel oli no save, be God nomo i save. (Mak 13:32) Antap moa, Jisas i prea long Papa blong hem i se: “Yu no mekem olsem we mi mi wantem, yu mekem olsem we yu nomo yu wantem.” (Luk 22:42) ?Sipos hem i no prea long wan Man we i hae moa long hem wan, hem i prea long hu? Mo God nao i mekem Jisas i girap bakegen long ded, i no Jisas hem wan.—Ol Wok 2:32.

Baebol i soemaot se Jeova i God ya we i Antap olgeta, mo Jisas hem i Pikinini blong hem. Bifo we Jisas i kam long wol, no taem hem i stap long wol, hem mo Papa blong hem tufala i no sem mak. Mo taem Jisas i girap bakegen long ded mo i go long heven, hem i no kam sem mak long Papa blong hem. (1 Korin 11:3; 15:28) Olsem yumi luk finis, tabu spirit we samfala oli talem se hem i namba tri man blong Triniti, hem i no wan man. Defren olgeta, hem i wan paoa we God i yusum blong mekem eni samting we hem i wantem i kamtru. Taswe Triniti i no wan tijing blong Baebol. * Baebol i talem se: “[Jeova] i God blong yumi, mo hem wan nomo i God.”—Dutronome 6:4.

 Kasem Save Gud Long God

Blong yumi lavem God mo givim wosip we hem nomo i mas kasem, yumi nidim blong save gud hem. ?Olsem wanem yumi save kasem save gud long God? Baebol i talem se: “I stat long taem ya we hem i mekem wol ya fastaem, i kam kasem tede, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem.” (Rom 1:20) Wan rod blong save gud God i blong lukluk mo tingting gud long ol samting we hem i bin wokem, mo blong gat tangkiu from.

Be ol samting we God i wokem oli no talemaot olgeta samting we yumi nidim blong save long saed blong God. Olsem, blong kasem save se hem i wan trufala spirit Man we i gat wan nem, yumi nidim blong lukluk insaed long Baebol. Fasin blong stadi long Baebol i beswan rod blong kasem save moa long God. Long Baebol, Jeova i talem plante samting long yumi blong soemaot se hem i wanem kaen God. Hem i soemaot tu ol stamba tingting blong hem mo i tijim yumi long ol rod blong hem. (Amos 3:7; 2 Timoti 3:16, 17) !Yumi glad tumas we God i wantem se yumi “save trutok blong hem,” olsem nao yumi save harem gud long ol help we hem i givim wetem lav! (1 Timoti 2:4) Taswe yumi mas traehad blong lanem fulap samting long saed blong Jeova.

[Futnot]

[Tok blong pija long pej 5]

God i yusum tabu spirit blong hem blong wokem wol mo blong pusum ol man blong raetem Baebol

[Tok blong pija long pej 5]

Wan voes i kamaot long heven i se: “Hemia Pikinini blong mi”

[Tok blong pija long pej 7]

Jisas i prea long God—Man ya we i hae moa long hem

[Tok blong pija long pej 7]

Jisas i mekem ol narafala oli save long nem blong God

[Tok blong pija long pej 7]

Yumi save kasem save moa long God