Ol Kristin Oli Wosip Wetem Spirit Mo Trutok
Ol Kristin Oli Wosip Wetem Spirit Mo Trutok
“God hem i wan Spirit, mo olgeta we oli stap mekem wosip long hem, oli mas wosip wetem spirit mo trutok.”—JON 4:24, NW.
1. ?Wanem kaen wosip we God i glad long hem?
JISAS KRAES, stret pikinini blong Jeova, i talemaot klia wanem kaen wosip we Papa blong hem long heven i glad long hem. Taem Jisas i stap witnes long wan woman Sameria klosap long wan wel afsaed long taon ya Saeka, hem i talem se: “Yufala man Sameria, yufala i stap mekem wosip long God, we yufala i no save hem. Be mifala, mifala i stap mekem wosip long God, we mifala i save hem from we rod blong God blong sevem man, hem i kamaot long mifala. I gat taem i stap kam, yes, taem ya i kam finis, we [“ol man blong mekem trufala wosip, bambae oli wosip long Papa wetem spirit mo trutok,” NW ]. Fasin ya nao, Papa blong yumi i wantem blong yumi mekem wosip long hem. God, hem i spirit, mo ol man we oli mekem wosip long hem, [“oli mas wosip wetem spirit mo trutok,” NW ].” (Jon 4:22-24) ?Wanem mining blong ol tok ya?
2. ?Wosip blong ol man Sameria i stanap long wanem?
2 Ol man Sameria oli gat plante giaman bilif. Oli ting se ol faef faswan buk blong Baebol nomo oli kamaot long God. Mo hemia ol faef buk ya long Baebol blong olgeta nomo, hemia Pentatuk blong Sameria. Ol man Sameria oli no rili save God, be ol man Isrel, God i putum tok blong hem long han blong olgeta. (Rom 3:1, 2) Nating se i olsem, i gat rod blong ol man Isrel mo ol narafala we oli bilif, oli save kam olsem we Jeova i glad long olgeta. ?Oli mas mekem wanem?
3. ?Yumi mas mekem wanem blong wosip long God long “spirit mo trutok”?
3 ?Blong mekem Jeova i glad, ol man Isrel, Sameria, mo ol narafala man bifo oli mas mekem wanem? Oli mas wosip long hem “wetem spirit mo trutok.” Yumi mas mekem samting ya tu. Yumi mas mekem wok blong God wetem glad mo strong tingting. Wan hat we i fulap long lav mo bilif i mas pusum yumi. Be, samting we yumi nidim moa blong wosip long God wetem spirit, hemia tabu spirit blong God we yumi letem hem i lidim yumi. Yumi mas stadi long Tok blong God mo folem long laef blong yumi. Olsem nao, spirit no tingting blong yumi i save laenap gud wetem tingting blong hem. (1 Korin 2:8-12) Blong Jeova i glad long wosip blong yumi, yumi mas mekem wosip ya wetem trutok. Wosip blong yumi i mas laenap wetem Tok blong God, Baebol, mo wetem ol samting we Tok ya i talem long saed blong hem mo ol stamba tingting blong hem.
Yumi Save Faenem Trutok
4. ?Samfala oli talem wanem long saed blong trutok?
4 Sam man we oli stadi long waes blong wol ya oli ting se neva yumi ol man i save faenem samting ya we yumi kolem trutok. Wan man Swiden we i raetem buk, nem blong hem Alf Ahlberg, i talem se: “Plante kwestin long saed blong waes blong wol, yumi no save givim wan stret ansa long olgeta.” ?Be i stret blong talem se i no gat samting we yumi save talem se i tru olgeta? Jisas Kraes i no tingting olsemia.
5. ?From wanem Jisas i kam long wol ya?
5 Traem tingbaot sipos yu yu stap laef long yia 33 K.T. Long stat blong yia ya, yu luk Jisas i stanap fored long hed gavman blong Rom, Ponjes Paelat. Nao yu harem Jisas i talem long Paelat se: “Mi mi bon, mi kam long wol ya blong wan samting nomo, blong mi talemaot ol tok we i tru.” Paelat i askem se: “?Wanem nao ol tok ya we i tru?” Be hem i no wet blong Jisas i ansa.—Jon 18:36-38.
6. (a) Wanem mining blong wod ya “trutok”? (b) ?Jisas i givim wanem wok long ol man blong hem?
