Laef Stori

Kasem Blesing From Fasin Blong Fasgud Long God

WILLIAM AIHINORIA I TALEM STORI YA

Mi wekap long medel blong naet taem mi harem voes blong Papa we i stap harem nogud bakegen. Hem i stap rolem hem long graon mo i holem bel blong hem. Mi wetem Mama mo bigfala sista blong mi, mitrifala i stap klosap long hem. Taem i luk olsem se soa i godaon, Papa i sidaon, i pulum win, mo i talem se: “Ol Witnes blong Jeova nomo oli gat pis long wol ya.” Tok ya i narakaen, be i gat bigfala paoa long mi from we hemia fastaem we mi harem nem ya ol Witnes blong Jeova. Mi stap askem long mi wan se wanem mining blong tok ya we Papa i talem.

SAMTING ya i hapen long 1953 taem mi gat sikis yia. Papa blong mi i gat plante waef, mo famle blong mifala i laef long Ewossa wan vilej long wes blong Naejeria we ol man blong hem oli laef long garen. Mi mi sekenbon pikinini, be mi faswan boe long famle blong mifala we i gat 3 waef blong Papa, wetem ol 13 pikinini blong olgeta. Mifala i serem haos natanggura blong Bubu man, we i gat fo rum long hem. Be tu, long haos ya i gat Bubu woman, wetem trifala brata blong Papa, mo ol famle blong trifala.

Laef blong mi olsem wan pikinini i no hapi nating. Wan stamba risen blong samting ya, hemia trabol we Papa i gat long helt blong hem. Bel blong hem i stap soa oltaem, mo sik ya i stap mekem hem gogo kasem we hem i ded plante yia biaen. I no gat wan man i save sik blong hem, mo ol meresin we mifala i naf blong pem—nating se i kastom meresin no wan meresin blong dokta—oli no naf blong winim sik ya. Mifala i spenem plante naet wetem Papa, mifala i stap krae taem hem i harem nogud bigwan, i stap rolem hem long graon gogo  kasem we faol i singaot long nekis moning. Papa wetem Mama, tufala i wokbaot i go long plante ples blong faenem wan meresin blong mekem Papa i kam gud bakegen. Taem oli wokbaot olsem, Bubu woman i stap lukaot long mi mo ol brata sista blong mi.

Famle blong mifala i laef from garen nomo—mifala i planem yam, maniok mo kola nat, mo mifala i salem olgeta. Mo tu mifala i stap tekem kaojuk long ol tri blong salem mo kasem moa mane, antap long smol mane we i kamaot long kakae blong garen. Stamba kakae blong mifala hem i yam. Long moning mifala i kakae yam, mifala i granem yam blong kakae long aftenun, mo long naet mifala i kakae yam bakegen. Sam samtaem, mifala i save kakae wan defren kakae taem mifala i rusum banana.

Wan impoten samting long laef blong mifala hemia wosip long ol bubu blong mifala. Famle blong mi i putum sam kakae long fored blong sam wud we oli fasem plante kaori sel long olgeta. Oli putum kakae ya blong ol bubu blong mifala. Mo tu, Papa i wosipim wan aedol blong ronem ol rabis spirit mo man blong mekem posen.

Taem mi gat faef yia, mifala i muv i go 11 kilometa longwe long vilej blong mifala, blong stap smoltaem long wan kamp we evri man i wok long garen. Long ples ya, Papa i kasem sik ya gini wom (wan wom we i laef aninit long skin blong man no anamol) we i mekem hem i harem nogud, antap long sik long bel. Long dei hem i no save wok, mo long naet hem i safa bigwan from bel i soa. Mi kasem sik we i kamaot long wan kaen laos we i go insaed long mit blong bodi, we i olsem wan kaen taefus. From ol sik ya, mifala i no save wok, mo mifala i laef long ol samting we stret famle blong mifala i givim fri long mifala. Mifala i pua tumas mo mifala i no wantem ded from, taswe mifala i muv i gobak long vilej blong Ewossa. Papa i wantem se mi, faswan boe blong hem, mi kasem wan wok we i moa gud i bitim had laef blong man we i wok long garen. Hem i harem se sipos mi gat wan gudfala edukesen, bambae mi naf blong givim wan laef we i moagud long famle blong mifala, mo edukesen ya i save halpem mi blong tijim ol brata sista blong mi.

Mi Lanem Tijing Blong Ol Defren Jos

Taem mifala i kambak long vilej blong mifala, mi stat go long skul. Hemia i min se mi mas lanem ol tijing blong ol jos blong Krisendom. * Long ol yia 1950, wan man Afrika we i kasem edukesen long skul blong ol waet man i mas lanem ol tijing blong jos blong olgeta tu. Mi stap skul long wan Katolik skul, taswe mi mas kam wan Katolik.

