Wosipim God “Long Spirit”

“?Yu save talem se God i sem mak long hu? ?Yu yu save mekem wan pija blong hem?”—Aesea 40:18, “THE JERUSALEM BIBLE”

MAET yu yu bilif strong se fasin ya blong yusum ol tabu pija blong wosipim God, i stret nomo. Maet yu filim se samting ya i mekem we yu kam klosap moa long Man ya blong Harem ol prea, we yumi no save luk hem mo we maet yumi ting se hem i stap longwe tumas long yumi.

?Be yu ting se yumi fri blong jusum rod we yumi nomo i wantem blong kam klosap long God? ?Yu no ting se God nao i gat raet blong talem wanem samting i stret blong mekem mo wanem samting i no stret? Jisas i talemaot tingting blong God long saed ya taem hem i talem se: “Mi mi Rod ya, mi Trutok mo mi Laef. I no gat man i save kam long Papa sipos hem i no pastru long mi.” (Jon 14:6) * Sotfala tok ya nomo i soem klia se i rong blong yusum ol tabu pija no enikaen aedol long wosip blong yumi.

I gat wan fasin blong wosip we i stret long fes blong Jeova God. ?Wosip ya i olsem wanem? Long wan narafala taem, Jisas i talem se: “Aoa i stap kam—tru ya, hem i kam finis—we ol trufala man blong God bambae oli wosipim Papa long spirit mo trutok: hemia nao wosip we Papa i wantem. God hem i wan spirit, mo olgeta we oli wosipim hem oli mas wosipim hem long spirit mo trutok.”—Jon 4:23, 24.

?Sipos God hem i “spirit” yu ting se man i save mekem wan pija blong hem? Nogat. Nating se wan tabu pija i naes olsem wanem, be neva bambae hem i naf blong soemaot trufala glori blong God. Taswe wan pija blong God i wan giaman samting nomo. (Rom 1:22, 23) ?Yu ting se wan man i stap ‘wosipim God long trutok,’ sipos hem i yusum wan tabu pija, we ol man nomo oli wokem, blong kam klosap long God?

 Wan Tijing Blong Baebol We i Klia

Loa blong God i putum tabu long fasin blong wokem ol aedol blong wosip. Namba tu long ol Tenkomanmen i talem se: “Yu no mas katem mo mekem wan aedol no pija blong eni samting we i stap long heven no daon long wol no long solwota aninit long graon; yu no mas bodaon long olgeta mo mekem wosip long olgeta.” (Eksodas 20:4, 5) Mo tu, Kristin haf blong Baebol we tabu spirit i lidim, i givim oda ya se: “Yufala i mas stap longwe long fasin blong wosipim aedol.”—1 Korin 10:14.

Plante man oli strong blong talem se fasin blong yusum aedol long wosip i no sem mak long fasin blong wosipim aedol. Eksampol, plante taem ol Kristin blong Otodoks Jos oli talem se oli no rili wosipim ol tabu pija ya taem oli bodaon no nildaon fored long olgeta mo prea long olgeta. Wan pris long Otodoks Jos i raetem se: “Mifala i givim ona long olgeta [ol tabu pija ya] from we oli blong God, mo mifala i ona long ol man ya we oli stap long ol tabu pija ya.”

Be kwestin i stap yet se: ?God i agri we man i yusum ol tabu pija olsem rod blong ona long hem? I no gat wan tok long Baebol we i agri wetem fasin ya. Taem ol man Isrel oli wokem wan bul mo oli talem se bul ya i pija blong Jeova we oli wantem ona long hem, Jeova i kros bigwan long olgeta, mo i talem long olgeta se oli go agensem wosip blong hem.—Eksodas 32:4-7.

Wan Denja We i Haed

I denja tumas blong yusum ol samting olsem aedol no pija long wosip blong yumi. Fasin ya i save pulum man isi nomo blong i wosipim aedol no pija ya i winim we hem i wosipim God. Hemia i min se, naoia tingting blong man i stap long pija ya no aedol ya nomo mo i stat tinghae long hem.

Hemia nao samting we i hapen wetem plante aedol no pija long taem blong ol man Isrel. Eksampol,  taem ol man Isrel oli stap wokbaot long draeples, Moses i wokem pija blong wan snek long bras. Fastaem, pija ya blong snek we i stap long wan pos, i wan rod we God i yusum blong hilim ol man blong hem. God i bin sanem ol snek blong kakae ol man blong hem we oli mekem stronghed, ale olgeta we snek i kakae olgeta oli save lukluk i go long snek ya blong bras mo kasem help blong God. Be afta we ol man Isrel oli kasem Promes Lan, i luk olsem se oli mekem pos ya we i gat snek long hem i kam wan aedol blong wosip long hem. Oli lukluk i go long pos ya olsem we hem i gat sam spesel paoa blong hilim man. Oli stap bonem insens fored long hem mo oli putum wan nem blong hem tu, hemia Nehushtan.—Namba 21:8, 9; 2 King 18:4.

