!Ol Trabol Long Wol Klosap Nao Oli Finis!

“OL GUDFALA wok blong givhan long ol man oli no save wokgud sipos oli no gat sapot blong sam narafala paoa olsem sam bigfala ogenaesesen no politik paoa, we olgeta nao bambae oli save rutumaot stamba blong ol trabol. Ol samting we oli hapen finis oli soem bakegen mo bakegen se ol gudfala wok blong givhan long man oli no naf blong winim ol trabol we stamba blong ol trabol ya i kamaot from politik.”—The State of the World’s Refugees 2000.

Nating se i gat plante man we oli wantem givhan, be ol trabol blong wol ya oli stap kam antap oltaem. ?Politik i save winim mo finisim ol trabol ya blong olwe? Blong talem tru, i no gat plante hop se bambae oli naf blong mekem olsem. ?Taswe hu i save givhan? Long wan impoten vas long stat blong leta we aposol Pol i raetem i go long ol Kristin blong Efesas, Pol i eksplenem olsem wanem bambae God i finisim olgeta trabol blong wol ya. Mo tu, Pol i talemaot wanem tul we bambae God i yusum—wan tul we bambae i rutumaot stamba blong olgeta trabol we oli spolem yumi tede. ?Yu wantem save wanem we Pol i talem long saed blong samting ya? I gud blong ridim Efesas 1:3-10.

“Hivimap Bakegen Olgeta Samting Long Han Blong Kraes”

Aposol Pol i talem se stamba tingting blong God, i “blong mekem fasin blong lukaot long ol samting [no fasin blong lidim wan bisnes] i stanap long stret taem we God i makemaot finis.” ?Wanem mining blong tok ya? Hem i min se God i jusum finis wan stret taem blong “hivimap bakegen olgeta samting long han blong Kraes, ol samting long heven mo ol samting long wol.” (Efesas 1:10, NW ) Yes, God i stat yusum wan rod blong hivimap bakegen ol samting long heven mo long wol blong mekem oli joengud bakegen aninit long paoa blong hem. Yumi intres blong makem se long saed blong tok ya “hivimap bakegen,” J. H. Thayer, wan man blong mekem dip stadi long Baebol i talem se: “God i joenem bakegen . . . olgeta samting mo olgeta man (we kam kasem naoia oli stap seraot from sin) blong oli kampani mo oli wosip tugeta, aninit long Kraes.”

Hemia i soem se God nomo i mas stretem ol trabol, taem yumi tingbaot olsem wanem fasin seraot i stat. Faswan papa mama blong yumi, Adam mo Iv, tufala i folem Devel Setan blong rebel agens long  God. Oli wantem kam independen, we i min se oli wantem fri blong jusum wanem i gud mo wanem i nogud long laef blong olgeta. (Jenesis 3:1-5) From we God i jajem man long stret fasin, hem i putumaot Adam mo Iv long famle blong hem, nao tufala i no moa fren wetem hem. From tufala ya, olgeta man oli bon wetem sin, mo tede yumi savegud ol nogud frut we oli kamaot from sin ya.—Rom 5:12.

God i Letem Rabis Fasin i Stap Blong Smoltaem

Maet sam man oli askem se: ‘?From wanem God i letem tufala i mekem samting ya? ?From wanem hem i no yusum bigfala paoa blong hem blong gohed nomo folem samting we hem i wantem, mo blokem olgeta soa mo fasin safa we yumi stap fesem tede?’ I isi blong gat wan tingting olsem. ?Be sipos God i yusum bigfala paoa blong hem blong mekem olsem, bambae hem i pruvum wanem? ?Sipos wan man i gat paoa, mo i yusum paoa ya kwiktaem nomo blong spolem eni man we i stat agiu long disisen blong hem, bambae yu save tinghae mo laekem man ya? Nogat.

Ol rebel ya oli no rili agensem bigfala paoa blong God. Be oli agensem raet we God i gat blong rul long man, mo oli talem se rul blong God i no stret. Taswe, blong stretem problem ya wantaem mo blong olwe, Jeova i letem ol man we hem i wokem oli rulum olgeta blong smoltaem. (Prija 3:1; Luk 21:24) Taem smoltaem ya i finis, bambae Jeova i girap blong karembak paoa blong rulum ol man blong wol. Long taem ya bambae i klia fulwan se rul blong Jeova nomo i save givim trufala pis, fasin glad, mo plante narafala samting bakegen long ol man we oli laef long wol. Nao God bambae i tekemaot olgeta man blong wol ya we oli stap mekem i strong tumas long ol narafala.—Ol Sam 72:12-14; Daniel 2:44.

