?Yu Yu Kasem Save Se God i Gat Lav?

MAN ya Job i tokbaot laef blong wan sinman i se: “Mifala man we i bon long wol ya, mifala i no strong. Laef blong mifala i sotfala nomo, mo i fulap long trabol. Mifala i stap kam bigfala kwiktaem nomo, olsem we flaoa i gru, be mifala i stap ded kwiktaem tu, olsem flaoa. Laef blong mifala i olsem sado, we i stap lus kwiktaem nomo.” (Job 14:1, 2) Job i harem nogud tumas from we laef i fulap long ol trabol mo soasore nomo. ?Yu yu harem olsem hem samtaem?

Nomata wanem kaen trabol no wanem kaen problem we yumi stap fesem, be i gat wan strong hop i stap we i stanap long sore mo lav blong God. Faswan samting, Papa blong yumi long heven i gat sore ale i givim ransom sakrefaes blong pemaot ol man long sin. Folem Jon 3:16, 17, Jisas Kraes i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis. God i no sanem mi, mi Pikinini blong hem, mi kam long wol ya blong mi jajem ol man long wol. Hem i sanem mi blong mi wok blong hem blong mekem rod blong sevem olgeta.”

Mo tu, tingbaot nambawan fasin kaen we God i soemaot long yumi ol sinman. Aposol Pol i talem se: “Bifo we bifo olgeta, hem i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol. Mo hem nomo i makemaot fastaem, se ples blong ol man bambae i bigfala olsem wanem, mo oli save stap long hem longtaem olsem wanem. God ya, hem i mekem olsem, blong bambae yumi evriwan yumi save lukaot hem, blong yumi save faenem hem. I olsem we man i stap pusum han blong hem i go olbaot, blong faenem wan samting. Be i tru we God ya i no stap longwe long yumi nating.” (Ol Wok 17:26, 27) !Tingbaot samting ya! Nating se yumi sinman, be yumi evriwan i gat janis yet blong frengud wetem Jeova God, Man ya we i Wokem yumi wetem lav.

Taswe yumi no mas fraet long fiuja. Yumi save se God i lukaot long yumi mo i mekem rod finis blong yumi haremgud blong olwe. (1 Pita 5:7; 2 Pita 3:13) From samting ya nao, yumi gat strong tingting blong stadi long Tok blong God, hemia Baebol, blong lanem moa long saed blong God blong yumi we i gat lav.