Ol Man We Oli Kam Klin Blong Mekem Ol Gudfala Wok
Ol Man We Oli Kam Klin Blong Mekem Ol Gudfala Wok
“Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan. Mo yumi mas traehad blong mekem fasin blong yumi i klin, i tabu, from we yumi stap ona gud long God.”—2 KORIN 7:1.
1. ?Jeova i wantem se ol man we oli wosip long hem oli gat wanem fasin?
“?HU MAN i gat raet blong go antap long hil blong Hae God? ?Hu man i save go insaed long tabu ples ya blong hem?” King Deved blong Isrel bifo i askem kwestin ya long saed blong wosip we God i agri long hem, mo kwestin ya i pulum intres blong yumi. Biaen, hem i ansa long kwestin ya se: “Man we tingting blong hem i klin mo laef blong hem i stret, we i no save mekem wosip long ol giaman god, mo i no save mekem ol giaman promes.” (Ol Sam 24:3, 4) Man we i wantem se Jeova, we i tabu we i tabu, i agri long hem, i mas klin mo tabu. Samtaem bifo, Jeova i mekem kongregesen blong ol man Isrel i tingbaot se: “Oltaem yufala i mas klin long fes blong mi, yufala i mas tabu, from we mi mi tabu, mi klin olgeta.”—Levitikas 11:44, 45; 19:2.
2. ?Olsem wanem Pol mo Jemes i makem se i impoten tumas blong stap klin long trufala wosip?
2 Plante handred yia biaen, aposol Pol i raet long ol Kristin fren blong hem long Korin, wan taon we i fulap long rabis fasin, se: “Olgeta promes ya oli blong yumi, mo from samting ya, yumi mas mekem yumi klin. Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan. Mo yumi mas traehad blong mekem fasin blong yumi i klin, i tabu, from we yumi stap ona gud long God.” (2 Korin 7:1) Tok ya i soemaot se man we i wantem frengud wetem God mo kasem ol blesing we hem i promes, i mas lego ol doti mo kruked fasin mo kam klin long bodi mo wosip. Long sem fasin, disaepol Jemes i tokbaot wosip we God i glad long hem se: “God i papa blong yumi, mo prapa fasin blong ona long hem, we hem i luk se i klin gud mo i stret gud i olsem. Man i mas givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta. Mo hem i mas lukaot gud long laef blong hem, blong i stap klin oltaem, we bambae ol rabis fasin blong wol i no spolem hem.”—Jemes 1:27.
3. ?Blong God i glad long wosip blong yumi, yumi mas tingbaot wanem samting?
3 Fasin blong stap klin, tabu, mo stret gud, i impoten tumas long trufala wosip. Man we i wantem se God i glad long hem i mas traehad blong stap klin. Be, ol man tede oli gat plante defren tingting long saed blong fasin klin se i minim wanem. Taswe, yumi mas kasem save tingting blong Jeova long wanem i klin mo stret gud mo yumi mas folem fasin ya long laef blong yumi. Yumi mas faenemaot wanem we God i wantem ol man blong hem oli mekem. Mo yumi mas save wanem we hem i mekem blong givhan long olgeta blong kam klin mo gohed blong stap klin, blong bambae hem i glad long olgeta.—Ol Sam 119:9; Daniel 12:10.
Stap Klin Long Trufala Wosip
4. Eksplenem tingting blong Baebol long saed blong fasin klin.
4 Bighaf blong ol man, oli ting se fasin klin i min se no kam doti. Be, long Baebol, fasin blong stap klin i kamaot long ol defren tok long Hibru mo Grik we oli no minim klin long bodi nomo. Plante taem ol tok ya oli tokbaot klin long fasin mo wosip. Taswe, wan diksonari long saed blong Baebol i talem se: “Tufala tok ya ‘klin’ mo ‘doti’ [Baebol] i no yusum plante blong tokbaot bodi, be i yusum moa long saed blong wosip. Folem mining blong tok ya, fasin blong stap ‘klingud’ i gat paoa long evri samting long laef blong man.”
5. ?Olsem wanem Loa blong Moses i lidim man Isrel blong stap klin long laef blong hem?