6 Diksonari i talem mining blong wod ya “trutok” se “ol prapa samting, ol stret save, mo ol samting we oli rili hapen.” (Webster’s Ninth New Collegiate Dictionary) ?Be trutok we Jisas i talemaot, hem i long saed blong evri samting? Nogat. Hem i wan spesel trutok. Jisas i talem long ol man we oli folem hem blong oli talemaot trutok ya, i se: ‘Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala.’ (Matiu 28:19, 20) Bifo we wol ya i finis ol trufala man blong Jisas oli mas talemaot “ol trutok blong gud nius ya” long olgeta ples blong wol. (Galesia 2:14) Long rod ya, ol tok blong Jisas bambae i kamtru, se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.” (Matiu 24:14) Taswe, i impoten we yumi luksave hu nao i stap talemaot gud nius blong Kingdom ya mo tijim ol man blong wol long trutok.
?Olsem Wanem Yumi Save Kasem Trutok?
7. ?Wanem i pruvum se Jeova i Stamba blong trutok?
7 Jeova i Stamba blong trutok blong Baebol. Yes, Deved we i raetem plante Sam i talem se Jeova i “God blong trutok.” (Ol Sam 31:5, NW; 43:3) Jisas i agri se tok blong Papa blong hem, hemia trutok. Mo hem i talem tu se: “Ol profet bifo oli bin raetem wan tok we i talem se, ‘God bambae i tijim olgeta man.’ Man we i harem tok blong Papa blong mi, mo i lanem tok ya blong hem, hem i save kam long mi.” (Jon 6:45; 17:17; Aesea 54:13) Taswe, i klia se olgeta we oli wantem faenem trutok oli mas letem Nambawan Tija ya Jeova, i tijim olgeta. (Aesea 30:20, 21) Ol man we oli stap lukaot trutok oli mas kasem “save blong God.” (Ol Proveb 2:5) Wetem lav, Jeova i yusum plante rod blong tijim mo givim trutok long ol man.
8. ?Wanem sam rod we God i yusum blong tijim mo givim trutok long ol man?
8 Hemia sam long ol rod ya: God i yusum ol enjel blong givim Loa long ol man Isrel. (Galesia 3:19) Hem i mekem se Ebraham mo Jekob i luk sam drim, mo i givim promes long tufala tru long ol drim ya. (Jenesis 15:12-16; 28:10-19) Voes blong God i bin kamaot long heven taem Jisas i baptaes, blong talem nambawan tok ya se: “Hemia pikinini blong mi, we mi lavem hem tumas. Mi mi glad tumas long hem.” (Matiu 3:17) Yumi save glad tu se God i givim trutok long sam man blong oli raetemdaon long Baebol. (2 Timoti 3:16, 17) Taswe, sipos yumi kasem save long Tok blong God, yumi save “bilif long ol trutok.”—2 Tesalonaeka 2:13.
Trutok Mo Pikinini Blong God
9. ?Olsem wanem God i yusum Pikinini blong Hem blong talemaot trutok?
9 Antap moa, God i yusum Pikinini blong hem, Jisas Kraes, blong mekem trutok i klia long ol man. (Hibrus 1:1-3) Yes, Jisas i talemaot trutok long fasin we i moa gud i winim ol narafala man bifo long hem. (Jon 7:46) Mo taem hem i go antap long heven tu, hem i talemaot trutok we Papa blong hem i givim long hem. Wan taem, aposol Jon i ‘raetem ol samting we Jisas Kraes i soemaot long hem. Hemia ol samting we God i givim long hem, blong hem i soemaot long ol man blong hem. Ol samting ya, bambae i no longtaem, oli kamtru.’—Revelesen 1:1-3.
10, 11. (a) ?Trutok ya we Jisas i talemaot, hem i long saed blong wanem? (b) ?Olsem wanem Jisas i soemaot se trutok ya i prapawan?
