Laef Stori

Kasem Paoa From Ol Brata Sista Long Ful Wol

THOMSON KANGALE I TALEM STORI YA

Long Eprel 24, 1993, mi kasem wan pepa we i singaot mi blong kam long dedikesen blong niufala branj ofis we i gat 13 bilding blong hem, long Lusaka, Sambia. Mi no save wokbaot gud, taswe Kristin sista we i tekem mifala blong visitim branj ofis i askem long mi se, “?Yu yu glad sipos mi karem wan jea wetem mifala, blong yu save sidaon smol, taem yumi visitim ol ofis?” Mi mi wan blak man, mo sista ya i waet, be hem i no wari long samting ya. Fasin ya i kasem hat blong mi, mo mi tangkiu long kaengud fasin blong sista ya, we i givim janis long mi blong visitim olgeta ples blong branj ofis.

TAEM ol yia oli pas, sam ekspiriens olsemia oli pulum hat blong mi mo oli mekem mi mi luksave se i rili gat lav long medel blong ol Witnes blong Jeova, lav ya nao we Jisas i talem se bambae i makemaot ol man blong hem. (Jon 13:35; 1 Pita 2:17) Mi wantem talem long yu olsem wanem mi mitim ol Kristin ya long 1931, long yia ya we oli talemaot long olgeta man se oli karem nem ya we i kamaot long Baebol, hemia ol Witnes blong Jeova.—Aesea 43:12.

Statem Minista Wok Long Afrika

Long Novemba 1931, mi gat 22 yia mo mi stap laef long Kitwe, long wan eria we oli kolem Copperbelt, long Not blong Rodesia (we tede, nem blong hem Sambia). Mi stat save ol Witnes from wan fren we i plei futbol wetem mi. Mi go long sam miting blong olgeta mo mi raetem wan leta long branj ofis long Cape Town, Saot Afrika, blong oli sanem long mi wan buk blong stadi  long Baebol, hemia The Harp of God. * Oli raetem buk ya long Inglis, mo mi faenem i had blong kasem save long hem from we mi no savegud lanwis ya.

Copperbelt i stap 240 kilometa long Saotwes blong Lugun blong Bangweulu, klosap long ples we mi bin gruap long hem. Long eria ya i gat plante man we oli kamaot from ol narafala provins blong mekem wok blong digim ston ya kopa. Oltaem, i gat plante grup blong Witnes we oli joen long ples ya blong stadi long Baebol. Sam taem i pas, nao mi livim Kitwe mi muv i go long Ndola mo mi stat joenem wan grup blong Witnes long taon ya. Long taem ya, mi mi kapten long wan futbol tim we nem blong hem, Prince of Wales. Mo tu, mi klinim haos blong wan waet man we i bos blong African Lakes Corporation, wan kampani we i gat plante stoa long sentrol Afrika.

Mi no skulgud mo mi lanem sam tok long Inglis from ol man Yurop we oli bos blong mi. Nating se i olsem, mi wantem kasem wan gudfala edukesen, taswe mi raetem wan leta blong go stadi long wan skul long Plumtree, Saot Rodesia (we naoia oli kolem Simbabwe). Mo long sem taem, mi raetem wan seken leta i go long branj ofis blong Cape Town. Mi talem long olgeta se mi bin kasem buk ya The Harp of God, mo mi wantem wok fultaem blong Jeova.

Mi sapraes taem mi kasem ansa blong olgeta we i talem se: “Mifala i presem yu from we yu wantem mekem wok blong Jeova. Mifala i leftemap tingting blong yu blong yu prea from samting ya, bambae Jeova i halpem yu blong yu kasem save trutok, mo bambae hem i faenem wan ples blong yu save mekem wok long hem.” Mi bin ridim leta ya plante taem, mo biaen mi askem long ol Witnes se mi mi mas mekem wanem. Oli talem se: “Sipos yu rili wantem mekem wok blong Jeova, gohed mo mekem wok ya kwiktaem.”

Wan ful wik, mi stap prea from samting ya, mo mi tekem disisen se bambae mi lego haeskul mo mi gohed blong stadi Baebol wetem ol Witnes. Long nekis yia, long Jenuware 1932, mi tekem baptaes blong soem se mi givim laef blong mi i go long Jeova. Mi livim Ndola mi muv i go long Luanshya, mo long ples ya mi mitim Jeanette we i wan Witnes tu, mo mitufala i mared long Septemba 1934. Taem mi maredem Jeanette, hem i gat wan boe mo wan gel blong hem finis.

