Kasem Blesing From Lav Blong Jeova We i Kaengud
Kasem Blesing From Lav Blong Jeova We i Kaengud
“?I gat wan long yufala we i waes? Bambae hem i . . . tingbaot ol wok blong Jeova we oli soemaot lav blong hem we i kaengud.”—OL SAM 107:43, NW.
1. ?Wetaem Hibru tok ya we oli tanem i kam ‘lav we i kaengud’ i kamaot long Baebol fastaem, mo wanem ol kwestin we bambae yumi tokbaot long fasin ya?
SAMWE long 4,000 yia bifo, Lot we i pikinini blong brata blong Ebraham, i talem long Jeova se: “Yu soemaot bigfala lav blong yu we i kaengud tumas.” (Jenesis 19:19, NW ) Hemia fastaem we Hibru tok ya we oli tanem i kam ‘lav we i kaengud’ long vas ya, i kamaot long Baebol. Jekob, Nomi, Deved, mo sam narafala man blong God tu, oli tokbaot fasin ya blong Jeova. (Jenesis 32:10; Rut 1:8; 2 Samuel 2:6) Yes, long ol faswan hanraet blong Hibru haf blong Baebol, Hibru tok ya i kamaot 250 taem. ?Be fasin lav we i kaengud i olsem wanem? ?Long ol taem bifo, Jeova i soemaot fasin ya long hu? ?Mo olsem wanem yumi tede i kasem blesing from fasin ya?
2. ?From wanem i no isi blong talem mining blong Hibru tok ya we oli tanem i kam ‘lav we i kaengud,’ mo wanem narafala wei blong tanem tok ya?
2 Long Baebol, tok ya ‘lav we i kaengud’ i kamaot long wan Hibru tok we i gat dip mining. Plante lanwis oli no gat wan tok we i stret blong talem mo karem ful mining blong Hibru tok ya. Taswe, ol tok olsem “lav,” “kaen tumas,” mo “fasin blong stap tru” oli no kasem fulwan mining blong tok ya. Be, buk ya Theological Wordbook of the Old Testament i makem se, tok ya ‘lav we i kaengud’ i “laenap moa wetem fulwan mining blong [Hibru] tok ya.” Wan narafala tok we Baebol ya New World Translation of the Holy Scriptures—With References i yusum blong tanem Hibru tok ya ‘lav we i kaengud’ hemia se “lav we i stap tru oltaem.”—Eksodas 15:13; Ol Sam 5:7; futnot.
Defren Long Fasin Lav Mo Fasin Blong Stap Tru
3. ?Olsem wanem Hibru tok ya we oli tanem i kam lav we i kaengud, i defren long lav?
3 Lav we i kaengud, no lav we i stap tru oltaem, i klosap sem mak long fasin lav mo fasin blong stap tru. Be, i gat sam impoten samting we i mekem se ol fasin ya oli no sem mak olgeta. Tingbaot olsem wanem lav we i kaengud i defren long fasin lav. Long sam lanwis yumi save talem se man i lavem ol ting mo ol samting we hem i bilif long hem. Baebol i tokbaot man we i “lavem waen mo oel” mo we i “lavem fasin waes.” (Ol Proveb 21:17, NW; 29:3, NW ) Be yumi no save soemaot lav we i kaengud long ol samting we yumi bilif long hem no olting we oli no gat laef. Yumi soemaot fasin ya long ol man. Eksampol, Eksodas 20:6 (NW ) i tokbaot ol man nomo se Jeova i stap “soemaot fasin lav we i kaengud long olgeta mo long ol pikinini blong olgeta, gogo wan taosen laen blong ol pikinini we i kamaot biaen long olgeta.”
4. ?Olsem wanem Hibru tok we oli tanem i kam lav we i kaengud i defren long lav we i stap tru oltaem?
4 Mo tu, Hibru tok we oli tanem i kam ‘lav we i kaengud’ i karem wan mining we i bigwan moa long “fasin blong stap tru oltaem.” Long sam lanwis, oli yusum “fasin blong stap tru oltaem” blong tokbaot wan wokman we i mas stap daon long hemia we i bos long hem. Be wan man blong mekem dip stadi i makem se long Baebol, fasin lav we i kaengud “oli yusum moa long saed blong man we i bos, se hem nao i stap tru long man we i no gat paoa, we i gat nid mo we i daon long hem.” Taswe King Deved i save askem long Jeova se: “Plis yu lukluk i kam long mi, yu kaen long mi. Fasin blong yu, oltaem yu yu lavem man tumas, [“soemaot lav we i kaengud,” NW ] plis yu sevem mi.” (Ol Sam 31:16) Taem Deved i trabol, hem i askem Jeova, we i gat bigfala paoa, blong soemaot lav we i kaengud long hem, no lav we i stap tru oltaem. From we man we i pua no we i trabol, i no save bos long man we i gat paoa, hem i no save fosem man ya blong soemaot fasin lav we i kaengud long hem. I min se man ya we i gat paoa bambae i soemaot fasin ya from we hem wan i wantem.
