Jeova i Flasem Ol Man Blong Hem Long Laet
Jeova i Flasem Ol Man Blong Hem Long Laet
‘!Yu woman, yu girap! Mekem laet blong yu i saen, from we laet blong yu i kam mo bigfala paoa blong Jeova i saenaot i kam long yu.’—AESEA 60:1, NW.
1, 2. (a) ?Wanem samting i kavremap wol ya? (b) ?Hu i stamba blong tudak blong wol ya?
“!YUMI nidim tumas ol man olsem Aesea no Tabu Pol!” Hemia toktok blong Presiden blong Yunaeted Stet, Harry Truman, long ol yia 1940. ?From wanem hem i talem tok ya? From we hem i luksave se wol long taem blong hem, i nidim tumas ol lida we oli gat ol gudgudfala fasin. Long taem ya, ol man oli jes pas tru long wan trabol we i moa nogud i winim olgeta narafala trabol long ol yia 1900. Trabol ya hem i namba tu bigfala faet blong wol. Nating se long taem ya, faet i finis, be i no gat pis yet long wol. Tudak i gohed blong kavremap wol. Naoia, 57 yia afta long faet ya, wol i stap yet long tudak. Sipos Presiden Truman i laef i stap tede, i sua we bambae hem i luksave se wol ya i nidim tumas ol gudfala lida olsem Aesea no aposol Pol.
2 Nomata sipos Presiden Truman i gat save long samting ya no nogat, be Pol i tokbaot we ol man oli stap long tudak, mo long ol buk we hem i raetem, hem i givim strong woning agensem samting ya. Eksampol, Pol i givim woning long ol man blong bilif se: “Olgeta ya we yumi stap faet agens long olgeta long laef blong yumi, oli no man. Yumi stap faet agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ya.” (Efesas 6:12) Long ol tok ya, Pol i soemaot se tudak long saed blong spirit i kavremap wol ya, mo hem i soemaot we hem i save hu nao trufala stamba blong tudak ya—hemia ol devel we oli gat strong paoa we oli ‘ol jif blong wol ya.’ ?From we ol devel we oli gat bigfala paoa oli stamba blong tudak we i kavremap wol ya, ol man oli mas mekem wanem blong blokem tudak ya?
3. ?Nating se ol man oli stap long tudak, Aesea i talemaot wanem long saed blong olgeta we oli holemstrong long God?
3 Mo tu, Aesea i tokbaot trabol we ol man oli kasem from we oli stap long tudak. (Aesea 8:22; 59:9) Taem tabu spirit i pusum hem blong talemaot se long taem blong tudak bambae Jeova i givim hop long olgeta we oli laekem laet, hem i stap tokbaot taem blong yumi. Yes, nating se Pol mo Aesea, tufala i no stap wetem yumi tede, ol buk we tabu spirit i pusum tufala blong raetem oli save lidim yumi. Olgeta we oli lavem Jeova oli save kasem blesing from ol buk ya. Blong luk samting ya, i gud yumi tokbaot profet tok blong Aesea japta 60.
Woman We i Mekem Laet Blong Hem i Saen
4, 5. (a) ?Wanem oda we Jeova i givim long wan woman, mo hem i mekem wanem promes long hem? (b) ?Wanem ol nambawan samting we Aesea japta 60 i tokbaot?
4 Ol faswan tok blong Aesea 60 i go long wan woman we i trabol bigwan—hem i stap ledaon long graon long ples we i tudak we i tudak. Wantaem nomo, wan laet i saenaot long tudak i kam long hem, mo Jeova i singaot se: “Woman, yu girap, mekem laet blong yu i saen, from we laet blong yu i kam mo bigfala paoa blong Jeova i saenaot i kam long yu.” (Aesea 60:1, NW ) Naoia i stret taem blong woman ya i girap mo i soemaot laet mo bigfala paoa blong God. ?From wanem? Ansa i stap long nekiswan vas se: ‘Ol man blong olgeta ples long wol, tudak i kavremap olgeta, be long yu, bigfala laet ya bambae i saen, from we mi bambae mi stap wetem yu, mo laet ya i soemaot samting ya.’ (Aesea 60:2) Taem woman ya i obei long oda blong Jeova, hem i kasem promes se gudfala frut bambae i kamaot. Jeova i talem se: ‘Ol man blong narafala kantri bambae oli luk laet ya, nao bambae oli kam long laet ya, mo ol king blong olgeta bambae oli luk we yu yu kam long niufala dei, nao bambae oli kam long yu blong luk.’—Aesea 60:3.