10 Jisas i talem long Ponjes Paelat se Hem i kam long wol ya blong talemaot tok we i tru. Taem Jisas i prij, hem i talemaot trutok ya long saed blong Kingdom blong God we Kraes i King blong hem. Hem i soemaot tu se Kingdom ya bambae i mekem we hae rul blong Jeova i win. Be blong talemaot ol tok we i tru, Jisas i mas mekem moa i winim we hem i prij mo i tijim ol man. Jisas i soemaot se trutok ya i prapawan taem hem i mekem i kamtru. Long saed ya, aposol Pol i talem se: “Bambae yufala i no letem man i putum rul long yufala, se yufala i no save kakae samting ya, no yufala i no save dring samting ya. Mo yufala i no letem man i talem long yufala, se yufala i mas mekem dei ya i tabu, no yufala i mas mekem Lafet blong Niumun, no yufala i mas mekem Sabat dei i olsem, i olsem. Ol loa olsem oli olsem sado nomo blong samting we i no kamtru yet. Be prapawan blong hem, ol samting we i stap long Kraes.”—Kolosi 2:16, 17.
11 Wan samting we i soemaot se trutok ya i prapawan, hemia taem Jisas i bon long Betlehem, olsem profet tok i talem. (Maeka 5:2; Luk 2:4-11) Profet tok blong Daniel tu i soemaot se trutok ya i prapawan. Daniel i talem se Mesaea bambae i kamtru long en blong 69 ‘wik blong yia.’ Samting ya i hapen taem Jisas i baptaes mo tabu spirit i kamdaon long hem, long stret taem we profet tok i bin talem, hemia 29 K.T. (Daniel 9:25; Luk 3:1, 21, 22) Wok blong Jisas blong talemaot Kingdom tu i soemaot se trutok ya i prapawan. (Aesea 9:1, 2, 6, 7; 61:1, 2; Matiu 4:13-17; Luk 4:18-21) Taem hem i ded mo i laef bakegen, samting ya tu i soemaot se trutok ya i prapawan.—Ol Sam 16:8-11; Aesea 53:5, 8, 11, 12; Matiu 20:28; Jon 1:29; Ol Wok 2:25-31.
12. ?From wanem Jisas i save talem se, “Mi mi stamba blong trutok”?
12 Trutok ya i stanap long Jisas Kraes, taswe hem i save talem se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” (Jon 14:6) Man i kam fri long giaman wosip taem hem i luksave olsem wanem Jisas i mekem ol tingting blong God oli kamtru. Long taem ya, man ya i stanap “long saed blong trutok.” (Jon 8:32-36; 18:37, NW ) Ol man we oli gat fasin olsem ol sipsip, oli luksave trutok mo oli folem Kraes wetem bilif. From samting ya, bambae oli kasem laef we i no save finis.—Jon 10:24-28.
13. ?Bambae yumi lukluk gud long trutok blong Baebol long saed blong wanem trifala samting?
13 Ol trutok we Jisas i talemaot mo we God i givim long ol disaepol blong hem blong talemaot, hemia nao trufala Kristin bilif. Olgeta we oli “obei long bilif ya” oli “stap folem ol tok we i tru.” (Ol Wok 6:7, NW; 3 Jon 3, 4) ?Ale, tede, hu olgeta we oli stap folem ol tok we i tru? ?Hu olgeta we oli stap tijim ol man blong wol long trutok? Blong ansa long tufala kwestin ya bambae yumi lukluk laef blong ol faswan Kristin. Mo bambae yumi lukluk gud long trutok blong Baebol long saed blong (1) ol tijing, (2) fasin blong wosip, mo (3) ol fasin long laef.
Trutok Mo Ol Tijing
14, 15. ?Ol faswan Kristin oli gat wanem tingting long saed blong Baebol we i sem mak long ol Witnes blong Jeova tede?
14 Ol faswan Kristin oli tinghae long ol hanraet we oli karem Tok blong Jeova. (Jon 17:17) Oli skelem ol tijing mo ol fasin blong olgeta wetem Tok ya. Clement blong Alexandria, we hem i laef long ol yia 100 mo 200, i talem se: “Ol man we oli wantem gat ol nambawan fasin bambae oli no stop blong lukaotem trutok. Bambae oli gohed gogo oli pruvum wetem Baebol se bilif blong olgeta i stret.”
15 Ol Witnes blong Jeova tede oli olsem ol faswan Kristin ya, oli tinghae long Baebol. Oli bilif se, “olgeta tok blong Baebol oli kamaot long God fastaem. . . . Ol tok ya i stret gud blong tijim yumi long ol trutok.” (2 Timoti 3:16) Ale bambae yumi tokbaot sam tijing blong ol faswan Kristin. Bambae yumi skelem olgeta wetem ol save we ol man blong Jeova tede oli kasem taem oli yusum Baebol olsem nambawan buk blong olgeta.
