Bilif Long Gudlak Mo Badlak i Bos Long Laef Blong Plante Man

SEMTAEM we yu aot long haos blong yu, yu mitim wan man i wokbaot i kam pas long yu. Yu bangem smol fingga blong leg blong yu long wan ston. Wan pijin i krae long naet. Yu kasem semfala drim bakegen mo bakegen. Long tingting blong plante man, ol samting ya oli nating nomo, oli no save spolem olgeta. Be sam man long Wes Afrika, oli bilif se ol samting ya oli olsem ol saen, no ol mesej we oli kamaot long ol spirit man. Ol samting ya oli save min se bambae man i kasem gudlak no badlak.

Bilif long ol samting we oli olsem saen blong gudlak no badlak, i no stap long Afrika nomo. Longtaem finis, ol man Jaena mo ol man blong Soviet Yunion oli no bilif long God. Nating se i olsem, plante long olgeta oli holemtaet bilif long ol saen we oli minim gudlak no badlak. Long ol kantri we oli rij, plante man oli ridim ol sta blong save wanem bambae i hapen long laef blong olgeta, oli bilif se Fraede namba 13 i karem badlak, mo oli fraet blong kam klosap long wan blak puskat. Sam man long ol ples long not blong wol, oli bilif se ol laet we oli kamaot long skae long ples blong olgeta oli olsem ol saen blong soemaot se bambae i gat faet no bigfala sik. Long India, ol draeva blong ol bigfala kamiong oli stap pasem sik ya AIDS i go long ol narafala man, from we oli bilif se taem weta i hot oli save stap kolkol nomo sipos oli mekem nogud long saed blong seks. Long Japan, ol man we oli digim ol tanel aninit long graon, oli bilif se sipos wan woman i kam insaed long tanel bifo we wok blong digim hol ya i finis, hem i karem badlak i kam. Wan man blong plei volibol i talem se hem i win from we hem i no werem waet sok, be hem i werem blak sok. Mo i gat plante narafala saen bakegen we man i bilif se hem i minim gudlak no badlak.

?Olsem wanem long yu? ?Yu yu fraet long wan samting we yu no save eksplenem? ?Yu yu holem wan “bilif, . . . no yu folem wan kastom we maet i no gat gudfala risen” blong mekem olsem? Ansa blong yu bambae i soemaot sipos bilif long ol saen blong gudlak mo badlak i gat paoa long laef blong yu.

Sipos wan man i letem wan bilif olsem i gat paoa long ol disisen mo bisnes we hem i mekem evri dei, hemia i min se hem i letem wan samting i bos long hem we hem i no rili kasem save long hem. ?Be, fasin ya i rili waes? ?I stret we yumi letem samting i bos long yumi we yumi no kasem save long hem mo we maet i save spolem yumi? ?Olsem wanem? ?I nating nomo sipos yumi bilif long sam saen blong gudlak no badlak, no i gat denja biaen long tingting ya?