5 Ol nambawan tok long trifala vas ya oli olsem fastok blong japta ya mo oli givim smol save long wanem we Aesea japta 60 i tokbaot. Japta ya i talemaot ol samting we bambae i hapen long wan woman, we i pija blong wan narafala samting. Hem i eksplenem wanem we yumi mas mekem blong kam long laet blong Jeova, nating se ol narafala man oli stap long tudak. ?Be, ol samting we trifala vas i tokbaot oli pija blong wanem samting?
6. ?Woman we Aesea japta 60 i tokbaot i pija blong hu, mo hu olgeta long wol we oli stap mekem wok long nem blong hem?
6 Woman ya long Aesea 60:1-3 i minim Saeon, hemia ogenaesesen blong ol spirit man blong Jeova long heven. Tede i gat sam man long wol ya, hemia ol laswan memba blong “Isrel blong God,” we oli wok long nem blong Saeon. Olgeta ya oli mekemap kongregesen blong ol tabu Kristin we oli kamaot long olgeta ples long wol mo we oli gat hop blong rul wetem Kraes long heven. (Galesia 6:16, NW ) Nesen ya, we i wan nesen long saed blong spirit, i gat 144,000 memba long hem. Profet tok blong Aesea 60 we i kamtru bakegen long taem blong yumi, i go stret long olgeta ya we oli laef yet long wol long taem blong “Lasdei.” (2 Timoti 3:1; Revelesen 14:1) Mo tu, profet tok ya i givim plante save long saed blong ol fren blong ol tabu Kristin, hemia “bigfala hip” blong “ol narafala sipsip.”—Revelesen 7:9; Jon 10:16.
7. ?Wanem i hapen long Saeon long 1918, mo profet tok i talemaot wanem long saed ya?
7 ?I gat wan taem we “Isrel blong God” i stap ledaon long tudak, olsem woman long profet tok ya? Yes, samting ya i bin hapen bitim 80 yia bifo. Long taem blong faswan bigfala faet blong wol, ol tabu Kristin oli traehad blong mekem we wok blong prij i gohed. Be long 1918, laswan yia blong faet ya, klosap oli stopem wok blong prij. Long taem ya kot i jajem Joseph F. Rutherford, we hem i bin lukaot long wok blong prij long ful wol, mo sam narafala Kristin bakegen, blong oli kalabus blong plante yia. Ol poen we oli talemaot agensem olgeta oli giaman nomo. Profet tok long buk blong Revelesen, i tokbaot ol tabu Kristin we oli stap long wol long taem ya i se, bodi blong olgeta i stap ledaon nomo ‘long rod, insaed long bigfala taon ya we . . . yumi save putum nem blong hem se Sodom mo Ijip.’ (Revelesen 11:8) !Yes, long taem ya, tudak i rili stap long Saeon, we ol tabu pikinini blong hem long wol ya oli wok long nem blong hem!
8. ?Wanem bigfala jenis i kamaot long 1919, mo wanem frut i kamaot from?
8 Be, long yia 1919 wan bigfala jenis i kamaot. !Jeova i mekem laet blong hem i saen long Saeon! Ol man blong Isrel blong God we oli laef long taem ya oli stat wok bakegen blong soemaot laet blong God. Oli no fraet blong stat bakegen blong talemaot gud nius. (Matiu 5:14-16) From we ol Kristin ya oli kasem strong tingting bakegen, oli pulum plante narafala man oli kam long laet blong Jeova. Fastaem, tabu spirit i makemaot ol niuwan ya olsem ol memba blong Isrel blong God. Aesea 60:3 i tokbaot olgeta olsem ol king, from we bambae oli rul wetem Kraes long Kingdom blong God long heven. (Revelesen 20:6) Biaen, wan bigfala hip blong ol narafala sipsip oli stat kam long laet blong Jeova. Olgeta ya oli ol “man blong olgeta ples long wol” we profet tok i tokbaot.
!Ol Pikinini Blong Woman Ya Oli Kamhom Bakegen!