“Taem Wol Ya i No Stap Yet”

Jeova i gat stamba tingting blong mekem ol samting ya longtaem bifo finis. Pol i talem se “taem wol ya i no stap yet.” (Efesas 1:4, NW ) Hemia i no minim taem bifo we God i wokem graon no bifo we hem i wokem Adam mo Iv from we wol long taem ya i “gud we i gud tumas,” mo fasin rebel i no kamaot yet. (Jenesis 1:31) ?Taswe wanem “wol” ya we aposol Pol i tokbaot? Hemia wol blong ol pikinini blong Adam mo Iv—wan wol we evri man i gat sin i no gat wan i stretgud, wan wol we olgeta man oli gat hop blong kam fri long sin bakegen. Bifo we Adam mo Iv tufala i karem faswan pikinini blong tufala, Jeova i save finis olsem wanem hem i save givhan long ol pikinini ya blong pemaot olgeta long sin.—Rom 8:20.

Samting ya i no min se Haefala Rula blong heven mo wol i mas stretem bisnes blong hem olsem ol man blong wol ya oli mekem. Taem ol man oli luksave se maet wan bigfala trabol bambae i kamaot, ale oli jenisim plan blong olgeta blong blokem trabol ya no blong gohed long bisnes blong olgeta nating se trabol i kamaot. Be God ya we i gat olgeta paoa hem i soemaot stamba tingting blong hem finis mo bambae i mas mekem stamba tingting ya i kamtru. Nating se i olsem, Pol i eksplenem olsem wanem Jeova i rerem rod blong karemaot sin long olgeta man blong olwe. ?Wanem rod ya we hem i jusum?

?Hu Bambae i Karemaot Sin?

Pol i eksplenem se ol disaepol blong Kraes we tabu spirit i makemaot olgeta, oli gat wan spesel haf insaed long wok ya blong karemaot trabol we i kamaot from sin blong Adam. Pol i talem se Jeova “i jusumaot yumi finis blong bambae yumi joen long Kraes,” blong rul wetem Jisas long Kingdom blong hem long heven. Biaen, Pol i eksplenem se, “bifo olgeta, hem [ Jeova] i makemaot yumi blong bambae hem i openem rod long Jisas blong tekem yumi, yumi kam pikinini blong hem.” (Efesas 1:4,5) I tru se Jeova i no makemaot olgeta, no i no jusum olgeta man wanwan. Be God i jusumaot wan grup blong man we oli stanap strong long bilif mo we oli fasgud long God. Olgeta ya bambae oli wok wetem Kraes mo oli karemaot ol nogud frut we i kasem ol man from sin blong Devel Setan wetem Adam mo Iv.—Luk 12:32; Hibru 2:14-18.

!Hemia wan samting blong sapraes! Taem Setan i stat agensem raet we Jeova i gat blong rul antap long man, hem i talem se ol man we God i bin wokem oli no stret—hem i se, sipos ol man ya oli fesem bigfala traem no sipos wan samting i pulum olgeta blong no moa tingting stret, olgeta evriwan bambae oli rebel agensem rul blong God. (Job 1:7-12; 2:2-5) Be Jeova God i trastem ol man we hem i bin wokem, nao long stret taem blong hem i  tekemaot sam sinman long famle blong Adam blong oli kam spirit pikinini blong hem. Fasin ya i soemaot klia se ‘fasin blong [ Jeova] i gudfala tumas, hem i givhan long ol man long gladhat blong hem.’ Jeova i tekem smol grup ya blong oli go wok long heven. ?Bambae smol grup ya i mekem wanem?—Efesas 1:3-6; Jon 14:2, 3; 1 Tesalonaeka 4:15-17; 1 Pita 1:3, 4.

Aposol Pol i talem se ol man ya we God i tekemaot olgeta, oli “joen long Kraes blong kasem haf long ol gudgudfala samting” long Kingdom blong hem long heven. (Rom 8:14-17) Olsem king mo pris, bambae oli wok wetem Jisas blong mekem ol man blong wol ya oli no moa harem soa mo safa we yumi fesem naoia. (Revelesen 5:10) I tru, “kam kasem naoia, olgeta samting ya we God i mekem oli stap krae, from we olgeta oli stap harem nogud.” Be, i no longtaem, ol man ya we God i tekemaot olsem ol spesel pikinini blong hem, bambae oli wok wetem Jisas Kraes, mo olgeta man we oli obei long God bambae “oli fri olgeta, . . . oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem” bakegen.—Rom 8:18-22.

