Wan Kwestin

?Sipos wan man i wantem baptaes, be hem i handikap bigwan no helt blong hem i nogud, hem i mas draonem ful bodi blong hem long wota nating se i hadwok long hem?

Tok ya “baptaes” i kamaot long Grik veb ya baʹpto we i min se: “pusum i go long.” (Jon 13:26) Long Baebol, “baptaes” i gat sem mining olsem “draonem [wan samting] long wota.” Long saed blong baptaes we Filip i mekem long man Itiopia ya, The Emphasised Bible, blong Rotherham, i talem se: “Hem wetem Filip, tufala i godaon long wota,—mo Filip i draonem ful bodi blong man ya long wota.” (Ol Wok 8:38) Taswe, wan man we i baptaes i olsem we hem i pusum ful bodi blong hem i go long wota.—Matiu 3:16; Mak 1:10.

Jisas i talem long ol disaepol blong hem se: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta.” (Matiu 28:19, 20) Folem oda ya, ol Witnes blong Jeova oli baptaesem ol man long ol swiming pul, ol lugun, ol reva, no ol narafala ples we i gat naf wota blong draonem ful bodi blong man long hem. Tok blong God nao i givim oda se bodi blong man i mas draon fulwan taem hem i tekem baptaes, taswe ol man oli no gat raet blong talem se i no nidim blong baptaesem wan man. From samting ya, wan man i mas tekem baptaes nating sipos oli mas rerem sam spesel samting from we hem i sik. Eksampol, i gud blong yusum ol bigfala besin blong swim blong baptaesem ol olfala we oli gat trabol long saed blong helt. Sipos i nidim, oli save yusum wota we i hot smol, ale sloslo man we i tekem baptaes i save kam insaed long wota, tekem taem blong lan long wota ya nao oli save draonem ful bodi blong hem.

Ol man we oli handikap bigwan, olgeta tu oli save tekem baptaes. Eksampol, sam man we oli gat wan tracheotomy, * mo sam man we oli nidim wan mesin oltaem blong pulum win, oli bin tekem baptaes. I tru se oli mas reregud bifo we oli baptaes. I waes blong askem wan nes no wan dokta blong stap taem wan man olsem i tekem baptaes. Nomata wanem kaen problem we man i gat, be sipos oli lukaotgud mo oli rerem gud baptaes, klosap eni man i save tekem baptaes. Taswe yumi mas traehad blong baptaesem wan man we i wantem tumas blong tekem baptaes long wota, sipos laef blong hem i no stap long denja, mo sipos man ya i akseptem eni denja we i save kamaot.

[Futnot]