Lanem Mo Tijim Ol Kristin Rul Blong Gudfala Fasin
Lanem Mo Tijim Ol Kristin Rul Blong Gudfala Fasin
“Yufala i save tijim ol narafala man. ?Be from wanem yufala i no save tijim yufala bakegen?”—ROM 2:21.
1, 2. ?Wanem ol risen we maet oli mekem we yu yu wantem stadi Baebol?
I GAT plante risen from wanem yu wantem stadi long Tok blong God. Maet yu wantem save moa long saed blong sam samting insaed long Baebol—olsem ol man, ol stori, ol ples we Baebol i tokbaot, mo narafala samting bakegen. Maet yu wantem save trutok blong sam stamba tijing mo luk olsem wanem oli defren long wanem we plante jos oli tijim, olsem tijing blong Triniti mo helfaea. (Jon 8:32) Be tu, i gud sipos yu wantem save Jeova moa, blong folem fasin blong hem moa mo mekem ol fasin we oli stret long fes blong hem.—1 King 15:4, 5.
2 Wan impoten risen from wanem yumi mas stadi long Tok blong God hemia from we yumi wantem kam naf blong tijim ol narafala. Ol narafala ya maet hemia famle blong yumi, ol gudfala fren blong yumi, no maet olgeta ya we yumi no save olgeta yet. Wok ya blong tijim narafala i no wan samting we ol trufala Kristin oli save jusum se oli wantem mekem no nogat. Jisas i talem long ol disaepol blong hem se: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.”—Matiu 28:19, 20.
3, 4. ?From wanem i stret blong tinghae long wok blong tijim narafala folem oda blong Jisas?
3 I stret blong man we i stadi Baebol i wantem tijim ol narafala. Man olsem i save kasem glad we i stap oltaem. Wok ya blong tij i wan wok we longtaem finis, plante man oli tinghae long hem. Diksonari ya Encarta Encyclopedia i talem se: “Long lukluk blong plante man mo woman Jiu, ol tija oli save lidim narafala blong oli sef. Taswe oli pulum ol pikinini blong ona moa long ol tija i winim we oli ona long papa mama blong olgeta.” Ol Kristin we oli stadi Baebol blong tijim olgeta wan mo biaen tijim ol narafala tu, oli mekem wan gudfala wok.
4 Wan narafala diksonari, The World Book Encyclopedia i talem se “Ol man oli joen moa long wok blong tij i winim eni narafala wok. Raonabaot 48 milian man mo woman raonabaot long wol oli mekem wok olsem tija.” Wan tija long wan skul blong pikinini i gat wok blong tijim ol yangfala, mo ol samting we hem i talem oli save gat paoa long ol yangfala ya blong plante yia. Be taem yumi obei long oda we Jisas i givim blong tijim narafala, yumi save givhan long narafala long fasin we i bigwan moa. Tijing we yumi givim long olgeta i save jenisim fiuja blong olgeta blong olwe. Aposol Pol i mekem poen ya i klia taem hem i talem long Timoti se: “Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.” (1 Timoti 4:16) Yes, tijing we yumi givim i save sevem laef blong man.
5. ?From wanem Kristin wok blong tijim man i hae moa?
5 Haefala Masta blong heven mo wol, hem nao i givim oda mo i biaenem fasin ya blong tijim yu wan mo ol narafala. From risen ya nao, fasin ya i hae moa i winim eni narafala wok blong tij, olsem wok blong tijim ol pikinini long skul, no blong tijim ol man long wan wok, no blong givim save long meresin. Kristin wok blong tijim man i halpem wan studen blong hem wan i folem fasin blong Pikinini blong God, hemia Jisas Kraes, mo blong tijim ol narafala tu blong mekem sem mak.—Jon 15:10.
?From Wanem Yu Mas Tijim Yu Wan?
6, 7. (a) ?From wanem yumi mas tijim yumi wan fastaem? (b) ?From wanem ol tija blong ol man Jiu long faswan handred yia oli no mekem gud wok ya blong tij?
