?Wanem i Hapen Long Helfaea?

?TOK ya “hel” i mekem yu yu tingbaot wanem? ?Yu yu ting se hel i wan ples blong faea mo salfa, we man i safa mo harem nogud long hem blong olwe? ?No maet yu ting se hel i wan pija nomo blong wan fasin we man i stap long hem?

Blong plante handred yia, ol lida blong Krisendom oli sua fulwan long tingting ya se ol sinman oli stap harem nogud tumas long helfaea. Plante skul tede oli tijim samting ya yet. U.S.News & World Report i talem se: “Ol Kristin skul nao oli lanem plante moa man long tok ya hel, be i no olgeta nomo we oli bilif long tijing ya. Klosap olgeta bigfala skul blong wol mo sam narafala smosmol skul tu, oli bilif se afta long ded, man i mas harem soa long panis we hem i kasem from sin blong hem.” Ol Hindu, Budis, Muslim, Jain, mo ol man long skul Tao, olgeta tu, oli bilif long wan kaen hel.

Be, plante man tede oli gat wan defren tingting olgeta long saed blong wanem ya hel. Buk ya we yumi tokbaot antap i gohed i talem se: “Nating se plante man oli bilif yet long helfaea, wan niufala tingting long saed blong panis blong olwe i stap kam antap tede, hemia se [hel] i olsem wan nogud kalabus we i holem man hem wan i stap long hem, mo i no rili wan ples blong faea.”

Wan magasin blong ol Jesuit, La Civiltà Cattolica i makem se: “I giaman nomo . . . blong bilif se God i yusum ol dimon blong mekem ol rabis man oli harem nogud long faea.” Magasin ya i gohed se: “Hel i stap, be hem i no wan prapa ples. Hem i wan pija nomo we i minim fasin we man i stap harem nogud tumas from we hem i seraot long God.” Long 1999, Pop John Paul II i talem se: “Hel i no wan ples, be hem i minim fasin we ol man oli stap long hem taem oli wantem seraot fulwan long God, we i stamba blong laef mo fasin glad.” Long saed blong ol pija blong hel olsem wan ples blong faea, hem i talem se: “[Ol pija ya] oli soem se laef blong ol man i nogud olgeta mo i emti nomo taem oli seraot long God.” Martin Marty, wan man blong stadi long histri blong ol jos, i talem se sipos pop i bin tokbaot hel olsem wan ples blong “faea we i gat devel long hem we klos blong hem i red mo i holem wan bigfala fok, bambae ol man oli no save bilif long hem.”

Sam narafala jos tu oli jenisim tingting blong olgeta long saed blong hel. Wan ripot we i kamaot long wan grup blong man we oli jekemap ol tijing blong Anglikan Jos, i talem se: “Hel i no wan ples blong man i harem nogud blong olwe, be hem i laswan jus we man i mekem mo we bambae hem i no save jenisim bakegen, blong folem wan fasin blong laef we i agensem God fulwan mo i lidim man ya i go blong lus olgeta, olsem we hem i no moa gat laef.”

Wan buk we i tijim ol bilif blong Episkopal Jos blong Yunaeted Stet i talem mining blong hel se, “ded blong olwe from we yumi sakemaot God.” U.S.News & World Report i talem se plante moa man oli bilif long tingting ya se “taem rabis man i ded hem i no kasem panis blong olwe, be hem i lus nomo. . . . [Oli] ting se ol man ya we biaen oli  sakemaot God, bambae oli lus blong olwe long ‘faea ya we i kakae evri samting,’ hemia hel.”

Nating se long taem blong yumi ol man oli sakemaot tingting ya blong faea mo salfa, plante oli holemfas long bilif ya se hel i ples we man i stap harem nogud long hem. Albert Mohler, blong Saot Baptis Tiolojikol Skul long Louisville, Kentucky, Yunaeted Stet, i talem se: “Baebol i tokbaot klia se hel i wan ples blong faea we man i harem nogud long hem.” Evangelical Alliance Commission, wan grup blong ol lida blong Protestan Skul i wokem ripot ya, The Nature of Hell, i talem se: “Hel i wan fasin we man i stap long hem we i mekem hem i harem save se [God] i sakemaot hem mo hem i safa from.” Ripot ya i ademap se: “Panis mo fasin blong harem nogud we sam man oli kasem long hel, i smol, mo blong narafala i nogud olgeta. I dipen long ol sin we oli mekem long wol.”

?Olsem wanem nao? ?Hel i rili wan ples blong harem nogud no blong lus blong olwe? ?No hem i pija nomo blong fasin we man i seraot long God? ?Hel i rili minim wanem?

[Bokis/Foto blong pija long pej 4]

Histri Blong Tijing Blong Helfaea

?WETAEM ol man we oli talem se oli Kristin oli stat blong bilif long helfaea? Samting ya i kamaot plante yia afta long taem blong Jisas Kraes mo ol aposol blong hem. Franis buk ya, Encyclopædia Universalis i talem se: “Buk ya, The Apocalypse of Peter (blong ol yia 100 K.T. *) hem i faswan buk [apokrifa *] we i tokbaot panis mo fasin blong safa blong ol sinman long hel.”

Be, ol faswan Papa blong Jos oli rao from tijing blong hel. Justin Martyr, Clement blong Alexandria, Tertullian, mo Cyprian oli bilif se hel i wan ples blong faea. Be Origen mo wan man blong stadi long tijing blong jos, Gregory blong Nyssa, tufala i ting se hel i wan ples we man i seraot long God—i olsem we man ya i safa long saed blong spirit. Defren nao, Augustine blong Hippo, i holem tingting ya se man we i stap long hel hem i safa long saed blong spirit mo tu long saed blong bodi—wan tingting we biaen plante oli agri long hem. Tija J.N.D. Kelly, i raetem se: “Long ol yia fo handred, strong tijing ya se ol sinman oli no save kasem wan janis bakegen afta long ded mo se faea bambae i kakae olgeta gogo i no save finis samtaem, i kam antap bigwan.”

Long ol yia 15 handred, ol man Protestan olsem Martin Luther mo John Calvin oli tingting se faea we i mekem ol man oli harem nogud long hel i wan pija nomo we i min se man i seraot long God blong olwe. Be, long ol tu handred yia we oli kam biaen, tingting ya we hel i wan ples blong faea i kam antap bakegen. Wan prija blong Protestan Jos, Jonathan Edwards, taem hem i tokbaot hel hem i mekem ol man Amerika we oli laef long ol yia 17 handred oli fraet tumas.

Be, i no longtaem biaen, tingting ya se hel i ples blong faea i stat godaon mo i stap lus bakegen. U.S.News & World Report i talem se: “Faea blong hel klosap i lus olgeta long ol yia 19 handred.”

[Ol Futnot]

[Ol Foto]

Justin Martyr i bilif se hel i wan ples blong faea

Augustine blong Hippo, i tijim se hel i wan ples blong safa long saed blong spirit mo bodi