?Tijing Blong Yu i Karem Frut?

OL PAPA mama, ol elda, ol man blong talemaot gud nius—olgeta evriwan oli mekem wok blong tija. Ol papa mama oli tijim ol pikinini blong olgeta, ol elda oli tijim ol memba blong Kristin kongregesen, mo ol man blong talemaot gud nius oli tijim ol niuwan we oli intres long trutok. (Dutronome 6:6, 7; Matiu 28:19, 20; 1 Timoti 4:13, 16) ?Olsem wanem tijing blong yu i save karem moa frut? Blong kasem mak ya, i gud blong folem eksampol mo fasin blong tij blong ol gudfala tija we Baebol i tokbaot. Esra i wan long ol tija ya.

Eksampol Blong Esra i Tijim Yumi

Esra i wan pris we i kamaot long laen blong Eron, mo hem i laef long Babilon 2,500 yia bifo. Long yia 468 B.K.T., * hem i go long Jerusalem blong leftemap klin wosip long medel blong ol man Jiu we oli stap laef longwe. (Esra 7:1, 6, 12, 13) Blong mekem samting ya, hem i mas tijim ol man long Loa blong God. ?Esra i bin mekem wanem blong meksua se tijing blong hem i karem frut? I gat sam defdefren samting we hem i mekem. Makem ol samting ya long Esra 7:10 (NW ):

“Esra i [1] mekemrere hat blong hem finis [2] blong ridimgud loa blong Jeova, mo [3] blong mekem hem i wok, mo [4] blong tijim ol man Isrel long ol rul mo long stret fasin.” I gud yumi tingbaot ol fofala samting ya mo luk wanem tijing we yumi save kasem from.

“Esra i Mekemrere Hat Blong Hem Finis”

Olsem wan man blong wok long garen we i tantanem graon bifo we i planem ol sid long hem, Esra i stap prea plante blong mekemrere hat blong hem blong kasem tok blong God. (Esra 10:1) I olsem we ‘hat blong hem i laekem’ kasem tijing blong Jeova.—Ol Proveb 2:2, NW.

Long sem fasin, Baebol i talem se King Jeosafat i “stap traehad [“mekemrere hat blong hem,” NW ] blong mekem ol samting we Hae God i wantem.” (2 Kronikel 19:3) Defren olgeta, Baebol i tokbaot ol man Isrel we “neva oli putum tingting [“mekemrere hat,” NW ] blong olgeta i stap strong long God,” oli “no save obei long God, oli stap agens long hem.” (Ol Sam 78:8) Jeova i stap lukluk “ol fasin we oli stap haed long hat.” (1 Pita 3:4, NW ) Yes, Jeova i stap tijim ‘olgeta man we tingting blong olgeta i stap daon.’ (Ol Sam 25:9) !Taswe, i impoten tumas we tede, olgeta we oli  stap tijim narafala, oli folem eksampol blong Esra, nao oli prea blong mekemrere hat blong olgeta!

“Blong Ridimgud Loa Blong Jeova”

Blong Esra i wan tija we i nafgud, hem i stap ridim Tok blong God. Sipos yu go luk wan dokta, ating yu lesingud long olgeta tok blong hem, mo yu meksua se yu kasem save evri samting we hem i bin talem no olsem wanem blong tekem ol meresin we hem i givim long yu. Yes, ating yu mekem olsem from we helt blong yu i dipen long samting ya. Taswe, i stret we yumi lukaotgud moa long olgeta samting we Jeova i stap talem long yumi tru long Tok blong hem, Baebol, mo tru long “slef we i stret mo waes.” !Laef blong yumi i dipen long ol advaes blong Hem! (Matiu 4:4; 24:45-47, NW ) I tru, wan dokta i save mestem, be “loa blong Hae God i stret gud.” (Ol Sam 19:7) Bambae yumi neva nidim wan narafala advaes.