6 ?From wanem yumi mas tijim yumi wan fastaem? From we yumi no save tijimgud ol narafala sipos yumi no tijim yumi wan fastaem. Pol i soemaot se samting ya i impoten taem hem i tok blong wekemap tingting blong ol man Jiu bifo. Tok blong hem i karem wan impoten mesej we i stret long ol Kristin tede tu. Hem i askem se: “Yufala i save tijim ol narafala man. ?Be from wanem yufala i no save tijim yufala bakegen? Yufala i stap talem long olgeta se, ‘Bambae yu no mas stil.’ ?Be from wanem yufala i stap stil? Yufala i stap talem se, ‘Bambae yu no mas stilim woman blong narafala man.’ ?Be from wanem yufala i stap stilim woman? Yufala i stap lukluk nogud long ol narafala god, se oli rabis. ?Be from wanem yufala i stap stilim ol samting long ol haos blong wosip blong olgeta? !Yufala i stap tok flas from we yufala i gat Loa blong God, be yufala nao i stap spolem nem blong hem long fasin ya we yufala i stap brekem Loa blong hem!”—Rom 2:21-23.
7 Wetem ol kwestin ya, Pol i soemaot tufala fasin we ol Tenkomanmen oli talem stret se tufala i rong, hemia se: Yufala i no mas stil, mo yufala i no mas slip wetem woman blong narafala. (Eksodas 20:14, 15) Sam man Jiu long taem blong Pol oli flas from we olgeta nao oli holem Loa blong God. ‘Loa ya i tijim olgeta finis, mo from we oli save Loa ya, oli ting se oli savegud fasin blong lidim ol blaenman, mo oli save givim laet long olgeta we oli stap yet long tudak. Oli ting se oli save lanem ol pikinini.’ (Rom 2:17-20) Be sam long olgeta ya oli gat tu fes from we long fasin haed oli stap stil no oli stap slip wetem ol woman blong narafala man. Ol fasin ya oli sakem doti long Loa mo long Bigman long heven we hem nao i stanemap loa ya. Yumi luk se olgeta ya oli no naf nating blong tijim ol narafala from we oli no stap tijim olgeta fastaem.
8. ?Ating sam man Jiu long taem blong Pol oli stap ‘stilim samting long wan haos blong prea’ olsem wanem?
8 Pol i tokbaot fasin blong stilim samting long haos wosip. ?I gat sam man Jiu we oli rili mekem samting ya? ?Pol i stap tingbaot wanem taem hem i talem olsem? From we vas ya i no klia moa long poen ya, yumi no save talem stret se olsem wanem nao sam man Jiu oli bin ‘stilim samting long wan haos blong prea.’ Bifo we Pol i raetem tok ya, taon klak blong Efesas i talemaot se ol fren blong Pol oli no ‘stilim samting long wan haos prea.’ Tok blong man ya i soemaot se ol man Jiu oli gat fasin ya blong stil long ol haos prea. (Ol Wok 19:29-37) ?Wanem nao we oli stap mekem? ?Oli stap yusum no salem sam tabu samting blong ol haos prea blong ol hiten man we maet sam soldia oli bin karem i kam taem oli winim faet agensem narafala kantri no we maet skul blong ol silot i stilim long narafala man? Sipos i olsem, oli stap mekem rong from we Loa blong God i talem se oli mas spolem olgeta gol mo silva blong ol aedol ya, oli no mas kipim i blong olgeta. (Dutronome 7:25) * Taswe maet Pol i stap tokbaot ol man Jiu ya we oli no obei long oda blong God mo oli stap yusum ol samting we oli kamaot long haos prea blong ol hiten man.
9. ?Wanem nogud samting we ol man oli mekem we i sem mak nomo olsem se oli stil long tempol ya?
9 Josephus i tokbaot wan bigfala trabol we fo man Jiu oli mekem long Rom. Man we i biaenem trabol ya hem i wan tija blong Loa. Fofala man ya oli pulum wan woman Rom, we hem i joenem skul blong ol man Jiu, blong givim ol gol mo narafala sas samting i go long fofala ya blong oli karem i go olsem presen blong tempol long Jerusalem. Be taem fofala ya i kasem ol sas samting ya, oli yusum blong olgeta nomo—i olsem we oli stil long tempol. * Sam narafala man Jiu oli stap stil long tempol blong God from we oli givim ol sakrefaes we oli nogud mo oli stap mekem bisnes insaed long hem. Oli mekem tempol “i kam ples blong haed blong ol man blong stil.”—Matiu 21:12, 13; Malakae 1:12-14; 3:8, 9.
