Laef Stori

Mi Olfala Tumas Be Mi Haremgud Long Laef Blong Mi

MURIEL SMITH I TALEM STORI YA

Mi harem wan strongfala noknok i seksekem doa blong mi. Mi jes kambak long haos blong kakae long medel dei, afta we mi bin spenem ful moning long wok blong prij. Olsem oltaem, mi stap boelem wota blong mekem wan kap ti, mo mi jes stat stretem leg blong mi blong spel smol. Noknok ya long doa i rili strong, mo taem mi wokbaot i go blong openem doa mi stap askem long mi wan se hu ya i kam luk mi long medel dei. Kwiktaem nomo, mi faenemaot hu i stap. Tu man i stap long doa, tufala i talem se tufala i polisman. Tufala i talem se tufala i mas lukluk insaed long haos blong mi blong faenem ol buk we ol Witnes blong Jeova oli wokem—wan ogenaesesen we gavman i putum tabu long wok blong hem.

?From wanem Ostrelia i putum tabu long wok blong ol Witnes blong Jeova, mo olsem wanem mi mi kam wan long ol Witnes ya? Stori i stat wetem wan presen we mama i givim long mi long yia 1910, taem mi gat ten yia blong mi.

FAMLE blong mi i laef long wan haos we oli wokem long wud, long Crows Nest long Not blong Sydney. Wan dei, mi kambak long skul mo mi luk mama blong mi i stap storian wetem wan man long fored blong doa. Mi wantem tumas blong save hu ya man ya we i werem naes klos mo i karem wan bag we i fulap long buk. Mi sem taswe mi jes talem ‘eskiusmi’ mo mi go insaed long haos. Sam menet biaen, Mama i singaot mi. Hem i talem long mi se: “Man ya i gat ol gudfala buk, mo ol buk ya oli tokbaot Baebol. Klosap nao bambae yu gat betde blong yu, taswe yu save jusum se yu wantem wan niufala dres, no ol buk ya. ?Yu yu wantem weswan?”

 Mi ansa se: “O, Mama plis, mi wantem ol buk ya.”

Taswe, taem mi gat ten yia nomo, mi kasem ol trifala faswan buk blong Studies in the Scriptures, we Charles Taze Russell i raetem. Man we i stap long doa i eksplenem long mama blong mi we bambae mama i mas halpem mi blong mi kasem save ol buk ya, from we oli had tumas blong mi. Mama i talem se hem i glad blong halpem mi blong save ol buk ya. Be sore tumas, smoltaem nomo biaen, Mama i ded. Papa i mekem bes blong hem blong lukaot long brata blong mi, sista blong mi, wetem mi, be naoia mi gat sam moa wok blong mekem long haos mo wok ya i tekem fulap taem blong mi. Nomata ol hadtaem ya, wan narafala bigfala trabol i stap kam yet.

Long 1914 faswan bigfala faet blong wol i stat, mo wan yia biaen oli kilim i ded gudfala papa blong mifala. From we mifala i no moa gat papa mama, brata mo sista blong mi tufala i go laef long famle blong mifala, mo oli sanem mi mi go long wan Katolik boding skul. Samtaem, mi harem nogud bitim mak from we mi stap mi wan. Nating se i olsem, mi gat tangkiu tu from we long skul ya mi gat janis blong stadi long miusik we mi laekem tumas, mo mi lanem blong plei piano. Ol yia oli pas, nao mi kasem setifiket blong mi long skul ya. Long 1919, mi maredem Roy Smith, wan man we i salem ol tul blong plei miusik. Long 1920, mi karem faswan pikinini blong mitufala, mo bakegen laef blong mi i kam bisi tumas from wok we mi mas mekem evri dei. ?Olsem wanem long ol buk ya, mi bin yusum olgeta?