Sloslo, mi gohed long saed blong spirit, mo long 1937 mi statem fultaem minista wok. Smol taem biaen, oli putumap mi olsem man blong goraon long ol kongregesen, we naoia oli kolem seket elda. Ol seket elda oli visitim ol kongregesen blong ol Witnes blong Jeova blong mekem olgeta oli stap strong long saed blong spirit.

Ol Faswan Yia Long Wok Blong Prij

Long Jenuware 1938, oli sanem mi blong visitim wan jif blong Afrika we nem blong hem Sokontwe. Hem i bin askem ol Witnes blong Jeova blong kam luk hem. Mi ron long baskel blong tri dei blong kasem ples blong hem. Taem mi talem long hem se  branj ofis blong mifala long Cape Town i sanem mi from leta we hem i bin raetem i go long olgeta, hem i tangkiu tumas long mifala.

Mi go prij long ol haos natanggura wanwan, mo mi invaetem ol man i kam long insaka (wan ples blong miting olsem nakamal). Taem oli joen wanples, mi stat toktok long olgeta. Long rod ya, mi statem plante Baebol stadi. Jif mo klak blong vilej, tufala oli faswan man we oli lukaot long ol kongregesen long ples ya. Tede, i gat bitim 50 kongregesen long eria ya, we oli kolem distrik blong Samfya.

Stat long 1942 go kasem 1947, mi wok olsem wan seket elda long ol ples raonabaot long Lugun blong Bangweulu. Mi stap ten dei wetem evri kongregesen. Long taem ya i no gat plante man oli joen long wok blong prij, mekem se mifala i harem olsem Masta blong yumi Jisas Kraes taem hem i talem se: “Yufala i luk. I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Matiu 9:36-38) Long taem ya, i no isi blong muv i go long narafala ples, taswe Jeanette i stap long Luanshya wetem ol pikinini taem mi mi stap visitim ol kongregesen. Long taem ya, mi mo Jeanette mitufala i gat tu narafala pikinini, be wan long tufala i ded taem i gat ten manis.

I no gat plante trak long taem ya, taswe i no gat plante rod tu. Wan dei, mi tekem baskel blong Jeanette mo mi ron 200 kilometa blong kasem ples we mi mas go long hem. Samtaem taem mi mas krosem wan smol reva, mi putum baskel long solda blong mi, mi holem hem wetem wan han, mo mi stap swim wetem narafala han. Namba blong ol Witnes i kam antap bigwan long Luanshya, mo long 1946, i gat 1,850 man i kam long Memoriol blong ded blong Kraes.

Ol Man Oli Agensem Wok Blong Mifala

Wan dei, taem Wolwo Tu i stap gohed yet, distrikejen blong Kawambwa i singaot mi blong go luk hem mo i talem long mi se: “Yu mas stop blong yusum ol buk blong Watch Tower Society fom we naoia mifala i putum tabu long ol buk blong yufala. Be mi save givim sam samting long yu we yu save yusum blong raetem sam narafala buk blong yusum long wok blong yufala.”

Mi ansa long hem se: “Mi mi glad long ol buk blong mifala. Mi no nidim sam narafala buk.”

Hem i se: “Yu no save fasin blong ol man Amerika.” (Long taem ya oli prentem ol buk blong mifala long Yunaeted Stet). “Bambae oli giaman long yu.”

Mi ansa long hem se: “Nogat, ol man Amerika we mi wok wetem olgeta bambae oli no save giaman long mi.”

Biaen hem i askem se: “?Yu save pulum ol kongregesen blong yu, blong oli givim presen mane blong sapotem wo, olsem ol narafala skul oli mekem finis?”

Mi ansa se: “Hemia wok blong ol man blong gavman.”

Hem i se: “I moa gud yu gobak long haos blong yu, mo yu tingbaot samting ya.”

Mi ansa se: “Long Eksodas 20:13 mo 2 Timoti 2:24, Baebol i talem se yumi no mas kilim man i ded mo yumi no man blong faet.”

Nating se oli letem mi mi go, be biaen distrikejen blong Fort Rosebery, wan taon we tede oli kolem Mansa, hem i singaot mi blong mi kam long ofis blong hem tu. Hem i talem long mi se: “Mi singaot yu blong talem long yu se gavman i putum tabu long ol buk blong yu.”

Mi talem se: “Yes. Mi harem nius blong samting ya.”

“Taswe i gud yu go long olgeta kongregesen blong yufala, mo yu talem long evri man we oli stap wosip wetem yu se oli mas karem olgeta buk i kam long ples ya. ?Yu harem?”

Mi ansa se: “Hemia i no wok blong mi ya. Hemia i wok blong ol man blong gavman.”