Tijim Ol Kristin Rul Blong Gud Fasin
10. ?Wanem bigfala poen long toktok blong Pol long Rom 2:21-23 we yumi no mas mestem?
10 Nomata wanem kaen nogud fasin we ol man oli stap folem long faswan handred yia, olsem stil, slip wetem woman blong narafala, no stil long ol haos prea, i nogud yumi mestem bigfala poen long toktok blong Pol. Hem i askem se: “Yufala i save tijim ol narafala man. ?Be from wanem yufala i no save tijim yufala bakegen?” I gud blong makem we ol eksampol we Pol i givim oli tokbaot fasin blong man. Aposol Pol i no stap pulum tingting blong yumi i go long sam tijing blong Baebol no sam stori blong samting we i hapen bifo. Pol i tokbaot se yumi mas tijim yumi wan mo ol narafala blong folem ol Kristin rul blong gud fasin.
11. ?Taem yu stadi long Tok blong God, from wanem i impoten we yu tingbaot ol Kristin rul blong gud fasin?
11 Blong folem lesen we i stap long Rom 2:21-23, yumi mas letem Tok blong God i tijim yumi long ol Kristin rul blong gud fasin. Ale yumi mas mekem ol samting we yumi lanem i wok long laef blong yumi, mo tijim ol narafala blong mekem olsem. Taswe, taem yumi stadi long Baebol, i gud yumi lukluk gud long eni toktok no advaes we oli soemaot tingting blong Jeova, from we ol rul blong Kristin gud fasin oli stanap long samting ya. Yumi mas tingting dip long ol advaes mo ol lesen we yumi faenem long Baebol. Ale yumi mas mekem samting we yumi lanem i wok long laef blong yumi. Mo blong mekem olsem yumi mas winim fraet mo yumi nidim strong tingting. I isi long ol sinman blong faenem sam eskius no sam risen blong talem se wan traem i had tumas nao i no gat rod blong gohed folem ol Kristin rul blong gud fasin. Ol man Jiu we Pol i tokbaot olgeta, ating olgeta tu oli stat karem ol tingting ya we oli faenem eskius no lidim ol narafala oli gorong. Be toktok blong Pol i soem se yumi no gat raet blong ting nating no fogetem ol Kristin rul blong gud fasin, jes from we yumi no wantem folem olgeta.
12. ?Ol gudfala fasin no ol rabis fasin oli save mekem wanem long Jeova God, mo from wanem i gud blong tingbaot samting ya oltaem?
12 Aposol Pol i soemaot stamba risen from wanem yumi mas lanem mo folem ol gud fasin we yumi faenem long Baebol. Nogud fasin blong ol man Jiu i sakem doti long nem blong Jeova: “!Yufala i stap tok flas from we yufala i gat Loa blong God, be yufala nao i stap spolem nem blong hem long fasin ya we yufala i stap brekem Loa blong hem! Samting ya i olsem tok blong Baebol we i talem se, ‘!Ol laen blong Isrel! !Ol hiten man oli stap tok nogud long nem blong God, be i fol blong yufala nomo!’ ” (Rom 2:23, 24) Long taem blong yumi i sem mak. Sipos yumi ting nating long ol Kristin rul blong gud fasin, yumi no stap soem respek long Bigman ya we i Stamba blong ol gud fasin ya. Be sipos yumi holem strong long ol rul blong God, yumi mekem fasin we i leftemap nem blong hem, mo yumi ona long hem. (Aesea 52:5; Esikel 36:20) Sipos yu luksave samting ya bambae tingting blong yu i strong moa blong holem gudfala fasin taem wan samting i traem yu no taem yu harem se maet i isi moa blong lego smol ol Kristin rul blong stret fasin. Mo tu, ol tok blong Pol oli tijim yumi long wan narafala samting. Yumi luksave se fasin blong yumi i save leftemap God no sakem doti long nem blong hem. Be antap long hemia, taem yumi tijim ol narafala, yumi mas halpem olgeta tu blong luksave se ol fasin we bambae oli mekem, folem wanem we oli lanem, i save leftemap nem blong Jeova. Ol gudfala Kristin fasin oli no blong mekem yumi glad nomo mo oli no blong blokem helt blong yumi long ol sik nomo. Nogat. Ol Kristin rul blong gud fasin oli blong leftemap nem blong God, we i givim ol rul ya mo askem yumi blong folem olgeta.—Ol Sam 74:10; Jemes 3:17.
