Plante Moa Man i Kam—I Nidim Moa Haos Kingdom
‘Yufala i Kam Long Mi, Nao Bambae Mi Mekem We Yufala i Spel’
Plante Moa Man i Kam—I Nidim Moa Haos Kingdom
JISAS i talem se: ‘Yufala i kam long mi, nao bambae mi mekem we yufala i spel.’ (Matiu 11:28) !Hed blong Kristin kongregesen i singaotem yumi wetem lav! (Efesas 5:23) Taem yumi tingting gud long ol tok ya, yumi mas gat bigfala tangkiu from stamba samting ya we i mekem yumi spelgud—hemia kampani blong ol Kristin brata sista blong yumi long ol Kristin miting. Yumi agri wetem man blong raetem Sam we i singsing se: “I gud tumas taem ol man blong God oli stap wanples, we oli gat wan tingting nomo. Fasin ya i gud tumas.”—Ol Sam 133:1.
Yes, olgeta we oli joen wetem yumi blong wosipim Jeova oli ol beswan fren we yumi save gat, mo tingting long saed blong spirit we i stap long ol miting ya i mekem yumi harem sef mo yumi glad. From samting ya wan yangfala Kristin i talem se: “Mi mi skul ful dei, mo samting ya i karemaot paoa long mi. Be ol miting oli olsem wan ples blong kasem wota long drae ples, oli mekem mi mi kasem paoa blong gohed wetem ol traem we mi stap fesem long skul nekis dei.” Wan yangfala gel blong Naejeria i talem se: “Mi faenem we fasin blong joen oltaem wetem ol man we oli lavem Jeova i givhan long mi blong stap klosap long Jeova.”
Haos Kingdom blong ol Witnes blong Jeova long ples blong yumi i impoten tumas from we hem i stamba ples blong trufala wosip long komuniti blong yumi. Long plante ples, ol Witnes oli holem ol miting long Haos Kingdom tu taem long wan wik, mo oli leftemap tingting blong ol Baebol studen blong kam long miting mo harem gud from gudfala kampani blong ol brata sista long ples ya.—Hibru 10:24, 25.
I Gat Bigfala Nid
Be yumi mas save se sam Witnes blong Jeova oli no gat janis blong holem ol miting long wan gudfala Haos Kingdom. Namba blong ol man blong talemaot Kingdom i kam antap bigwan long olgeta ples long wol, mekem se i gat wan bigfala nid i stap. Yumi nidim plante taosen Haos Kingdom, antap moa long ol pua kantri.—Aesea 54:2; 60:22, NW.
Tingbaot sam eksampol ya: Long bigfala taon blong Demokratik Ripablik blong Kongo i gat 290 kongregesen be i gat ten Haos Kingdom nomo. Kantri ya i nidim plante niufala Haos Kingdom kwiktaem. Long Angola, bighaf blong ol kongregesen oli stap holem miting long open ples nomo from we i gat smol namba blong Haos Kingdom. Mo i gat bigfala nid olsem long plante narafala kantri bakegen.
Taswe, stat long 1999, ol Witnes oli traehad blong givhan long wok blong bildim ol Haos Kingdom long ol kantri we oli gat hadtaem long saed blong mane. Sam Witnes we oli gat gudhan blong wokem haos oli volontia blong givhan long wok long ol kantri ya. Gudfala frut i kamaot taem olgeta ya we oli traehad, oli wok tugeta wetem ol lokol brata sista we oli gat gud tingting tu blong joen long wok ya. Mo long semtaem, ol Witnes blong ol pua kantri oli kasem trening. Olgeta samting ya i mekem we wok blong bildim ol Haos Kingdom long ol kantri we i gat nid i stap gohed gud.
Mo tu, taem oli bildim ol Haos Kingdom ya, oli lanem ol man blong folem fasin blong wok we i stret long kantri ya mo oli yusum ol samting blong wokem haos we oli blong kantri ya nomo. Mak we oli wantem kasem hemia blong bildim ol Haos Kingdom we plante kantri oli nidim kwiktaem, be tu, oli wantem bildim ol Haos Kingdom we bambae i isi long ol brata blong kantri ya blong lukaot mo fiksimap.—2 Korin 8:14, 15.
Gudfala Frut i Kamaot
?Wanem frut i kamaot from ol traehad blong bildim ol haos blong wosip? Long stat blong 2001, wan ripot long Malawi i talem se: “Olgeta mak we yumi bin kasem long kantri ya i rili leftemap tingting. Long nekis tufala manis, bambae mifala i finisim sam narafala Haos Kingdom.” (Pija 1 mo 2) Long ol manis we oli jes pas, ol volontia long Togo oli bin bildim sam Haos Kingdom we i no flas tumas be oli naes. (Pija 3) Mo tu, gudfala wok blong ol volontia i mekem se i gat sam niufala Haos Kingdom long Meksiko, Brasil, no sam narafala kantri bakegen.
