Stok i Givim Wan Lesen Long Yumi

“Ol PIJIN ya stok, . . . nating we oli pijin nomo, be oli savegud stret taem blong oli ronwe long koltaem, blong go long narafala ples. Be yufala, yufala i no save nating ol loa blong mi, we mi mi stap rulum yufala long hem.” (Jeremaea 8:7) Hemia tok we Jeova i givim long Jeremaea blong talemaot jajmen blong Hem long ol man Juda we oli lego Hem. Oli no moa mekem wosip long God blong olgeta Jeova, be oli go wosip long ol narafala god. (Jeremaea 7:18, 31) ?From wanem Jeremaea i jusum pijin ya stok blong givim wan lesen long ol man Isrel we oli no stap tru long God?

Ol man Isrel oli save gud ol stok, antap moa ol waet stok. Evri yia, ol pijin ya oli stap pastru long ol kantri we Baebol i tokbaot, taem oli stap ronwe long koltaem. Pijin ya i bigbigwan, i gat longlongfala leg, mo i laekem wokbaot long wota mo sofmad. Nem blong hem long lanwis Hibru i minim, “wan we i stap tru, wan we i soemaot lav mo kaen fasin.” Nem ya i stret long pijin ya. Hem i no olsem plante narafala pijin. Ol man mo woman stok oli stap tugeta blong ful laef blong olgeta. Taem ples i kolkol, oli ronwe i go long ples we i hot. Be evri taem, oli kambak long semfala bed blong olgeta.

Stok i gat sam narafala nambawan wei blong hem we oli soemaot fasin ya blong stap tru. Papa mo mama stok oli serem wok ya blong sidaon long ol eg blong mekem oli stap wom, mo wok blong fidim ol pikinini. Buk ya Our Magnificent Wildlife i eksplenem se: “Papa mo mama stok, tufala i stap tru long tufala olwe. Long Jemani, wan man stok i flae i go fas long ol rop blong lektrik, ale i ded. Woman blong hem i gohed blong tri dei blong sidaon long ol eg, hem wan nomo. Hem i livim ol eg ya wan taem nomo long ol dei ya, hemia smoltaem nomo blong lukaot kakae. . . . Long wan narafala taem, wan man i sutum i ded wan mama stok, nao papa stok nomo i lukaot long ol pikinini gogo oli kam bigwan.”

Tru ya, fasin blong man mo woman stok se tufala i stap tru long tufala blong ful laef blong tufala, mo tufala i lukaot gud long ol pikinini blong tufala, i soemaot se nem blong pijin ya i stret—“wan we i stap tru.” Long rod ya, ol stok oli givim wan bigfala lesen long ol stronghed man Isrel we oli no stap tru long God.

Tede, plante man oli ting se fasin ya blong stap tru i blong bifo nomo—oli ting se i wan gudfala fasin be i no stret long taem blong yumi. Taswe, divos i stap kam antap, ol man mo woman, ol famle mo ol fren oli stap serseraot, fasin blong trikim narafala blong stilim mane blong hem i kam bigwan moa, mo olkaen fasin blong giaman oli fulap. Ol samting ya i soemaot se fasin blong stap tru i no wan impoten fasin long tingting blong ol man. Be, Baebol i soem se fasin ya we i joen wetem lav mo kaen fasin, i sas tumas. Baebol i talem long ol Kristin se: “Bambae yufala i kam niufala man, we God i mekem yufala i kam olsem hem. Nao bambae ol man oli save luksave se laef blong yufala i folem trutok blong hem, mo i stret gud, i tabu, i blong hem nomo.” (Efesas 4:24) Yes, niufala fasin blong laef ya bambae i givhan long yumi blong stap tru. Mo stok tu i givim lesen long yumi long fasin ya.