Wan Woman We i Laef Klosap Long Mifala i Serem Trutok

Long olgeta yia ya we oli pas, mi bin karem ol “buk blong Baebol” wetem mi oltaem. I tru se mi neva ridimgud ol buk ya, be dip long hat blong mi, mi save se mesej blong buk ya i impoten. Ale wan dei long en blong ol yia 1920, Lil Bimson, wan woman we i laef long wan haos klosap long mifala, i kam visitim mi. Mitufala i go sidaon insaed long rum blong spel mo mitufala i dring ti.

Wantaem nomo hem i talem se: “!Eh, yu yu gat ol buk ya!”

Mi no kasem save wanem we hem i tokbaot, ale mi askem se: “?Be yu tokbaot wanem buk ya?”

Hem i soem ol buk ya Studies in the Scriptures we i stap long laebri. Long sem dei ya nomo, Lil i karem ol buk ya i go long haos blong hem, mo i wantem tumas blong ridim olgeta. Kwiktaem nomo mifala i luk se hem i haremgud tumas from ol samting we hem i stap ridim. Lil i kasem sam moa buk from ol Baebol Studen, hemia nem blong ol Witnes blong Jeova long taem ya. Antap long samting ya, oltaem hem i talemaot long mifala ol samting we hem i stap lanem. Wan blong ol buk we hem i kasem hemia The Harp of God, mo i no longtaem biaen, buk ya i kam long haos blong mifala. Taem mi stat pemaot taem blong ridim buk ya we i stanap long Baebol, mi stat wantem mekem wok blong Jeova long laef blong mi. Mi kasem ol ansa long sam impoten kwestin we jos blong mi i no naf blong givim ansa long hem.

Mi laki from we Roy tu i intres tumas long mesej ya, mo mitufala i stat stadigud long Baebol. Bifo, Roy i joenem skul blong ol Masonik. * Naoia famle blong mifala i joengud tugeta long trufala wosip, mo wan brata i kam mekem Baebol stadi wetem ful famle blong mifala tu taem long wan wik. Biaen taem mifala i stat go long ol miting blong ol Baebol Studen, samting ya tu i leftemap tingting blong mifala. Oli holem ol miting long wan smol haos we oli rentem long Newtown.  Long taem ya, i gat klosap 400 Witnes long ful Ostrelia, taswe ol brata we oli wantem go long ol miting oli mas wokbaot longwe.

Taem famle blong mifala i wantem go long ol miting mifala i mas krosem Sydney Haba. Oli wokem Sydney Haba Brij long 1932 nomo, be bifo we i gat brij ya evri man i mas yusum wan bigfala sip blong krosem haba ya. Nating se sip ya i tektaem mo i sas tu, be mifala i no wantem mestem wan long ol gudfala kakae long saed blong spirit we Jeova i givim long mifala. I gud we mifala i mekem ol traehad ya blong stanap strong long trutok, from we namba tu bigfala faet blong wol i stat, mo famle blong mifala bambae i kasem traem from we mifala i no joen long faet.

Wan Taem Blong Traem Mo Blesing Tu

Mi wetem famle blong mi mifala i haremgud tumas long stat blong ol yia 1930. Mi tekem baptaes long 1930, mo long 1931 mi stap long nambawan asembli ya we bambae mi neva fogetem, hemia taem we mifala evriwan i stanap mo i agri blong karem naesfala nem ya, ol Witnes blong Jeova. Mi wetem Roy mitufala i wantem tumas se laef blong mifala i laenap wetem nem ya, taswe mitufala i joen long evri wok blong prij we ogenaesesen i stanemap. Eksampol, long 1932 mifala i joen long wan spesel wok blong seremaot wan buk long ol hip blong man we oli kam long dedikesen blong Sydney Haba Brij. Wan spesel samting blong mifala, hemia taem mifala i yusum ol trak we i gat wan laod spika long hem, mo famle blong mifala i gat janis blong yusum wan spika olsem long trak blong mifala. Wetem ol trak ya, mifala i fulumap ol rod blong Sydney wetem voes blong Brata Rutherford we i stap givim ol tok long saed blong Baebol.