Tufala buk blong Kronikel long Baebol (we fastaem Esra i raetem olsem wan buk nomo) oli soem se Esra i wan man we i stadi dip. Blong raetem tufala buk ya, hem i mas lukluk i go long plante defren buk. * Ol man Jiu, we oli jes kamaot long Babilon, oli nidim blong save histri blong nesen blong olgeta. Oli no gat naf save long saed blong wosip blong olgeta, wok blong mekem long tempol, mo wok blong ol Livaet. Ol buk we oli tokbaot laen blong olgeta, i rili impoten long olgeta. Esra i bin lukaot gud long bisnes ya. Gogo kasem taem we Mesaea i kamtru, ol man Jiu oli stap olsem wan nesen we i gat prapa graon blong hem, wan tempol, ol pris, mo wan rula. Hadwok blong Esra blong hivimap olgeta save ya i mekem se ol man Jiu oli save joengud tugeta mo no lusum trufala wosip.

?Olsem wanem long fasin blong stadi blong yu, taem yu skelem wetem fasin blong Esra? Fasin blong stadigud long Baebol bambae i givhan long yu blong yu save tijimgud Baebol mo kasem frut.

“Blong Ridimgud Loa Blong Jeova” Olsem Wan Famle

Yu mas ridim loa blong Jeova, be i no taem yu mekem stadi blong yu wan nomo. Taem yu mekem famle stadi, hemia wan nambawan janis tu blong ridim loa blong God.

Jan mo waef blong hem Julia, tufala i laef long Netalan, mo stat long taem we tufala pikinini boe blong tufala i bon, oli stap ridim Baebol long tufala. Tede, Ivo i gat 15 yia mo Edo i gat 14 yia. Oli stap gohed yet blong mekem famle stadi evri wik. Jan i eksplenem se: “Stamba mak blong mifala i no blong tokbaot plante samting long famle stadi, be mifala i wantem se ol boe oli kasemgud tok we mifala i stadi long hem.” Hem i ademap se: “Tufala boe i mekem dip stadi. Tufala i jekemap ol wod we tufala i no save mo traem faenem moa save long ol man we Baebol i tokbaot—wetaem oli bin laef, oli wanem kaen man, oli bin mekem wanem, mo ol narafala samting bakegen. Stat long taem we tufala i save rid, tufala i lukluk i go long ol buk olsem Insight on the Scriptures, ol diksonari, mo ol insaeklopedia. From fasin ya mifala i glad moa blong mekem famle stadi. Oltaem ol boe oli wantem tumas blong mekem famle stadi.” Mo tu, wan narafala gudfala frut we i kamaot from, hemia se tufala boe oli kam faswan long klas blong tufala long fasin blong yusum lanwis.

John mo Tini tufala i papa mama tu we oli laef long Netalan mo oli bin stadi wetem Esli, boe blong tufala (we naoia i gat 24 yia mo hem i wan paenia long wan narafala kongregesen), mo Linda, gel blong tufala (we naoia i gat 20 yia mo i mared wetem wan gudfala brata). Taem oli stadi tugeta, oli no mekem wan stadi wetem kwestin-mo-ansa nomo olsem we i stap long buk, be oli mekem wan famle stadi we i stret long yia blong ol pikinini mo we i ansa long ol nid blong olgeta. ?Olsem wanem oli bin mekem stadi ya?

John i eksplenem se Esli mo Linda oli jusum wan haf we oli intres long hem long “Wan Kwestin” (long ol Wajtaoa) no long “Baebol i Talem Wanem” (long ol Wekap!). Biaen, oli eksplenem ol samting we oli bin stadi long hem, mo oltaem famle i storian gud long samting ya. Folem rod ya nao ol yangfala oli kasem gudhan blong stadi dip mo eksplenem ol samting we oli bin faenemaot. ?Yu yu stap “ridimgud loa blong Jeova” wetem ol pikinini blong yu? Fasin ya bambae i mekem yu yu nafgud blong tij, mo tu i givhan long ol pikinini blong yu blong oli kasem moa frut.