5 Tru tumas, Loa blong Moses i fulap long ol rul we oli soemaot klia long ol man Isrel, wanem fasin i klin mo gud, mo wanem i no klin. Eksampol, long Levitikas japta 11 go kasem 15, yumi faenem plante rul long saed blong fasin we i klin mo i no klin. Sam anamol oli no klin, mo ol man Isrel oli no save kakae olgeta. Woman we i jes bonem pikinini i no klin gogo kasem wan stret taem i pas. Sam sik blong skin olsem leprosi, mo sam sik blong man no woman we i mekem wota no blad i kamaot long bodi blong olgeta, i mekem ol man mo woman ya oli no klin. Mo tu, Loa ya i talemaot wanem we ol man oli mas mekem taem wan long olgeta i no klin. Eksampol, long Namba 5:2, yumi ridim se: “Talemaot long ol laen blong Isrel . . . se . . . Olgeta man long ples blong yufala we oli gat rabis sik long skin blong olgeta, wetem olgeta we oli gat sik, no soa, no wanem, nao blad no wota no wanem i stap kamkamaot long bodi blong olgeta, mo olgeta we oli tajem dedbodi, yufala i mas sanemaot olgeta oli gowe long ples ya we ol haos tapolen blong yufala i stap long hem, oli go stap afsaed.”
6. ?From wanem Jeova i givim ol loa long saed blong fasin klin?
6 I tru se ol loa ya wetem ol narafala loa blong Jeova tu, oli laenap wetem ol save long saed blong meresin mo helt we ol man long taem ya oli no gat save long hem yet. Ol loa ya oli givhan bigwan long ol man we oli folem olgeta. Be, ol loa ya we God i givim oli no jes blong blokem sik mo lidim ol man long saed blong helt. Ol loa ya oli haf blong trufala wosip. Oli laenap wetem ol samting long laef blong man evri dei—olsem kakae, karem pikinini, fasin insaed long mared, mo ol narafala samting olsem. Taswe, ol loa ya oli makem se Jeova, we i God blong olgeta, i gat raet blong jusumaot wanem fasin i gud mo wanem fasin i nogud long laef blong olgeta we oli givim long Jeova finis.—Dutronome 7:6; Ol Sam 135:4.
7. ?Sipos nesen blong Isrel i obei long Loa ya, bambae oli kasem wanem blesing?
7 Kontrak blong Loa i protektem ol man Isrel blong no folem ol rabis fasin blong ol nesen raonabaot long olgeta. Sipos ol man Isrel oli gohed blong obei long Loa ya, mo mekem olgeta samting blong stap klin long fes blong Jeova, bambae hem i agri long olgeta olsem man blong wok blong hem mo bambae oli kasem ol blesing blong hem. Long saed ya, Jeova i talem long nesen ya se: “Sipos yufala i obei long mi, mo yufala i holemgud promes ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man blong wol. Nating we olgeta man long wol ya oli blong mi, be yufala bambae i tabu, yufala i man blong mi nomo, mo bambae yufala i pris blong mi [“yufala i wan kingdom blong pris,” NW ].”—Eksodas 19:5, 6; Dutronome 26:19.
8. ?From wanem ol Kristin tede oli mas lesingud long wanem we i stap long Loa ya long saed blong fasin klin?
8 Olgeta samting ya we Jeova i putum long Loa ya, i blong tijim ol man Isrel blong stap klin mo tabu, mo long rod ya hem i save glad long olgeta. !I gud sipos olgeta Kristin tede oli tingbaot olsem wanem fasin blong olgeta i laenap wetem ol tijing ya! Nating se ol Kristin oli no stap aninit long Loa ya, oli mas tingbaot we, olsem Pol i talem, olgeta samting long Loa ya “oli olsem wan sado nomo, blong ol samting we oli kam biaen. Be samting we i rili tru hem i blong Kraes” (Kolosi 2:17; Hibrus 10:1) Jeova God i talem se “mi no save jenis samtaem.” Taswe, sipos long taem ya hem i tingbaot fasin blong stap klin olsem wan impoten samting long trufala wosip, samting ya i sem mak tede. Blong mekem Jeova i glad long yumi mo i blesem yumi, yumi mas tinghae long fasin blong stap klin, long bodi, fasin, mo wosip.—Malakae 3:6; Rom 15:4; 1 Korin 10:11, 31.
Klin Long Bodi i Soemaot We Yumi Man Blong God
9, 10. (a) ?From wanem i impoten we wan Kristin i stap klin long saed blong bodi? (b) ?Ol man oli stap talem wanem long saed blong ol asembli blong ol Witnes blong Jeova?