5. (a) ?Baebol i makem wanem long saed blong fasin blong God hemia lav we i kaengud? (b) ?Bambae yumi tokbaot wanem tufala rod we Jeova i soemaot fasin ya?
5 Wan man blong raetem Ol Sam i askem se: “Bambae hem i. . . tingbaot ol wok blong Jeova we oli soemaot lav blong hem we i kaengud.” (Ol Sam 107:43, NW ) Lav blong Jeova we i kaengud i save mekem ol man oli fri mo i save sevem olgeta. (Ol Sam 6:4; 119:88, 159) Fasin ya i save protektem ol man mo karemaot trabol long olgeta. (Ol Sam 31:16, 21; 40:11; 143:12) From fasin ya, God i save tekemaot sin blong ol man. (Ol Sam 25:7) Long sam stori blong Baebol mo sam narafala vas tu bambae yumi luk olsem wanem Jeova i soemaot fasin lav we i kaengud (1) long sam spesel wok we hem i mekem mo (2) long ol man blong hem we oli holem bilif oltaem.
Kam Fri—Wan Pruf Blong Lav We i Kaengud
6, 7. (a) ?Olsem wanem Jeova i soemaot lav we i kaengud long taem blong Lot? (b) ?Wetaem Lot i tokbaot fasin lav blong Jeova we i kaengud?
6 Beswan rod blong kasem save long fasin lav blong Jeova we i kaengud, hemia blong stadi long ol stori long Baebol we oli tokbaot fasin ya. Long Jenesis 14:1-16, yumi faenem we ol enemi soldia oli tekem Lot, pikinini blong brata blong Ebraham, nao oli karem hem i go. Be biaen, Ebraham i sevem Lot. Biaen, laef blong Lot i stap long denja bakegen, taem Jeova i mekem disisen blong spolem rabis taon blong Sodom, hemia taon we Lot mo famle blong hem oli stap long hem.—Jenesis 18:20-22; 19:12, 13.
7 Jes bifo we Sodom i lus, tu enjel blong Jeova tufala i lidim Lot mo famle blong hem oli aot long taon ya. Long taem ya nao, Lot i talem se: “Mi man blong wok blong yu, mo yu yu mekem i gud tumas long mi, yu soemaot bigfala lav blong yu we i kaengud tumas, from samting ya nao, mi mi no lusum laef blong mi.” (Jenesis 19:16, 19, NW ) Lot i talem samting ya from we hem i luksave se Jeova i soemaot nambawan fasin lav we i kaengud, taem hem i sevem hem. Yes, long taem ya, God i soemaot lav we i kaengud, taem hem i mekem Lot i fri mo i sevem hem.—2 Pita 2:7.
Jeova i Soemaot Lav We i Kaengud Mo i Lidim Man
8, 9. (a) ?Ebraham i sanem man blong wok blong hem blong mekem wanem? (b) ?From wanem man ya i prea blong God i soemaot lav we i kaengud, mo wanem i hapen taem hem i stap prea?
8 Long Jenesis japta 24, yumi save ridim wan narafala stori we i soemaot lav blong God we i kaengud, no lav we i stap tru oltaem. Long stori ya, Ebraham i sanem man blong wok blong hem i go long kantri we ol famle blong Ebraham oli stap long hem, blong lukaot wan waef blong pikinini blong hem Aesak. (Vas 2-4) Samting we Ebraham i askem long man blong hem i no isi nating, be hem i promes long man ya se God bambae i sanem enjel blong hem i go fastaem. (Vas 7) Afta sam taem, man ya i kamtru long wan wel afsaed long “taon ya we Naho i stap long hem” (maet Haran no wan ples klosap). Hem i kam stret long taem ya we ol woman oli kam long wel ya blong kasem wota. (Vas 10, 11) Taem hem i luk ol woman ya oli stap wokbaot i kam, hem i save se hemia nao stret taem we hem i mas mekem wok blong hem. ?Be olsem wanem hem i save weswan gel nao hem i mas jusumaot?
