Paoa Blong Jeova i Saen Long Ol Man Blong Hem
Paoa Blong Jeova i Saen Long Ol Man Blong Hem
“Mi mi Hae God, mo mi bambae mi laet blong yufala, gogo i no save finis.”—AESEA 60:20.
1. ?Olsem wanem Jeova i blesem ol man we oli stap tru long hem?
“JEOVA i stap glad long ol man blong hem. Hem i flasem olgeta we oli gat tingting daon, taem hem i sevem olgeta.” (Ol Sam 149:4, NW ) Man we i raetem Sam ya i talem ol tok ya longtaem bifo, mo ol samting we i hapen long ol yia we i pas oli pruvum se ol tok blong hem oli tru. Jeova i tingbaot ol man blong hem we oli stap tru long hem. Hem i mekem olgeta oli karem gudfala frut, mo i lukaotgud olgeta. Long ol taem bifo, hem i stap givhan long olgeta blong winim ol enemi blong olgeta. Tede, hem i holem olgeta oli stap strong long saed blong spirit mo i mekem olgeta oli sua se from sakrefaes blong Jisas bambae oli sef. (Rom 5:9) Jeova i mekem olgeta samting ya, from we long ae blong hem ol man blong hem oli naes tumas.
2. ?Nating se ol man blong God oli fesem fasin agens, oli sua long wanem samting?
2 I tru se, long wol ya we i stap long tudak, ol man oli agensem olgeta we oli wantem “mekem laef blong olgeta i stret long fes blong God.” (2 Timoti 3:12) Nating se i olsem, Jeova i stap wajem ol man blong agens, mo hem i givim woning long olgeta se: “Ol kantri we ol man blong olgeta oli no kam blong wok blong yufala, bambae mi mi spolemgud olgeta.” (Aesea 60:12) Tede, i gat ol defren fasin blong agens. Long sam kantri, ol man oli traem blokem no putum tabu long wosip we ol trufala Kristin oli mekem long Jeova. Long sam narafala kantri, ol man blong agens oli faetem ol man blong Jeova mo oli bonem ol haos blong olgeta. Be tingbaot, Jeova i mekem disisen finis long saed blong wanem we bambae i hapen long olgeta we oli traem agensem wil blong hem. Ol man blong agens bambae oli no save win. Olgeta we oli faet agensem ol man long wol ya we oli wok long nem blong Saeon, oli no save win. !Hemia promes blong Jeova, Hae God blong yumi, mo yumi save sua long promes ya!
Blesing We i Bigwan Bitim Wanem We Oli Tingbaot
3. ?Wanem pijatok i soemaot we ol man blong wosip long Jeova oli naes tumas mo oli karem plante frut?
3 Samting we i tru se long taem blong lasdei blong wol ya, ol man blong Jeova oli kasem ol blesing we i bitim wanem we oli tingbaot se bambae oli kasem. Sloslo, Jeova i bin flasem ples blong wosip blong hem mo olgeta we oli karem nem blong hem. Folem profet tok blong Aesea, Jeova i talem long Saeon se: “Ol man bambae oli karem ol nambawan wud blong kantri ya Lebanon i kam, blong stanemap Jerusalem bakegen, mo blong mekem haos blong mi i naes we i naes [“blong flasem ol ples long haos blong mi,” NW ]. Bambae oli karem ol wud ya, paentri, mo junipa, mo saepras, blong mekem taon ya [“ples blong leg,” NW ] blong mi i nambawan.” (Aesea 60:13) I naes tumas blong luk ol hil taem we oli fulap long bigbigfala tri. Taswe ol gudgudfala tri ya oli stret pija blong ol man blong wosip long Jeova we oli naes tumas mo oli karem plante frut.—Aesea 41:19; 55:13.
4. ?Wanem ya “haos” mo “ples blong leg [blong Jeova],” mo olsem wanem Jeova i flasem olgeta?