13. (a) ?Olsem wanem Baebol i givhan long yumi blong luksave ol fasin we oli gud long fasin we i nogud? (b) Givim bigfala tingting we i stap long 1 Tesalonaeka 4:3-7.
13 Ol fasin blong yumi, we maet oli gud no maet oli nogud, oli save gat paoa long narafala man tu. Yumi luk samting ya long ol stori long Tok blong God we oli soem gudfala frut we i kamaot from ol rul blong God mo nogud frut we i kamaot taem man i no folem ol rul ya. (Jenesis 39:1-9, 21; Josua 7:1-25) Yumi save ridim ol advaes long saed blong gudfala fasin we i stret mo klia olsem hemia: “God i wantem we yufala i tabu, yufala i man blong hem, we yufala i no mekem trabol wetem woman no wetem man. Hem i wantem we yufala evriwan i lanem fasin ya we man i tekem woman blong hem long fasin we i klin gud, i blong ona nomo. Bambae yufala i no folem ol rabis fasin wetem woman we tingting, blong yufala nomo i wantem, olsem we olgeta we oli no save God oli stap mekem. Long ol fasin ya, God i no wantem nating we samtaem, wan long yufala i mekem i nogud long wan narafala Kristin man, [“i no mas gat wan long yufala we i bitim mak from we i spolem brata blong hem, i spolem raet blong hem,” NW ]. . . . God i no singaot yumi blong yumi stap folem ol fasin we i no klin long fes blong hem. Hem i wantem blong yumi tabu, yumi man blong hem.”—1 Tesalonaeka 4:3-7.
14. ?Wanem sam kwestin we yu save askem long yu wan long saed blong advaes we i stap long 1 Tesalonaeka 4:3-7?
14 Eniman we i ridim vas ya i luksave klia se rabis fasin long saed blong seks i go agensem ol Kristin rul blong gud fasin. Be yumi save kasem moa save long saed ya. Sam haf blong vas ya i openem rod blong stadi mo tingting dip, mo i mekem we save blong yumi long vas ya i kam antap moa. Eksampol, maet yu wantem tingting gud long mining blong tok blong Pol taem hem i talem se man we i slip wetem woman blong narafala man i “bitim mak from we i spolem brata blong hem, i spolem raet blong hem.” ?Wanem ol raet ya we Pol i tokbaot? ?Mo olsem wanem save we yu kasem long saed blong ol raet ya bambae i mekem tingting blong yu i strong moa blong holem gudfala Kristin fasin? ?Olsem wanem save we yu kasem long saed ya i save rerem yu moa blong tijim ol narafala mo halpem olgeta blong ona long God?
Yumi Stadi Blong Yumi Naf Blong Tij
15. ?Wanem ol tul we yu save yusum blong tijim yu wan taem yu mekem stadi?
15 Ol Witnes blong Jeova oli gat ol tul we oli save yusum taem oli stadi blong tijim olgeta wan no blong tijim narafala. Ol tul ya oli halpem olgeta blong faenem ansa long ol kwestin no blong faenem moa save long wan poen. Wan tul we i stap long plante lanwis naoia hemia Watch Tower Publications Index. Sipos i gat buk ya long wan lanwis we yu save, i gud blong yusum hem blong faenem ol save we oli stap long ol buk we ol Witnes blong Jeova oli wokem blong tokbaot Baebol. Yu save lukaot save blong wan wod no wan vas sipos yu jekem lis we i stap aninit long wod no vas ya. Wan narafala tul we ol Witnes blong Jeova oli save yusum long sam stamba lanwis blong wol hem i Watchtower Library long CD-ROM. Hemia wan program we oli yusum long kompiuta mo hem i holem plante buk blong sosaeti. Program ya i halpem man blong lukaot save blong sam poen long Baebol. Sipos yu gat wan long tufala tul ya, no maet yu gat tufala tugeta, traem bes blong yusum ol tul ya oltaem taem yu stadi long Tok blong God blong tijim narafala.