Trutok Long Saed Blong Sol
16. ?Wanem nao trutok long saed blong sol?
16 Ol faswan Kristin oli bilif long Baebol, taswe oli tijim trutok long saed blong sol. Oli save se taem God i wokem faswan man, “man ya i kam wan laef sol.” (Jenesis 2:7, NW ) Mo tu, oli agri se sol i save ded. (Esikel 18:4; Jemes 5:20) Oli save tu se “ol man we oli ded finis oli no moa save wan samting.”—Prija 9:5, 10.
17. ?Olsem wanem bambae yu eksplenem fiuja blong ol dedman?
17 Be, ol faswan disaepol blong Jisas oli putum tingting blong olgeta i stap strong long promes ya se God bambae i mekem ol dedman we hem i tingbaot olgeta yet, oli girap, no oli laef bakegen. Pol i talemaot bilif ya i klia nomo, i se: “Mi putum tingting blong mi long God. . .God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Samtaem biaen, Kristin man ya Minucius Felix, i raetem se: “Sipos wan man i talem se God, we i mekem man fastaem, i no save mekem hem bakegen, man ya i krangke mo i no gat hed.” Long saed blong sol, ded, mo laef bakegen, ol Witnes blong Jeova oli bilif long trutok blong Baebol olsem ol faswan Kristin. Naoia, bambae yumi tokbaot God mo Kraes.
Trutok Mo Triniti
18, 19. ?From wanem yumi save talem se Triniti i no wan tijing blong Baebol?
18 Ol faswan Kristin oli no bilif se God, Kraes, mo tabu spirit oli wan Triniti. Buk ya, The Encyclopædia Britannica i talem se: “I no gat tok ya Triniti long Niutesteman, mo tijing ya tu i no stap. Jisas wetem ol man blong hem oli no agensem Shema [wan Hibru prea] long Oltesteman we i talem se: ‘Ol man Isrel, yufala i harem: Masta ya we i God blong yumi, hem i wan Masta nomo’ (Dut. 6:4).” Ol Kristin bifo oli no mekem wosip long Triniti we ol man Rom oli wosipim, no long wan narafala god. Oli agri long tok blong Jisas se yumi mas mekem wosip long Jeova nomo. (Matiu 4:10) Mo tu, oli bilif long tok blong Kraes se: “[Papa blong mi] i hae moa long mi.” (Jon 14:28) Ol Witnes blong Jeova tede oli gat semfala tingting.
19 Ol faswan man blong Jisas oli makemaot klia se God, Kraes, mo tabu spirit, trifala i no wan, be tri. Mo oli baptaesem ol disaepol (1) long nem blong Papa, (2) long nem blong Pikinini, mo (3) long nem blong tabu spirit, be i no long nem blong Triniti. Ol Witnes blong Jeova tu oli tijim trutok blong Baebol. Taswe, oli makemaot God, Pikinini blong hem, mo tabu spirit, olsem tri defren samting.—Matiu 28:19.
Trutok Mo Baptaes
20. ?Olgeta we oli wantem tekem baptaes oli mas gat wanem save?
20 Jisas i talem long ol man blong hem blong oli tijim ol man long trutok mo mekem oli kam disaepol. Blong ol man oli kam naf blong tekem baptaes, oli nidim save long ol stamba tijing blong Baebol. Olsem nao, oli mas luksave haenem mo paoa blong Papa mo blong Pikinini blong hem, Jisas Kraes. (Jon 3:16) Mo tu, olgeta we oli wantem tekem baptaes oli mas kasem save se tabu spirit i no wan man, be hem i bigfala paoa blong God.—Jenesis 1:2, futnot, NW.
21, 22. ?From wanem yu ting se man we i baptaes i mas gat bilif?
21 Ol faswan Kristin oli baptaesem nomo ol man we oli gat save finis, oli tanem tingting blong olgeta from sin, mo oli givim laef blong olgeta i go long God blong mekem ol samting we hem i wantem. Long Pentekos long 33 K.T., ol man Jiu mo ol proselaet we oli hivap long Jerusalem oli gat save finis long saed blong ol Hibru hanraet blong Baebol. Taem oli harem aposol Pita i tokbaot Jisas olsem Mesaea, samwe 3,000 blong olgeta oli “bilif long tok blong hem,” ale “oli baptaes.”—Ol Wok 2:41; 3:19 kasem 4:4; 10:34-38.