4 ?Wanem ya “haos” mo “ples blong leg [blong Jeova]” we Aesea 60:13 i tokbaot? Tufala tok ya oli yusum blong tokbaot ol yad we oli stap long bigfala tempol blong Jeova long saed blong spirit. Hemia plan we God i stanemap blong man i save wosip long hem tru long Jisas Kraes. (Hibrus 8:1-5; 9:2-10, 23) Jeova i talemaot stamba tingting blong hem blong karem ol man blong ol narafala kantri oli kam wosip long ples ya mo fulumap haos ya wetem glori. (Hagae 2:7) Bifo finis Aesea i luk ol man blong narafala kantri oli kam antap long bigfala hil blong wosip blong Jeova. (Aesea :1-4) Plante handred yia biaen, aposol Jon i luk wan vison blong “wan bigfala hip blong ol man, we olgeta i plante we plante, i no gat man i save kaontem olgeta. Ol man ya oli kamaot long olgeta kala, mo long olgeta kantri, mo long olgeta laen, mo long olgeta lanwis.” Oli stap stanap “long fes blong God . . . mo long dei mo long naet oli stap mekem wosip long hem insaed long haos blong hem.” (Revelesen 7:9, 15) Yumi luk wetem prapa ae blong yumi we ol profet tok ya oli stap kamtru tede, taem Jeova i flasem haos blong hem.
5. ?Wanem bigfala jenis we ol pikinini blong Saeon oli gotru long hem we i mekem i gud long olgeta?
5 !Bigfala jenis ya we i kamaot i mekem i gud long Saeon! Jeova i talem se: “Bambae yufala i no moa save stap yufala nomo, we ol man oli no laekem yufala, oli stap agens long yufala. Mo taon ya blong yufala bambae i no moa save stap nating, we i no gat man long hem. Mi bambae i mekem taon ya i naes we i naes, we bambae i stap mekem ol man oli glad, gogo i no save finis.” (Aesea 60:15) Klosap long en blong faswan bigfala faet blong wol ya, “Isrel blong God” i gotru long wan taem blong trabol. (Galesia 6:16, NW ) Hem i harem se ‘hem i stap hem wan nomo,’ from we ol pikinini blong hem long wol oli no bin kasem save klia wanem we God i wantem olgeta blong mekem. Nao, long 1919, Jeova i givim paoa bakegen long ol tabu man blong hem, mo stat long taem ya hem i gohed blong blesem olgeta mo oli stap gru gud long saed blong spirit. !Promes blong Jeova we i stap long vas ya i mekem yumi glad tumas! Jeova bambae i luk Saeon olsem ‘wan taon we i naes we i naes.’ Yes, ol pikinini blong Saeon, mo Jeova hem wan, bambae oli glad long Saeon. Bambae hem i “mekem ol man oli glad,” mo glad ya bambae i bigwan olgeta. Mo hemia i no blong smoltaem nomo. Jeova bambae i glad long Saeon, we ol pikinini blong hem oli wok long wol ya long nem blong hem, “gogo i no save finis.” Yes, blong olwe.
6. ?Olsem wanem ol trufala Kristin oli yusum ol sas samting blong ol narafala kantri?
6 Naoia, lesin long wan narafala promes blong God. Jeova i toktok long Saeon, i se: “Ol man blong ol narafala kantri wetem ol king blong olgeta bambae oli lukaot gud long yufala, olsem wan mama we i stap lukaot gud long pikinini blong hem, i stap givim titi long hem. Nao long taem ya, bambae yufala i save we mi mi Hae God, mi nao mi God blong paoa, mo mi God blong yufala, we oltaem mi stap sevem yufala, mi stap mekem yufala i fri.” (Aesea 60:16) ?Olsem wanem “ol man blong ol narafala kantri” oli lukaot gud long Saeon mo olsem wanem ‘ol king blong olgeta oli givim titi’ long Saeon? Ol tabu Kristin wetem ol fren blong olgeta “ol narafala sipsip” oli yusum ol sas samting blong ol narafala kantri blong mekem trufala wosip i gohed moa. (Jon 10:16) Presen mane we ol man oli glad blong givim, i givhan bigwan blong mekem se wok blong prij mo tijim man i gohed long olgeta ples blong wol. Fasin waes blong yusum teknoloji blong tede i mekem wok blong prentem ol Baebol mo buk long plante handred lanwis i isi moa. Tede, plante moa man oli save kasem trutok blong Baebol, i bitim olgeta taem bifo. Ol man blong plante kantri oli kasem save se Jeova, we i pemaot ol tabu man blong hem oli aot long kalabus long saed blong spirit, hem i Man we i stap sevem olgeta.
