Fofala Leta Blong Nem Blong God Long Septuagint
Fofala Leta Blong Nem Blong God Long Septuagint
NEM blong God, Jeova, long lanwis Hibru oli raetem wetem fofala leta ya יהוה (YHWH). Longtaem finis ol man oli ting se ol fofala leta ya oli no stap long ol hanraet blong Baebol blong Septuagint. Taswe oli agiu se taem ol man blong raetem Kristin Grik haf blong Baebol oli tekem sam vas long Hibru haf blong Baebol, oli no bin yusum nem blong God.
Long wan handred yia we i jes pas, ol man oli faenem fulap samting we i soemaot se nem blong God i stap long Baebol blong Septuagint. Wan buk i talem se: “Ol man Jiu we oli toktok lanwis Grik mo oli folem fasin blong laef blong ol man Gris (Hellenists), oli wantem tumas blong holem tabu nem blong God i stap olsem we i stap. Taswe, taem oli tanem Hibru haf blong Baebol i go long Grik lanwis, oli raetem fofala leta ya i go stret long Grik hanraet.”
Oli faenem sam haf blong ol hanraet ya tede, olsem hemia we i stap long lefsaed, we hem i wan pis blong skrol we oli wokem long gras ya papiras. Smol pis blong skrol ya we oli faenem long Oxyrhynchus, long Ijip, mo oli putum namba blong hem se 3522, i blong ol yia wan handred K.T. * * Longfala blong hem, i samwe long 7 sentimita wan saed mo 10.5 sentimita narasaed, mo i holem ol vas blong Job 42:11, 12. Fofala leta ya blong nem blong God i stap long ol vas ya we oli putum wan mak i goraon long hem. *
?Taswe, olsem wanem? ?Nem blong God i stap long ol faswan hanraet blong Kristin Grik haf blong Baebol? Man ya George Howard, we i holem skolasip, i talem se: “From we ol man oli raetem fofala leta blong nem blong God long ol kopi blong Baebol long Grik lanwis [olsem Septuagint] we hem i Baebol blong faswan jos, i stret blong ting se ol man we oli raetem N[iu] T[estemen], taem oli tekem sam vas long Baebol ya [Septuagint] oli yusum fofala leta ya long hanraet blong Baebol we oli stap mekem.” I luk olsem se smoltaem afta nomo, ol man we oli stap mekem kopi blong Baebol oli karemaot nem blong God blong putum ol taetel, olsem Kyʹri·os (Masta) mo The·osʹ (God).
[Ol Futnot]
^ Blong save moa long saed blong smol pis blong skrol ya we oli faenem long Oxyrhynchus, lukluk Wajtaoa blong Februari 15, 1992, pej 26-28 (Inglis mo Franis).
^ K.T. i minim Kristin Taem.
^ Sam narafala eksampol blong nem blong God long Grik hanraet, i stap long New World Translation of the Holy Scriptures—With References, apendiks 1C (Inglis mo Franis).
[Foto Credit Line blong pija long pej 30]
Courtesy of the Egypt Exploration Society