Mo tu, ol man Isrel oli traem yusum bokis ya we i saen blong promes we God i mekem wetem olgeta, olsem wan samting we i save karem gudlak taem oli faet agensem ol enemi blong olgeta. Be fasin ya i karem trabol nomo i kam. (1 Samuel 4:3, 4; 5:11) Mo long taem blong Jeremaea, ol man long Jerusalem oli stap putum tingting blong olgeta i stap strong long haos tempol i winim wosip blong God we oli mas mekem insaed long haos ya.—Jeremaea 7:12-15.

Tede yet, ol man oli gat fasin ya blong wosipim ol samting i bitim we oli wosip long God hem wan. Vitalij Ivanovich Petrenko, we i lukluk moa long saed ya, i talem se: “Wan tabu pija . . . i kam wan samting we man i wosipim mo i putum man long denja blong wosipim aedol . . . Yumi evriwan i mas luksave se fasin ya i kamaot long tingting blong hiten man nomo, mo i folem ol bilif we plante man long taem ya oli laekem.” Demetrios Constantelos, wan pris blong Grik Otodoks Jos i talem samting we i klosap sem mak. Long buk blong hem, Understanding the Greek Orthodox Church, hem i raetem se: “I isi nomo long wan Kristin blong mekem wan tabu pija i kam olsem samting blong wosipim.”

Ol man oli talem se ol tabu pija oli samting blong givhan long olgeta blong oli wosipim God. Be toktok  blong olgeta ya i no tru. ?From wanem? Tingbaot samting ya. I gat plante tabu pija blong Meri mo ol “tabu man” we olgeta ya oli ded longtaem finis, be i gat sam long ol tabu pija ya we ol man oli talem se oli mas tinghae moa long olgeta mo oli talem se i gat moa paoa i winim ol narawan. Eksampol, sam memba blong Otodoks jos oli strong blong ona long wan tabu pija blong Meri we i stap long Tinos, long Gris, mo sam narafala memba blong jos ya oli strong tu blong ona long wan narafala tabu pija blong Meri we i stap long Soumela, not blong Gris. Nating se tufala tabu pija ya tugeta oli pija blong Meri nomo, tufala grup blong man ya tufala i bilif se tabu pija blong olgeta i gud moa i winim narawan mo i save mekem ol bigbigfala merikel moa i winim narawan. Taswe, ol aksin blong ol man ya oli soemaot klia se plante man oli rili bilif se ol tabu pija ya oli gat sam spesel paoa mo oli stap wosipim ol tabu pija ya.

?Yumi Prea Long Ol “Tabu Man” No Long Meri?

?Olsem wanem long fasin blong ona long Meri no “ol tabu man”? ?Fasin ya i stret? Taem Setan i traem Jisas, Jisas i yusum ol tok we oli stap long Dutronome 6:13 mo i se: “Yu mas wosipim Masta nomo we i God blong yu, mo yu mas mekem wok blong hem nomo.” (Matiu 4:10) Long wan narafala taem, hem i talem se ol trufala man blong God, bambae oli wosipim “Papa blong yumi,” i no wan narafala man bakegen. (Jon 4:23) Wan enjel, we i luksave samting ya, i stretem aposol Jon we i bin bodaon fored long hem. Enjel ya i se: “Yu no mekem samting ya . . . Yu mas wosip long God nomo.”—Revelesen 22:9.

?I stret blong prea long Meri, we hem i mama blong Jisas taem Jisas i stap long wol? ?I stret blong prea long ol “tabu man,” blong askem olgeta blong toktok long God from yumi? Ansa blong Baebol i klia nomo, i se: “I gat wan man nomo we i stap bitwin God mo ol man, man ya hem i Jisas Kraes.”—1 Timoti 2:5.

Holemgud Fasin Fren Blong Yu Wetem God

Ol tijing blong Baebol oli no agri wetem fasin ya blong yusum ol tabu pija long wosip blong yumi. Taswe, ol tabu pija ya oli no save givhan long yumi blong mekem God i glad long yumi mo oli no save givhan long yumi blong kasem laef. Defren olgeta, Jisas i talem se man i save kasem laef we i no save finis sipos hem i kasem save long trufala God, i savegud ol nambawan fasin blong hem wetem stamba tingting blong hem mo ol wok we hem i mekem long man. (Jon 17:3) Ol tabu pija we oli no stap lukluk no harem samting, mo we oli no stap toktok, oli no save halpem man blong save God mo wosipim hem long wei we i stret. (Ol Sam 115:4-8) I gat wan rod nomo blong kasem save long saed blong trufala God. Rod ya hemia stadi long Tok blong God, Baebol.