 “Blong Mekem Hem i Wok”

Esra i mekem ol samting we hem i lanem i wok long laef blong hem. Eksampol, taem hem i stap yet long Babilon, maet hem i gat wan laef we i isi. Be hem i luksave se hem i save halpem ol man Jiu longwe, taswe hem i lego gudfala laef long Babilon blong muv i go long Jerusalem we i farawe, nating se laef long ples ya i no isi, i gat trabol mo denja tu. I klia we Esra i gat gudfala save long Baebol, be antap long hemia, hem i rere blong folem ol samting we hem i bin lanem.—1 Timoti 3:13.

Biaen, taem Esra i stap long Jerusalem, hem i soem bakegen se hem i folem ol samting we hem i bin lanem mo tijim long narafala. Fasin ya i kamaot klia taem hem i harem se ol man Isrel oli stap mared wetem ol hiten woman. Baebol i talem se hem i ‘terem klos blong hem, i pulpulumaot hea blong hem, mo mustas blong hem, mo i go sidaon we i harem nogud tumas.’ Mo tu hem i ‘sem tumas, i no save kam leftemap hed blong hem’ long fes blong Jeova.—Esra 9:1-6.

!Stadi we Esra i mekem long loa blong God i rili tajem hat blong hem! Esra i luksave ol nogud frut we bambae oli kamaot taem we ol man Jiu oli no obei long loa blong God. I no gat plante man Jiu we oli kambak long Jerusalem. !Taswe, sipos oli stat mared wetem ol strenja, maet oli save miks wetem ol hiten nesen raonabaot, mo klin wosip i save lus fulwan long wol!

Laki nomo, gudfala eksampol blong Esra, we i fraetgud long God mo i gat strong tingting blong mekem wok blong God, i pulum ol man Isrel blong stretem fasin blong olgeta. Oli sakemaot ol waef blong olgeta we oli blong narafala kantri. Tri manis nomo biaen, problem ya i finis. Fasin blong Esra blong stap tru long Loa blong God i mekem we tijing blong hem i karem frut.

Hemia i sem mak long yumi tede. Wan Kristin papa i talem se: “!Ol pikinini oli folem moa eksampol blong yumi, i bitim ol tok we yumi givim long olgeta!” Mo samting ya i tru tu insaed long Kristin kongregesen. Taem ol elda oli givim gudfala eksampol, oli save sua se kongregesen bambae i folem ol tijing we oli givim.

“Tijim Ol Man Isrel Long Ol Rul Mo Long Stret Fasin”

Be i gat wan narafala risen tu we i mekem se tijing blong Esra i karem frut. Hem i no tijim prapa tingting blong hem, be hem i tijim ‘ol rul mo stret fasin,’ we i minim ol rul, no loa, blong Jeova. Hemia nao wok blong hem olsem wan pris. (Malakae 2:7) Mo tu, hem i tijim stret fasin, mo i givim wan gudfala eksampol long saed ya from we oltaem hem i mekem i stret mo i sem mak long ol man, folem ol rul blong God. Taem olgeta we oli gat paoa oli mekem i stret, laef blong ol man i no olbaot mo oli karem gudfala frut we i stap longtaem. (Ol Proveb 29:4) Long sem fasin, ol Kristin elda, ol papa mama, mo ol man blong talemaot gud nius blong Kingdom, we olgeta oli savegud Tok blong God, bambae oli mekem ol man oli stanap strong long saed blong spirit taem oli tijim ol rul mo stret fasin blong Jeova long kongregesen, famle blong olgeta, mo olgeta we oli intres.

?Yu agri se tijing blong yu i save karem moa frut sipos yu folem stret eksampol blong Esra, man ya blong bilif? Ale, ‘mekemrere hat blong yu, ridimgud loa blong Jeova, mekem hem i wok, mo tijim ol rul mo stret fasin blong Jeova.’—Esra 7:10, NW.

[Ol Futnot]

[Bokis/Foto blong pija long pej 22]

?FROM WANEM TIJING BLONG ESRA I KAREM FRUT?

1. Hem i mekemrere hat blong hem

2. Hem i ridimgud Loa blong Jeova

3. Hem i soem gudfala eksampol taem hem i folem ol samting we hem i lanem

4. Hem i mekem dip stadi blong tijim Tok blong God