22 Ol man we oli wantem tekem baptaes olsem ol Kristin, oli mas gat bilif fastaem. Sam man Sameria oli glad blong harem trutok. “Taem olgeta ya oli harem tok blong Filip, we hem i stap talemaot gud nius blong Jisas Kraes, mo fasin we God i kam King blong ol man blong hem, oli bilif long tok ya. Mo ol man mo ol woman we oli bilif, Filip i baptaesem olgeta.” (Ol Wok 8:12) Haeman blong Itiopia i wan strong proselaet mo i gat save finis long saed blong Jeova. Fastaem, hem i bilif long ol profet tok long saed blong Mesaea we Filip i soemaot se i kamtru, nao biaen hem i tekem baptaes. (Ol Wok 8:34-36) Biaen bakegen, Pita i talem long Konilias mo sam narafala man we oli no man Isrel se: “Sipos wan man i ona long God, mo i mekem ol samting we i stret long fes blong hem, bambae God i glad long hem.” Mo hem i talem tu se evriwan we oli bilif long Jisas Kraes bambae God i fogivim sin blong olgeta. (Ol Wok 10:35, 43; 11:18) Olgeta samting ya i laenap wetem tok we Jisas i talem long ol man blong hem, se oli mas ‘pulum ol man oli kam man blong hem. Mo oli mas tijim olgeta blong oli folem olgeta tok ya we hem i givim finis long olgeta.’ (Matiu 28:19, 20; Ol Wok 1:8) Ol Witnes blong Jeova tu oli folem rul ya. Oli baptaesem ol man nomo we oli gat save finis long ol stamba tijing blong Baebol, mo we oli givim laef blong olgeta i go long God.
23, 24. ?Wanem stret rod we ol Kristin oli folem blong baptaesem man?
23 Stret rod blong baptaesem ol man we oli gat bilif, i blong draonem olgeta fulwan long wota. Afta we Jisas i baptaes long Jodan Reva, hem i “kamaot long wota.” (Mak 1:10) Man Itiopia i baptaes long “wan ples we i gat wota long hem.” Hem wetem Filip tufala i “godaon long wota,” mo biaen, tufala i “kamaot long wota bakegen.” (Ol Wok 8:36-40) Mo Baebol i yusum pijatok se taem man i baptaes i olsem we oli berem hem. Samting ya tu i soemaot se man i man draon fulwan taem hem i baptaes.—Rom 6:4-6; Kolosi 2:12.
24 Buk ya, The Oxford Companion to the Bible i talem se: “Ol stori long Niutesteman long saed blong ol man we oli tekem baptaes, oli soemaot se oli draonem ol man ya fulwan.” Franis buk ya, Larousse du XXe Siècle (Paris, 1928) i talem se: “Long eniples we ol faswan Kristin oli save faenem wota, oli draonem man blong baptaesem hem.” Mo buk ya, After Jesus—The Triumph of Christianity i talem se: “Ol stamba samting [long saed blong baptaes] hemia se, man i mas talemaot bilif blong hem, mo biaen i mas draon fulwan long wota long nem blong Jisas.”
25. ?Bambae yumi tokbaot wanem long nekis stadi?
25 Yumi bin tokbaot sam nomo long ol tijing mo fasin blong ol faswan Kristin, we oli stanap long Baebol. I gat plante moa tijing blong olgeta we ol Witnes blong Jeova tede tu oli folem. Long nekis stadi, bambae yumi luk sam narafala samting we oli makemaot ol man blong tijim trutok.
?Bambae Yu Yu Ansa Olsem Wanem?
• ?Wanem kaen wosip we God i wantem yumi blong mekem?
• ?Olsem wanem Jisas Kraes i soemaot trutok we i prapawan?
• ?Wanem trutok long saed blong sol mo ded?
• ?Ol Kristin oli baptaesem ol man olsem wanem, mo man we i wantem baptaes i mas mekem wanem fastaem?
[Kwestin]
[Tok blong pija long pej 16]
Jisas i talem long Paelat se: ‘Mi mi kam long wol blong talemaot ol tok we i tru’
[Tok blong pija long pej 17]
?Yu save eksplenem from wanem Jisas i talem se “Mi mi stamba blong trutok”?
[Tok blong pija long pej 18]
?Wanem nao trutok long saed blong baptaes blong ol Kristin?