16, 17. (a) ?Weples yu save faenem moa save long saed blong ol raet we 1 Tesalonaeka 4:6 i tokbaot? (b) ?Olsem wanem wan man we i slip wetem woman we i no woman blong hem i spolem raet blong narafala?
16 Tekem eksampol sipos yu wantem save moa long saed blong 1 Tesalonaeka 4:3-7. Kwestin we yumi wantem save hem i long saed blong ol raet. ?Pol i minim ol raet blong hu? ?Mo olsem wanem maet yumi spolem raet ya? Sipos yu yusum tufala tul ya we yumi tokbaot finis, yu save faenem plante tok we oli givim save long ol vas ya, mo long ol raet ya tu we Pol i tokbaot. Yu save ridim moa save long ol buk olsem Insight on the Scriptures, Buk 1, pej 863 mo 864 (pej 920 mo 921 long Franis); True Peace and Security—How Can You Find It?, pej 145; Wajtaoa blong Novemba 15, 1989, pej 31.
17 Taem yu gohed blong stadi long saed ya, bambae yu luk long ol buk ya se ol tok blong Pol oli tru tumas. Wan man we i slip wetem woman we i no woman blong hem, i sin agensem God mo i pulum ol sik oli kam long hem wan. (1 Korin 6:18, 19; Hibrus 13:4) Man we i slip wetem woman we i no woman blong hem, hem i spolem raet blong woman ya. Hem i mekem we woman ya i no moa klin mo i mekem tingting blong woman ya i stikim hem. Sipos woman ya i no mared yet, man ya i spolem raet we woman ya i gat blong mared olsem wan vejin. Mo tu, hem i spolem hasban we woman ya bambae i karem biaen, we i gat raet blong wantem se woman blong hem i wan vejin. Taem wan man i slip wetem woman bifo mared, hem i spolem papa mama blong woman ya, mo sipos woman ya i mared finis, hem i spolem hasban blong woman ya. Man ya we i mekem sin i spolem nem blong famle blong hem tu. Hem i mekem we ol narafala oli gat nogud tingting long saed blong famle blong hem. Sipos man ya i wan memba blong Kristin kongregesen, hem i sakem doti no i spolem gudnem blong kongregesen tu.—1 Korin 5:1.
18. ?Wanem blesing we yu kasem taem yu stadi Baebol blong kasem moa save long ol Kristin rul blong gud fasin?
18 Ol save ya we yumi kasem long ol raet we vas ya i tokbaot oli mekem vas ya i kam klia moa long yumi. Tru ya, fasin blong stadi olsemia, i save mekem i gud tumas long yumi. Taem yu gohed blong stadi olsem, yu stap tijim yu wan. Bambae yu luksave moa we mesej blong God i tru mo i gat paoa. Yu mekem tingting blong yu i strong moa blong wantem holem ol Kristin rul blong gud fasin nomata wanem kaen traem i kasem yu. !Mo tu, tingbaot se bambae yu gat plante gudfala save blong givim long narafala we yu tijim hem! Eksampol, taem yu tijim ol trutok blong Baebol long narafala, yu save givim moa save long 1 Tesalonaeka 4:3-7. Nao bambae yu mekem we save blong olgeta i gru, be tu, bambae yu givhan long olgeta blong luksave se ol Kristin rul blong gud fasin oli impoten tumas. Yes, taem yu mekem stadi yu wan, yu givhan long yu mo plante narafala man tu blong ona long God. Mo long ples ya yumi tokbaot wan eksampol nomo we i kamaot long leta blong Pol i go long ol man Tesalonaeka. I gat plante moa samting blong lanem long saed blong ol Kristin rul blong gud fasin. Be tu, i gat plante samting bakegen long ol stori blong Baebol no advaes we yumi save stadi long hem, folem, mo tijim long narafala.