9, 10. (a) ?Woman ya i glad tumas blong luk wanem nambawan samting, mo hemia i pija blong wanem samting? (b) ?Saeon i gat wanem risen blong glad?
9 Jeova i stat blong givim moa save long saed blong Aesea 60:1-3. Hem i givim wan narafala oda bakegen long woman ya. Lesin long wanem we hem i talem: ‘!Yu luklukraon! !Yu lukluk ol samting we oli stap kamtru!’ !Ale woman ya i obei, mo hem i luk wan samting we i mekem hem i haremgud tumas! Ol pikinini blong hem oli kamhom bakegen. Vas ya i gohed i se: ‘Ol man blong yu oli stap hivap blong kamhom bakegen. Ol pikinini boe blong yu bambae oli aot long ol ples longwe, oli kambak. Mo ol dota blong yu, bambae ol man oli karem olgeta i kam.’ (Aesea 60:4) Wok ya blong talemaot Kingdom long olgeta ples blong wol, i stat bakegen long 1919, mo i pulum plante taosen niuwan oli kam joen long wok blong Jeova. Olgeta ya oli kam ol “pikinini boe” mo “dota” blong Saeon, hemia ol tabu memba blong Isrel blong God. Yes, Jeova i flasem Saeon long laet blong hem, taem hem i karem ol laswan memba blong 144,000 oli kam long laet ya.
10 !Tingbaot bigfala glad we Saeon i kasem from we ol pikinini blong hem oli stap wetem hem. Be, Jeova i tokbaot wan narafala risen from wanem Saeon i mas glad. Yumi ridim se: ‘Taem yu luk ol samting ya, bambae yu harem gud tumas. Bambae yu glad we i glad, we yu jamjam from. Ol gudgudfala samting blong ol narafala kantri, olgeta ya bambae oli karem i kam blong givim long yu. Ol gudgudfala samting we praes blong olgeta i hae tumas, bambae oli tekem long narasaed solwota, oli karem i kam long yu.’ (Aesea 60:5) Folem wanem we profet tok ya i talem, i stat long 1930 i kam, plante taosen Kristin we oli gat hop blong laef foreva long wol ya oli kam long Saeon. Oli kamaot long “solwota,” we hem i pija blong ol man we oli stap longwe long God. Yes, olgeta ya oli olsem “ol gudgudfala samting we praes blong olgeta i hae tumas.” (Hagae 2:7; Aesea 57:20) Makem tu se ‘ol gudgudfala samting ya’ oli no mekem wok blong Jeova olgeta wanwan nomo long wei we olgeta oli wantem. Nogat, olgeta ya oli flasem Saeon, taem oli wosip tugeta wetem ol tabu brata blong olgeta. Oli kam olsem “wan kampani nomo” aninit long “wan man nomo blong lukaot long olgeta.”—Jon 10:16.
Ol Bisnesman, Ol Man Blong Lukaot Sipsip, Mo Ol Tredaman Oli Kam Long Saeon
11, 12. Tokbaot bigfala hip blong man we oli kam long Saeon.
11 From wok ya blong hivimap man, namba blong ol man we oli presem Jeova i kam antap bigwan. Profet tok i soemaot samting ya long ol tok we oli kamaot biaen. Traem tingbaot we yu yu stanap klosap long woman ya long Hil blong Saeon. ?Yu lukluk i go long is, mo yu luk wanem? “Bambae ol bigfala grup blong ol man oli aot long Midian mo Efaha, oli wokbaot long ol kamel, oli kam long ples ya. Bambae ol grup olsem oli aot long Seba, oli karem gol mo insens i kam. Ol man bambae oli stap talemaot se, ‘!Ol fasin ya we Hae God i mekem, oli gud tumas!’ ” (Aesea 60:6) Ol bigfala hip blong bisnesman oli lidim ol kamel blong olgeta long ol rod we oli go long Jerusalem. !Ol kamel ya oli plante, olsem bigfala wota we i ron, i kavremap kantri ya! Ol tredaman oli karem ol sas presen i kam olsem “gol mo insens.” Mo ol bisnesman oli kam long laet blong God, blong presem hem long fes blong ol man, blong talemaot se “ol fasin ya we Hae God i mekem, oli gud tumas.”