Nomata long ol gudfala taem ya, bigfala jenis i kamaot bakegen mo laef i kam had tumas. Long 1932, Bigfala Hadtaem long saed blong mane i kasem Ostrelia, taswe mi wetem Roy mitufala i tekem disisen blong gat wan laef we i isi moa. Blong kasem mak ya, mifala i muv i go long wan haos we i klosap moa long kongregesen, mekem se mifala i no spenem tumas vatu blong go kam long ol miting. Nating se mifala evriwan i fesem hadtaem from ol problem long saed blong mane, be i gat wan narafala trabol bakegen we i mekem mifala i fraet moa: Wolwo Tu i stat.

From we ol Witnes blong Jeova oli obei long oda blong Jisas se oli no mas joen long wol, ol man oli givim hadtaem long olgeta long fulwol, mo long Ostrelia tu. Long taem ya we tingting blong ol man i stap long faet, sam man oli talem se mifala i joen wetem ol Komunis. Ol man we oli agensem mifala oli giaman se ol Witnes blong Jeova oli stap yusum ol fo radio stesen we oli gat long Ostrelia blong sanem sam mesej long ami blong Japan.

Oli singaot ol yangfala brata blong oli joenem ami, mo oli traehad blong pulum olgeta blong oli faet. Mi glad tumas blong talem se ol trifala boe blong mifala oli stanap strong long bilif blong olgeta, mo oli no joen long faet. Richard, fasbon boe blong mifala, i kasem panis blong 18 manis long kalabus. Kevin, namba tu boe blong mifala, i kasem janis blong oli rejistarem hem olsem wan man we bilif blong hem i blokem hem blong joen long ami. Sore tumas, Stuart, lasbon blong mifala i ded long wan akseden long moto blong hem, taem hem i stap go long kot blong oli jajem hem from we hem i no wantem joen long faet. Mifala i harem nogud tumas taem Stuart i ded. Nating se i olsem, mifala i stap lukluk i go long Kingdom mo promes blong Jeova se bambae hem i mekem ol dedman oli laef bakegen. Samting ya i givhan long mifala blong mifala i gohedgud.

Oli Mestem Samting We i Moa Impoten

Long Jenuware 1941, oli putum tabu long wok blong ol Witnes blong Jeova long Ostrelia. Be, folem eksampol blong ol aposol blong Jisas, mi wetem Roy mitufala i stap obei long God fastaem i bitim ol man, mo blong tu yia haf mitufala i gohed blong wok long fasin haed. Hem i long taem ya nao we tufala polisman oli kam noknok long doa blong mi. ?Wanem i hapen biaen?

Mi tekem tufala i kam insaed. Taem tufala i kam insaed long haos, mi askem long tufala se: “?I oraet sipos mi finisim kap ti blong mi bifo we yutufala stat lukluk insaed long haos?” Mi sapraes tumas oli talem se yes, ale mi go long kijin blong prea long Jeova mo mekem tingting blong mi i stap kwaet. Taem mi kambak, wan polisman i stap long rum we mifala i stadi long hem mo i stap tekem evri samting we hem i luk se i gat nem blong Wajtaoa long hem, mo hem i tekem ol buk we oli stap long bag blong prij blong mi mo Baebol blong mi tu.

 Biaen polisman i askem se: “?Yu sua se yu no gat sam narafala buk oli stap haed sam ples long sam bokis? Mifala i save se yu go long wan miting evri wik long wan haos long en blong rod ya, mo yu stap karem plante buk long ples ya.”

Mi ansa se: “I tru, be oli no stap long ples ya nao.”

Hem i talem se: “Yes, mifala i save finis Misis Smith. Mifala i save tu se yufala i kipim ol buk long haos blong plante man long distrik ya.”

Long bedrum blong ol boe blong mifala, oli faenem faef bokis we i gat plante kopi blong buk ya Freedom or Romanism.

Polisman i askem se: “?Yu sua se yu no gat sam samting bakegen long haos blong trak?”

Mi talem se: “No, i no gat wan samting long ples ya.”

