Yumi Nidim Blong Save Se God i Hu

?LONG wan naet we i no gat klaod, yu yu haremgud blong luk ol sta oli fulap long skae? ?Smel blong ol naesfala flaoa i i mekem yu yu glad? ?Yu yu haremgud blong lesin long singsing blong ol pijin mo long noes we win i mekem long ol lif? !Mo yumi intres tumas blong luk ol welfis we oli gat bigfala paoa mo ol narafala anamol we oli laef long solwota! Mo tu, yumi ol man yumi bon wetem wan tingting we i save jajem yumi mo wetem wan bren we i wok long rod we i had tumas. ?Yu yu save talem wanem blong eksplenem ol naesfala samting we oli stap raonabaot long yumi se oli kamaot olsem wanem?

Samfala oli bilif se olgeta samting ya oli kamaot olsem nomo. ?Be sipos i tru, from wanem yumi ol man yumi tingbaot God? ?Olsem wanem wan akseden nomo we i joenem ol defdefren kemikol, i save wokem ol man wetem wan tingting se oli nidim God?

“Tingting blong wantem wosip i stap dip insaed long fasin blong man. Ol man we oli rij wetem olgeta we oli no rij mo ol man we oli skul gud wetem olgeta we oli no skul gud oli gat tingting ya.” Toktok ya i kamaot long buk we Tija Alister Hardy i raetem, nem blong buk ya, The Spiritual Nature of Man. I no longtaem i pas, sam sayentis oli mekem stadi long saed blong bren, nao oli talem se maet Bigman i bin putum “program” finis long man blong mekem se hem i wantem wosip. Buk ya, Is God the Only Reality? i talem se: “Stat long faswan man i kam kasem naoia, long olgeta kantri mo kastom, . . . yumi faenem fasin ya we man i tingting strong long skul.”

Tingbaot tok blong wan man we i skul gud samwe 2,000 yia bifo. Hem i raetem se: “Evri haos i gat man we i wokem, be God i wokem olgeta samting we i stap.” (Hibrus 3:4) Faswan vas blong Baebol i talem se: “Bifo we bifo olgeta, God i mekem skae mo graon wetem olgeta samting we i stap long tufala.”—Jenesis 1:1.

?Be, God hem i hu? Ol man oli gat plante defdefren tingting long kwestin ya. Taem oli askem long wan yangfala boe blong Japan, we nem blong hem Yoshi, se God hem i hu, boe ya i ansa se: “Mi mi no save stret. Skul blong mi hem i Budis, mo i no impoten long mi blong save se God hem i hu.” Be, Yoshi i agri se plante man oli lukluk Buddha olsem wan god. Nick i wan bisnesman we i gat bitim 60 yia. Hem i bilif long God mo hem i tingbaot God olsem wan paoa we i bigwan olgeta. Taem oli askem long Nick blong i eksplenem wanem samting hem i save long saed blong God, hem i wet longtaem lelebet, nao hem i ansa se: “Maefren, hemia wan kwestin we i strong tumas.  Mi save talem nomo se i gat wan God. Yes, God i stap.”

Sam man oli “wosip mo mekem wok blong ol samting we God i wokem be oli no wosip long God hem wan.” (Rom 1:25, Today’s English Version) Plante milian man oli wosip long ol bubu blong olgeta we oli ded finis. Oli bilif se God i stap longwe tumas long olgeta. Long skul Hindu, i gat plante man mo woman god. Long taem blong ol aposol blong Jisas Kraes, i gat plante defren kaen god, olsem Sus mo Heremes. (Ol Wok 14:11, 12) Plante skul blong Krisendom oli tijim se God i wan Triniti, we i gat God Papa, God Pikinini, mo God Tabu Spirit long hem.

Yes, Baebol i talem se: “I gat plante god olsem, mo plante masta olsem.” Be hem i talem bakegen se: “Yumi gat wan God nomo blong yumi. Hem i Papa blong yumi, we olgeta samting oli kamaot long hem, mo laef blong yumi i blong hem nomo.” (1 Korin 8:5, 6) Yes, i gat wan trufala God nomo. ?Be hem i hu? ?Hem i olsem wanem? I impoten we yumi save ansa blong ol kwestin ya. Jisas hem wan i prea long Man ya mo i talem se: “Mo laef ya, [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Yes, blong kasem laef blong olwe, yumi mas save trutok long saed blong God.

[Tok blong pija long pej 3]

?Oli kamaot olsem wanem?

[Credit Line]

Whale: Courtesy of Tourism Queensland

 [Foto Credit Line long pej 2]

COVER: Index Stock Photography © 2002