?Bambae Yu Holemtaet Stret Fasin?

I NO gat man we i save talem hamas smosmol pijin oli ded yestede. Mo from we ol smosmol pijin oli plante, ating smol man nomo oli rili kea. Be, nating se i luk olsem se ol smosmol pijin oli no impoten tumas, Jeova i kea long olgeta. Jisas i tokbaot olgeta long ol disaepol blong hem, i se: “Sipos Papa blong yufala i no letem, i no gat wan long olgeta we i save foldaon long graon.” Mo hem i gohed i talem se: “Yufala i no fraet. Long fes blong hem, yufala i gud moa, i winim plante smolfala pijin ya.”—Matiu 10:29, 31.

Samtaem biaen ol disaepol oli kasem save moa se Jeova i rili tinghae long olgeta. Wan long olgeta, hemia aposol Jon, i raet se: “God i gat wan pikinini nomo blong hem, be hem i sanem hem i kam long wol ya, blong i mekem rod blong yumi, blong yumi kasem laef. Long samting ya nao, God i soemaot fasin blong hem blong lavem yumi.” (1 Jon 4:9) Jeova i givim pikinini blong hem olsem wan ransom, mo tu hem i mekem evri man blong hem oli sua se: “Bambae mi mi no save livim yu yu stap yu wan. Bambae mi mi no save lego yu samtaem.”—Hibrus 13:5.

I klia se, i no gat wan samting we i naf blong karemaot lav we Jeova i gat long ol man blong hem. Be, kwestin i stanap se, ‘?Olsem wanem long yumi? ?Yumi fasgud long Jeova we neva bambae yumi lego hem?’

Setan i Traem Pulum Yumi Blong Lego Stret Fasin

Taem Jeova i talem long Setan se Job i wan man we i holemtaet stret fasin, Setan i ansa se: “Be hem i stap mekem wosip long yu from we yu yu stap givhan gud long hem.” (Job 1:9) Setan i traem givim tingting se fasin blong man blong stap tru long God i dipen nomo long ol blesing we hem i kasem. Be, sipos samting ya i tru, hemia i min se evri Kristin bambae i lego stret fasin—sipos hem i kasem bigfala traem.

Fastaem Setan i talem se Job i no save stap tru long God sipos hem i lusum ol samting blong hem we hem i laekem tumas. (Job 1:10, 11) Taem Job i pruvum se tok ya blong Setan i giaman, Setan i gohed i talem se: “Hem [Job] i save lego olgeta samting we hem i gat blong i sevem laef blong hem.” (Job 2:4) Maet tok we Setan i talem i tru long saed blong sam man, be Job i no lego stret fasin. Stori blong hem long Baebol i pruvum se hem i holemstrong long God. (Job 27:5; 42:10-17) ?Olsem wanem long yu? ?Fasin blong yu blong stap tru long God i olsem Job? ?No bambae yu letem Setan i pulum yu blong lego stret fasin? Bambae yumi tokbaot sam samting we oli stap hapen long laef blong evri Kristin. Taem yumi mekem olsem, i gud yu tingbaot yu wan.

Aposol Pol i bilif se trufala Kristin fasin blong stap tru long God i gat bigfala paoa. Hem i raet se: “Mi mi save finis we i no gat wan samting nating we i save tekemaot yumi long Kraes we i lavem yumi tumas. Bambae yumi ded, be hemia i no save tekemaot yumi mo laef blong yumi i no save mekem. . . . I no gat wan samting we i stap finis, no wan samting we bambae i kam, we i save mekem. . . . I no gat wan samting nating long olgeta samting we God i mekem, we i save tekemaot yumi long God, we hem i lavem yumi ya tumas, we yumi joen long Jisas Kraes, Masta blong yumi.” (Rom 8:38, 39) Yumi save gat strong tingting olsem Pol, sipos lav we yumi gat long Jeova i  strong. Lav ya i mekem se yumi fasgud long God, mo i no gat wan samting, ded tu, we i save tekemaot yumi long God.

Sipos yumi frengud wetem God olsemia, neva bambae yumi askem se, ‘?Bambae mi stap mekem wok blong Jeova yet, long ol yia we bambae i kam?’ Sipos yumi no sua, samting ya i soemaot se fasin blong yumi blong stap tru long God i dipen long wanem we bambae i hapen long laef blong yumi. Man we i gat trufala fasin blong holemstrong long God bambae i neva letem ol samting raonabaot oli gat paoa long hem. Fasin ya i dipen long wanem we i stap long hat blong yumi. (2 Korin 4:16-18) Sipos yumi lavem Jeova wetem olgeta hat blong yumi, bambae yumi neva lego hem.—Matiu 22:37; 1 Korin 13:8.