Ogenaesesen i Stap Gohed
7. ?Long wanem rod ol pikinini blong Saeon oli kam gud moa?
7 Jeova i flasem ol man blong hem long wan narafala rod bakegen. Hem i blesem olgeta mekem se ogenaesesen blong hem i gohed gud. Yumi ridim long Aesea 60:17 se: “Fastaem yufala i stap yusum bras blong wokem ol samting, be bambae mi mi givim gol long yufala. Fastaem yufala i stap yusum aean mo wud, be bambae mi mi givim silva mo bras long yufala. Fastaem yufala i stap yusum ston, be bambae mi mi givim aean long yufala. Bambae ol haeman mo ol lida oli no moa save mekem i strong long yufala. Mi bambae mi mekem we pis mo stret fasin, tufala i rul long yufala.” Gol i moa gud long bras. Silva mo bras i moa gud long aean mo wud mo aean i moa gud long ston. Profet tok ya i soemaot se, long ol lasdei ya Isrel blong God i gohed blong mekem ol jenis long ogenaesesen blong hem we oli moa gud. Bambae yumi luk sam eksampol.
8-10. Tokbaot sam bigfala jenis we oli kamaot afta long 1919, we oli mekem se ogenaesesen blong Jeova i ron gud moa.
8 Bifo long 1919, ol elda mo dikon oli lidim ol kongregesen blong ol man blong God. Ol memba blong kongregesen oli vot blong putumap olgeta. I stat long yia ya, “slef we i stret mo waes” i stanemap wan sevis daerekta long evri kongregesen, we i lukaot long wok blong prij. (Matiu 24:45-47, NW ) Be long plante kongregesen, plan ya i no wok gud tumas, from we sam long ol elda we kongregesen i vot blong putumap olgeta, oli no sapotem fulwan wok blong prij. Taswe, long 1932, ol kongregesen oli kasem advaes se oli no moa vot blong putumap ol elda mo dikon. Defren nao, oli mas vot blong putumap ol man we oli wok long sevis komiti wetem sevis daerekta blong hem. !Jenis ya i olsem we “bras” i tekem ples blong “wud”—ogenaesesen i kam gud moa!
9 Long 1938, ol kongregesen raonabaot long wol oli agri long wan plan we i moa gud bakegen, mo we i laenap moa wetem Baebol. Wok blong lukaot kongregesen i go long han blong wan man blong lukaot kongregesen mo sam narafala we oli givhan long hem. Slef we i stret mo waes nomo i mekem wok blong putumap olgeta. !Oli no moa folem fasin blong vot blong putumap man! Hemia i min se naoia oli putumap man folem tiokratik fasin. Hemia i olsem we “aean” i tekem ples blong ol “ston” no “gol” i tekem ples blong “bras.”
10 I stat long taem ya, ogenaesesen i gohed moa yet. Eksampol, long 1972 oli luksave se i moa gud sipos ol kongregesen wanwan oli gat wan grup blong ol elda we oli putumap olgeta folem tiokratik fasin. Grup ya blong ol elda i mas wok gud tugeta, i no mas gat wan elda we i bos long narawan. Oli luksave se fasin ya i stret moa wetem fasin we ol Kristin blong faswan handred yia oli folem blong lukaot kongregesen. Antap long samting ya, tu yia bifo, i gat wan narafala samting i hapen we i soem se ogenaesesen i gohed moa. Oli mekem wan bigfala jenis long saed blong olgeta we oli daerekta blong ol kampani blong Sosaeti we loa i agri long olgeta. From jenis ya, ol memba blong Hed Kampani oli save putum tingting blong olgeta i stap fulwan long ol samting we ol man blong God oli nidim long saed blong spirit. Oli no moa nid blong spenem taem evri dei blong stretem ol problem long saed blong loa.