9 ?Long trufala wosip tede, i impoten yet we ol man oli stap klin long bodi? I tru se, fasin blong stap klin long saed blong bodi nomo i no mekem se man i kam wan trufala man blong wosip long God. Be nating se i olsem, i stret we wan trufala man blong wosip i klingud long bodi, olsem we hem i naf blong mekem long laef blong hem. Samting ya i tru moa long taem blong yumi from we fulap man oli no tinghevi long fasin blong stap klin long bodi, klos, no ples we oli stap long hem. Taswe, plante taem ol man oli luksave kwiktaem nomo olgeta ya we oli traehad blong stap klin. Gudfala frut i save kamaot from fasin ya, olsem Pol i talem long ol Kristin long Korin se: “Mifala i no wantem we sam man oli save faenem sam rabis poen long ol wok blong mifala. Nao mifala i stap traehad, blong mifala i no mekem sam fasin we narafala man bambae i save foldaon long hem. Long olgeta samting we mifala i mekem, mifala i stap soemaot we mifala i man blong wok blong God.”—2 Korin 6:3, 4.
10 Bakegen mo bakegen, ol man blong gavman oli presem ol Witnes blong Jeova from fasin blong olgeta long ol bigfala asembli blong olgeta, olsem fasin klin, folem oda, mo respek long narafala. Eksampol, niuspepa ya La Stampa i tokbaot wan asembli we ol Witnes oli mekem long provens blong Savona, long Itali, hem i se: “Taem yu wokbaot long ples ya, yu luk klia nomo se ol man we oli mekem asembli ya oli klin mo oli wok folem oda.” Afta long wan asembli blong ol Witnes long wan stad long São Paulo, Brasil, wan long ol bos blong stad ya i talem long man we i lukaot wok blong klinim stad ya i se: “Stat naoia, mi mi wantem se yufala i klinim stad ya olsem we ol Witnes blong Jeova oli mekem.” Wan narafala bos blong semfala stad ya i talem se: “Taem ol Witnes blong Jeova oli wantem yusum stad ya, mifala i wari nomo se stad bambae i fri long ol dei ya we bambae oli mekem asembli. Ol narafala samting mifala i no wari long hem.”
11, 12. (a) ?Wanem rul blong Baebol i save lidim yumi long fasin blong stap klin long bodi? (b) ?Wanem ol kwestin we yumi save askem long saed blong fasin blong laef blong yumi?
11 Sipos ples blong wosip blong yumi i klin mo i gat oda long hem, fasin ya i presem God ya we yumi wosip long hem. Samting ya i tru tu sipos laef blong yumi wanwan i klin mo i gat oda long hem. Be long hom blong yumi wan, maet yumi harem se yumi gat raet blong spel lelebet mo mekem wanem we yumi wantem. ?Mo olsem wanem long fasin blong putum klos mo mekem hea? ?Yumi no fri blong jusum wanem we yumi haremgud long hem mo wanem we yumi laekem? Si yumi fri blong jus, be fasin fri ya i gat mak blong hem. Tingbaot taem ya we Pol i tokbaot fasin fri long saed blong kakae. Pol i givim woning long ol Kristin brata blong hem se: “Yufala i mas lukaot gud. Yes, i fri long yufala, blong yufala i jusum rod blong yufala. Be i nogud yufala i letem fasin ya we yufala i jusum, i spolem sam narafala man we oli no bilif strong, nao bambae oli foldaon long sin.” Biaen hem i gohed i talem impoten rul ya se: “I fri blong yumi mekem evri samting, be i no evri samting we oli gud blong yumi mekem. . . . I fri blong yumi mekem evri samting, be i no evri samting we oli save givhan long yumi.” (1 Korin 8:9; 10:23) ?Olsem wanem advaes ya blong Pol i givhan long yumi long saed blong fasin klin?
12 I stret blong ting se wan man blong wok blong God i mas gat wan laef we i klin mo we i folem oda. Taswe, yumi mas meksua se haos mo yad blong yumi i no pulum ol man blong tok agens long wok we yumi stap mekem blong talemaot Tok blong God. ?Hom blong yumi i givim gudfala witnes long saed blong yumi mo ol bilif blong yumi? ?Hem i soemaot we yumi rili wantem laef long wan niufala wol we i klin, we i gat oda, mo we stret fasin i stap long hem, olsem wol ya we yumi stap talemaot long ol narafala se yumi bilif long hem? (2 Pita 3:13) Long sem fasin, klos mo hea blong yumi—nating se yumi stap spel no yumi stap long wok blong prij—i save pulum man blong lesin no sakemaot mesej we yumi stap talemaot. Eksampol, wan man blong niuspepa long Meksiko i talem se: “Tru ya, bighaf blong ol memba blong ol Witnes blong Jeova oli yangfala nomo, mo samting we i gud tumas blong luk hemia gudfala fasin blong olgeta blong katem hea, stap klin, mo werem klos we i stret.” !Yumi glad tumas we ol yangfala olsem oli stap long medel blong yumi!
13. ?Yumi save mekem wanem blong meksua se laef blong yumi evri dei i klin mo i gat oda long hem?