Mi Kasem Frut From Mi Tekem Janis Blong Prij

Afta long wo, mifala i gohed long wok blong prij. Long 1947, mi jes finis blong visitim wan kongregesen long vilej blong Mwanza nao mi askem sam man se long weples nao bambae mi save pem wan kap ti. Oli sanem mi mi go long haos blong Masta Nkonde, from we man ya i holem wan ples blong dring ti. Masta Nkonde wetem waef blong hem, tufala i welkamem mi. Taem mi stap dring ti, mi askem long  Masta Nkonde sipos hem i save ridim japta ya “Hell, a Place of Rest in Hope” (Hel, Wan Ples Blong Spel We i Gat Hop i Stap) long buk ya “Let God Be True.”

Mi flatem ti blong mi, mo mi askem long hem se: “?Wanem tingting blong yu long saed blong hel naoia?” Hem i sek long samting we hem i ridim, taswe hem i stat stadi Baebol wetem ol Witnes, mo biaen, hem wetem waef blong hem tufala i baptaes. Nomata se hem i no moa wan Witnes tede, be waef mo ol pikinini blong hem oli Witnes yet. Pilney, wan blong ol pikinini blong hem, i stap wok long branj ofis blong ol Witnes blong Jeova long Sambia. Mo nating se mama blong Pilney i kam olfala naoia, be hem i wan Witnes we i holem strong long bilif blong hem.

Wok Smoltaem Long Is Afrika

Branj ofis blong mifala long Not Rodesia, we oli stanemap long Lusaka long 1948, i sanem mi mi go long Tanganyika (we tede oli kolem Tansania). Wan narafala Witnes i joen wetem mi mo waef blong mi, mifala i wokbaot i krosem teritori ya we i gat ol bigfala hil long hem. Mifala i wokbaot tri dei, mo trip ya i mekem mifala i taed tumas. Mi mi stap karem ol buk, waef blong mi i karem ol klos blong mifala, mo narafala Witnes i karem ol samting blong slip.

Taem mifala i kasem Mbeya long Maj 1948, i gat plante wok i stap yet blong halpem ol brata blong oli mekem laef blong olgeta i laenap moa wetem ol tijing blong Baebol. Wan samting we mifala i faenem se, ol man long ples ya oli stap singaot mifala ‘ol man blong Wajtaoa.’ Nating se ol brata long ples ya oli savegud nem ya ‘Witnes blong Jeova,’ be oli no talemaot nem ya long olgeta man. Antap long samting ya, sam Witnes oli mas lego sam kastom we i laenap wetem fasin blong ona long ol dedman. Be wan bigfala samting we bighaf blong ol brata sista ya oli mas mekem, hemia se oli mas rejistarem mared blong olgeta folem loa blong gavman blong evriwan i save tinghae long mared ya.—Hibrus 13:4.

Biaen, mi gat janis blong wok long sam narafala eria long Is Afrika, olsem Uganda. Mi stap sikis wik long Entebbe mo Kampala, mo long ples ya mifala i halpem plante man blong save trutok blong Baebol.

Oli Singaot Mi Blong Go Long New York Siti

Mi stap wok long Uganda blong sam taem, mo biaen mi kam long Dar es Salaam, bigfala taon blong Tanganyika. Long ples ya, i gat wan leta i stap, we hedkwota blong ol Witnes blong Jeova i sanem i kam long mi. Long leta ya oli talem long mi se mi mas mekemrere olting blong mi blong kam long New York blong wan intenasnal asembli, we i stat long Julae 27 go kasem Ogis 3, 1958. Tru ya, mi glad tumas blong harem nius ya.

Mi mekem trip ya wetem wan narafala seket elda we nem blong hem Luka Mwango. Mitufala i tekem plen i aot long Ndola i go long Salisbury (we naoia oli kolem Harare), Saot Rodesia, biaen mitufala i go long Nairobi, Kenia. Nao mitufala i tekem plan blong go long London, Inglan, ples ya we ol brata oli welkamem mitufala wetem lav. Long naet ya we mitufala i kasem Inglan, taem mitufala i go slip mitufala i glad tumas, mo mitufala i no save stop blong storebaot olsem wanem ol waet man ya oli welkamem gud mitufala man Afrika. Ekspiriens ya i leftemap tingting blong mitufala.

Biaen, mitufala i kasem New York, ples ya we oli holem asembli long hem. Long wan long ol dei blong asembli ya, mi tokbaot wok blong prij blong ol Witnes blong Jeova long Not Rodesia. Long dei ya, i gat klosap 200,000 man oli joen tugeta long Polo Grounds blong New York Siti mo  long Yankee Stadium. Long naet ya mi no save slip, from we mi stap tingbaot nambawan janis ya we mi bin kasem.

