?Wanem Tingting Blong Yu Long Saed Blong Ded?

NATING se bodi blong yumi i strong gud, nating sipos yumi rij tumas, be tingting ya se bambae yumi mas ded samtaem i mekem se yumi no save glad fulwan long laef blong yumi evri dei. Ded i save kasem yumi taem yumi krosem rod no taem yumi slip long bed. Ol trabol olsem ol teroris oli bin mekem long Septemba 11, 2001, long New York mo Washington, D.C., oli mekem yumi luksave se ded, we i “laswan blong ol enemi” blong yumi, i save kasem enikaen man nating se oli yangfala no olfala. Samtaem hem i kasem plante taosen man wantaem nomo.—1 Korin 15:26.

Nating se ded i wan nogud samting olsem, be plante man oli intres long hem. Plante moa man oli pem niuspepa mo lukluk televisin taem i gat ol ripot long saed blong ded, antap moa taem bigfala hip blong man i ded long wan fasin we i nogud olgeta. I luk olsem se ol man oli no taed blong harem ol ripot blong ded, nating sipos man i ded long faet, long hariken no graon i seksek, taem narafala i kilim hem i ded, no i ded from sik. Taem wan haeman no wan bigfala man blong singsing no sinema i ded, ol man oli krae bigwan mo soemaot bigfala filing. Hemia tu i wan narakaen fasin we i soemaot se man i gat strongfala intres long saed blong ded.

Yes, yumi luk klia nomo filing we ol man oli gat long saed blong ded. Oli gohed blong intres long ded, hemia ded blong ol narafala man. Be oli no wantem tingbaot ded blong olgeta wanwan. Prapa ded blong yumi i wan samting we yumi no wantem tingbaot no tokbaot.

?Tingting Blong Yu i Fasfas Long Saed Blong Ded?

Yumi no wantem tingbaot prapa ded blong yumi, mo bambae i olsem olwe. ?From wanem? Hemia from we God i putum wan tingting insaed long yumi se yumi wantem tumas blong laef olwe. Prija 3:11 i talem se: “Hem i mekem yumi, we long tingting blong yumi, oltaem yumi wantem tumas blong save ol samting we bambae i kamtru long fiuja.” From we ol man oli save se oli mas ded, be oli no wantem ded, hemia i mekem we tingting blong olgeta i fasfas. Blong winim tingting ya we i fasfas, mo blong harem gud long tingting ya blong wantem gohed blong laef, oli mekemap plante kaen bilif, olsem tijing ya se sol i no save ded samtaem, mo bilif ya se afta we man i ded, hem i laef bakegen long wan narafala laef.

Nating se oli mekem olsem wanem, be i tru nomo se ded i wan samting we i mekem man i fraet mo i mekem tingting blong man i trabol, mo long evri ples, ol man oli fraet long ded. Taswe, yumi no mas sapraes se bighaf blong ol man oli tingbaot ded olsem wan traem we i stap fored long olgeta. Wan samting we oli tingbaot se, i blong nating nomo we yumi spenem laef blong yumi blong ronem ol rij samting mo paoa, from we en blong rod ya i ded nomo.

?Stap Yu Wan Blong Ded?

Bifo, taem wan man i kasem kil we i mas karem ded, no i kasem wan sik we dokta i no save winim, oli  letem hem blong i go ded long haos blong hem. Long ples ya, ol famle blong hem we oli laekem hem oli stap klosap long hem. Samting ya i bin hapen long taem blong Baebol, mo tede, i stap yet long kastom blong sam ples. (Jenesis 49:1, 2, 33) Long ol ples olsem, ol famle oli kam wanples, mo ol pikinini oli joen blong storian tu. Hemia i mekem wanwan memba blong famle i filim se hem i no stap harem nogud hem wan. Mo i leftemap tingting blong famle moa taem oli joen blong serem wok long saed blong ded ya mo blong serem sore.

Hemia i defren olgeta long samting we i stap hapen long ol ples we ol man oli gat tingting se i tabu blong tokbaot ded. Oli ting se ded i wan rabis samting blong tokbaot, mo se ol pikinini oli no mas stap klosap taem oli tokbaot ded from we bambae i “hevi tumas” long olgeta. Long taem blong yumi, plante samting long saed blong ded oli defren—mo plante man oli stap olgeta nomo taem oli ded. Plante oli wantem ded long haos blong olgeta long pis, mo we famle blong olgeta i lukaot gud long olgeta wetem lav. Be fulap oli ded long hospital, we oli stap olgeta nomo, oli harem i soa tumas long bodi blong olgeta, mo plante rop blong ol defdefren mesin oli fas long olgeta. Mo tu, plante milian man oli jes ded olsem nomo we i no gat man i save long olgeta, olsem ol man we oli ded taem wan laen i traem kilimaot narafala laen blong man, no oli ded from hanggri, from AIDS, from faet we i kamaot long kantri blong olgeta, no jes from we oli pua tumas.

Wan Poen Blong Tingting Dip Long Hem

Baebol i no talem se yumi no mas tingbaot ded. Prija 7:2 i talem se: “Sipos yu go long wan haos we dedman i stap long hem, we ol man oli stap krae long hem, hemia i save givhan moa long yu, i winim we yu go long wan haos we i gat lafet long hem, from we yumi ya we i stap laef yet, i stret blong yumi stap tingbaot oltaem, we bambae yumi evriwan i mas ded.” Taem ded i kam klosap, ating yumi jenisim ol tingting mo wok blong yumi from we yumi luksave se laef i sot tumas. Hemia i save halpem yumi blong yusum gud laef blong yumi i bitim we yumi laef long wan fasin we yumi westem taem mo paoa blong yumi blong nating nomo.

?Wanem tingting blong yu long saed blong ded? ?Yu yu bin jekem filing, bilif, hop, mo fraet we yu yu gat long saed blong en blong laef blong yu?

Ol man oli no kasem save long ded mo oli no save eksplenem, hemia

i sem mak long saed blong laef tu. Wan nomo we i save gud long saed ya hemia Man we i Wokem yumi. Hem i “stamba blong laef blong olgeta samting,” mo “hem i stap holem yumi, yumi stap laef.” (Ol Sam 36:9; 68:20) Maet bambae yu sapraes taem yu skelem sam bilif we plante man oli holem long saed blong ded wetem Tok blong God. Ating bambae yu faenem se save ya i mekem tingting blong yu i harem gud mo i stap kwaet. Bambae yumi faenemaot se ded i no en blong evri samting.

[Tok blong makem poen long pej 4]

From we yumi save ded enitaem nomo, samting ya i mas pusum yumi blong yusum gud laef blong yumi