9 Man blong wok blong Ebraham i luksave se hem i nidim help blong God, taswe hem i prea se: “Hae God, yu yu God blong masta blong mi. Plis yu mekem wok ya blong mi i go gud tede. Plis yu soemaot we yu yu lavem masta blong mi [no, “soemaot lav we i kaengud long masta blong mi,” NW ].” (Vas 12) ?Olsem wanem Jeova i soemaot lav we i kaengud? Man blong wok i askem wan saen blong soemaot yangfala gel ya we God i jusumaot hem. (Vas 13, 14) Wan long ol woman ya i mekem stret folem wanem we man ya i askem Jeova long prea. !I olsem we gel ya i bin harem prea blong hem! (Vas 15-20) Man blong wok ya i sapraes tumas, hem i “stap kwaet, i lukluk gel ya.” Be, i gat sam samting we hem i mas faenemaot fastaem. ?Naesfala woman ya i wan famle blong Ebraham? ?Mo hem i no mared yet? Ale man ya i stap kwaet “i stap tingbaot prea ya blong hem, se Hae God i stap mekem i kamtru, no nogat.”—Vas 16, 21.
10. ?From wanem man blong wok blong Ebraham i luksave se Jeova i soemaot lav we i kaengud long masta blong hem?
10 Smoltaem biaen, yangfala woman ya i talemaot se “nem blong papa blong mi Betuel, we i pikinini blong Naho [brata blong Ebraham] mo Milka.” (Jenesis 11:26; 24:24) Stret long taem ya man ya i luksave se Jeova i ansa long prea blong hem. Hem i haremgud tumas, i nildaon mo i talem se: “Hae God, yu yu God blong masta blong mi. Mi mi presem nem blong yu. Yu yu stap holem promes ya yet we yu mekem long hem [no, “yu yu no lego fasin lav blong yu we i kaengud,” NW ]. Yu tekem mi mi kam stret long haos blong wan famle blong hem.” (Vas 27) Taem God i stap lidim man ya, hem i soem fasin lav we i kaengud long Ebraham, from we hem i masta blong man ya.
Fasin Ya i Protektem Man Mo i Karemaot Trabol
11, 12. (a) ?Wanem traem we Josef i stap fesem nao Jeova i soem lav we i kaengud long hem? (b) ?Jeova i mekem wanem long Josef blong soemaot fasin ya?
11 Nao, i gud yumi luk long Jenesis japta 39. Japta ya i tokbaot Josef, smol bubu blong Ebraham, we oli salem hem olsem slef long Ijip. Nating se i olsem, “Hae God i stap wetem Josef.” (Vas 1, 2) Potifa man Ijip we hem i masta blong Josef, hem tu i luksave we Jeova i stap wetem Josef. (Vas 3) Be, Josef i fesem wan bigfala traem. Waef blong Potifa i giaman se Josef i fosem hem blong slip wetem hem. Nao oli putum Josef long kalabus. (Vas 7-20) Long nogud “kalabus” ya oli “fasemtaet leg blong hem, mo bigfala aean i holemtaet nek blong hem.”—Jenesis 40:15; Ol Sam 105:18.
12 ?Wanem i hapen long Josef long taem ya we hem i kasem bigfala traem? “Oltaem Hae God i stap wetem hem, i stap blesem hem [no “i stap soemaot lav we i kaengud long hem,” NW ].” (Vas 21a) God i mekem wan samting from we hem i gat lav we i kaengud, mo samting ya i karemaot trabol we Josef i stap harem nogud long hem. Jeova i mekem se ‘bos long kalabus ya i glad long Josef.’ (vas 21b) Stat long taem ya, plante jenis i kamaot. Bos blong kalabus i putumap Josef blong i lukaot long ol narafala man we oli stap long kalabus. (Vas 22) Nao, Josef i mitim man ya we biaen i tokbaot Josef long fes blong Fero we i rulum Ijip. (Jenesis 40:1-4, 9-15; 41:9-14) Biaen, king ya i putumap Josef i kam wan haeman blong Ijip we i namba tu long king. Wok we Josef i mekem long kantri blong Ijip, we long taem ya i fesem hadtaem blong kasem kakae, i sevem laef blong plante man. (Jenesis 41:37-55) !Josef i gat 17 yia nomo, taem hem i stat blong kasem ol trabol ya mo fasin ya i gohed bitim 12 yia! (Jenesis 37:2, 4; 41:46) Be long olgeta yia ya we hem i harem nogud mo hem i fesem trabol, Jeova God i soemaot lav we i kaengud long Josef. Hem i protektem Josef blong ol trabol ya oli no spolem hem fulwan mo hem i sevem Josef from we Josef i gat wan spesel wok blong mekem we i joen long stamba tingting blong God.
