“Yu Yu Wan Gudfala Woman”

Naesfala tok ya i presem wan yangfala woman Moab we nem blong hem Rut. Hem i wan wido we bifo i mared wetem boe blong Nomi, wan woman Isrel. Rut i stap laef 3000 yia bifo, long taem we ol jaj oli stap rul, mo hem i kasem gudnem from nambawan fasin blong hem. (Rut 3:11) ?Olsem wanem hem i kasem gudnem ya? ?Hu i save kasem blesing from eksampol blong hem?

Rut “i no stap kakae bred ya we i olsem fasin les,” hem i wokhad mo i wok longtaem long garen blong pikimap ol bale, mo from fasin ya nao hem i kasem gudfala nem. Nating se oli mekem we wok blong hem i no hevi tumas, be Rut i stap wok strong, hem i mekem moa wok bitim wanem we hem i mas mekem. Hem i rili olsem woman ya we Baebol i tokbaot se ol man oli save presem hem, hem i naf blong mekem plante samting, mo i stap wokhad.—Ol Proveb 31:10-31, NW; Rut 2:7, 15-17.

Stamba samting we i mekem se Rut i gat wan gudnem, hemia ol gudfala fasin blong hem—tingting daon, fasin blong lego ol samting we hem nomo i wantem, mo lav we i stap tru oltaem. Hem i stap oltaem wetem Nomi, nating se hem i mas livim papa mama blong hem mo kantri blong hem, mo nating se hem i no sua blong faenem wan narafala man blong mared wetem. Long semtaem, Rut i talem se hem i wantem tumas blong mekem wok blong Jeova, we hem i God blong Nomi. Blong soemaot klia se Rut i wan gudfala woman, Baebol i talem se ‘sipos Nomi i gat seven pikinini boe blong hem blong givhan long hem, be bambae oli no save givhan gud long hem, olsem we woman ya i mekem.’—Rut 1:16, 17; 2:11, 12; 4:15.

Yumi save presem Rut from we hem i gat gudnem long lukluk blong ol man. Be, samting we i impoten moa hemia se God i tinghae long ol gudfala fasin blong Rut, mo i blesem hem, mekem se Rut i gat bigfala blesing ya blong kam wan bubu blong Jisas Kraes. (Matiu 1:5; 1 Pita 3:4) !Rut i wan nambawan eksampol long ol Kristin woman, mo olgeta man we oli talem se oli wosipim Jeova!