Yoga—?Wan Eksasaes Nomo No Wan Narafala Samting?

PLANTE man tede oli wantem wan bodi we i fit mo i helti. Blong kasem mak ya, oli stap go long ol ples blong eksasaes mo ol ples we oli givhan long man blong stap helti. From semfala risen ya nao, plante taosen man long ol kantri blong Wes oli folem wan program we oli kolem yoga, mo we i kamaot long ol kantri blong Is.

Ol man we oli wari, we tingting i foldaon, mo we oli stap kros oltaem, oli joen long yoga blong haremgud bakegen mo winim ol problem blong olgeta. Long ol yia 1960, hemia long taem blong ol hipi, * ol man blong Wes oli stat blong intres bigwan long ol skul blong Is. From samting ya, ol wok we ol skul ya oli mekem we mining blong hem i no klia, i kasem ol kantri blong Wes. Wan long ol wok ya we i joen long yoga, mo we ol man blong plei sinema mo miusik oli mekem i kam antap kwiktaem, hem i transcendental meditation. Long wan voes we i smol, man i singsing bakegen mo bakegen ol semfala toktok, blong traem mekem tingting i stap kwaet, mo i no tingbaot wan narafala samting. From we intres long yoga i stap kam antap, maet yumi askem se: ‘?Olsem wanem? ?Yoga i jes wan eksasaes nomo we i givhan long man blong gat gud helt, naesfala bodi mo pis long tingting? ?Sipos man i joen long yoga, hem i min se hem i joen wetem skul tu? ?I stret blong wan Kristin i joen long yoga?’

Stamba Blong Yoga

Tok ya “yoga” i laenap wetem tok ya “yok.” Hem i save min se yu joenem tufala samting tugeta aninit long wan yok no yu karem wan samting i kam aninit long wan yok blong fasem no bos long hem. Ol man Hindu oli tingbaot yoga olsem wan fasin blong trenem man blong hem i save kam wan nomo wetem wan bigfala paoa no spirit man. Oli talem se yoga i “joenem olgeta paoa blong bodi, tingting mo sol i go long God.”

?Wetaem long histri blong man, yumi save faenem we ol man oli joen long yoga? Long Indus Vali, we naoia hem i Pakistan, oli faenem ol stam, mo pija long ol stam ya i soemaot man we i stap mekem yoga. Ol man we oli digim graon blong faenem ol samting blong bifo, oli talem se i gat man i  stap long Indus Vali bitwin ol yia tri taosen mo wan taosen B.K.T. Hemia taem we kastom mo rul blong ol man Mesopotemia i bigwan long laef blong ol man. Plante long olting we oli faenem long tufala eria ya oli gat pija blong wan man long hem, we i wan god. Man ya i werem wan hat we i gat tu hon blong anamol long hem mo i gat ol anamol oli stap raonabaot long hem. I luk olsem se man ya hem i Nimrod, ‘wan strong man blong kilim anamol.’ (Jenesis 10:8, 9, NW ) Ol man Hindu oli talem se ol pija blong man we i mekem yoga, oli ol pija blong god ya Siva, masta blong ol anamol mo masta blong yoga. Long wosip blong Siva, ol man oli stap yusum lingam, we hem i saen blong tabu haf blong man. Taswe, buk ya Hindu World i tokbaot yoga olsem “ol rul we man i folem blong blokem ol samting we hem i wantem, hem i stat bifo long taem blong ol man Arian, mo i fulap long ol olfala tingting mo kastom we ol man bifo oli folem.”

Fastaem, oli pasem ol rul blong yoga i go long narafala man tru long toktok nomo. Biaen, Patañjali, wan waesman blong India, i raetemdaon evri rul long wan buk we nem blong hem Yoga Sutra. Kam kasem tede, ol man oli yusum buk ya yet blong tijim yoga. Patañjali i talem se man we i mekem yoga hem i stap “traehad blong kam stretgud olgeta, hem i trenem hem wan blong bos long ol slak fasin blong hem, hemia long saed blong bodi mo tingting.” Long stat blong hem, i kam kasem taem blong yumi tede, yoga i wan impoten haf blong ol skul blong Is olsem Hindu, Jain, mo Budis. Sam man we oli joen long yoga oli bilif se yoga bambae i lidim olgeta blong kasem moksha, we i min se oli kam fri, nao oli kam wan nomo wetem bigfala spirit ya we i stap evri ples.

