“Oli Draon Olsem Ston”

“Dipsi ya i kam kavremap olgeta, nao wantaem nomo, oli draon olsem ston.”

WETEM ol tok ya, Moses mo ol man Isrel oli mekem wan singsing blong selebretem taem ya we oli pastru long Red Si, mo taem we Jeova i kilim i ded ol man Ijip we oli ronem olgeta—Fero wetem ol ami blong hem.—Eksodas 15:4, 5.

Eni man we i bin luk bigfala merikel ya i kasem save klia wanem lesen Jeova i wantem givim. Ol man we oli wantem agensem paoa blong Jeova, bambae oli no save stap laef. Nating se i olsem, sam manis afta long merikel ya, sam haeman blong Isrel—Kora, Datan, Abiram mo 250 man we oli sapotem olgeta—oli agensem paoa we Jeova i bin givim long Moses mo Eron.—Namba 16:1-3.

Folem oda blong Jeova, Moses i givim woning long ol man Isrel se oli mas gowe long haos tapolen blong ol rebel. Datan mo Abiram, wetem ol famle blong olgeta, oli no wantem jenisim fasin blong olgeta. Biaen, Moses i talem se Jeova hem wan bambae i soem klia long nesen blong Isrel se “olgeta ya oli tanem baksaed long hem [Jeova].” Nao Jeova i mekem graon i brok i open bigwan stret aninit long leg blong olgeta. “Oli godaon long Hom blong ol Dedman wetem olting blong olgeta. Graon ya i berem olgeta, nao oli lus.” ?Olsem wanem long Kora mo ol narafala rebel? “Nao Hae God i sanem wan faea i kam we i laet bigwan, nao i bonem ol tu handred fifti man ya we oli tekem insens i kam, blong givim i go long hem.”—Namba 16:23-35; 26:10.

Fero wetem ol ami blong hem mo ol rebel ya long drae ples, oli lus from we oli no wantem luksave paoa blong Jeova mo oli ting se Hem i no lukaot gud long ol man blong hem. Taswe, sipos wan man i luksave se Jeova i stap lukaot gud long ol man blong hem long ol lasdei ya, i impoten tumas we man ya i lanem moa long saed blong Jeova, mo hem i mas obei long Jeova olsem “hae God we i hae we i hae” mo we “i gat olgeta paoa.” Sipos ol man oli mekem samting ya, gudfala tok ya blong Jeova bambae i leftemap tingting blong olgeta i se: “Maet wan taosen man we oli stap klosap long yu oli save foldaon, oli ded. Maet ten taosen man we oli stap raonabaot long yu oli save lus evriwan, be ol trabol ya bambae oli no save spolem yu. Bambae yu save luk stret long ae blong yu, we ol man nogud oli stap kasem panis. Hae God i hae we i hae, mo from we yu yu stap putum tingting blong yu i stap long hem, hem bambae i stap blokemgud yu, i stap lukaot gud long yu.”—Ol Sam 91:1, 7-9.