Wan Kwestin

?I stret we wan Kristin brata i givim tok blong berem wan man we i kilim hem wan i ded?

Ol Kristin brata wanwan oli mas mekem prapa disisen blong olgeta, sipos tingting i no jajem olgeta blong givim tok blong berem wan man we maet hem i kilim hem wan i ded. Blong mekem disisen ya, i gud we oli tingbaot ol kwestin ya: ?Wanem tingting blong Jeova long fasin we man i kilim hem wan i ded? ?I sua se man ya i bin kilim hem wan i ded? ?Bifo we man ya i ded, hem i gat problem long tingting mo filing? ?Ol man long komuniti oli tingting olsem wanem long fasin we man i kilim hem wan i ded?

Ol Kristin oli wantem save tingting blong Jeova long saed ya. Jeova i tingbaot laef blong man olsem wan samting we i sas mo i tabu. (Jenesis 9:5; Ol Sam 36:9) Taswe, long ae blong Jeova, i rong blong man i kilim hem wan i ded. (Eksodas 20:13; 1 Jon 3:15) ?Be, samting ya i min se wan Kristin i no save givim wan tok blong berem wan man we i kilim hem wan i ded?

Tingbaot samting we i hapen long King Sol blong Isrel. Long laswan faet blong hem agensem ol man Filistia, hem i luksave we bambae oli kilim hem i ded. Be, hem i no wantem we ol enemi blong hem oli tok flas from we oli kilim hem i ded. “Nao king i pulumaot naef blong faet blong hem, i holem, i foldaon antap long hem, i stikim hem i ded.” Taem ol man Filistia oli faenem dedbodi blong hem, oli nilim hem long bigfala stonwol blong taon ya Betsan. Biaen ol man blong taon ya Jabes long Gilead oli harem wanem we ol man Filistia oli mekem long king blong olgeta, ale oli tekemaot dedbodi ya mo oli bonem. Nao oli karem ol bun blong hem, oli go berem, mo folem kastom blong ol man Isrel, oli livim kakae gogo kasem seven dei, blong soemaot sore blong olgeta. (1 Samuel 31:4, 8-13; Jenesis 50:10) Taem Deved, we Jeova i jusumaot hem, i harem wanem we ol man blong Jabes long Gilead oli mekem, hem i talem se: “Prea blong mi we Hae God bambae i blesem yufala, from we yufala i go berem King Sol. Fasin ya i soemaot we yufala i stap stanap strong yet long saed blong king blong yufala. Prea blong mi we Hae God bambae i kaen gud long yufala, i stap holem promes blong hem long yufala oltaem.” (2 Samuel 2:5, 6) Baebol i no talem se God i jajem ol man Jabes long Gilead from we oli berem King Sol, mo oli mekem wanem we yumi save kolem tede, wan sevis blong berem dedman. Be, skelem stori ya wetem stori blong sam narafala man we i no gat man i berem dedbodi blong olgeta from ol fasin nogud we oli mekem. (Jeremaea 25:32, 33) Maet i gud we wan Kristin brata i tingbaot stori ya blong Sol sipos hem i mas mekem disisen blong givim wan tok blong berem man we i kilim hem wan i ded.

Mo tu, maet brata ya i save tingbaot risen from wanem yumi givim tok blong berem wan dedman. Defren long ol man we oli bilif se sol i laef yet afta ded, ol Witnes blong Jeova oli no mekem sevis blong sanem dedman i go laef long narafala wol. Sevis ya i no blong givhan long dedman. Sevis ya i blong leftemap tingting blong ol famle mo fren, mo blong givim witnes long olgeta we oli stap long taem ya blong save wanem we i hapen long man taem hem i ded. (Prija 9:5, 10; 2 Korin 1:3-5) Wan narafala impoten risen from wanem yumi givim wan tok blong berem man we i ded, hemia blong pulum olgeta we oli stap, blong tingbaot se laef blong man i sot nomo. (Prija 7:2) ?Ol gudfala samting ya bambae oli kamaot long tok ya we Kristin brata i givim blong berem man we i kilim hem wan i ded?

I tru, maet samfala oli ting se man ya i wantem kilim hem wan i ded, mo hem i bin savegud se fasin ya i wan sin agensem Jeova. ?Be, i gat rod blong pruvum se tingting ya i tru evri taem? ?Maet man ya i no bin mekem plan fastaem, hem i tekem disisen wantaem nomo blong kilim hem wan i ded? Sam man we oli plan blong kilim olgeta wan i ded oli jenisim tingting blong olgeta biaen mo oli no gohed wetem plan ya. Be, man we i ded i no save tanem tingting blong hem from samting we hem i mekem.

Wan narafala samting blong tingbaot hemia se plante man we oli kilim olgeta wan i ded oli trabol bigwan long filing mo tingting blong olgeta. Yumi rili mas sore long olgeta ya. Wan stadi i soemaot se 90 pesen long  olgeta we oli kilim olgeta i ded oli trabol long tingting, filing, no oli yusum drag. ?Bambae Jeova i fogivim ol man ya we oli kilim olgeta oli ded taem oli stap harem nogud from tingting we i trabol? I no wok blong yumi blong jajem sipos man ya we i ded i mekem sin we Jeova i no save fogivim. Taem Kristin brata i wantem mekem disisen se bambae hem i givim tok blong berem man we i kilim hem wan i ded no nogat, i gud sipos hem i tingbaot ol samting long laef blong man ya mo sipos hem i bin gat wan sik long bodi no tingting blong hem.

I gat sam moa samting blong tingbaot. ?Wanem tingting blong ol man long komuniti long saed blong fasin we man i kilim hem wan i ded? ?Mo, wanem tingting blong olgeta long saed blong man ya we i ded? Ol elda oli mas tingbaot ol samting ya, from we oli tingbaot gud nem blong kongregesen blong ol Witnes blong Jeova long ples ya. Taswe i dipen long tingting we ol man long ples ya oli gat long saed blong fasin ya, mo tu, long ol samting we i hapen long laef blong man ya we i pusum hem blong kilim hem wan i ded. Maet ol elda oli no agri blong mekem sevis ya long fored blong ol narafala man no maet oli no agri blong mekem long Haos Kingdom.

Be, sipos oli askem wan Kristin brata blong mekem smol toktok long taem blong berem man ya, maet hem wan i harem se hem i save mekem samting ya. Be sipos hem i jus blong mekem samting ya, hem i mas yusum waes fasin mo i no mas strong blong talem se bambae man ya i laef bakegen. Eni hop long fiuja blong ol dedman i stap long han blong Jeova, mo i no gat wan man we i gat raet blong talem se dedman ya bambae i laef bakegen, no nogat. Brata ya i save tokbaot trutok blong Baebol long saed blong olgeta we oli ded mo hem i save leftemap tingting blong olgeta we oli harem nogud from man ya we i ded.