11. ?Hu i stamba blong ol jenis we oli kamaot long ogenaesesen blong ol man blong Jeova, mo wanem gudfala frut i kamaot from ol jenis ya?
11 ?Hu i stamba blong ol jenis ya we i mekem ogenaesesen i gohed gud? Hemia Jeova God. Hem nao i talem se: “Bambae mi mi givim gol long yufala.” Mo hem nao i gohed blong talem se: “Mi bambae mi mekem we pis mo stret fasin, tufala i rul long yufala.” Yes, Jeova nao i lidim ol man blong hem. Profet tok i talemaot we bambae ogenaesesen blong hem i gohed gud. Hemia wan narafala rod bakegen we Jeova i yusum blong flasem ol man blong hem. Ol Witnes blong Jeova oli kasem blesing long plante defren rod from. Long Aesea 60:18, yumi ridim se: “Noes blong faet bambae i no moa save kamaot long kantri blong yufala. Bambae ol enemi oli no moa save kam blong spolem ples blong yufala. Bambae mi mi lukaot gud long yufala, mi blokemgud yufala olsem wan bigfala stonwol we i goraon long yufala. Mo long taem ya, bambae yufala i save presem mi, from we mi mi sevem yufala.” !Ol tok ya oli naes tumas! ?Be olsem wanem oli kamtru?
12. ?Olsem wanem pis i rul long medel blong ol trufala Kristin?
12 Ol trufala Kristin oli lukluk i go long Jeova blong tijim mo lidim olgeta. Aesea i talemaot frut we i kamaot from, se: “Olgeta pikinini blong yu, bambae Jeova i tijim olgeta, mo pis blong ol pikinini blong yu bambae i fulap.” (Aesea 54:13, NW ) Mo tu, spirit blong Jeova i wok long ol man blong hem, mo wan haf blong ol frut blong spirit ya hem i pis. (Galesia 5:22, 23) Pis ya we ol man blong Jeova oli gat, i mekem se oli olsem wan gudfala ples blong haed long wan wol we i fulap long raf fasin. Pis ya, we i stanap long fasin lav we ol trufala Kristin oli soem long ol narafala, i soemaot smol, gudfala laef we bambae man i gat long niufala wol. (Jon 15:17; Kolosi 3:14) I sua se, yumi evriwan i glad tumas blong leftemap pis ya. !Fasin ya bambae i presem mo givim ona long God mo hem i wan impoten fasin long paradaes blong yumi long saed blong spirit!—Aesea 11:9.
Laet Blong Jeova Bambae i Gohed Blong Saen
13. ?From wanem yumi save sua se laet blong Jeova i gohed blong saen long ol man blong hem gogo i no save finis?
13 ?Bambae laet blong Jeova i gohed blong saen long ol man blong hem? !Yes! Long Aesea 60:19, 20, yumi ridim se: “Bambae i no moa gat san blong givim laet long yufala long dei, mo bambae i no moa gat mun, blong givim laet long yufala long naet. Mi mi Hae God, mi nomo bambae mi laet blong yufala, gogo i no save finis. Bigfala laet ya we i soemaot we mi mi stap, bambae i saen i kam long yufala olwe. Mi mi olsem san mo mun blong yufala, be neva bambae mi godaon samtaem. Mi mi Hae God, mo mi bambae mi laet blong yufala, gogo i no save finis. Naoia yufala i stap harem nogud, yufala i stap krae, be hadtaem ya bambae i finis.” Taem oli kamaot long kalabus long saed blong spirit long 1919, i olsem we “hadtaem” blong olgeta i finis. I stat long taem ya, laet blong Jeova i stat blong saen long olgeta. Bitim 80 yia biaen, ol man blong Jeova oli haremgud yet, from we hem i glad long olgeta mo laet blong hem i gohed blong saen. Mo laet ya bambae i gohed blong saen blong olwe. Jeova i no olsem san no mun we bambae i “godaon” samtaem. Defren olgeta, hem bambae i mekem laet blong hem i saen long ol man blong hem gogo i no save finis. !Promes ya i givhan bigwan long yumi we yumi laef long taem blong lasdei blong wol ya we i stap long tudak!