“From We Blad Blong Kraes i Ron . . . Yumi Friman”

Olgeta samting ya bambae oli kamtru from wan nambawan presen we God i givim wetem gladhat blong hem long ol man we hem i pemaot long wol—presen ya hemia ransom sakrefaes blong Jisas Kraes. Pol i raetem se: “Nao from we blad blong Kraes i ron, God i mekem yumi ya we yumi joen long Kraes, yumi friman finis. Hem i fogivim yumi finis, i tekemaot ol sin blong yumi. Gladhat blong God i bigwan tumas.”—Efesas 1:7.

Jisas Kraes i gat wan impoten wok blong mekem stamba tingting blong God i kamtru. (Hibrus 2:10) Ransom sakrefaes blong Jisas, hem i wan rod we i stanap long loa mo i mekem we Jeova i save tekemaot sam man long laen blong Adam blong oli joenem famle blong God long heven. Mo i mekem tu se, God i save karemaot ol sin mo ol trabol blong ol man we long semtaem hem i no spolem ol loa no rul blong Hem. (Matiu 20:28; 1 Timoti 2:6) Jeova i bin mekem ol samting ya long wan fasin we i leftemap stret fasin blong hem mo i laenap wetem fasin blong hem blong mekem i stret olgeta.—Rom 3:22-26.

“Tabu Tok Haed” Blong God

Blong plante taosen yia, God i no talem stret olsem wanem bambae hem i mekem stamba tingting blong hem i kamtru. Long ol faswan handred yia K.T., * “hem i talemaot plan blong hem long yumi [ol Kristin], we plan ya fastaem i wan tabu tok haed.” (Efesas 1:9) Pol wetem ol narafala tabu Kristin oli kasem save klia nambawan wok we Jisas Kraes i gat long stamba tingting blong God. Mo tu, oli stat luksave se olgeta tu oli gat wan spesel wok, olsem man we oli joen wetem Kraes long Kingdom blong hem long heven. (Efesas 3:5, 6, 8-11) Yes, Kingdom gavman we i stap long han blong Jisas Kraes mo ol narafala man ya we oli rul wetem hem, hemia nao tul we God bambae i yusum blong mekem pis i kamtru mo i stap long heven mo long wol blong olwe. (Matiu 6:9, 10) Wetem Kingdom ya, Jeova bambae i mekem wol ya i kamgud bakegen olsem we hem i bin wantem fastaem.—Aesea 45:18; 65:21-23; Ol Wok 3:21.

I no longtaem nao, stret taem ya we Jeova i jusum finis, bambae i kam, nao bambae hem i sakemaot olgeta man ya we oli stap mekem i strong tumas long narafala mo we oli stap mekem ol fasin no stret. Be Jeova i stat finis blong jenisim ol samting long Pentekos 33 K.T. ?Hem i mekem samting ya olsem wanem? Taem hem i stat hivimap “olgeta samting long heven,” hemia olgeta ya we  bambae oli rul wetem Kraes long heven. Long olgeta ya, i gat ol Kristin blong Efesas tu. (Efesas 2:4-7) Mo i no longtaem, long taem blong yumi, Jeova i “hivimap bakegen olgeta samting . . . long wol.” (Efesas 1:10, NW ) Tru long bigfala wok blong prij, Jeova i mekem se olgeta nesen oli gat janis blong save gud nius blong Kingdom gavman ya we i stap long han blong Jisas Kraes. Olgeta we oli lesin long mesej ya oli stap hivap naoia, long wan ples we i sef mo oli stap kamgud bakegen long saed blong spirit. (Jon 10:16) I no longtaem bambae oli laef long wan paradaes wol we i klin, mo we i no moa gat fasin we i no stret mo safa long hem.—2 Pita 3:13; Revelesen 11:18.

Ol ogenaesesen blong givhan long man oli bin “mekem plante nambawan wok” blong halpem olgeta man we oli safa long han blong narafala. (The State of the World’s Children 2000) Be, beswan help bambae i kamaot from wok blong Jisas Kraes wetem ol man we oli rul wetem hem long Kingdom gavman long heven. Bambae oli rutumaot stamba blong ol faet mo ol narafala trabol we oli stap kasem yumi. Bambae oli finisim olgeta trabol long wol ya.—Revelesen 21:1-4.

[Futnot]

[Tok blong pija long pej 4]

Ol gudfala wok blong givhan long man oli no finisim ol trabol long wol

[Tok blong pija long pej 6]

Ransom sakrefaes blong Kraes i pemaot ol man long sin blong Adam

[Tok blong pija long pej 7]

Tede yu save faenem sefples mo kamgud bakegen long saed blong spirit

[Tok blong pija long pej 7]

I no longtaem, bambae Kingdom blong Mesaea i finisim olgeta trabol