13 I tru se, i no wan isi samting blong mekem we bodi blong yumi wetem ol samting we yumi yusum i stap klin oltaem, mo blong kipim hom blong yumi i klin mo i gat gudfala oda oltaem. Be blong stap klin, yumi no nidim ol mesin we oli sas no plante spesel tul blong halpem yumi. Samting we yumi nidim hemia wan gudfala program mo fasin traehad oltaem. Yumi mas tekem taem blong swimgud, wasem klos, klinim haos, trak, mo ol narafala samting blong yumi. Yumi bisi long wok blong prij, ol miting, mo blong stadi yumi wan—antap long hemia, i gat ol narafala wok we yumi mas mekem evri dei. Be hemia i no wan eskius blong talem se yumi no save stap klin oltaem mo mekem God mo ol man oli glad long yumi. Rul ya we yumi save gud se i gat wan ‘stret taem blong olgeta samting’ i tru tumas long laef blong yumi, mo long saed blong fasin klin tu.—Prija 3:1.
Wan Hat We i Klingud
14. ?From wanem i impoten moa blong stap klin long fasin mo wosip i winim blong klingud long bodi?
14 I impoten tumas we yumi traehad blong klingud long bodi. Be, i impoten moa blong stap klin long fasin mo wosip blong yumi. Tingting ya yumi kasem taem yumi tingbaot wanem we i hapen long nesen blong Isrel. Jeova i no sakemaot nesen ya from we oli doti long bodi, be from we fasin mo wosip blong olgeta i kam doti. Jeova i yusum profet Aesea blong talem long olgeta se “kantri ya blong yumi i fulap gud long ol fasin nogud. Ol rabis fasin blong yufala i spolemgud yumi.” Jeova i kam taed long ol sakrefaes blong olgeta, ol lafet blong niumun mo sabat, mo tu ol prea blong olgeta. ?Oli mas mekem wanem blong God i glad long olgeta bakegen? Jeova i talem se: “Yufala i mas wasem yufala, blong yufala i kam klin. Yufala i mas finis long ol rabis fasin ya we yufala i stap mekem long fes blong mi. Yufala i mas lego ol fasin ya we oli no stret.”—Aesea 1:4, 11-16.
15, 16. ?Jisas i talem se wanem samting i mekem man i doti, mo olsem wanem ol tok blong Jisas oli save givhan long yumi?
15 Blong kasem save moa from wanem i impoten tumas blong stap klin long fasin mo wosip, tingbaot wanem we Jisas i talem long ol Farisi mo ol tija blong loa. Olgeta ya oli talem se ol disaepol blong Jisas oli doti from we oli stap kakae, be oli no wasem han blong olgeta fastaem. Jisas i stretem olgeta taem hem i talem se: “I no kakae we i go insaed long maot blong man we i save mekem hem i doti long fes blong God. Ol tok we i kamaot long maot blong hem, hemia nao i save mekem hem i doti.” Jisas i gohed i eksplenem se: “Ol tok ya we man i talemaot long maot blong hem, hem i kamaot long tingting [“hat,” NW ] blong hem fastaem. Mo samting ya nao i save mekem man i doti long fes blong God, from we long tingting [“hat,” NW ] blong man nao ol rabis tingting olsem, oli save kamaot. Ol tingting olsem oli save mekem man i kilim man i ded, mo man i mekem i nogud wetem woman, mo i save mekem ol narafala fasin nogud olsem. Mo i save mekem man i stil, mo i giaman, mo i tok nogud blong spolem nem blong narafala man. Hemia nao ol fasin we oli save mekem man i doti long fes blong God. Be fasin ya we man i kakae, be i no wasem han blong hem fastaem, hem i no save mekem man i doti olsem.”—Matiu 15:11, 18-20.
16 ?Yumi save lanem wanem long ol tok blong Jisas? Jisas i soemaot se ol doti mo rabis tingting i stat long hat blong man fastaem, bifo we hem i mekem ol doti mo rabis fasin ya. Olsem we disaepol Jemes i talem se “taem wan man i wantem tumas ol samting nogud, ol fasin nogud oli holem hem, oli pulum hem, nao hem i foldaon long sin.” (Jemes 1:14, 15) Taswe, sipos yumi no wantem mekem ol bigfala sin we Jisas i tokbaot, yumi mas rutumaot ol nogud tingting long hat blong yumi mo no letem oli kam long hat blong yumi bakegen. Hemia i min se, yumi mas lukaotgud long ol samting we yumi ridim, wajem, mo lesin long hem. From we tede ol man oli gat fasin fri blong talemaot tingting blong olgeta, ol kampani we oli wokem pablisiti mo pleplei oli wokem fulap toktok mo pija we oli pulum ol man blong wantem tumas ol rabis fasin. Yumi mas gat strong tingting blong no letem eni nogud tingting i gru insaed long hat blong yumi. Impoten samting hemia se sipos yumi wantem God i glad mo i agri long yumi, yumi mas lukaot gud oltaem se ol samting long hat blong yumi we yumi tingbaot, oli klin gud mo i no save mekem yumi kam doti.—Ol Proveb 4:23.