Biaen oli openem wan kabod long ples we mifala i kakae long hem. Polisman i faenem sam fom we oli emti, ol fom ya mifala i yusum blong makem ripot blong kongregesen. Hem i tekem ol fom ya, mo i wantem go luk long haos blong trak.

Mi talem se: “Ale, yufala i kam.”

Tufala i folem mi, mifala i go long haos blong trak, mo afta we tufala i lukluk insaed, tufala i go.

!Ol polisman ya oli ting se oli faenem wan impoten samting wetem ol faef bokis ya! Be oli livim samting we i impoten moa i stap long haos. Long taem ya, mi mi wok olsem sekretari blong kongregesen, mo mi gat wan lis blong evri pablisa mo sam narafala impoten samting tu i stap. Be tangkiu tumas, ol brata oli givim woning finis long mifala se maet sam man oli save kam blong lukluk insaed long haos, nao mi haedemgud ol pepa ya blong kongregesen. Mi putum olgeta pepa ya long sam envlop, mo mi haedem olgeta insaed long ol tin blong ti, suga, mo flaoa. Mo tu, mi haedem sam blong ol pepa ya long haos blong ol pijin we i stap klosap long haos blong trak. Taswe ol polisman oli wokbaot i go pas long samting ya stret we oli wantem kasem.

Statem Fultaem Wok Blong Prij

Long 1947, ol bigfala pikinini blong mifala oli mared finis. Taswe long taem ya, mi wetem Roy mitufala i ting se naoia mifala i save mekem wok blong fultaem paenia. I gat sam nid long Saot blong Ostrelia, taswe mifala i salem haos blong mifala mo mifala i pem wan smol haos wetem wil we trak i pulum, mo mifala i putum nem long hem se Mispa, we i min se “Wajtaoa.” Fasin ya blong laef i givim janis long mifala blong go prij long sam ples we oli farawe. Plante taem, mifala i stap prij long ol ples afsaed long taon, we i no gat pablisa long hem. Mi rimemba ol gudfala taem ya. Mi mekem wan stadi wetem Beverly, wan yangfala woman. Be hem i livim ples ya bifo we hem i naf blong tekem baptaes. !Sam yia biaen, mi glad we mi glad taem wan sista i kam luk mi long wan asembli, mo i talem long mi se hem i Beverly! Mi glad bigwan blong luk se plante yia biaen, Beverly i stap mekem wok blong Jeova wetem hasban blong hem mo ol pikinini blong tufala.

Long 1979, mi gat janis blong joen long Skul blong Ol Paenia. Wan long ol stamba tijing blong skul ya, hemia se sipos yu wantem stanap strong longtaem long wok blong paenia yu mas stadigud yu wan oltaem. Mi luk se samting ya i tru tumas. Fasin blong stadi, go long ol miting mo wok blong prij, hemia samting we mi bin mekem long ful laef blong mi. Blong bitim 50 yia mi bin wok olsem wan fultaem paenia, mo mi ting se wok ya hem i wan nambawan blesing we mi bin kasem.

Gohed Nating Se Mi Sik

Nating se i olsem, ol yia oli pas mo mi bin fesem sam spesel traem. Long 1962, ol dokta oli faenem se mi kasem sik ya we oli kolem glokoma. Long  taem ya ol dokta oli no naf blong mekem ae blong mi i kam gud bakegen, ale kwiktaem nomo ae blong mi i no moa save luklukgud. Helt blong Roy tu i stat kam nogud, mo long 1983 wansaed bodi blong hem i ded mo hem i no moa save toktok. Hem i ded long 1986. Hem i bin sapotem mi bigwan taem mi stap paenia, mo mi harem nogud from we hem i no moa stap.

