?Wanem Nao Stret Mining Blong Hel?
?Wanem Nao Stret Mining Blong Hel?
NOMATA wanem tingting we yu yu gat long saed blong tok ya “hel,” bighaf blong ol man oli ting se hel i ples we man i kasem panis from sin. Long saed blong sin mo frut blong hem, Baebol i talem se: “Bifo olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Mo tu, Baebol i talem se: “Ol man we oli stap mekem sin, pei blong olgeta, bambae oli ded from.” (Rom 6:23) Taswe, pei we man i kasem from sin hemia ded. Nao blong faenemaot stret mining blong hel, yumi mas kasem ansa long bigfala kwestin ya se: ?Wanem i hapen long man taem hem i ded?
?Afta we man i ded, laef blong hem i gohed long sam narafala ples, no long sam kaen fasin? ?Wanem ya hel, mo wanem kaen man i go long ples ya? ?Olgeta we oli stap long hel oli gat hop blong aot long ples ya? Baebol nomo i givim ol trufala ansa long ol kwestin ya.
?Laef Afta Long Ded?
?I gat wan samting insaed long yumi, olsem wan sol no spirit, we i gohed blong laef samples afta we bodi i ded? Tingbaot faswan man, Adam, mo olsem wanem hem i kasem laef. Baebol i talem se: “Nao Jeova God i tekem sam graon, i wokem man long hem, mo hem i blu long nus blong man ya, i putum win blong laef long hem. Nao long fasin ya, man ya i kam wan laef sol.” (Jenesis 2:7, NW ) Man i mas pulum win blong hem i save laef. Be, taem God i “blu long nus blong man ya,” hem i no jes min se Adam i pulum win i go long waet leva blong hem. Nogat. Hem i min se God i putum laef insaed long bodi blong Adam—hemia “paoa blong laef” we i stap long olgeta man mo anamol long wol. (Jenesis 6:17; 7:22, NW ) Baebol i tokbaot paoa ya we i mekem man i laef se hem i “spirit.” (Jemes 2:26, NW ) Yumi save talem se spirit ya i olsem lektrik we i mekem wan mesin i wok. Lektrik ya i neva jenis blong tekem ol fasin mo mekem wok blong mesin ya, hem i stap olsem wan paoa nomo. Sem mak nao long paoa blong laef. Hem i no save tekem fasin blong ol man no anamol we hem i stap long olgeta. Spirit ya i no gat ol prapa fasin blong hem mo tu hem i no gat tingting.
?Wanem i hapen long spirit ya, taem man i ded? Sam 146:4 (NW ) i talem se: “Spirit blong hem i kamaot long hem, nao man ya i gobak long graon blong hem. Long sem dei ya ol tingting blong hem oli finis.” Taem man i ded, spirit blong hem i no gohed blong laef samples olsem wan spirit man. Nogat. ‘Laef ya [no “spirit,” NW ] we God i givim long hem, bambae i gobak long Hem bakegen.’ (Prija 12:7) Hemia i min se fiuja laef blong man ya we i ded i stap long han blong God nomo.
Tu waes man blong Gris bifo, Sokrates mo Plato, tufala i holem tingting ya se man i gat wan sol we i gohed blong laef afta we bodi i ded mo sol ya i neva save ded samtaem. ?Baebol i tijim wanem long saed blong sol? Jenesis 2:7 (NW ) i talem se “man ya [Adam] i kam wan laef sol.” Hem i no kasem wan sol; hem i kam wan laef sol—hemia i minim man fulwan. Baebol i tokbaot we sol i mekem wok, i wantem kakae, hem i talem se oli holem sol olsem slef, sol i taed i wantem slip, mo plante narafala samting bakegen. (Levitikas 23:30, NW; Dutronome 12:20; 24:7, NW; Ol Sam 119:28, NW ) Yes, man nao hem i wan sol. Taem man i ded, sol ya i ded.—Esikel 18:4.
?Be, wanem i hapen long man taem hem i ded? Taem God i talemaot panis blong Adam, Jeova i talem se: “Bodi blong yu bambae i gobak bakegen long graon ya we mi mi wokem yu long hem fastaem.” (Jenesis 3:19) ?Adam i stap wea, bifo we God i wokem hem long graon mo givim laef long hem? !Hem i no stap laef samples! Taem Adam i ded, hem i kam olsem fastaem bakegen, hem i no moa laef samples. Prija 9:5, 10, i soemaot klia wanem i hapen long man taem hem i ded se: “Ol dedman oli no save samting . . . Long beregraon, ples we bambae yu go long hem, i no gat wok no plan no save no waes.” (New International Version) Folem wanem we Baebol i talem, man we i ded i no moa laef samples. Man we i ded i no moa save wan samting, i no moa gat ol filing, mo i no moa gat ol tingting.
?Safa Blong Olwe No Beregraon Blong Ol Man?
Ol man we oli ded oli no moa save wan samting. Taswe hel i no wan ples blong faea we ol rabis man oli go long hem afta we oli ded, blong harem nogud blong olwe. ?Be, wanem ya hel? Blong ansarem kwestin ya, yumi mas luklukgud long wanem we i hapen long Jisas afta we hem i ded. Luk, we i wan man blong raetem Baebol, i talem se: “God i no livim [Jisas] i stap long Hom blong ol Dedman [“Hades,” NW ; “hel,” King James Version] bodi blong hem i no roten blong i sting.” * (Ol Wok 2:31) ?Hel ya we Jisas i go long hem i stap weples? Aposol Pol i raet se: “Ol prapa tok ya blong bilif blong yumi, we mi mi kasem fastaem, . . . Kraes i ded blong tekemaot ol sin blong yumi, olsem we Baebol i talem. Olgeta oli berem hem. Mo long namba tri dei blong hem, hem i laef bakegen, olsem we Baebol i talem.” (1 Korin 15:3, 4) Yes, Jisas i go long hel, no beregraon, be God i no livim hem i stap long ples ya, hem i mekem hem i girap, i laef bakegen.
