Wokbaot Long Rod Blong Jeova Mo Kasem Blesing

?YU YU wokbaot finis antap long ol bigfala hil? Sipos yu mekem samting ya finis, ating yu harem olsem se yu stap antap long wol. !I naes tumas blong pulum fres win, mo blong lukluk i go longwe, mo blong stap long medel blong ol naesfala tri mo bus! Ating long taem ya, olgeta trabol blong wol oli stap longwe long yu, no maet oli no moa mekem yu yu harem nogud tumas.

I tru se ol wokbaot olsemia maet oli samting we yumi no mekem plante, no maet yumi neva mekem. Be sipos yu yu wan Kristin we yu givim laef blong yu finis long God, maet yumi save talem se yu stap wokbaot long wan ples we i hae olsemia long saed blong spirit. I sua se yu bin prea olsem man ya blong raetem Sam bifo, se: “Hae God. Plis yu tijim mi long ol fasin blong yu, yu mekem mi mi savegud ol rod blong yu.” (Ol Sam 25:4) ?Yu yu rimemba wanem filing we yu gat fastaem, taem we yu kam antap long bigfala hil blong Jeova mo yu stat wokbaot antap long hil ya? (Maeka 4:2; Habakuk 3:19) Ating yu luksave kwiktaem nomo se man i harem sef mo i glad tumas taem hem i wokbaot folem ol rod blong hil ya we i minim klin wosip blong Jeova. Ating filing blong yu i sem mak wetem filing blong man ya blong raetem Sam we i se: “Olgeta we oli stap singsing blong presem yu, oli glad tumas. Oltaem yu yu kaen gud long olgeta, nao i olsem we oli stap wokbaot long delaet.”—Ol Sam 89:15.

Be, samtaem ol man we oli stap wokbaot antap long ol hil oli mas klaem folem ol rod we oli longwan i go antap long ples we i stip. Maet oli harem we ol leg blong olgeta i stat soa, mo oli stat blong taed. Long wosip blong God tu, yumi save faenem we samtaem yumi taed. Maet i no longtaem i pas, yumi bin harem se ol leg blong yumi oli stat kam hevi lelebet mo yumi taed blong wokbaot. ?Olsem wanem blong kasembak paoa mo glad blong yumi? Faswan step, i gud blong luksave se ol rod mo wei blong Jeova oli hae mo oli nambawan olgeta.

Ol Loa Blong Jeova We Oli Hae

Ol rod blong Jeova oli ‘hae moa long ol rod blong man,’ mo wosip blong hem i ‘stanap strong antap moa long ol bigfala hil, mo i kam hae moa i bitim ol hil.’ (Aesea 55:9, NW; Maeka 4:1, NW ) Waes blong Jeova i “kam long heven.” (Jemes 3:17) Yes, ol loa blong hem oli hae moa long eni narafala loa. Tingbaot taem ya we ol man Kenan oli stap kilim ol pikinini blong olgeta blong mekem sakrefaes long god blong olgeta. Long taem ya, Jeova i givim sam loa long ol man Isrel we ol loa ya oli leftemap ol fasin we oli gud mo oli pulum man blong gat fasin sore. Hem i talem long olgeta se: “Yufala i mas jajem tufala [puaman wetem rijman] long sem mak nomo. . . . Yufala i mas lavem ol narafala man [ol strenja] olsem we yufala i stap lavem yufala, mo yufala i mas lukaot gud long olgeta, sem mak olsem we yufala i stap lukaot gud long ol laen blong yufala nomo.”—Levitikas 19:15, 34.

Wan taosen faef handred yia biaen, Jisas i givim sam narafala eksampol we oli soemaot se yumi mas “ona long ol loa” blong Jeova. (Aesea 42:21) Long bigfala toktok blong Jisas antap long hil, hem i talem long ol disaepol blong hem se: “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.  Long fasin ya, bambae yufala i soemaot we yufala i pikinini blong Papa blong yufala long heven.” (Matiu 5:44, 45) Mo hem i ademap se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.”—Matiu 7:12.

Ol haefala rul ya oli gat paoa long hat blong ol man we oli wantem folem olgeta mo oli pusum ol man blong folem ol fasin blong God ya we oli stap wosip long hem. (Efesas 5:1; 1 Tesalonaeka 2:13) Tingbaot ol bigfala jenis we Pol i mekem long laef blong hem. Taem Baebol i tokbaot hem fastaem, yumi luk se hem “i glad nomo we olgeta oli kilim Steven i ded” mo hem i stap “mekem i strong tumas” long ol Kristin. Be, sam yia nomo afta long hemia, Pol i wok wanples wetem ol Kristin long Tesalonaeka, mo fasin blong hem i kaen gud, i olsem “wan mama we i stap lukaot long ol pikinini blong hem.” Ol tijing we oli kamaot long God oli jenisim Pol, oli mekem we hem i no moa wan man blong ronem man be i kam wan Kristin we i kea bigwan long ol narafala. (Ol Wok 8:1, 3; 1 Tesalonaeka 2:7) Ating Pol i tangkiu bigwan se tijing blong Kraes i stretem fasin blong hem mo mekem i kam moagud. (1 Timoti 1:12, 13) ?Sipos yumi gat tangkiu olsem hem, olsem wanem samting ya i save halpem yumi blong gohed blong wokbaot folem ol rod blong God we oli hae?