Nomata long ol hadtaem ya, mi traem blong gohed gud long saed blong spirit. Mi pem wan trak we i strong, mo i stret long ol teritori blong mifala afsaed long taon, mo Joyce, gel blong mi, i givhan long mi blong mi gohed long fultaem wok blong prij. Tufala ae blong mi i stap kam nogud gogo wan saed ae blong mi i blaen. Ol dokta oli putum wan giaman ae long ples blong ae ya. Ale mi stat yusum wan glas we i mekem ol leta oli kam bigwan, mo mi ridim ol buk we oli prentem wetem bigfala leta, nao mi save spenem tri kasem faef aoa evri dei blong stadi long Baebol, from we mi naf blong luk smol wetem narafala ae blong mi we i stap yet.

Oltaem mi mi laekem tumas blong stadi. Taswe, traem tingbaot ol filing blong mi long aftenun ya we mi stap stadi, mo wantaem nomo mi no moa save luk wan samting nating. I olsem se wan man i kilim laet. Nao, mi no moa save lukluk wan samting nating. ?Olsem wanem mi save gohed blong stadi? Nating se sora blong mi i fas lelebet be mi lesin long ol kaset, mo famle blong mi tu i sapotem mi wetem lav, blong mi stap strong long saed blong spirit.

Stanap Strong Go Kasem En

Naoia, from we mi gat bitim wan handred yia, mi kasem sam narafala trabol long saed blong helt blong mi taswe mi no save mekem plante wok olsem bifo. Samtaem, mi harem olsem se mi lus. !Be tu from we mi moa save lukluk, samtaem mi rili lus, mi no save faenem rod blong mi! Sipos mi naf, mi mi glad tumas blong stadi Baebol wetem sam man, be from we helt blong mi i nogud mi no naf blong go prij mo faenem ol man ya. Fastaem, tingting blong mi i foldaon from samting ya. Mi mas lanem blong mekem smol wok nomo from we mi sik, mo mi mas lanem blong haremgud long ol smol samting we mi naf blong mekem. Be samting ya i no isi. Nating se i olsem, mi glad se evri manis mi naf blong ripotem ol taem we mi spenem blong tokbaot Jeova, bigfala God blong yumi. Taem mi gat janis blong tokbaot Baebol long ol man we oli kam visitim mi, olsem ol nes, ol tredaman, mo sam narafala bakegen, ale mi tekem janis ya—mo mi toktok wetem kaen fasin.

Wan bigfala blesing we mi haremgud tumas long hem, hemia taem mi luk se famle blong mi i gohed blong wosipim Jeova, go kasem namba fo smol bubu blong mi. Sam famle blong mi oli wok strong blong mekem wok blong paenia long ol ples we i gat nid long hem, sam narafala oli mekem wok blong elda no oli man blong givhan, mo sam oli stap wok long Betel. I tru se taem mi kasem trutok, olsem plante man we oli laef long taem ya, mi ting se en blong wol bambae i kam kwiktaem nomo. !Be mi luk namba blong ol Witnes i kam antap bigwan blong ol seventi yia we mi spenem long fultaem sevis! Mi haremgud tumas long laef blong mi from we mi gat janis blong joen long wan bigfala wok olsem.

Ol nes we oli kam luk mi long haos oli talem se bilif blong mi nao i mekem se mi stap laef yet. Mi agri wetem tok ya. Yu gat wan nambawan laef taem yu stap wok oltaem blong Jeova. Olsem King Deved, mi save talem se mi olfala tumas be mi haremgud long laef blong mi.—1 Kronikel 29:28.

(Sista Muriel Smith i ded long Eprel 1, 2002, taem mifala i finisim haf ya. Sipos hem i laef wan manis moa bambae hem i kasem 102 yia blong hem. Hem i rili givim wan nambawan eksampol long fasin blong holem bilif mo fasin blong stanap strong go kasem en.)

[Futnot]

[Tok blong pija long pej 24]

Taem mi gat faef yia, mo taem mi gat 19 yia mo mi mitim Roy, hasban blong mi

[Tok blong pija long pej 26]

Trak blong mifala wetem smol haos ya we i gat wil we mifala i putum nem blong hem se Mispa

[Tok blong pija long pej 27]

Wetem Roy, hasban blong mi, long 1971