Kwiktaem tumas, asembli i finis mo mifala i mas gobak hom. Long trip blong gobak long haos, ol brata sista blong Inglan oli soem lav blong olgeta taem oli welkamem mifala bakegen. !Fasin joengud blong ol man blong Jeova, nomata wanem kala no kantri blong olgeta, i kamaot klia long mifala taem mifala i mekem trip ya, mo neva bambae mi fogetem fasin ya!

Gohed Long Wok Blong God, Mo Fesem Ol Traem

Long 1967, oli putumap mi olsem wan distrik elda—hemia elda we i stap visitim ol seket wanwan. Long taem ya namba blong ol Witnes long Sambia i go antap bitim 35,000 man. Biaen, helt blong mi i kam nogud, taswe mi gobak long wok blong seket elda long Copperbelt. Jeanette tu i stat siksik, mo hem i holemstrong long bilif gogo hem i ded long Disemba 1984.

Afta we Jeanette i ded, mi harem nogud tumas from we sam famle blong hem we oli no Witnes, oli tok agensem mi se mi bin yusum blak majik blong kilim hem i ded. Be sam famle blong hem we oli save sik blong hem, mo oli bin toktok wetem dokta blong hem, oli talem long olgeta ya, trufala risen from wanem hem i ded. Biaen mi mas fesem wan narafala traem. Sam famle oli wantem se mi folem wan kastom we oli kolem ukupyanika. Long ples blong mi, kastom ya i talem se taem waef no hasban i ded, hem ya we i laef yet i mas slip wetem wan stret famle blong hasban no waef ya we i ded. I klia se mi no wantem mekem samting ya.

Biaen, famle i stop blong givim hadtaem long mi. Mi tangkiu long Jeova se hem i halpem mi blong mi stanap strong. Mi berem waef blong mi, mo wan manis biaen, wan brata i kam luk mi i se: “Brata Kangale, yu rili leftemap tingting blong mifala taem waef blong yu i ded, from we yu yu no letem wan long ol traem ya i pulum yu blong joen long ol kastom we God i no laekem. Mifala i tangkiu tumas long yu.”

Nambawan Frut i Kamaot

Naoia bambae i mekem 65 yia we mi spenem long fultaem sevis olsem wan Witnes blong Jeova. !Mi rili haremgud long ol yia ya, taem mi luk ol handred kongregesen we oli kamaot, mo ol Haos Kingdom we mifala i bin bildim long ol eria we bifo mi mekem wok blong seket elda long hem! Long 1943 i gat 2,800 Witnes long Sambia, mo naoia i gat bitim 122,000 man we oli stap talemaot gud nius blong Kingdom long kantri ya. Yes, long olgeta man we oli laef long Sambia, we namba blong olgeta klosap i kasem 11 milian, i gat bitim 514,000 man oli kam long Memoriol las yia.

Long semtaem, Jeova i lukaotgud long mi. Taem mi nidim blong luk wan dokta, wan brata i karem mi mi go long hospital. Ol kongregesen oli stap askem mi yet blong kam givim tok long olgeta, mo samting ya i leftemap tingting blong mi. Long kongregesen blong mi, oli mekem wan plan blong sam sista oli kam klinim haos blong mi, mo sam brata oli volontia blong karem mi mi go long ol miting evri wik. Mi save se ol brata sista oli kaengud mo oli soem lav long mi from we mi mekem wok blong Jeova. Taswe mi tangkiu tumas long Jeova from we hem i stap yusum mi long fultaem wok blong prij yet, mo i stap givim plante wok long mi kam kasem naoia.

Mi no moa save lukluk klia, mo taem mi stap wokbaot blong go insaed long Haos Kingdom, mi mas stop plante taem blong spel smol. Naoia, mi harem se basket blong mi we mi putum ol buk long hem i kam hevi moa, taswe mi karemaot olgeta buk we maet mi no nidim olgeta long miting. Bighaf blong wok blong prij blong mi, hemia ol Baebol stadi we mi lidim long ol man we oli kam long haos blong mi. !Be mi glad tumas taem mi luklukbak long ol yia we oli pas finis, mo mi tingbaot wok blong Jeova we i gru bigwan! Mi bin wok long wan ples we i laenap gud wetem tok blong Jeova long Aesea 60:22 (NW ). Hem i talem se: “Wan smolwan bambae i kam wan taosen, mo hemia we i olsem nating nomo bambae i kam wan strongfala nesen. Mi, Jeova, bambae mi mekem i spid long prapa taem blong hem.” I tru ya, long laef blong mi, mi bin luk profet tok ya i kamtru long Sambia, mo long fulwol tu. *

[Ol Futnot]

[Tok blong pija long pej 24]

Thomson wetem branj ofis blong Sambia biaen long hem

[Tok blong pija long pej 26]

Branj ofis blong Sambia tede