Wokbaot Wetem Fasin Tangkiu

Ol man we oli wokbaot antap long ol bigfala hil oli harem gud tumas blong lukluk ol naesfala samting we i stap raonabaot long olgeta. Mo tu, taem oli stap wokbaot, oli tektaem blong lukluk gud ol samting nating se oli smol samting nomo. Maet oli lukluk wan ston we saes blong hem i defren, no wan naesfala flaoa, no wan anamol. Yumi mas mekem sem samting tu long wosip blong yumi. Yumi mas tektaem blong lukluk ol blesing we yumi kasem taem yumi stap wokbaot wetem God—maet hem i samting we i bigwan no i smol. Fasin blong luksave ol samting olsem, i save mekem yumi smat moa long wokbaot blong yumi mo i save jenisim wokbaot blong yumi, we maet i had, i kam wan wokbaot we yumi glad long hem. Bambae yumi save talem semfala toktok ya we Deved i talem se: “Mi mi putum tingting blong mi i stap strong long yu. Evri moning, plis yu soemaot long mi bakegen we oltaem yu yu lavem man tumas. Oltaem prea blong mi i stap go antap long yu. Plis yu soemaot rod long mi, blong mi mi folem.”—Ol Sam 143:8.

Mary i wokbaot folem ol rod blong Jeova blong plante yia finis. Hem i se: “Taem mi luk ol samting we Jeova i wokem, mi no wajem ol samting ya nomo be mi tingbaot tu ol fasin blong Jeova we oli naes tumas. Nating se mi luk wan anamol, wan pijin, no wan smol bebet, be mi luksave se evriwan oli gat wan samting we i spesel mo we i pulum intres blong mi. Semfala glad ya, mi kasem taem we, sloslo, ol trutok oli stap kam klia moa long mi long ol yia we oli pas.”

?Olsem wanem yumi save mekem fasin tangkiu blong yumi i kam dip moa? Wan rod hemia blong no ting nating long wanem we Jeova i stap mekem blong yumi. Pol i raetem se: “Oltaem yufala i mas prea. Mo long olgeta samting we oli stap kamtru long yufala, yufala i mas talem tangkiu long God.”—1 Tesalonaeka 5:17, 18; Ol Sam 119:62.

Stadi long Baebol i halpem yumi blong gat fasin blong wantem talem tangkiu oltaem. Pol i pulum ol Kristin long Kolosi se: “Oltaem, laef blong yufala i mas joen long laef blong [Jisas Kraes] . . . Mo oltaem, yufala i mas talem tangkiu long hem.” (Kolosi 2:6, 7) Fasin blong ridim Baebol mo tingting dip long ol samting we yumi ridim, i mekem bilif blong yumi i kam strong moa mo i pulum yumi i kam klosap moa long God we hem nao i raetem Baebol. Insaed long Baebol i gat ol sas samting we oli save pulum yumi blong ‘talem tangkiu oltaem.’

Taem yumi wok wanples wetem ol brata blong yumi, samting ya i mekem i isi moa long yumi blong wokbaot long stret rod. Man blong raetem Sam i tokbaot hem wan i se: “Mi mi stap fren long olgeta man we oli stap wok blong yu mo oli stap obei long ol loa blong yu.” (Ol Sam 119:63) Sam long ol taem we yumi hapi moa long laef blong yumi hemia taem we yumi spenem wetem ol brata blong yumi long ol Kristin asembli no long nara ples bakegen. Yumi luksave se, from Jeova mo ol wei blong hem we oli hae, tede yumi save gat wan gudfala Kristin famle raon long wol.—Ol Sam 144:15b, NW.

 Be antap long fasin tangkiu, yumi mas holem tingting ya tu se yumi gat ol wok blong mekem. Hemia i save mekem yumi strong blong gohed folem ol rod blong Jeova we oli hae.

No Fogetem Ol Wok Blong Yu

Ol man we oli wokbaot antap long ol bigfala hil oli luksave se i gat wan samting we oli mas mekem. Taem oli stap wokbaot oli mas lukaot gud blong no lusum rod mo no kam klosap tumas long ol ples we oli stip. Yumi man, yumi fri blong jusum wei blong yumi. Yes, Jeova i letem yumi fri blong tekem prapa disisen blong yumi. Be fasin fri ya i joen wetem narafala samting moa, hemia fasin blong luksave se i gat wan samting blong mekem taem yumi stap gohed long Kristin fasin blong yumi.

