Ripot Long Wok Blong Kingdom

Faenem Trutok Long Wan Ples We Man i No Tingbaot

GOD “i wantem sevem olgeta man, mo i wantem we olgeta man bambae oli save trutok blong hem.” (1 Timoti 2:3, 4) Blong kasem mak ya ol Witnes blong Jeova oli prentem mo oli seremaot plante milian Baebol mo plante buk we oli tokbaot Baebol. Ol buk ya oli halpem ol man we hat blong olgeta i stret blong lanem trutok long sam rod we man i no tingbaot nating. Long saed ya, ol man blong talemaot Kingdom long Freetown, Siera Leon, oli talem ekspiriens we i kam biaen.

Osman i sekenbon boe long wan famle we i gat naen pikinini. Famle blong hem i bilif long God, mo taem hem i stap gruap hem i go long jos wetem papa blong hem oltaem. Nating se i olsem, Osman i harem nogud from tijing blong skul blong hem long saed blong hel. Hem i no kasem save olsem wanem wan God we i gat sore i save spolem bodi blong ol man nogud, i bonem olgeta long faea. Oli traem eksplenem tijing blong helfaea blong halpem Osman blong kasem save long hem, be samting ya i no karem pis long tingting blong Osman.

Wan dei, taem Osman i gat 20 yia blong hem, hem i luk wan blu buk i stap long wan tin doti, we klosap ol doti oli kavremap buk ya. Osman i laekem tumas ol buk, taswe hem i pikimap buk ya, i klinim hem, nao hem i save ridim taetel blong hem—Trutok blong Soemaot Rod blong Itenel Laef. *

Osman i askem long hem wan se: “?Wanem trutok ya?” Hem i wantem tumas blong save, taswe hem i gobak long haos wetem buk ya, mo wantaem nomo i ridim ful buk. !Hem i harem gud tumas taem i lanem we God i gat prapa nem blong hem—hemia Jeova! (Ol Sam 83:18, NW ) Mo tu, Osman i lanem se lav i stamba fasin blong God, mo long lukluk blong God fasin ya blong bonem man long faea hem i wan samting we i nogud we i nogud olgeta. (Jeremaea 32:35; 1 Jon 4:8) Antap long samting ya, Osman i lanem we i no longtaem, bambae Jeova i mekem wol ya i kam wan paradaes we olgeta man oli save laef long hem blong olwe. (Ol Sam 37:29; Revelesen 21:3, 4) !Trutok ya i nambawan, i kamaot long wan God we i gat sore mo lav! Osman i tangkiu tumas long Jeova from janis ya we hem i kasem blong faenem trutok long wan ples we man i no save tingbaot.

Sam dei biaen, sam fren oli givhan long Osman blong faenem Haos Kingdom blong ol Witnes blong Jeova, mo hemia fastaem we hem i go long wan miting. Long miting ya nao, hem i askem wan Witnes blong stadi Baebol wetem hem. Nating se famle i agensem hem bigwan, be Osman i gohed gud long saed blong spirit mo i tekem baptaes. (Matiu 10:36) Tede, hem i wan elda long wan kongregesen. !I gud tumas blong tingbaot we gudfala frut ya i kamaot from we hem i faenem wan buk we i tokbaot Baebol insaed long wan tin doti!

[Futnot]