Long 1966 taem mi gat 19 yia, oli akseptem mi long Pilgrim Baptis Sekendri Skul long taon blong Ewohinmi, klosap 8 kilometa longwe long Ewossa. Long ples ya mi kasem wan niufala edukesen long saed blong jos. Naoia we mi stap go long wan Protestan skul, ol Katolik pris oli blokem mi blong tekpat long Lames we oli mekem long Sande.

Taem mi stap long Baptis skul hemia fastaem we mi ridim Baebol. Nating se mi stap go long Katolik jos, be evri Sande afta long sevis blong jos, mi stap ridim Baebol mi wan. Mi laekem tumas ol tijing blong Jisas Kraes, mekem se mi wantem tumas blong fasgud long God long laef blong mi. Taem mi gohed blong ridim Baebol, mi harem nogud bitim mak blong luk fasin tu fes blong sam lida blong jos mo rabis laef blong plante memba blong jos. Mi luk we fasin blong ol man we oli talem se oli Kristin i defren olgeta long ol tijing mo ol aksin blong Jisas mo ol disaepol blong hem.

I gat sam samting we oli rili mekem mi mi sek. Wan dei taem mi go long stoa blong jos blong pem wan rosari, mi luk wan bidbid blong ronemaot ol rabis spirit i stap hang long doa blong stoa ya. Wan  narafala dei, hed masta blong Baptis skul i traem mekem nogud wetem mi long saed blong seks. Biaen mi lanem se hem i wan man blong slip wetem man mo i bin mekem nogud finis long sam narafala man. Mi tingbaot ol samting ya, mo mi stap askem long mi wan se, ‘?God i save agri long ol skul we oli no givim panis long ol memba mo lida blong olgeta we oli mekem ol bigfala sin olsem?’

Mi Jenisim Skul

Nomata long ol samting ya, mi lavem ol samting we mi ridim long Baebol mo mi tekem disisen blong gohed blong ridim Baebol. Long taem ya nao mi stat tingbaot ol tok blong Papa, we hem i talem 15 yia bifo se: “Ol Witnes blong Jeova nomo oli gat pis long wol ya.” Be mi wari from we long skul blong mi, oli daonem ol yangfala Witnes mo samtaem olgeta oli kasem panis from we oli no joen long moning wosip wetem mifala. Mo sam bilif blong olgeta oli narakaen. Eksampol, mi faenem i had blong bilif se 144,000 man nomo bambae oli laef long heven. (Revelesen 14:3) Mi mi wantem laef long heven, taswe mi stap askem long mi wan sipos oli jusumaot finis ol 144,000 man bifo we mi bon.

I klia se fasin mo tingting blong ol Witnes i defren olgeta. Oli no joenem ol narafala yangfala long ol doti mo raf fasin blong olgeta long skul. Long lukluk blong mi, oli rili seraot long wol, olsem we mi bin ridim long Baebol se ol man we oli stap long trufala skul oli no man blong wol ya.—Jon 17:14-16; Jemes 1:27.

Mi tekem disisen se mi mas lukluk moa long skul ya. Long Septemba 1969 mi kasem buk ya “Trutok blong Soemaot Rod blong Itenel Laef.” Wan manis biaen, wan paenia—hemia nem we oli givim long ol Witnes blong Jeova we oli prij fultaem—i stat stadi Baebol wetem mi. From we mi rili laekem faswan stadi blong mi, wan Sarede long naet mi stat ridim buk ya Trutok gogo mi flatem long nekis dei long aftenun. Kwiktaem nomo mi stat talemaot long ol narafala studen, ol nambawan samting we mi bin ridim. Ol studen mo ol tija oli ting se niufala bilif blong mi i mekem mi mi krangke. Be mi save se mi no kam krangke.—Ol Wok 26:24.

Papa mama blong mi oli harem se mi stap talemaot niufala bilif blong mi. Oli askem long mi blong kambak long haos kwiktaem nomo, blong oli save faenemaot wanem problem blong mi. I no gat wan brata i stap we mi save askem advaes long hem, from we ol Witnes blong Jeova oli go finis  long distrik asembli blong olgeta long Ilesha. Taem mi gobak long haos, mama blong mi wetem sam narafala famle oli askem plante kwestin mo oli sakem plante nogud tok long mi. Mi traem bes blong mi blong toktok from ol samting we mi stap lanem long Baebol.—1 Pita 3:15.