Mo tu, tingbaot stori blong stret man ya Job, we i bin safa bigwan. Hem i wantem ronwe long ol trabol blong hem, ale i askem se: “?Hu bambae i givim samting ya long mi, we yu lukaotgud long mi long hel [Seol], mo haedem mi gogo kasem we kros blong yu i finis?” * (Job 14:13, Douay Version) !I no stret blong ting se Job i wantem go long wan ples blong faea blong harem sef! Long tingting blong Job, “hel” i beregraon nomo, ples we bambae hem i no moa save safa. Taswe, hel blong Baebol i minim beregraon blong olgeta man, ples we ol gudfala man wetem ol nogud man oli go long hem.
Helfaea—?Fasin Blong Lus Olgeta?
?Olsem wanem? ?Maet faea blong hel i wan pija blong minim fasin blong lus olgeta, olsem faea i kakae wan samting fulwan? Blong soem se faea i defren long Hades, no hel, Baebol i talem se: “Nao Ded wetem Hom blong ol Dedman, [“Hades,” NW ] enjel i sakem tufala i go long bigfala hol blong faea.” “Bigfala hol blong faea” we Baebol i tokbaot, i wan pijatok nomo, from we wan faea i no rili save bonem ded mo hel (Hades). “Bigfala hol blong faea ya, hemia seken ded ya”—we i min se man we i ded i no moa gat hop blong laef bakegen.—Revelesen 20:14.
Mining blong bigfala hol blong faea i klosap sem mak long “faea long hel” [“faea blong Gehena,” NW ] we Jisas i tokbaot. (Matiu 5:22; Mak 9:47, 48) Gehena i kamaot 12 taem long Kristin haf blong Baebol, mo i tokbaot level ples blong Hinom, afsaed long stonwol blong Jerusalem. Taem Jisas i stap long wol, oli yusum ples ya olsem ples blong sakem doti, “we oli sakem ol ded bodi blong ol rabis man long hem, wetem ol anamol we oli ded, mo olgeta narafala rabis tu.” (Smith’s Dictionary of the Bible) Blong faea ya i gohed blong bonem ol doti, oli stap sakem salfa long hem. Jisas i yusum ples ya olsem wan pija blong minim ded blong olwe.
Olsem Gehena, bigfala hol blong faea tu i pija blong ded blong olwe. Wan enjel “i sakem” ded mo Hades i go long ples ya. Samting ya i min se taem ol man oli kam fri long sin mo panis blong ded, bambae ded mo Hades tufala i lus blong olwe. Ol man we oli wantem nomo blong mekem sin mo oli no tanem tingting blong olgeta from sin, oli “gat ples” blong olgeta long bigfala hol ya. (Revelesen 21:8) Olgeta tu bambae oli lus blong olwe. Be ol man we God i stap tingbaot olgeta yet, hemia olgeta we oli stap long hel—beregraon blong olgeta man—oli gat wan nambawan fiuja.
!Hel i Emti!
Revelesen 20:13 i talem se: “Olgeta man we oli ded long solwota, oli aot long solwota oli kam. Mo olgeta narafala dedman tu oli kam. Ded wetem [“Hades,” NW ] tufala i no moa save holem olgeta, olgeta evriwan oli aot long tufala, oli kam.” Yes, hel ya we Baebol i tokbaot bambae i emti nomo. Olsem Jisas i promes, “aoa i stap kam we ol dedman we oli stap long ol gref blong olgeta, bambae oli harem voes blong hem [Jisas], nao bambae oli kamaot.” (Jon 5:28, 29, NW ) Nating se plante milian dedman naoia oli no moa gat wan bodi, be God i stap tingbaot olgeta yet, mo bambae hem i mekem we oli laef bakegen long wol ya we i kam paradaes bakegen.—Luk 23:43; Ol Wok 24:15.
Long niufala wol blong God, ol man we oli laef bakegen mo we oli obei long ol stret loa blong hem, bambae oli gat janis blong neva ded bakegen samtaem. (Aesea 25:8) Jeova “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” Yes, “ol samting ya blong bifo [bambae] oli lus olgeta.” (Revelesen 21:4) !Hemia ol nambawan blesing we God i stap rerem blong givim long olgeta we oli stap long hel—“gref blong olgeta”! Yes, blesing ya nomo i naf blong pulum yumi blong wantem kasem moa save long Jeova God mo Pikinini blong hem, Jisas Kraes.—Jon 17:3.
[Ol Futnot]
^ Long Baebol ya King James Version, oli tanem Grik tok ya Hades i kam “hel” long olgeta ten ples we hem i kamaot long Grik haf blong Baebol. Luk 16:19-31 i tokbaot we dedman i harem nogud tumas, be fulwan stori ya i wan parabol nomo we i saen blong ol narafala samting. Lukluk japta 88 blong buk ya Man We i Hae Moa Long Olgeta Man, we ol Witnes blong Jeova oli wokem.
^ Hibru tok ya Seol i kamaot 65 taem long Hibru haf blong Baebol mo long Baebol ya King James Version oli tanem tok ya i kam “hel,” “beregraon,” mo “hol.”
[Tok blong pija long pej 5]
Job i prea blong go haed long hel
[Tok blong pija long pej 6]
Faea blong Gehena hem i minim ded blong olwe
[Tok blong pija long pej 7]
‘Olgeta we oli stap long ol gref blong olgeta, bambae oli kamaot’