14, 15. (a) ?Olgeta man blong God oli kam “stret man” long fes blong hem olsem wanem? (b) ?Folem ol tok blong Aesea 60:21, ol narafala sipsip oli lukluk i go long wanem impoten samting we bambae i kamtru long fiuja?
14 Lesingud long wan narafala promes we Jeova i givim long Isrel blong God, we oli wok long wol ya long nem blong Saeon. Aesea 60:21 i talem se: “Bambae yufala evriwan i mekem ol fasin we i stret, mo bambae yufala i stap long kantri blong yufala, gogo i no save finis. Mi mi mekem yufala, mo yufala i olsem wan tri we mi planem long ples ya, blong mi save soemaot long olgeta man, we mi mi gat olgeta paoa.” Long 1919, taem ol tabu Kristin oli stat bakegen blong prij, oli wan kampani blong man we i defren olgeta. Long wan wol we i fulap long sin, Jeova i luk olgeta olsem “stret man” long fes blong hem. Hemia from strong bilif blong olgeta long sakrefaes blong Kraes Jisas. (Rom 3:24; 5:1) Biaen, oli tekem wan “kantri” i blong olgeta, olsem ol man Isrel oli mekem taem oli aot long kalabus long Babilon. Hemia wan kantri long saed blong spirit, we i olsem ples blong wok we oli save haremgud long hem olsem we oli stap long wan paradaes long saed blong spirit. (Aesea 66:8) Naesfala paradaes ya long saed blong spirit bambae i neva finis samtaem from we Isrel blong God i defren long nesen blong Isrel bifo, bambae hem i stap tru long God olsem wan nesen. Bilif, fasin blong stanap strong, mo strong tingting blong olgeta bambae i gohed blong givim ona long nem blong God blong olwe.
15 Olgeta memba blong nesen ya long saed blong spirit oli stap insaed long niufala kontrak. Jeova i putum loa blong hem i stap long hat blong olgeta, mo hem i fogivim sin blong olgeta from sakrefaes blong Jisas. (Jeremaea 31:31-34) Hem i luk olgeta olsem ol “pikinini” we oli stret man finis mo fasin we hem i mekem long olgeta i olsem se oli stretgud olgeta. (Rom 8:15, 16, 29, 30) From sakrefaes blong Jisas, Jeova i fogivim ol sin blong ol fren blong olgeta tu, hemia ol narafala sipsip. From bilif blong olgeta, Jeova i lukluk olgeta olsem ol fren blong hem we oli stret man finis, olsem Ebraham bifo. “Oli wasem ol klos blong olgeta finis long blad blong Smol Sipsip ya we i ded.” Grup ya i save lukluk i go long fiuja blong kasem wan narafala blesing we i nambawan. Afta we oli kasem sef tru long “bigfala trabol” no afta we oli laef bakegen long ded, bambae oli luk ol tok blong Aesea 60:21 i kamtru long saed blong bodi, taem ful wol bambae i kam wan paradaes. (Revelesen 7:14; Rom 4:1-3) Long taem ya, “ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11, 29.
Namba i Kam Antap Moa
16. ?Jeova i givim wanem nambawan promes, mo olsem wanem promes ya i kamtru?