12 I no ol bisnesman nomo we oli stap kam. Ol man blong lukaot ol sipsip tu oli stap kam long Saeon. Profet tok i gohed i talem se: “Bambae ol man oli tekem ol sipsip blong tufala ples ya Kedara mo Nebaeot, from we oli beswan, oli karem i kam long ples ya blong mekem sakrefaes long olgeta.” (Aesea 60:7a) Ol laen blong man wetem ol anamol blong olgeta oli kam long tabu taon ya blong givim beswan long ol anamol blong olgeta i go long Jeova. !Mo tu, ol man ya oli glad blong givim laef blong olgeta wan blong mekem wok blong Saeon! ?Jeova i mekem wanem long ol man we oli kam long narafala kantri? God hem wan i ansa se: “Bambae oli mekem ol sakrefaes long olta blong mi, nao mi bambae mi glad long olgeta, mo mi bambae mi kam mekem haos blong mi i gud moa, [“mi flasem haos blong mi,” NW ], i winim fastaem.” (Aesea 60:7b) Jeova i glad long ol sakrefaes mo ol wok we ol man blong narafala kantri oli stap mekem. Yes, olgeta ya oli stap flasem tempol blong hem.
13, 14. ?Wanem samting i stap kam long wes?
13 Naoia, lukluk i go longwe long saed i go long wes. ?Yu yu luk wanem? I luk olsem we wan waet klaod i kavremap solwota. Jeova i askem sem kwestin we maet yu tu yu stap tingbaot se: “?Hu ya olgeta we oli spid i kam olsem klaod, mo olsem ol sotleg we oli stap flae i kambak long haos blong olgeta?” (Aesea 60:8, NW ) Jeova i ansa long kwestin blong hem se: “Ol man blong ol aelan oli gat hop from mi, ol sip blong Tasis olsem fastaem, oli karem ol pikinini boe blong yu we oli stap longwe oli kam, wetem ol silva mo gol blong olgeta. Bambae oli karem olgeta ya oli kam, long nem blong Jeova, God blong yufala, mo Tabu wan blong Isrel, from we bambae hem i mekem yufala i kam naes.”—Aesea 60:9, NW.
14 ?Yu save pijarem samting ya? Waet klaod ya we i stap longwe long saed i go long wes, i stap kam klosap, mo i luk olsem ol smosmol mak nomo. Hem i luk olsem ol pijin we oli stap flae antap long ol wef blong solwota. Be taem oli kam klosap moa, yu luk se ol waet mak ya oli ol sip we win i blu long sel blong olgeta. Fulap sip oli stap kam long Jerusalem, olsem ol sotleg we oli flae i kam. Oli spid i kam long ol taon longwe, blong karem ol man blong bilif i kam long Jerusalem blong wosip long Jeova.
Ogenaesesen Blong Jeova i Kam Bigwan Moa
15. (a) ?Olsem wanem ol tok long Aesea 60:4-9 oli soemaot we wok bambae i gru bigwan? (b) ?Ol trufala Kristin oli soemaot wanem tingting?
15 !Profet tok long vas 4 go kasem 9 oli soemaot klia we wok blong prij long ful wol i kam antap bigwan stat long 1919! ?From wanem Jeova i blesem Saeon, nao wok blong hem i kam bigwan moa? Stat long 1919, Isrel blong God i bin gohed blong obei long Jeova mo i mekem se laet blong hem i saenaot. ?Be, yu yu makem we vas 7 i soemaot se ol niuwan oli kam “long olta blong [God]”? Ol man oli kam long olta blong mekem sakrefaes. Samting ya i mekem yumi tingbaot se ol man we oli mekem wok blong Jeova oli mas mekem sakrefaes tu. Aposol Pol i raetem se: “Mi mi talem strong long yufala, se plis yufala i mas givim olgeta laef blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem.” (Rom 12:1) Folem ol tok blong Pol, ol trufala Kristin oli no ting se i naf blong joen long wosip wan taem long wik nomo. Olgeta oli yusum taem, paoa, mo ol ting blong olgeta blong leftemap trufala wosip. !Yes, ol man ya we oli yusum laef blong olgeta blong wosip long Jeova oli flasem haos blong hem! Profet tok blong Aesea i talem samting ya. Mo yumi save sua se long ae blong Jeova, ol man ya we oli wok strong long wosip blong hem oli naes tumas.