19. ?From wanem i impoten tumas we yumi holemtaet ol Kristin rul blong gud fasin?
19 I klia fulwan se yumi waes taem yumi folem ol Kristin rul blong gud fasin. Jemes 3:17 i talem se “waes we i kam long heven,” long Jeova God stret, “hem i klingud.” Hemia i min se yumi mas folem ol rul we God i putum long saed blong fasin we i gud mo fasin we i nogud. Yes, Jeova i wantem se olgeta man we oli tijim Baebol long nem blong hem oli mas soem gudfala eksampol mo fasin we i ‘stap mekem laef blong yumi i klingud.’ (1 Timoti 4:12) Fasin blong laef we Pol mo Timoti tufala i folem, i pruvum se tufala i gat fasin we i klingud. Tufala i no letem ol nogud fasin oli winim tufala. Taswe Pol i raetem se: “From we yufala i tabu, mo yufala i man blong God, i no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman mo ol narafala krangke fasin olsem, mo fasin blong man we i wantem evri samting, bambae yufala i no tokbaot. Mo i no stret blong yufala i yusum ol rabis tok we i save mekem man i sem, mo ol tok we i save mekem man i harem nogud, mo ol tok plei we i nogud.”—Efesas 5:3, 4.
20, 21. ?From wanem yu yu agri wetem ol tok blong aposol Jon, we i stap long 1 Jon 5:3?
20 Ol rul blong fasin we i gud mo fasin we i nogud oli raetem klia nomo long Tok blong God. Mo oli no hevi tumas blong folem. Hemia samting we Jon i agri long hem. Jon i wan long ol aposol we i laef longtaem moa i bitim ol narawan. Hem i luk plante samting long laef blong hem, mo from samting ya hem i save se ol Kristin rul blong gud fasin oli no spolem man. Defren olgeta, ol rul ya oli wokgud, oli mekem i gud long man, mo oli karem blesing. Jon i mekem samting ya i klia taem hem i raetem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.”—1 Jon 5:3.
21 Be long ples ya Jon i no min se man i obei long God mo i folem ol Kristin rul blong gud fasin nomo from we samting ya i save blokem hem long ol trabol. Hem i no minim tu se man i mas mekem olsem from we sipos hem i no mekem bambae i kasem panis. Nogat. Jon i givim stret tingting we yumi mas gat long saed blong fasin obei, taem hem i talem se yumi mekem fasin ya blong soemaot we yumi lavem Jeova God. Yes, fasin obei hem i wan janis blong soem lav blong yumi long Jeova. Taem yumi tijim yumi wan mo narafala blong lavem God, yumi mas agri mo folem ol haefala rul blong hem. Tru ya, hemia i min se yumi mas tijim ol Kristin rul blong gud fasin long yumi wan mo long ol narafala.
[Ol Futnot]
^ Josephus i talem se ol man Jiu oli man we oli ona long ol samting we oli tabu. Be yet, hem i yusum ol tok ya blong talem bakegen loa blong God se: “I nogud yumi daonem ol god we ol narafala taon oli stap wosipim, mo i nogud yumi stilim samting long haos prea blong narafala man, i nogud yumi tekem ol sas samting we long lukluk blong narafala man oli tabu, oli blong god blong olgeta.” (Mifala nomo i putum italik.)—Jewish Antiquities, Buk 4, japta 8, paragraf 10.
^ Jewish Antiquities, Buk 18, japta 3, paragraf 5.
?Yu Yu Tingbaot?
• ?From wanem yumi mas stadi blong tijim yumi wan bifo ol narafala?
• ?Olsem wanem fasin blong yumi i save leftemap no sakem doti long nem blong Jeova?
• ?Wan man we i slip wetem woman we i no woman blong hem, hem i spolem raet blong hu?
• ?Wanem strong tingting we yu gat long saed blong ol Kristin rul blong gud fasin?
[Kwestin]
[Tok blong pija long pej 22]
“Ol tok blong hem i no strong tumas blong folem”