Ol kongregesen oli luksave se taem oli bildim wan Haos Kingdom, ol man raonabaot oli kasem se ol Witnes bambae oli stap nao long ples blong olgeta. Plante man we bifo oli no wantem joen wetem ol Witnes, naoia oli rere blong kam from we i gat wan ples blong wosip. Kongregesen blong Nafisi long
Malawi i talem se: “Naoia we mifala i gat wan naesfala Haos Kingdom, samting ya i givim wan gudfala witnes. I isi nomo blong statem ol Baebol stadi.”Bifo, ol memba blong Krake Kongregesen long Benin oli harem nogud long ol tok jik we ol man oli sakem long olgeta from we Haos Kingdom blong olgeta i no naes olsem ol jos blong ples ya. (Pija 4) Be naoia kongregesen ya i gat wan naesfala Haos Kingdom we i stret ples blong leftemap trufala wosip, mo nating se oli no wokem hem wetem ol sas samting, be ol man oli sapraes taem oli luk hem. (Pija 5) Long kongregesen ya i gat 34 man blong talemaot gud nius blong Kingdom mo i gat raonabaot 73 man i stap kam long ol miting, be 651 man i kam taem oli dediketem Haos Kingdom. Bighaf blong olgeta ya oli man blong taon, we oli sapraes
blong luk se ol Witnes oli save bildim wan haos long sot taem nomo. Ol brata long branj ofis long Simbabwe oli tingbaot ol gudfala frut we i kamaot from we oli gat ol niufala Haos Kingdom, oli se: “Plante taem mifala i makem se, wan manis afta we mifala i bildim wan niufala Haos Kingdom, namba blong olgeta we oli kam long miting i dabol.”—Pija 6 mo 7.I sua fulwan se ol niufala Haos Kingdom ya oli givhan long ol man we oli Kristin finis, mo long ol man we oli intres long trutok, blong oli kasem spel long saed blong spirit we i mekem man i harem gud. Long Yukren, afta we oli stat yusum wan niufala Haos Kingdom, wan Witnes i talem se: “Mifala i glad bigwan. Mifala i luk wetem prapa ae blong mifala olsem wanem Jeova i stap halpem ol man blong hem.”
[Bokis blong pija long pej 10, 11]
God i Tinghae Long Presen Mane
Ol Witnes blong Jeova oli glad tumas blong luk se wok blong bildim ol niufala Haos Kingdom i gohedgud long ful wol. Long plante kantri, namba blong man we i stap wosipim Jeova i kam antap evri yia, mekem se bambae yumi nid blong bildim plante niufala Haos Kingdom. !Long yia 2001, oli stanemap klosap 32 niufala kongregesen evri wik! Ol kongregesen ya oli nidim wan ples blong mekem miting mo wosip long God.
Maet yu askem se: ‘?Olsem wanem yumi kasem mane blong bildim ol niufala Haos Kingdom, speseli long ol kantri we ol brata oli gat trabol long saed blong mane?’ Blong kasem mane ya, i nidim help blong God mo fasin blong ol man blong givim wetem gladhat.
Jeova i holem promes blong hem blong givim tabu spirit blong hem long ol man blong wok blong hem. Nao from tabu spirit ya bambae oli “mekem ol gudfala fasin, mo ol gudfala wok, mo oli mas kam rij long fasin ya. [Bambae oli] gat gladhat blong givhan long ol man, mo blong seraot ol samting blong olgeta long ol narafala man.” (1 Timoti 6:18) Spirit blong God i pusum ol Witnes blong Jeova blong sapotem wok blong prij long defren fasin—oli givim taem mo paoa blong olgeta, oli wokhad, mo oli givim ol narafala samting blong olgeta bakegen blong mekem Kristin wok.
From we oli gat gladhat blong givim, ol Witnes mo sam narafala man we oli intres long trutok oli givim mane blong wokem ol niufala haos no blong mekem sam haos oli kam bigwan moa. Oli givhan blong pem ol samting we kongregesen long ples blong olgeta i nidim, be tu oli givim presen mane blong bildim sam niufala Haos Kingdom long ol narafala kantri.
Long evri kongregesen, i gat sam bokis we evriwan i save luk, we i gat tok ya long olgeta: “Presen Mane Blong Sapotem Wok Blong Prij Long Ful Wol—Matiu 24:14.” Eni man i save putum presen mane insaed long bokis ya sipos hem i wantem. (2 King 12:9) Evri presen mane, nating se hem i bigwan no hem i smol be God i tinghae long hem. (Mak 12:42-44) Oli yusum mane ya long defdefren rod, i dipen long ol defren nid we i gat, olsem wok blong bildim ol Haos Kingdom. Be oli no yusum mane ya blong pem ol haeman blong sosaeti, from we i no gat haeman long ogenaesesen blong ol Witnes blong Jeova.
?Presen mane we ol man oli givim long ful wol i kasem mak blong hem? Yes, hem i kasem mak blong hem. Branj ofis long Laeberia—wan kantri we faet i spolemgud—i talem se bighaf blong ol lokol Witnes oli no gat wok, mo oli gat hadtaem blong kasem mane. ?Olsem wanem ol man blong Jeova long kantri ya oli save kasem wan gudfala haos blong wosip? Branj ofis i talem se: “Blong bildim ol niufala Haos Kingdom, bambae mifala i yusum presen mane we ol brata oli givim long ol narafala kantri. !Fasin ya i waes, mo i soem lav blong ol brata sista!”
Ol lokol brata oli givhan tu, nating se oli no gat plante mane. Ol brata blong Siera Leon, wan kantri blong Afrika, oli talem se: “Ol lokol brata oli joen long wok ya mo oli glad blong givim paoa mo smol mane we oli gat blong sapotem wok blong bildim ol Haos Kingdom.”
Hadwok blong bildim ol haos ya i presem Jeova. Ol brata blong Laeberia oli glad blong talem se: “Wok ya blong bildim ol haos wosip long evri ples long kantri [blong mifala] i soem long ol man se trufala wosip bambae i stap olwe long kantri ya, mo bambae i givim ona mo i leftemap haenem blong God blong yumi.”