‘Yufala i Kam Long Mi, Nao Bambae Mi Mekem We Yufala i Spel’

“Yumi Mas Mekem i Gud Long Olgeta Man”

NAMBAWAN wok we Jisas i mekem hemia wok blong prij mo tijim ol man long saed blong Kingdom blong God. (Mak 1:14; Luk 8:1) Ol trufala man blong Kraes oli wantem folem eksampol blong hem. Taswe oli tingbaot wok ya blong tijim mesej blong Baebol long saed blong Kingdom blong God, olsem wan wok we i impoten tumas long laef blong olgeta. (Luk 6:40) Ol Witnes blong Jeova oli haremgud tumas taem oli luk olsem wanem mesej blong Kingdom i karem pis i kam long laef blong ol man we oli lesin—olsem we hem i karem pis long laef blong ol man long taem we Jisas i stap long wol.—Matiu 11:28-30.

Jisas i tijim Tok blong God, be hem i mekem sam narafala gudfala wok tu. Hem i mekem ol sikman oli kamgud bakegen mo i givim kakae long olgeta we oli hanggri. (Matiu 14:14-21) Long sem fasin, ol Witnes blong Jeova oli tijim ol man long saed blong Baebol mo tu oli givhan long olgeta we oli gat nid. Yes, Baebol i tijim ol Kristin blong oli savegud ol rod “blong mekem ol gudfala wok” mo i pusum olgeta blong “mekem i gud long olgeta man.”—2 Timoti 3:16, 17; Galesia 6:10.

“Ol Brata Blong Mifala Oli Stap Blong Givhan”

Long Septemba 1999, wan strong etkwek i seksekem Taewan. Sam manis biaen, long Veneswela, bigfala ren i foldaon wantaem nomo mekem se graon antap long ol hil i kamdaon i kavremap ol haos. Disasta ya i moa nogud i bitim olgeta narafala disasta long histri blong Veneswela. Mo i no longtaem i pas, wota i ron bigwan long Mosambik, mo i spolem gud kantri ya. Long trifala ples ya, ol Witnes blong Jeova oli kamtru kwiktaem nomo wetem kakae, wota, meresin, klos, haos tapolen, mo ol samting blong kuk. Sam Witnes we oli gat save long wok blong dokta oli stanemap ol ples blong tritim ol man we oli kasem kil, mo sam narafala bakegen oli bildim ol niufala haos blong ol man we oli lusum haos blong olgeta.

Help ya we ol man oli kasem long stret taem i rili tajem hat blong olgeta. Long Veneswela, bigfala graon we i kamdaon long ol hil i kavremap haos blong Malyori. Hem i talem se: “Long taem we mifala i nidim help bigwan, ol brata blong mifala oli stap blong givhan.” Afta we oli bildim wan niufala haos blong hem mo  famle blong hem, Malyori i talem wetem glad se: “!Mifala i no save stop blong talem tangkiu long Jeova from olgeta samting we hem i mekem blong givhan long mifala!” Long Mosambik, bigfala wota we i ron, i spolem plante haos. Taem ol brata long ples ya oli kasem ki blong ol niufala haos blong olgeta, wantaem nomo ful grup ya i singim singsing blong Kingdom se “Jeova, Wan Sefples Blong Haed Long Hem.” *

Wok blong givhan long ol man we oli gat nid, i mekem ol man we oli givhan tu oli haremgud. Marcelo, we i mekem wok blong nes long wan kamp blong refuji long Mosambik, i talem se: “Mi glad tumas blong givhan long ol brata ya we oli safa bigwan.” Huang, we i joen long wok blong givhan long ol brata blong Taewan, i talem se: “Wok we mi mi mekem blong karem kakae mo ol haos tapolen i go long ol brata we oli gat nid, i givim bigfala glad long mi. Wok ya i mekem bilif blong mi i kam strong moa.”

Wan Program We i Karem Gudfala Frut

Plante taosen man we oli stap long kalabus raon long wol, oli kasem blesing long saed blong spirit from wok we ol Witnes oli mekem. ?Oli kasem blesing ya olsem wanem? Long ol yia we oli jes pas, long Yunaeted Stet nomo, ol Witnes blong Jeova oli givim ol buk long saed blong Baebol long bitim 30,000 man we oli stap long 4,000 kalabus. Antap long samting ya, taem ol kalabus oli givim raet, ol Witnes oli go blong stadi Baebol mo mekem Kristin miting wetem ol presina. ?Olsem wanem wok ya i givhan long ol presina?

Sam presina we oli stadi Baebol oli stat blong serem ol gudfala tijing blong Tok blong God wetem ol narafala presina. From samting ya, long plante kalabus raonabaot long wol, i gat ol grup blong presina we oli joen wanples blong wosip long Jeova. Long 2001, wan presina long Oregon, Yunaeted Stet, i talem se: “Grup blong mifala i stap gohed gud. Mifala i gat 7 pablisa blong Kingdom mo mifala i stap mekem 38 Baebol stadi finis. Bitim 25 man oli stap joen long pablik tok mo Wajtaoa Stadi, mo 39 man oli kam long Memoriol [blong ded blong Kraes]. !Bambae i no longtaem, tri man i tekem baptaes!”

Gudfala Frut Mo Glad

Ol man we oli lukaot long kalabus oli luksave se program ya blong givhan long ol presina i karem gudfala frut. Samting we i mekem ol man we oli lukaot long ol kalabus oli sapraes tumas, hemia se frut we i kamaot from wok blong ol Witnes i stap longtaem. Wan ripot i makem se: “Long ol ten yia we program i stap gohed, long olgeta presina we oli tekem baptaes olsem Witnes blong Jeova, i no gat wan we i kambak bakegen long kalabus afta we hem i bin gofri. Hemia i defren long ol narafala grup, we 50-60 pesen blong olgeta oli kambak long kalabus bakegen.” Gudfala frut we i kamaot from wok blong ol Witnes i pusum pasta blong wan kalabus long Idaho blong raetem wan leta i go long wol hedkwota blong ol Witnes blong Jeova. Hem i se: “Nating se mi no agri long ol bilif blong yufala, mi mi glad blong luk wok we ogenaesesen blong yufala i mekem.”

Ol Witnes we oli givhan long ol presina long kalabus, oli haremgud tu from wok blong olgeta. Afta long wan miting wetem wan grup blong ol presina we hem i fastaem blong olgeta blong singim wan singsing blong Kingdom, wan Witnes i raetem se: “Ol 28 man ya we oli joen blong singsing blong presem Jeova, oli leftemap tingting blong mi. !Mo oli singsing bigwan! !Hem i wan bigfala blesing blong stap long taem ya!” Wan Witnes we i stap visitim ol kalabus long Arizona i talem se: “!Hem i wan bigfala blesing blong joen long spesel wok ya!”

Ol Witnes raonabaot long wol we oli joen long wok blong givhan long narafala, oli agri long tok blong Jisas se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Mo tu, oli agri se sipos yumi folem advaes blong Baebol mo mekem i gud long olgeta man, bambae yumi mas haremgud.—Ol Proveb 11:25.

[Futnot]

[Tok blong pija long pej 8]

Veneswela

[Tok blong pija long pej 8]

Taewan

[Tok blong pija long pej 8]

Mosambik