16 Long laswan vas blong Aesea 60, yumi ridim laswan promes we Jeova i givim long japta ya. Hem i talem long Saeon se: “Hemia we i smolwan bambae i kam wan taosen man, mo hemia we i olsem nating nomo bambae i kam wan strongfala nesen. Mi, Jeova, bambae mi mekem wok ya i spid moa long stret taem blong hem.” (Aesea 60:22, NW ) Long taem blong yumi, Jeova i holem promes blong hem. Taem ol tabu Kristin oli stat blong prij bakegen long 1919, namba blong olgeta i smol nomo—yes, oli olsem wan “smolwan.” Namba blong olgeta i kam antap taem oli karem moa man Isrel long saed blong spirit oli kam. Mo biaen, namba blong ol narafala sipsip oli stat kam bigwan moa. Pis we i stap long medel blong ol man blong God, we i olsem wan paradaes long saed blong spirit long “kantri” blong olgeta, i pulum plante man we hat blong olgeta i stret oli kam. Long rod ya nao “smolwan” i rili kam wan “strongfala nesen.” Tede, Isrel blong God mo bitim sikis milian “man blong ol narafala kantri” we oli givim laef blong olgeta i go long Jeova, oli mekemap “nesen” ya we i bigwan moa i winim plante nesen long ol kantri blong wol. (Aesea 60:10) Olgeta sitisen blong nesen ya oli letem laet blong Jeova i saenaot, mo from samting ya Jeova i luk olgeta olsem se oli naes tumas.
17. ?Ol poen we yumi lanem long Aesea japta 60 oli mekem wanem long yu?
17 Yes, fasin blong tingbaot ol stamba poen blong Aesea japta 60 i mekem bilif blong ol man blong God i kam strong. Yumi haremgud blong save we longtaem bifo finis Jeova i save we ol man blong hem bambae oli kalabus long saed blong spirit mo biaen oli kam strong bakegen. Yumi sapraes we Jeova i save we namba blong ol trufala man blong wosip long taem blong yumi, bambae i kam antap bigwan. !Mo tu, yumi haremgud tumas blong tingbaot we Jeova bambae i neva lego yumi! Yumi haremgud from we yumi sua se ol doa blong “taon ya” bambae oli open i stap olwe blong tekem olgeta we “oli stret blong kasem laef we i no save finis” oli kam! (Ol Wok 13:48, NW ) Jeova i gohed blong saenem laet long ol man blong hem. Hem i gohed blong mekem Saeon i naes we i naes, from we ol pikinini blong hem oli letem laet blong olgeta i saenaot moa. (Matiu 5:16) !I sua se yumi gat strong tingting, bitim bifo, blong stap klosap long Isrel blong God mo tinghae long janis ya we yumi gat blong karem laet blong Jeova i go long ol man!
?Yu Yu Save Eksplenem?
• ?Long saed blong ol man blong agens, yumi sua long wanem samting?
• ?Olsem wanem ‘ol man blong ol narafala kantri oli stap givim titi’ long ol pikinini blong Saeon?
• ?Olsem wanem Jeova ‘i givim bras long olgeta blong tekem ples blong wud’?
• ?Aesea 60:17, 21 i makem wanem tufala fasin blong ol man blong Jeova?
• ?Olsem wanem “smolwan” i kam wan “strongfala nesen”?
[Kwestin]
[Bokis/Foto blong pija long pej 18]
PROFET TOK BLONG AESEA—Laet Blong Olgeta Man
Bighaf blong tufala stadi ya i kamaot long wan tok we oli givim long Distrik Asembli ya “Ol Man Blong Tijim Tok Blong God” long ol yia 2001/2002. Long klosap olgeta ples we oli mekem asembli ya, brata we i givim tok i talemaot wan niufala buk we nem blong hem Isaiah’s Prophecy—Light for All Mankind, Buk Tu. Wan yia bifo, Isaiah’s Prophecy—Light for All Mankind, Buk Wan i bin kamaot. From niufala buk ya, yumi save kasem save long klosap olgeta vas blong buk blong Aesea, we oli stret long taem blong yumi. Tufala buk ya i givhan bigwan long yumi blong kasem dip save mo fasin tangkiu long profet buk blong Aesea we i mekem bilif blong yumi i strong.
[Tok blong pija long pej 15]
Nating se ol man oli agensem olgeta strong, ‘Jeova i flasem ol man blong hem taem hem i sevem olgeta’
[Tok blong pija long pej 16]
Ol man blong God oli yusum ol sas samting blong ol narafala kantri blong sapotem trufala wosip
[Tok blong pija long pej 17]
Jeova i blesem ol man blong hem taem hem i mekem ogenaesesen blong hem i gohed gud mo i givim pis long olgeta