Ripot Long Wok Blong Kingdom

‘Paoa Blong Tok Blong God i Stap Wok’

LONG Jamaika, wan aelan long Karibin Si, bighaf blong ol man i savegud Baebol. Long klosap evri famle i gat Baebol ya King James Version, mo sam man oli luksave se “Tok blong God i laef i stap mo paoa blong hem i stap wok.” (Hibrus 4:12, NW ) Paoa ya i save jenisim laef blong man, olsem yumi luk long ekspiriens we i kam biaen.

Wan man we nem blong hem Cleveland i jes kamhom from wok, taem wan Witnes blong Jeova i visitim hem. Oli lukluk sam vas long Baebol tugeta, mo Witnes ya i givim long Cleveland wan buk blong stadi long Baebol, hemia Save Blong Lidim Yu Long Laef We i No Save Finis. Long taem ya Cleveland i no save yet se bambae Tok blong God i gat bigfala paoa long laef blong hem olsem wanem.

Cleveland i stap prea tri taem evri dei, hem i stap askem God blong i halpem hem blong faenem stret rod blong wosipim hem. Cleveland i sua fulwan se papa mama blong hem, tufala i no wosipim God long fasin we i stret, be afta we hem i jekemap ol narafala skul hem i harem nogud. Hem i bin harem ol man oli tokbaot ol Witnes blong Jeova, be hem i no sua sipos oli gat trutok no nogat. Nating se hem i no sua yet, be Cleveland i agri blong stadi long Baebol wetem Witnes ya we i kam visitim hem. ?From wanem hem i wantem stadi? !From we i wantem pruvum se ol Witnes oli rong!

I no longtaem biaen, Cleveland i lanem se God i no laekem rabis fasin we hem i gat blong slip wetem tu defren woman. (1 Korin 6:9, 10) Afta tu stadi nomo, hem i strong inaf blong stopem fasin fren wetem tufala woman ya. Mo tu, hem i stat kam long ol Kristin miting long Haos Kingdom. Be hemia tu i wan traem long hem.

Cleveland i joen long futbol tim blong vilej blong hem, mo oli stap plei futbol long sem dei we i gat ol miting. ?Bambae hem i mekem wanem? Nomata se ol man we oli plei futbol wetem hem wetem trena mo ol fren blong hem tu, olgeta oli pulum hem blong i stap plei wetem olgeta yet, be Cleveland i tekem disisen se hem i mas lego futbol tim ya. !Yes, paoa blong Tok blong God i stap wok long hem, mo hem i haremgud from!

Biaen, i klia moa we paoa blong Tok blong God i stap wok taem Cleveland i stat tokbaot Baebol wetem ol narafala. (Ol Wok 1:8) From samting ya, tu man we oli plei futbol wetem hem bifo, oli stat kam long ol miting blong ol Witnes blong Jeova. Biaen Cleveland i naf blong kam wan pablisa blong gud nius, mo hem i harem gud tumas long minista wok blong hem taem i yusum Tok blong God blong givhan long ol narafala.

Cleveland i letem paoa blong Tok blong God i wok moa long hem, nao hem i givim laef blong hem i go long Jeova mo i tekem baptaes. Tede, hem i wan fultaem paenia mo hem i wan man blong givhan long wan kongregesen.

Long Jamaika mo raon long wol, plante taosen man oli bin lanem se, yes i tru tumas, Tok blong God “i laef i stap mo paoa blong hem i stap wok.”

[Map/Foto blong pija long pej 8]

(Lukluk niuspepa)

JAMAIKA

[Credit Line]

Map and globe: Mountain High Maps® Copyright © 1997 Digital Wisdom, Inc.