Taswe yumi askem bakegen se: ‘?Sipos yumi no joen long skul blong Is, i stret blong mekem yoga olsem eksasaes nomo, blong wokem wan bodi we i helti mo wan tingting we i kwaet?’ Sipos yu tingtingbak long stamba blong hem, ansa blong kwestin ya i klia nomo se nogat.

?Yoga i Stap Lidim Yu Yu Go Wea?

Trening blong yoga i blong lidim man blong “joen” no kam wan wetem wan spirit we i strongfala moa bitim olgeta man. ?Be weswan spirit ya?

Wan man blong raetem buk, Benjamin Walker, i tokbaot yoga long buk blong hem Hindu World, mo i talem se: “I luk olsem se [yoga] i wan fasin we oli yusum bifo long ol wok blong majik, mo kasem naoia i gat plante samting we oli mekem yet long yoga, we oli joen wetem majik mo ol rabis spirit.” Ol Hindu waesman oli stap talem oltaem se hemia i no mak blong yoga. Nating se i olsem, oli talem stret se ol man we oli mekem yoga oli save kasem paoa we i kamaot long ol spirit. Eksampol, long buk ya Indian Philosophy, Dr. S. Radhakrishnan, we bifo hem i presiden blong India, i tokbaot man we i stap mekem yoga oltaem se, “ol spesel eksasaes i mekem man i bos long bodi blong hem, nao hem i no save filim taem i kolkol no hot bitim mak. . . . Nating se hem i stap longwe, hem i save harem mo lukluk ol samting. . . . Hem i save putum tingting blong hem i go long tingting blong narafala, nating se hem i no toktok wetem man ya fastaem. . . . Hem i save mekem se ol narafala oli no save luk bodi blong hem.”

Sam man blong yoga oli save slip long wan plang we i gat ol nil i kamaot long hem, no oli save wokbaot long hot jakol. Maet ol narafala man oli ting se hemia i giaman nomo no i wan samting blong pleplei. Be long India, ol man oli stap mekem ol kaen samting ya oltaem. Oli save stanap long wan leg nomo blong plante aoa mo lukluk i go stret long san. Mo tu, oli save kontrolem win we oli pulum, mekem se oli save berem olgeta aninit long sanbij blong longtaem. Long Jun 1995, The Times of India i ripotem we wan gel we i gat tri yia haf nomo i ledaon long graon olsem we hem i stap slip mo wan trak we hevi blong hem i bitim 750 kilo i pas antap long bel blong hem. Ol man we oli wajem so ya oli sapraes tumas taem gel ya i wekap we hem i no kasem kil nating. Ripot i talem se: “Hemia paoa blong yoga stret.”

I tru se, i no gat man we i naf blong mekem ol samting ya long paoa blong hem nomo. Taswe, wan Kristin i mas askem hem wan se: ?Ol bigfala wok ya oli soemaot wanem? ?Oli kamaot long Jeova God, we ‘hem nomo i hae King blong olgeta ples long wol,’ no oli kamaot long paoa blong wan narafala man? (Ol Sam 83:18) Ansa we Baebol i givim i klia nomo. Taem ol man Isrel oli rere blong go insaed long Promes Lan ya we ol man Kenan oli stap long hem, Jeova i yusum Moses blong talem long olgeta se: “Bambae yufala i no mas folem ol rabis fasin blong olgeta we oli stap long ples ya.” ?Wanem “rabis fasin” ya? Moses i givim woning i se, “yufala i mas lukaot gud blong yufala i no folem fasin blong olgeta blong go luk ol kleva, mo blong makemgud ol smosmol saen we oli luk, mo blong  mekem singsing long man.” (Dutronome 18:9, 10) Ol fasin ya God i no laekem nating, from we oli ol wok blong ol devel mo ol man we oli wantem mekem sin.—Galesia 5:19-21.