Eksampol, Jeova i trastem ol man blong hem se bambae oli tinghevi long ol wok we oli mas mekem. Hem i no talem hamas paoa mo taem we yumi mas spenem long ol Kristin wok mo hem i no talem hamas mane no narafala samting we yumi mas givim. Tingbaot ol tok ya we Pol i raetem i go long ol Kristin long Korin mo we oli stret long yumi tu: “Nao evri man oli mas givim sam samting, olsem we olgeta wanwan oli jusumaot.”—2 Korin 9:7; Hibrus 13:15, 16.

Ol Kristin we oli luksave se i wok blong olgeta blong givim samting long narafala, bambae oli joen long wok blong talemaot gud nius. Mo tu, bambae oli luksave se i wok blong olgeta blong givim presen mane blong sapotem wok blong Kingdom long ful wol. Wan elda we nem blong hem Gerhardt, i talem se hem wetem waef blong hem, tufala i mekem plan blong givim moa presen mane afta we tufala i bin joen long wan asembli long Is Yurop. Hem i se: “Mitufala i luk we ol brata blong yumi longwe oli no gat plante samting long laef, be nating se i olsem, oli glad we oli glad tumas from ol buk blong Baebol. Taswe, mitufala i wantem traem givim moa, olsem we mitufala i naf, blong sapotem ol brata ya long narafala kantri we oli gat nid.”

Traehad Moa Blong Stanap Strong Longtaem

Taem man i wokbaot antap long ol hil hem i nidim paoa blong winim fasin taed. From samting ya, ol man we oli laekem wokbaot antap long ol hil oli stap eksasaes plante, mo oli mekem plante sotfala wokbaot blong rerem olgeta long ol longfala wokbaot ya we bambae oli mekem. Long sem fasin, Pol i talem se i gud we yumi stap bisi oltaem long ol tiokratik wok blong mekem se yumi stap fit long saed blong spirit. Taswe Pol i talem se olgeta we oli wantem ‘wokbaot long fasin we Jeova i glad long olgeta’ mo we ‘oli wantem kasem paoa,’ oli mas gohed blong ‘karem moa frut long evri gudfala wok.’—Kolosi 1:10, 11, NW.

Wan man we i wokbaot antap long ol bigfala hil bambae i save gohed long wokbaot blong hem sipos hem i tingbaot sam samting we oli save pusum hem blong gohed. Maet hem i tingbaot wan samting we i olsem wan mak we hem i lukluk i go long hem, olsem wan hil longwe. Samting ya i save pusum hem blong i gohed. Taem hem i luksave wanem ples we hem i stap long hem, ale hem i save yusum samting ya blong skelem sipos hem i stap gohed gud long wokbaot blong hem mo bambae i save kasem mak we hem i putum long fored. Taem hem i lukluk i gobak long rod blong hem, hem i glad blong luk se hem i wokbaot longwe finis.

Long sem fasin, taem yumi tingbaot hop blong yumi blong laef olwe yumi kasem paoa blong gohed. (Rom 12:12) Be long semtaem ya we yumi stap wokbaot folem ol rod blong Jeova, yumi kasem glad taem yumi putum ol Kristin mak we yumi wantem kasem mo biaen yumi wokhad blong kasem ol mak ya. Mo tingbaot glad we yu gat taem yu tingtingbak long olgeta yia we yu bin spenem long wok blong Jeova no taem yu lukluk ol jenis we yu bin mekem long fasin blong yu.—Ol Sam 16:11.

Taem ol man oli save se wokbaot blong olgeta bambae i longfala, oli traem blong no westem paoa blong olgeta, taswe oli wokbaot long wan spid we i stret. Long sem fasin, yumi save kasem mak we yumi putum sipos yumi gat wan gudfala program long saed blong spirit, we long program ya yumi stap go oltaem long ol miting mo joen long wok blong prij. Taswe, Pol i leftemap tingting blong ol Kristin brata blong hem se: “Yumi mas gohed long rod ya we yumi stap folem kam kasem naoia.”—Filipae 3:16.

I tru, yumi no wokbaot yumi wan nomo long rod blong Jeova. Pol i raetem se: “I gud yumi stap tingbaot yumi, blong yumi givgivhan long yumi blong mekem yumi strong moa long lav mo long ol gudfala wok.” (Hibrus 10:24, NW ) Bambae i isi moa long yumi blong wokbaot oltaem wetem ol Kristin brata blong yumi sipos yumi lukaot kampani blong olgeta we oli strong long saed blong spirit.—Ol Proveb 13:20.

Laswan samting we i impoten tumas se, yumi neva mas fogetem paoa we Jeova i stap givim. Ol man we oli dipen long paoa blong Jeova bambae “oli stap kam strong moa.” (Ol Sam 84:5, 7) Nating se samtaem yumi kasem hadtaem, be sipos yumi letem Jeova i halpem yumi, bambae yumi save gohed.