Be, yumi mas rimemba se Setan i gohed oltaem blong traem pulum yumi blong lego stret fasin. Maet hem i traem pulum yumi blong ronem ol samting long saed blong bodi, no blong folem ol rabis fren. No, maet yumi letem wan hadtaem i pulum yumi blong lego trutok. Namba wan samting we Setan i yusum blong spolem yumi, hemia wol ya we i seraot long God. Mo tu ol slak fasin blong yumi i mekem i isi moa long Setan blong pulum yumi blong lego stret fasin. (Rom 7:19, 20; 1 Jon 2:16) Nating se i olsem, i gat sam samting we oli givhan long yumi long faet ya. Wan long ol impoten samting ya, hemia save we yumi gat long ol plan blong Setan.—2 Korin 2:11.

?Wanem ya ol plan blong Setan? Long leta blong Pol long Efesas, hem i tokbaot ol plan ya se oli “ol giaman trik.” (Efesas 6:11) Setan i yusum ol giaman trik blong pulum yumi blong lego stret fasin. Be, yumi gat save long ol giaman trik ya, from we Tok blong God i tokbaot olgeta. Setan i traem finis blong spolem fasin blong Jisas mo Job blong holemstrong long God. Ol traem we tufala i kasem, oli soemaot klia ol samting we Setan i stap yusum blong pulum yumi blong lego God.

Jisas i Holemstrong Long God

Nating se Jisas i Pikinini blong God, Setan i no fraet blong traem hem. Long stat blong minista wok blong Jisas, Setan i traem pulum hem blong tanem ston i kam bred. !Hemia wan trik we i waes ya! Jisas i no bin kakae blong 40 dei, mo i sua se hem i hanggri tumas. (Luk 4:2, 3) Setan i pulum Jisas blong blokem hanggri wantaem nomo, be long wan rod we i agensem wil blong Jeova. Long sem fasin tede, wol ya i pulum ol man blong wantem haremgud naoia, we oli no tingbaot frut we i kamaot biaen. Mesej we wol ya i stap givim i olsem se, ‘Yu gat raet long samting ya naoia,’ no ‘!Mekem samting we yu yu wantem!’

Sipos Jisas i bin blokem hanggri mo i no tingbaot frut we i kamaot biaen, hemia i min se Setan i winim Jisas blong lego stret fasin. Be Jisas i wantem se Jeova i glad long hem. Taswe hem i ansa se: “Baebol i talem se, ‘Man i no save laef long kakae nomo.’ ”—Luk 4:4; Matiu 4:4.

Biaen Setan i traem wan defren rod bakegen. Hem i yusum Baebol, olsem Jisas i mekem, be hem i yusum long rong fasin. Hem i putum Jisas antap long wan hae ples long Haos blong God mo i pulum hem blong jam i godaon long graon. Hem i se: ‘Ol enjel bambae oli holem yu.’ Be Jisas i no wantem se Papa blong hem i mekem merikel blong protektem hem jes blong pulum tingting blong ol man i go long hem. Taswe hem i ansa se: “Yu no save traem Hae God we i God blong yu.”—Matiu 4:5-7; Luk 4:9-12.

Nao, laswan trik blong Setan i soemaot klia wanem tingting blong hem. Hem i traem pulum Jisas blong agri long wan plan. Hem i talem se bambae hem i givim olgeta kantri long wol ya wetem  ol gudgudfala samting blong olgeta long Jisas, sipos Jisas i nildaon, i mekem wosip long hem. Yes, Setan i rere blong givim olgeta samting we hem i gat long Jisas. !Be Jisas i no save nildaon long fored blong bigfala enemi blong Papa blong hem, nogat! !Tingting ya i krangke nomo! Taswe hem i ansa se: “Yu mas mekem wosip long Hae God we i God blong yu, mo bambae yu mas mekem wok blong hem nomo.”—Matiu 4:8-11; Luk 4:5-8.

Setan i traem Jisas long trifala rod ya, be hem i no save winim Jisas. Nao Setan i “gowe long Jisas blong bambae i kambak long hem samtaem.” (Luk 4:13) Tok ya i soemaot se Setan i gohed blong lukaot sam rod blong traem brekem fasin blong Jisas blong holemstrong long God. Tu yia haf i pas, mo Setan i traem Jisas bakegen. Jisas i stap storian wetem ol disaepol blong hem long saed blong ded blong hem, we i klosap nao. Aposol Pita i talem se: “Masta, God i mas blokem samting ya. Samting ya i no save kamtru long yu olsem.”—Matiu 16:21, 22.

