Wan Kwestin

?Olsem wanem? ?Ebel i save se hem i mas givim wan anamol olsem sakrefaes sipos i wantem mekem God i glad?

Stori blong Baebol long saed blong ol presen we Ken mo Ebel i givim i go long God, i sot nomo. Long Jenesis 4:3-5, yumi ridim se: “Tufala i stap mekem olsem gogo, nao Ken i tekem sam kakae we i kamaot long garen blong hem, i givim i go long Hae God blong mekem wosip long hem. Be Ebel i tekem wan fasbon blong ol sipsip blong hem, i kilim i ded, mo i tekem ol gudfala mit blong hem we i gat gris, nao i givim i go long Hae God blong mekem wosip long hem. Mo Hae God i glad long fasin ya we Ebel i mekem, mo long presen ya we i givim i go long hem, be i no glad long fasin we Ken i mekem, mo long presen ya blong hem.”

I no gat samting long Baebol blong soemaot se, long taem ya, Jeova i givim save finis long saed blong ol sakrefaes, mo wanem kaen sakrefaes we hem i glad long olgeta. Taswe, i klia se Ken mo Ebel i jusum wanem sakrefaes we tufala i wantem givim i go long God. Tufala i no save go insaed long Paradaes we papa mama blong tufala i bin stap long hem fastaem. Mo tu, tufala i stat blong haremsave se tufala i gat sin, mo se tufala i stap longwe long God. From we tufala i sinman mo tufala i stap trabol nao, ating tufala i harem se tufala i nidim we God i givhan long tufala. Ating tufala i wantem givim presen i go long God blong traem mekem God i glad long tufala.

Samting we i kamaot se, God i glad long sakrefaes we Ebel i givim be i no glad long sakrefaes blong Ken. ?From wanem? ?Hemia from we Ebel i givim samting we i stret olsem sakrefaes be Ken i givim samting we i no stret? Yumi no save talem sipos kaen sakrefaes we tufala i givim i gat paoa long God no nogat, from we God i no bin talem long tufala yet wanem kaen sakrefaes we hem i wantem. Ating tufala kaen sakrefaes evriwan oli gud nomo. Biaen, Jeova i givim Loa long ol man Isrel. Long Loa ya nao hem i jes talem se hem i glad sipos oli givim ol anamol olsem sakrefaes, no sam spesel haf blong bodi blong anamol. Be hem i talem tu se hem i glad long sid we oli rusum, ol hed blong bale, gudfala flaoa, sam samting we oli rusum, mo waen. (Levitikas 6:19-23; 7:11-13; 23:10-13) Taswe, i klia se i no samting we Ken mo Ebel i givim nomo we i mekem se God i glad long Ebel mo i no glad long Ken.—Skelem wetem Aesea 1:11; Amos 5:22.

Plante handred yia biaen, aposol Pol i talem se: “From we Ebel i stap bilif strong long God, taswe hem i givim wan presen i go long God, we i gud moa, i winim presen blong Ken. Mo from we hem i stap bilif strong long God olsem, taswe God i soemaot long hem se hem i wan stret man, nao i glad blong tekem presen blong hem.” (Hibrus 11:4) Ale, bilif nao i mekem se God i luk Ebel olsem wan stret man. ?Be bilif long wanem samting? Bilif long promes blong Jeova se bambae i stanemap wan Laen we bambae i ‘smasem hed blong snek.’ Nao ol samting bambae oli kam olsem fastaem bakegen, we ol man oli no gat sin mo pis i stap. Jeova i promes tu se Setan ‘bambae i kakae leg’ blong Laen ya. Maet tok ya i mekem Ebel i luksave se hem i mas mekem blad i ron blong givim wan sakrefaes i go long God. (Jenesis 3:15, NW ) Nating se i olsem wanem, be yumi save se bilif blong Ebel nao i mekem se ‘God i glad long presen we hem i givim.’

Long saed blong Ken tu, i no samting we hem i givim long God we i mekem se God i no glad long hem. God i no glad from we Ken i no gat bilif. Hem i soemaot samting ya long ol fasin blong hem. Jeova i talem klia long Ken se: “Sipos fasin blong yu i stret, bambae mi mi glad long yu.” (Jenesis 4:7) God i no agensem Ken from samting we hem i givim olsem sakrefaes. Be hem i no glad long Ken from we “fasin blong hem i no stret.” Ken i jalus, hem i no laekem brata blong hem, mo hem i kilim brata blong hem i ded. From samting ya nao, God i no wantem Ken.—1 Jon 3:12.