16. ?Long ol taem bifo, hu i givhan blong bildim bakegen ol samting, mo hu i mekem wok ya long taem blong yumi?
16 Ol niuwan we oli kam oli wantem wok. Profet tok i gohed i talem se: “Ol man blong ol narafala kantri bambae oli stanemap bigfala stonwol blong taon ya, mo ol king blong olgeta bambae oli kam, oli wok blong yufala.” (Aesea 60:10, NW ) Fastaem we profet tok ya i kamtru hemia long taem we ol man Isrel oli aot long kalabus long Babilon. Ol king mo ol man blong narafala kantri oli bin givhan long olgeta blong bildim tempol mo taon blong Jerusalem bakegen. (Esra 3:7; Nehemaea 3:26) Long taem blong yumi, we profet tok ya i kamtru bakegen, bigfala hip ya blong ol man i wok wetem smol grup blong ol tabu Kristin we oli stap yet long wol, blong stanemap trufala wosip. Oli givhan blong stanemap ol Kristin kongregesen mo long rod ya oli stap mekem ol “stonwol” blong taon ya, we hem i ogenaesesen blong Jeova, i kam strong moa. Mo tu, oli givhan blong bildim ol trufala haos—hemia ol Haos Kingdom, ol Haos Asembli, mo ol Haos Betel. !Long olgeta rod ya, oli sapotem ol tabu brata blong olgeta, blong oli save lukaot long nid blong ogenaesesen blong Jeova we i stap kam bigwan!
17. ?Olsem wanem Jeova i flasem ol man blong hem?
17 !Ol laswan tok blong Aesea 60:10 i rili leftemap tingting blong yumi! Jeova i talem se: “Fastaem mi mi kros tumas long yufala, nao mi panisim yufala, be naoia, long gladhat blong mi, mi mi gat sore long yufala.” Yes, long ol yia 1918 mo 1919, Jeova i stretem ol man blong hem. Be samting ya i hapen bifo finis. Naoia i stret taem blong Jeova i soemaot sore long ol tabu man blong hem mo ol fren blong olgeta we oli ol narafala sipsip. Pruf blong samting ya, hemia se namba blong ol man blong Jeova i gru kwiktaem from blesing blong hem, we i olsem se hem i stap ‘flasem’ olgeta.
18, 19. (a) ?Jeova i givim wanem promes long saed blong ol niuwan we oli joen long ogenaesesen blong hem? (b) ?Ol laswan vas blong Aesea japta 60 i tokbaot wanem?
18 Evri yia, plante handred taosen man blong “narafala kantri” oli joen wetem ogenaesesen blong Jeova. Doa blong go insaed long ogenaesesen ya bambae i stap open. Plante narafala bambae oli save biaen long olgeta. Jeova i talem long Saeon se: “Long dei mo long naet, ol doa blong bigfala stonwol blong taon ya bambae oli open i stap, blong ol king blong ol narafala kantri oli save lidim ol man blong olgeta, blong karem ol gudgudfala samting i kam.” (Aesea 60:11) Sam man blong agens oli traem satem “ol doa” ya, be yumi save se olgeta bambae oli no save win. Jeova hem wan i talem se bambae ol doa oli stap open nomo. Namba blong olgeta bambae i kam antap moa.
19 I gat sam narafala rod bakegen we Jeova i yusum blong blesem ol man blong hem mo flasem olgeta long ol lasdei ya. Ol profet tok we oli stap long laswan haf blong Aesea 60, oli soemaot ol narafala rod ya.
?Yu Yu Save Eksplenem?
• ?Hu ya “woman blong God,” mo hu ya olgeta long wol we oli wok long nem blong hem?
• ?Wetaem ol pikinini blong Saeon oli ledaon long graon, mo wetaem mo olsem wanem oli “girap” bakegen?
• ?Wanem ol samting we Jeova i talemaot we oli olsem pija blong soemaot we namba blong ol man blong prij tede bambae i kam antap bigwan?
• ?Wanem ol rod we Jeova i yusum blong mekem laet blong hem i saen long ol man blong hem?
[Kwestin]
[Tok blong pija long pej 10]
Jeova i givim oda long “woman” ya blong girap
[Tok blong pija long pej 12]
Ol sip we oli stap kam oli luk olsem ol sotleg