Lav Blong God We i Kaengud i No Save Finis Samtaem
13. (a) ?Wanem ol samting we Sam 136 i tokbaot blong soemaot lav blong God we i kaengud? (b) ?Fasin lav we i kaengud i olsem wanem?
13 Bakegen mo bakegen Jeova i soemaot lav we i kaengud long ol man Isrel, olsem wan grup. Sam 136 i talem se from lav we i kaengud, God i mekem olgeta oli go fri (Vas 10-15), i lidim olgeta (Vas 16), mo i protektem olgeta. (Vas 17-20) Be tu, God i soemaot lav we i kaengud long ol man wanwan. Man we i soemaot lav we i kaengud long ol narafala, hem i mekem ol gudfala wok we oli givhan long ol narafala long taem blong bigfala trabol. Mo man olsem, i givhan long gladhat blong hem. Wan buk we i givhan long ol man we oli stadi Baebol, i tokbaot lav we i kaengud i se: “Hem i wan fasin we i save sevem laef no mekem se laef i stap gud. Hem i wan fasin we man i soem long taem we narafala i kasem trabol no i harem nogud.” Wan man blong hae save i talem se fasin ya i “mekem we lav i wok.”
14, 15. ?From wanem yumi sua se Lot i wan man we God i agri long hem?
14 Ol stori blong Jenesis, we yumi storebaot olgeta, oli soem se oltaem Jeova i soemaot lav we i kaengud long ol man we oli lavem hem. Laef blong Lot, Ebraham, mo Josef i no sem mak mo i klia se ol traem we trifala i fesem oli no sem mak. Trifala ya i sinman nomo, be trifala ya i man blong wok blong Jeova mo hem i glad long trifala. Trifala i nidim we Jeova i givhan long trifala. Yumi haremgud tumas blong save se Papa blong yumi long heven, we i gat lav, i soemaot lav we i kaengud long ol man olsem trifala ya.
15 Lot i bin mekem sam disisen we oli no waes. Risal blong samting ya, hem i kasem hadtaem. (Jenesis 13:12, 13; 14:11, 12) Be, hem i soemaot sam fasin tu we oli nambawan. Taem tufala enjel blong God i kamtru long Sodom, Lot i singaot tufala i kam long haos blong hem. (Jenesis 19:1-3) Wetem bilif hem i go luk tufala man we bambae tufala i mared long tufala gel blong hem, mo i givim woning long tufala se klosap nao bambae Sodom i lus. (Jenesis 19:14) Long 2 Pita 2:7-9, yumi faenem tingting blong God long saed blong Lot, se: “[Jeova] i sevem Lot. Man ya, fasin blong hem i stret, mo hem i stap harem nogud tumas from ol fasin nogud we ol rabis man long ples ya oli stap mekem. Hem i stap long medel blong olgeta, mo oltaem hem i stap luk rabis fasin blong olgeta, mo i stap harem rabis tok blong olgeta, mo evri dei nomo, hem i stap harem nogud tumas from. Ol samting ya i soemaot we Hae God i save sevem ol man we oli bilif long hem, i save tekemaot olgeta long ol samting we i stap traem olgeta.” Yes, fasin blong Lot i stret, mo ol tok ya oli soemaot se hem i wan man we i fasgud long God. Olsem Lot, yumi save haremgud long lav blong God we i kaengud taem yumi mekem “ol wok blong fasin tabu mo ol wok blong fasgud long God.”—2 Pita 3:11, 12, NW.
16. ?Baebol i talem wanem gudfala tok long saed blong Ebraham mo Josef?
16 Stori long Jenesis japta 24 i soemaot klia se Ebraham i frengud wetem Jeova. Faswan vas i talem se “Hae God i stap blesem hem long evri samting we hem i stap mekem.” Man blong wok blong Ebraham i talem se Jeova i “God blong masta blong mi.” (Vas 12, 27) Mo disaepol Jemes i tokbaot Ebraham se “God i mekem hem i stret man long fes blong hem” mo “ol man oli stap singaot hem se, ‘Fren blong God.’ ” (Jemes 2:21-23) Ol samting ya i tru tu long saed blong Josef. Jenesis japta 39 i makem klia se i gat wan gudfala fasin fren bitwin Jeova mo Josef. (Vas 2, 3, 21, 23) Mo tu, disaepol Steven i tokbaot Josef se: “God i stap lukaot long hem.”—Ol Wok 7:9.