Ol tabu pija oli no givhan long yumi, be tu oli save spolem wosip blong yumi. ?Oli spolem wosip blong yumi olsem wanem? Faswan samting we i impoten tumas blong tingbaot, hemia se fasin ya i save brekem fasin fren we man i gat wetem Jeova. God i tokbaot Isrel, we i “mekem hem i kros from ol rabis aedol ya blong olgeta,” hem i se: “Bambae mi haedem fes blong mi long olgeta.” (Dutronome 32:16, 20, The New American Bible) Blong frengud wetem God bakegen, oli mas ‘sakemaot ol doti aedol ya.’—Aesea 31:6, 7, NAB.

Taswe i stret nomo we Baebol i givim advaes ya i se: “Ol smol pikinini blong mi, lukaot gud se yufala i no wosipim ol aedol.”—1 Jon 5:21, NAB.

[Futnot]

[Bokis blong pija long pej 6]

Oli Kasem Help Blong Wosip “Long Spirit”

Olivera i wan strong memba blong Otodoks Jos long Albania. Long 1967, gavman i putum tabu long evri jos long kantri ya. Be Olivera i gohed long wosip blong hem long fasin haed. Wanem smol mane we hem i gat, be hem i yusum blong pem ol tabu pija we oli wokem long gol mo silva, mo ol insens wetem kandel. Hem i haedem ol samting ya long bed blong hem mo plante taem hem i slip long wan jea klosap long bed ya from we hem i fraet se wan man i faenem mo stilim olgeta. Taem ol Witnes blong Jeova oli prij long Olivera long ol yia 1990, Olivera i luksave trutok blong Baebol long mesej blong olgeta. Hem i luk wanem we Baebol i talem long saed blong trufala wosip we man i mas mekem “long spirit,” mo hem i lanem wanem tingting we God i gat long fasin blong yusum ol tabu pija. (Jon 4:24, The Jerusalem Bible) Witnes we i stadi Baebol wetem Olivera i luk se evri taem we hem i kam long haos blong Olivera, wan long ol tabu pija blong hem i lus, gogo Witnes ya i no moa luk wan tabu pija i stap. Afta we Olivera i baptaes, hem i talem se: “Tede, mi no moa nidim ol tabu pija ya we oli no save givhan long mi, be mi gat tabu spirit blong Jeova. Mi glad tumas from we spirit ya i save kam kasem mi we i no nidim ol tabu pija ya.”

Athena, we i stap long aelan blong Lesbos long Gris, i bilif strong long jos blong hem, hemia Otodoks Jos. Hem i memba blong kwaea mo i neva mestem blong holem ol kastom blong jos, olsem fasin blong wosip long ol tabu pija. Ol Witnes blong Jeova oli halpem Athena blong luksave se i gat sam samting long tijing we hem i kasem we i no laenap wetem Baebol, olsem fasin blong yusum ol tabu pija mo ol kros long wosip blong hem. Be Athena i wantem faenem hem wan se fasin ya blong wosip long ol tabu pija i kamaot wea. Hem i ridim mo lukaot save long plante buk, gogo hem i luksave se fasin ya i no kamaot long Kristin skul. Hem i wantem tumas blong wosipim God “long spirit” taswe hem i sakemaot olgeta tabu pija blong hem, nating se hem i bin westem bigfala mane blong pem olgeta. Athena i no wari sipos hem i mas lusum olgeta samting ya, from we hem i wantem wosipim God long fasin we i klin mo i stret long lukluk blong Hem.—Ol Wok 19:19.

[Bokis/Foto blong pija long pej 7]

?I Stret Blong Flasem Haos Wetem Ol Tabu Pija?

Long ol yia we oli jes pas, ol man raon long wol oli stap lukaot mo pem olkaen tabu pija blong Otodoks Jos. Plante taem, ol man ya oli no luk wan tabu pija olsem samting we i blong wosip. Be long lukluk blong olgeta ol tabu pija ya oli olsem wan naesfala wok we i kamaot long wan spesel taem long histri, hemia taem we gavman blong Byzantine i rulum wol. Taswe yumi no sapraes sipos plante long ol tabu pija ya oli flasem haos no ofis blong ol man we oli talem se oli no bilif long God.

Be ol Kristin we oli tinghae long wosip blong olgeta, oli no fogetem se fastaem ol man oli wokem ol tabu pija ya olsem samting blong yusum long wosip. Ol Kristin oli no agensem narafala man we oli holem ol tabu pija olsem, hemia bisnes blong olgeta. Be ol Kristin wanwan oli no holem ol tabu pija ya long haos blong olgeta, nating se i blong mekem wan koleksen nomo blong ol tabu pija ya. Hemia i laenap stret wetem rul ya we i stap long Dutronome 7:26 long The Jerusalem Bible: “Yu no mas karem ol doti samting ya [ol pija we man i yusum long wosip] oli kam insaed long haos blong yu. Sipos no, bambae yu kasem panis olsem olgeta. Yu mas luk ol samting ya olsem we i doti mo i nogud olgeta.”

[Tok blong pija long pej 7]

God i no glad nating long fasin blong yusum ol pija blong wosipim hem

[Tok blong pija long pej 8]

Save blong Baebol i halpem yumi blong wosipim God long spirit