Angkel blong mi i traem pruvum se ol Witnes blong Jeova oli giaman tija, be hem i no naf blong pruvum samting ya, taswe hem i faenem wan narafala rod blong blokem mi. Hem i talem long mi se: “Rimemba se yu go long skul blong kasem wan edukesen. Sipos yu lego skul mo yu go prij, bambae yu neva finisim edukesen blong yu. ?Olsem wanem sipos yu finisim skul blong yu fastaem, mo biaen yu joenem niufala jos ya?” Long taem ya mi ting se tok ya i stret, taswe mi stop blong stadi wetem ol Witnes.

Long Disemba 1970 stret afta we mi kasem setifiket blong mi, mi go long Haos Kingdom mo stat long taem ya mi neva mestem wan miting blong ol Witnes blong Jeova. Long Ogis 30, 1971, mi givim laef blong mi long God mo mi tekem baptaes. Papa mama mo ful vilej tu oli sek taem mi tekem baptaes. Oli talem se mi mekem olgeta oli harem nogud from we mi nao mi faswan man blong Ewossa we gavman i givim mane long hem blong hem i skulgud. Plante man oli putum hop blong olgeta long mi. Oli hop se bambae mi yusum edukesen blong mi blong mekem laef blong vilej i kam moa gud.

Ol Frut We i Kamaot From Niufala Bilif Blong Mi

Famle blong mi wetem ol olfala man blong vilej oli sanem sam man blong traem pulum mi blong lego bilif blong mi. Long ol traehad blong olgeta oli stat tok nogud long mi. Oli talem se: “Sipos yu no lego jos ya, bambae yu harem nogud long laef blong yu. Bambae yu no faenem wok. Bambae yu no gat prapa haos blong yu. Bambae yu no save mared mo gat wan famle.”

Defren olgeta long ol nogud tok blong olgeta, mi finisim skul mo ten manis biaen mi faenem wok olsem wan tija. Long Oktoba 1972, mi maredem Veronica, waef blong mi we mi laekem tumas. Biaen, gavman i trenem mi blong givhan long ol man blong ogenaesem wok long garen, mo givhan long olgeta blong lukaot long kaon blong olgeta wan. Mi pem faswan trak blong mi, mo mi stat bildim haos blong mifala. Long Novemba 5, 1973, Victory, faswan gel blong mifala i bon, mo long ol yia we oli kam biaen mifala i gat Lydia, Wilfred mo Joan. Long 1986 Micah i bon, hemia laswan pikinini blong mifala. Olgeta evriwan oli kam ol gudfala pikinini, wan presen blong Jeova.—Ol Sam 127:3.

Taem mi luklukbak, mi save talem se defren olgeta long ol nogud tok ya blong ol man long vilej blong mi, mi no kasem trabol be mi kasem fulap blesing long laef blong mi. Hemia nao from wanem mi givim nem ya Victory (winim faet) long faswan gel blong mi. Mi jes kasem wan leta we ol man blong vilej oli raetem i kam long mi i se: “Plis, mifala i wantem se yu kamhom mo yu wok wetem mifala blong mekem se vilej i kam antap, from we mifala i luk we God i blesem yu.”

Trenem Ol Pikinini Long Rod Blong God

Mi wetem waef blong mi, mitufala i save se mitufala i no save fasgud long God mo trenem ol pikinini, mo long semtaem traehad blong kam rij. Taswe, mifala i lanem blong haremgud long wanem samting we mifala i gat long laef. Mifala i laekem moa blong gat wan laef olsem, i bitim ol nogud frut we maet mifala i mas fesem sipos mifala i wantem tumas blong kam rij.

Long kantri blong mifala, oltaem ol famle oli serem wan haos wetem wan ples blong swim, wan kijin, mo ol narafala samting bakegen. Mifala i glad se mifala i naf blong rentem prapa haos blong mifala long evri taon we gavman i sanem mi blong wok long hem. I tru se wan haos olsem i sas moa, be hemia i protektem ol pikinini blong mifala long ol nogud fren. Mi tangkiu long Jeova se long ol yia we oli pas, ol pikinini blong mifala oli gruap long wan famle we i stap strong long saed blong spirit.

Antap long samting ya, waef blong mi i neva wok, hem i lukaot mo stap oltaem wetem ol pikinini. Afta wok, mifala i traem blong mekem sam samting tugeta olsem wan famle. Ol samting we mifala i mekem, mifala i mekem tugeta olsem wan tim. Mifala i mekem famle Baebol stadi, rerem ol miting mo go long ol miting blong kongregesen, joen tugeta long Kristin wok blong prij, mo tu mifala i joen wetem ol narafala blong mekem ol pleplei no narafala samting tugeta.