17. ?Yumi save lanem wanem long eksampol blong Lot, Ebraham, mo Josef?
17 Ol man ya we yumi jes tokbaot olgeta se God i soemaot lav we i kaengud long olgeta, oli ol man we oli frengud wetem Jeova. Long ol defren rod, oli wok blong mekem stamba tingting blong God i kamtru. Oli fesem ol traem we oli no save winim long prapa paoa blong olgeta. Laef blong Lot i stap long denja, famle laen blong Ebraham klosap i lus, mo Josef i no kasem wok yet we bambae i sevem ol man. Jeova nomo i save givhan long ol man ya we oli ona long hem. Hem i soemaot lav we i kaengud long olgeta taem hem i mekem ol samting blong givhan long olgeta. Sipos yumi wantem haremgud blong olwe from lav blong God we i kaengud, yumi mas frengud wetem hem mo gohed blong mekem ol samting we hem i wantem.—Esra 7:28; Ol Sam 18:50.
God i Mekem i Gud Tumas Long Ol Man Blong Hem
18. ?Sam vas long Baebol oli soemaot wanem long saed blong fasin lav blong Jeova we i kaengud?
18 !“Wol i fulap” long fasin lav blong Jeova we i kaengud, mo yumi save tangkiu bigwan long God from fasin ya blong hem! (Ol Sam 119:64) Wetem fulhat, yumi agri long tok we man we i raetem Sam ya i talem se: “I gud olgeta oli talem tangkiu long Hae God from fasin blong hem we oltaem hem i lavem olgeta tumas [no, “i soem lav we i kaengud long olgeta,” ’ NW ], mo from ol bigbigfala samting we hem i stap mekem blong givhan long olgeta.” (Ol Sam 107:8, 15, 21, 31) Yumi glad tumas we Jeova i soemaot fasin lav we i kaengud long ol man blong wok blong hem we hem i agri long olgeta—hemia ol man wanwan no olsem wan grup. Long prea, profet Daniel i singaot Jeova se “God, yu yu Masta blong mifala. Yu yu hae we yu hae, mifala i ona long yu. Yu yu stap holemstrong promes ya blong yu we yu mekem long mifala. . . . Yu stap lavem [no, “soem fasin lav we i kaengud long,” NW ] olgeta man we oli lavem yu, mo we oli stap folem ol tok we yu yu putum.” (Daniel 9:4) King Deved i prea se: “Fasin blong yu, oltaem yu stap lavem tumas [no, “soem lav we i kaengud long,” ’ NW ] olgeta we oli save yu.” (Ol Sam 36:10) !Yumi tangkiu tumas we Jeova i soemaot lav we i kaengud long ol man blong hem!—1 King 8:23; 1 Kronikel 17:13.
19. ?Wanem ol kwestin we bambae yumi tokbaot long nekis stadi?
19 !Tru tumas, Jeova i mekem i gud long ol man blong hem! Yumi kasem blesing from lav we God i soemaot long olgeta man blong wol. Mo tu, yumi haremgud from ol spesel blesing we oli kamaot long Papa blong yumi long heven we i soemaot lav we i kaengud, mo lav we i stap tru oltaem long ol man blong hem. (Jon 3:16) Samting ya i tru moa taem yumi fesem hadtaem. Long ol taem olsem yumi save kasem blesing from nambawan fasin ya blong Jeova. (Ol Sam 36:7) ?Be olsem wanem yumi save folem fasin blong Jeova God long saed blong lav we i kaengud? ?Yumi wanwan i soemaot nambawan fasin ya? Nekis stadi bambae i tokbaot ol kwestin ya.
?Yu Yu Tingbaot?
• ?Wanem narafala rod we Baebol i yusum blong tanem tok ya ‘lav we i kaengud’?
• ?Lav we i kaengud mo lav we i stap tru oltaem, olsem wanem tufala i defren?
• ?Long wanem rod Jeova i soemaot lav we i kaengud long Lot, Ebraham, mo Josef?
• ?Fasin blong Jeova we i soemaot lav we i kaengud long ol man blong hem bifo, i mekem yumi sua long wanem samting?
[Kwestin]
[Tok blong pija long pej 13]
?Yu yu save olsem wanem God i soem lav we i kaengud long Lot?
[Tok blong pija long pej 15]
Wetem lav we i kaengud, Jeova i lidim man blong wok blong Ebraham
[Tok blong pija long pej 16]
Jeova i soemaot lav we i kaengud taem hem i protektem Josef