Stret Taem Blong Talemaot Wan Bisnes

I gat sam bisnes we i no stret blong talemaot olbaot, from we oli save spolem pis mo mekem rao i kamaot. ?Be i gat wan taem we i stret blong talemaot wan bisnes? Makem wanem we profet Amos i talem long saed blong God se: “Hae God i Masta blong yumi, mo ol profet oli man blong wok blong hem, mo oltaem, sipos hem i wantem mekem wan samting, hem i soemaot ol plan [“tok haed,” NW ] blong hem fastaem long olgeta.” (Amos 3:7) Ol tok ya oli tijim yumi long saed blong fasin blong talemaot ol tok haed. I gat sam tok we Jeova i haedem gogo kasem we stret taem blong hem i kam, nao hem i talemaot long sam man. ?Olsem wanem yumi save folem eksampol blong Jeova long saed ya?

Samtaem, ol elda long Kristin kongregesen oli faenem se i gud blong no talemaot wan bisnes. (Ol Wok 20:28) Eksampol, maet oli mekem disisen blong no talemaot blong smol taem sam plan no jenis long saed blong olgeta we oli holem wok insaed long kongregesen. Oli mekem olsem blong givhan long kongregesen.

Be, long ol taem olsem, i impoten blong talem klia long evriwan we oli stap insaed long bisnes ya se, wetaem, mo olsem wanem bambae oli talemaot. Sipos olgeta ya oli save wetaem bambae oli talemaot bisnes ya, bambae i isi moa long olgeta blong no tokbaot bisnes ya fastaem.—Ol Proveb 25:9.