?Jisas i haremgud long advaes ya we disaepol blong hem i givim, nating se advaes ya i no stret? Nogat. Kwiktaem nomo hem i luksave se tok ya i no laenap wetem samting we Jeova i wantem, be i laenap wetem samting we Setan i wantem. Taswe Jisas i ansa se: “Setan. Yu gowe long mi. Yu yu stap traem blong blokem mi nomo. Tingting blong yu i no tingting blong God, i tingting blong man nomo.”—Matiu 16:23.

Lav we Jisas i gat long Jeova i no save lus samtaem, taswe Setan i no save pulum hem blong lego Jeova. I no gat wan samting nating we Devel Setan i save givim long Jisas mo i no gat wan traem nomata we hem i bigwan olsem wanem, we i save slakem fasin blong Jisas blong stap tru long Papa blong hem long heven. ?Olsem wanem long yumi? ?Sipos ol samting long laef blong yumi i mekem i had long yumi blong holemtaet stret fasin, bambae tingting blong yumi i strong olsem Jisas? Bambae eksampol blong Job i givhan long yumi blong kasem save moa long ol traem we maet yumi stap fesem.

Stap Tru Long God Taem Yumi Kasem Hadtaem

Olsem Job, yumi evriwan i save kasem traem enitaem nomo. Job i gat wan gudfala mared, hem i gat ten pikinini mo hem i tinghae long ol samting long saed blong spirit. (Job 1:5) Wan kwestin i stanap long heven we Job i no gat save long hem. Kwestin ya i long saed blong fasin blong Job blong holemstrong long God. Setan i rere blong mekem eni samting blong pulum Job blong lego God.

Kwiktaem nomo, Job i lusum olgeta sas samting blong hem. (Job 1:14-17) Be, from we Job i neva putum tras blong hem long mane, hem i holemstrong long God. Hem i tingtingbak long taem we hem i rij, mo i talem se: “!Neva mi putum tingting blong mi i stap long ol gol blong mi! Mi mi wan rijman we mi gat plante samting, be neva mi mi save flas from. !Sin olsemia, ded nomo i stret panis blong hem! God i hae tumas, mo sin ya i soemaot we man i no bilif long hem.”—Job 31:24, 25, 28.

Tede, yumi save lusum evri samting we yumi gat kwiktaem nomo. Wan bisnesman we hem i wan Witnes blong Jeova i lusum bigfala mane from we wan man i giaman long hem. Klosap bisnes blong hem i bagarap. Hem i talem stret se: “Klosap mi hatatak. Yes, mi sua se sipos mi no bin frengud wetem God, mi mi kasem hatatak finis. Nating se i olsem, ekspiriens ya i givhan long mi blong luksave se ol sas samting long saed blong spirit oli no bin stap long fas ples long laef blong mi. Mi laekem tumas blong winim mane, mo hemia i impoten moa i bitim ol narafala samting.” Stat long taem ya, Witnes ya i katem daon taem we hem i spenem long bisnes blong hem, mo hem i joen long wok blong haftaem paenia, i spenem 50 aoa no moa long wok blong prij. Be, i gat sam problem we oli moa nogud i bitim we yu lusum ol ting blong yu.

Job i jes harem toktok we ol sas samting blong hem oli lus, nao wan toktok i kamtru se ol ten pikinini blong hem oli ded evriwan. Be Job i strong yet blong talem long Jeova se: “Mi mi presem nem blong yu.” (Job 1:18-21) ?Bambae yumi holemstrong long God sipos, wantaem nomo, yumi lusum sam memba blong famle blong yumi long ded? Tu pikinini blong Francisco, wan Kristin elda long Spen, tufala i ded long wan nogud akseden long bas. Blong haremgud bakegen, Francisco i kam klosap moa long Jeova mo i spenem moa taem long wok blong prij.

Afta we ol pikinini blong Job oli ded evriwan, ol trabol blong hem oli no finis yet. Setan i givim  rabis sik long Job, we i mekem hem i soa tumas. Long taem ya, waef blong Job i givim nogud advaes long hem se: ‘!I moa gud yu tok nogud long God blong yu yu ded!’ Job i no lesin long hem, mo hem i no “tok agens long God nating.” (Job 2:9, 10) Fasin blong Job blong holemstrong long God i no dipen long famle blong hem, be i stanap long fasin fren we hem i gat wetem Jeova.