I No Stret Blong Ol Kristin

Nating se maet ol tija long saed blong helt oli no agri long ol samting we yumi tokbaot antap, be i klia se yoga i no wan program blong eksasaes nomo. Buk ya Hindu Manners, Customs and Ceremonies i tokbaot wanem we i hapen long tu man we tija blong skul Hindu i lanem tufala long saed blong yoga. Wan long tufala i talem se: “Mi stap traehad blong holem win blong mi longtaem bitim mak, ale mi pulum win nomo taem mi harem se hed blong mi i raon. . . . Wan dei, long medel dei, mi ting se mi luk wan mun we i stap saen gud mo i stap muv i go wan saed i gobak long narasaed, bakegen mo bakegen. Wan narafala taem mi luk long tingting blong mi we tudak i kavremap mi long medel dei. Tija blong mi . . . i glad tumas taem mi tokbaot ol vison ya long hem. . . . Hem i talem long mi se i no longtaem hadwok ya we mi mi mekem we i soem sore from ol rong blong mi, bambae i mekem mi mi luk sam samting blong sapraes we oli bigwan moa.” Narafala man we i talem stori blong hem, i se: “Hem [tija ya] i mekem mi mi lukluk antap long skae evri dei we mi no mas muv mo mi no mas satem ae blong mi. . . . Samtaem mi ting se mi luk ol smosmol faea long skae; narafala taem mi luk ol bol we oli olsem faea mo ol bigfala ston blong faea we oli stap foldaon i kam long graon. Tija blong mi i glad tumas blong luk frut we i kamaot from traehad blong mi.”

Folem tingting blong ol tija, ol narakaen samting we tufala i luk oli ol gudfala frut we i kamaot from we tufala i mekem yoga. Hemia nao saen se bambae tufala i kasem trufala mak blong yoga. Yes, mak ya we ol man blong yoga oli wantem kasem hem i moksha. Oli eksplenem se hemia taem we man i kam wan nomo wetem wan bigfala spirit. Oli talem se hemia i min se man “i (wantem) blokem tingting blong i no moa wok hem wan.” I klia se mak ya i defren olgeta long wanem we ol Kristin oli wantem kasem. Baebol i givim advaes long olgeta se: “Yufala i mas givim olgeta laef blong yufala i go nomo long hem [God] olsem wan sakrefaes. Hemia i wan sakrefaes we i laef mo i tabu, mo we God i glad blong tekem. Hemia nao prapa wosip we i stret nomo, blong yufala i mekem long hem [“we i stanap long paoa blong tingting,” NW ]. Yufala i no mas letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.”—Rom 12:1, 2.

Yumi wanwan i gat raet blong jusum wanem eksasaes we yumi wantem mekem. Be ol Kristin, bambae oli no mas letem eni samting—nating se hem i eksasaes, kakae, dring, klos, pleplei, no eni narafala samting—i spolem fasin fren we oli gat wetem Jeova God. (1 Korin 10:31) Long saed blong olgeta we oli eksasaes blong gat gud helt, i gat plante narafala eksasaes we oli no putum man long denja from ol rabis spirit mo paoa blong majik. Taem yumi stap longwe long ol wok mo bilif we oli kamaot long ol giaman skul, bambae yumi save sua blong kasem blesing blong God hemia laef long wan niufala wol we stret fasin nomo i stap long hem, mo we yumi save gat gudfala helt long saed blong bodi mo tingting blong olwe.—2 Pita 3:13; Revelesen 21:3, 4.

[Futnot]

[Tok blong pija long pej 22]

Plante man oli haremgud long ol eksasaes we oli no meks wetem wok blong rabis spirit