Olta Blong Wan God We i No Gat Nem Blong Hem

LONG yia 50 K.T., aposol Pol i visitim Atens, long Gris. Long ples ya hem i luk wan olta we ol man oli dediketem i go long wan god we oli no save hem. Biaen, Pol i tokbaot olta ya taem hem i givim wan gudfala witnes long saed blong Jeova.

Blong statem tok blong hem long Hil blong Mars, we oli kolem Areopagus, Pol i talem se: “Taem mi stap wokbaot long ples ya blong yufala, mi stap lukluk ol ples blong wosip blong yufala. Nao mi faenem wan ples we yufala i raetem tok ya finis long wan ston se, ‘Hemia ples blong wosip long wan god we mifala i no save hem.’ Be god ya we yufala i stap mekem wosip long hem, we yufala i no save hem, hemia nao God ya we mi mi stap talemaot long yufala.”—Ol Wok 17:22-31.

Nating se oli neva faenem olta ya long Atens, be oli faenem sam narafala olta olsemia long sam narafala ples long Gris. Eksampol, Pausanias, wan man Gris we hem i stadi long ol kantri, we i bin laef long stat blong ol yia wan handred, i tokbaot ol olta blong “ol god ya we Nem blong Olgeta Mi No Save” long Phaleron, klosap long Atens. (Description of Greece, Attica I, 4) Long sem buk ya, hem i talem se long Olympia i gat “wan olta we i blong ol god we man i No Save olgeta.”—Eleia I, XIV, 8.

Philostratus (raonabaot long ol yia 170 kasem 245 K.T.), wan man Gris we i stap raetem buk, i talem long buk ya, The Life of Apollonius of Tyana (VI, III) se, long Atens “oli wokem sam olta blong wosip long ol god we oli no save olgeta.” Mo Diogenes Laertius (raonabaot long ol yia 200 kasem 250 K.T.) i raetem long buk blong hem, Lives of Philosophers se long ol defren ples long Atens, yu save faenem “sam olta we i no gat nem long olgeta.”

Ol man Rom tu oli wokem olta long ol god we oli no save olgeta. Pija long ples ya i soem wan olta we oli wokem long ol yia wan handred B.K.T. * no bifo, mo hem i stap yet long musium ya Palatine Antiquarium long Rom, Itali. Ol hanraet long lanwis Latin we i stap long hem i talem se oli dediketem olta ya i go long “wan god no wan woman god”—toktok ya yumi faenem “plante taem long ol prea no long ol tok blong seremoni, we i stap long ol hanraet no long ol buk.”

Kam kasem naoia, plante man oli no save yet ‘God ya we i mekem wol mo olgeta samting we oli stap long hem.’ Be, olsem Pol i bin talem finis long ol man Atens, God ya—Jeova—“i no stap longwe long yumi nating.”—Ol Wok 17:24, 27.

[Futnot]

[Foto Credit Line blong pija long pej 32]

Altar: Soprintendenza Archeologica di Roma