Flora, we hasban mo fasbon pikinini blong hem tufala i lego trutok bitim ten yia finis, i harem save filing blong Job. Hem i talem stret se: “Taem famle blong yu i no moa sapotem yu, yu save trabol bigwan. Be mi save se mi no save faenem glad sipos mi lego ogenaesesen blong Jeova. Taswe mi stanap strong mo mi putum Jeova long fas ples long laef blong mi. Mi gohed blong mekem wok blong mi olsem wan gudfala waef mo mama. Mi prea oltaem long Jeova, mo Jeova i mekem mi mi kam strong. Nating se hasban blong mi i agensem mi bigwan, mi mi hapi, from we mi lan blong dipen fulwan long Jeova.”

Setan i traem Job bakegen, i yusum tri fren blong Job blong brekem fasin blong hem blong holemstrong long God. (Job 2:11-13) Ating Job i harem nogud tumas taem trifala ya i stat blong tok agensem hem. Sipos Job i lesin long ol tok blong trifala, bambae hem i lusum tras blong hem long Jeova God. Advaes we trifala i givim i no leftemap tingting blong Job nating. Be Job i no letem tingting blong hem i foldaon olgeta, hem i holemstrong long God, mo i no letem Setan i winim hem.

Defren olgeta, Job i talem se: “Oltaem bambae mi strong blong talem se mi mi no mekem wan samting nogud [“lego stret fasin,” NW ], gogo kasem we mi mi ded.” (Job 27:5) Hem i no talem se, ‘!Bambae mi no letem yutrifala i pulum mi blong lego stret fasin!’ Nogat. Job i kasem save se fasin blong holemstrong long God i dipen long hem wan mo lav we hem i gat long Jeova.

Wan Olfala Trik Blong Kasem Moa Man

Samtaem ol fren mo Kristin brata sista oli save givim rong advaes no tok we i stikim yumi. Setan i yusum janis ya blong mekem tingting blong yumi i foldaon. I moa isi blong kam slak long bilif from wan memba blong kongregesen, i bitim taem ol man blong wol oli agensem yumi. Wan Kristin elda we bifo i joen long faet olsem wan soldia, i talem se soa we hem i kasem from ol fasin mo strong tok blong sam Kristin brata i bitim soa we hem i kasem long faet ya. Hem i talem se: “I no gat wan samting we i hapen long laef blong mi we i moa nogud i bitim hemia.”

Maet yumi harem nogud tumas from ol fasin slak blong sam Kristin brata sista, mekem se yumi no moa wantem toktok wetem olgeta no yumi stat blong no moa go long ol Kristin miting. From we yumi harem soa tumas, maet yumi ting se filing blong yumi naoia i impoten moa. Be sore tumas sipos yumi letem ol toktok mo samting we narafala i mekem i spolem samting we i impoten moa bitim olgeta narafala samting—hemia fasin fren blong yumi wetem Jeova. Sipos yumi letem samting ya i hapen long yumi, hemia i min se yumi foldaon long wan trik blong Setan we hem i stap yusum longtaem finis.

I stret nomo blong wantem se ol memba blong Kristin kongregesen oli gat ol gudfala fasin. Be yumi ol Kristin brata sista, yumi sinman yet. Sipos yumi gat tingting ya se ol brata sista oli no save mestem, bambae tingting blong yumi i save foldaon bigwan. Defren olgeta, Jeova i tingbaot se ol man blong hem oli no stretgud olgeta. Taswe hem i no askem tumas long olgeta. Sipos yumi folem eksampol blong Jeova, bambae yumi rere moa blong no foldaon from ol slak fasin blong narafala. (Efesas 4:2, 32) Aposol Pol i givim advaes ya se: “Sipos yufala i kros, yufala i no letem we kros ya i lidim yufala, blong yufala i mekem sin. Mo yufala i no stap kros, gogo kasem san i godaon. Yufala i mas no givim janis long Setan.”—Efesas 4:26, 27.

Baebol i soemaot klia se, Setan i traem yusum ol defren giaman trik blong faenem wan wei blong pulum ol Kristin blong lego stret fasin. Sam long ol trik ya oli pulum ae blong man blong mekem rabis fasin, sam narafala trik oli mekem man i harem nogud tumas. From ol samting we yumi tokbaot antap, yu kasem save se yu mas rere oltaem. Yu mas lavem Jeova long fulhat blong yu, mekem tingting blong yu i strong blong pruvum se Devel Setan i man blong giaman, mo mekem Jeova i glad long yu. (Ol Proveb 27:11; Jon 8:44) Rimemba se, nomata wanem traem we yumi kasem, neva yumi mas lego trufala Kristin fasin blong holemstrong long God.