Kam Klin Blong Mekem Ol Gudfala Wok
17. ?From wanem Jeova i mekem ol man blong hem oli kam klin?
17 Jeova i givhan long yumi blong stap olsem klin man long fored blong hem. Tru ya, fasin ya i wan blesing mo i lukaot gud long yumi. (2 Korin 6:14-18) Be tu, yumi kasem save se Jeova i mekem ol man blong hem oli kam klingud blong mekem wan spesel wok. Pol i talem long Taetas se, Jisas Kraes i “givim laef blong hem blong sevem yumi. Hem i tekemaot yumi long ol fasin blong yumi we i no stret, i mekem yumi fri. Mo hem i mekem yumi . . . we laef blong yumi i klin, yumi man blong hem nomo, mo yumi strong blong mekem ol gudfala samting [“wok,” NW ].” (Taetas 2:14) ?Olsem ol man we oli kam klin, yumi mas strong blong mekem wanem wok?
18. ?Olsem wanem yumi soem se yumi strong blong mekem ol gudfala wok?
18 Faswan mo impoten samting, yumi mas wokhad blong talemaot gud nius blong Kingdom blong God. (Matiu 24:14) Taem yumi mekem olsem, yumi givim hop long ol man blong laef foreva long wan wol we i no gat enikaen doti long hem. (2 Pita 3:13) Mo tu, ol gudfala wok blong yumi i min se yumi soemaot ol frut blong tabu spirit long laef blong yumi evri dei. Long rod ya yumi leftemap nem blong Papa blong yumi long heven. (Galesia 5:22, 23; 1 Pita 2:12) Mo yumi mas tingbaot olgeta we oli no gat save long trutok, we maet oli harem nogud from ol disasta mo ol bigfala trabol we i kasem olgeta. Pol i givim advaes se: “Oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi.” (Galesia 6:10) Olgeta wok ya, we oli kamaot long wan hat mo tingting we i klin, oli mekem se God i glad long yumi.—1 Timoti 1:5.
19. ?Wanem ol blesing we bambae yumi kasem sipos yumi gohed blong holem haefala mak ya blong stap klin long bodi, fasin, mo wosip?
19 From we yumi mekem wok blong Hemia we i Hae Olgeta, yumi lesingud long ol tok blong Pol se: “Ol brata mo sista. From we God i mekem i gud tumas long yumi long plante samting, mi mi talem strong long yufala, se plis yufala i mas givim olgeta laef blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem. Hemia nao prapa wosip we i stret nomo blong yufala i mekem long hem.” (Rom 12:1) I gud yumi gohed oltaem blong tinghae long blesing ya we Jeova i mekem yumi kam klin. Mo i gud yumi traehad blong holem haefala mak ya blong stap klingud long bodi, fasin mo wosip. Sipos yumi mekem olsem, bambae yumi gat respek long yumi wan mo yumi haremgud naoia, be tu bambae yumi luk we “ol samting ya blong bifo”—hemia rabis wol ya wetem ol doti fasin blong hem—oli lus olgeta taem God i “mekem olgeta samting oli kam niuwan bakegen.”—Revelesen 21:4, 5.
?Yu Yu Tingbaot?
• ?From wanem Jeova i givim fulap loa long ol man Isrel long saed blong klin fasin?
• ?Sipos yumi stap klin long saed blong bodi, olsem wanem samting ya i pulum ol man blong lesin long mesej we yumi stap talemaot?
• ?From wanem i impoten moa blong stap klin long fasin mo wosip i winim blong stap klingud long bodi?
• ?Olsem wanem yumi save soemaot se yumi ol man we “yumi strong blong mekem ol gudfala samting”?
[Kwestin]
[Tok blong pija long pej 21]
Klin fasin long bodi i pulum ol man blong lesin long mesej we yumi talemaot
[Tok blong pija long pej 22]
Jisas i givim woning se ol rabis tingting oli lidim man blong mekem ol rabis wok
[Tok blong pija long pej 23]
From we God i mekem we oli kam klin, ol Witnes blong Jeova oli strong blong mekem ol gudfala wok