Mifala i traem folem advaes we i stap long Dutronome 6:6, 7. Hem i pusum ol papa mama blong  tijim ol pikinini blong olgeta taem oli stap long haos, mo long eni ples mo eni taem tu. From samting ya, ol pikinini oli mekem fren insaed long kongregesen be oli no traem faenem sam fren long wol. Oli folem eksampol blong mitufala mo oli lan blong jusumgud ol fren blong olgeta, from we mi wetem Veronica, mitufala i no spenem tumas taem wetem olgeta we oli no gat sem bilif olsem mifala.—Ol Proveb 13:20; 1 Korin 15:33.

Be i tru se i no tijing mo advaes blong mitufala nomo we i gat paoa blong mekem i gud long laef blong ol pikinini blong mitufala. Stat long taem bifo kam kasem tede, mifala i welkamem olgeta Kristin we oli wok strong, olsem ol seket elda, oli kam long haos blong mifala. Ol Kristin ya oli bigman long saed blong spirit, mo taem we oli spenem wetem famle blong mifala i givim janis long ol pikinini blong mitufala blong luklukgud laef blong olgeta mo lanem fasin blong stap glad long ol samting we oli gat. Gudfala eksampol ya i givim moa paoa long tijing blong mifala, mo ol pikinini oli akseptem trutok blong Baebol long hat blong olgeta.

Mi Kasem Blesing From Mi Fasgud Long God

Tede, mi mo waef blong mi wetem fofala pikinini blong mitufala, mifala i joen long wok blong prij fultaem. Mi stat paenia long 1973. Taem ol yia oli pas, sam samtaem mi mas stopem wok blong fultaem paenia from ol trabol long saed blong mane. Mo tu mi bin gat janis blong tij long Kingdom Ministri Skul, wan skul we i givim trening long ol Kristin elda blong ol Witnes blong Jeova. Tede mi stap wok long Hospital Liaison Committee mo tu mi lukaot long olgeta kongregesen long taon blong Uhonmora.

Tufala faswan gel blong mi, Victory mo Lydia, tufala i mared wetem tu gudfala Kristin elda. Tufala wetem hasban blong tufala oli wok long branj ofis blong ol Witnes blong Jeova long Igieduma, Naejeria. Wilfred, bigfala boe blong mitufala, i man blong givhan, mo Micah, yangfala boe blong mitufala, i haftaem paenia samtaem. Long 1997, Joan i finisim haeskul mo i statem wok blong fultaem paenia.

Wan blong ol nambawan ekspiriens long laef blong mi, hemia taem mi halpem ol narafala blong oli mekem wok blong God. Mi bin halpem sam famle blong mi. Papa blong mi i traehad blong mekem wok blong God, be from we hem i mared wetem plante waef samting ya i blokem hem. Taem mi yang yet, oltaem mi laekem tumas ol man. Taem mi luk ol narafala oli safa, mi harem se ol problem blong mi oli nating nomo. Mi ting se ol man oli harem se mi rili wantem halpem olgeta, mekem se i moa isi long olgeta blong toktok wetem mi.

Wan man we mi halpem hem blong save ol stamba tingting blong God, hem i wan yangfala man we i no save wokbaot, i stap ledaon nomo long bed. Bifo, hem i wok long wan kampani blong mekem lektrik, mo paoa blong lektrik i jokem hem taem hem i stap wok, mekem se haf bodi blong hem i ded. Hem i agri blong stadi long Baebol mo sloslo i akseptem ol samting we hem i lanem. Taem hem i tekem baptaes long Oktoba 14, 1995, long wan smol reva klosap long haos blong mifala, hemia nao fastaem long 15 yia we hem i aot long bed blong hem. Hem i talem se long dei ya, hem i glad moa i bitim ol narafala dei long laef blong hem. Naoia hem i wan man blong givhan long kongregesen.

Mi mas talem se neva mi bin sore we 30 yia bifo, mi bin jusum blong mekem wok blong Jeova wetem ol man we oli givim laef blong olgeta long hem. Mi luk trufala lav i wok long medel blong ol man ya. Nating sipos Jeova i no bin givim hop ya blong laef we i no save finis, be bambae mi mi glad yet blong stap fasgud long God. (1 Timoti 6:6; Hibrus 11:6) Fasin ya blong fasgud long God i lidim laef blong mi mo i holem laef blong mi i stap stret, hem i givim glad, mo i mekem mi mo famle blong mifala i harem moagud.

[Futnot]

[Tok blong pija long pej 25]

Wetem waef blong mi mo ol pikinini blong mi long 1990

[Tok blong pija long pej 26]

Wetem waef blong mi mo ol pikinini blong mi mo hasban blong tufala gel blong mi