!Oli Haremgud Tumas From We Oli Lan Blong Rid!

LONG sam ples blong Solomon Aelan, klosap 80 pesen blong olgeta we oli Witnes blong Jeova naoia oli no save rid fastaem. Problem ya i mekem se oli no save joen fulwan long ol miting blong kongregesen, mo tu i mekem i had blong oli tijim trutok blong Kingdom long ol narafala. ?Yu ting se ol bigman, we neva oli bin holem pensel, oli naf blong lan blong rid?

Long klosap evri kongregesen blong ol Witnes blong Jeova long Solomon Aelan, i gat ol klas blong tijim man blong rid we oli yusum buk ya Apply Yourself to Reading and Writing, we ol Witnes blong Jeova oli wokem. Ol stori we oli kam biaen oli soem olsem wanem program ya i halpem plante handred man blong oli kam naf moa. Be samting we i impoten moa se, from we oli lan blong rid, oli save givim wan gudfala witnes long saed blong bilif blong olgeta.—1 Pita 3:15.

Wan misinari sista i stap long wan kongregesen we i gat bitim wan handred man blong talemaot Kingdom, mo hem i luk se evri wik taem oli yusum Wajtaoa blong stadi long Baebol, i gat smol man nomo we i gat prapa kopi blong magasin ya, mo i gat smol man nomo i givim ansa. ?From wanem oli no gat magasin mo oli no ansa? From we oli no save rid. Taem kongregesen i talemaot se bambae i gat wan skul blong tijim man blong rid mo raet, misinari ya i glad tumas blong joen long kos ya olsem wan tija. Fastaem, smol studen nomo i joen long kos, be i no longtaem bitim 40 man wetem ol yangfala mo ol olfala tu i stat kam blong folem ol kos.

?Wanem frut i kamaot from skul ya? Misinari ya i talem se: “Sot taem nomo afta we mifala i stat givim ol kos ya, mi go long maket long sikis klok long moning blong pem sam kakae blong misinari hom. Long ples ya mi luk sam long ol studen ya, we sam long olgeta oli yang nomo, oli stap salem kokonas mo ol ligim. ?From wanem oli salem ol samting ya? !From we oli  wantem kasem naf mane blong pem wan pensel mo wan buk blong folem ol kos! Mo tu, fasin blong kam long ol kos ya i pulum olgeta blong wantem gat prapa kopi blong magasin ya Wajtaoa.” Hem i ademap se: “Naoia, taem kongregesen i mekem Wajtaoa Stadi, ol yangfala wetem ol olfala tu oli givim ansa, mo miting ya i moa gud.” Misinari ya i glad tumas taem fo man mo woman we oli folem kos ya, oli askem sipos oli save joen long wok blong prij, from we oli talem se oli “no moa fraet.”

Gudfala risal we i kamaot from ol klas ya hemia se ol studen oli lan blong rid mo raet. Be i gat sam narafala frut i kamaot we oli moagud. Eksampol, blong plante yia wan woman we i no bilif mo i mared wetem wan Witnes, i stap givim trabol long kongregesen. Hem i wan woman we i stonem ol man from smol samting nomo we maet oli mekem agensem hem, mo tu hem i stap kilim ol narafala woman wetem wan pis wud. Sam samtaem hem i kam long ol Kristin miting wetem hasban blong hem. Be from we hem i jalus bitim mak, hasban blong hem i mas werem ol dak glas, olsem nao, waef blong hem i no save blemem hem se hem i stap lukluk ol narafala woman.

Nating se i olsem, jes afta we oli statem ol kos blong lanem man blong rid mo raet, woman ya i askem se: “?Mi save joenem klas ya?” Oli ansa se yes. Stat long taem ya, neva hem i mestem wan kos no wan miting long kongregesen. Hem i wokhad taem hem i mas lan blong rid mo hem i gohed gud bigwan mo i harem gud from. Biaen hem i askem se: “?Mi save stadi long Baebol?” Hasban blong hem i glad tumas blong mekem stadi blong waef blong hem. Woman ya i stap gohed gud yet blong rid mo raet mo blong kasem save long Baebol.

Traem tingbaot wan man we i gat 50 yia blong hem, mo i neva bin yusum pensel. Taem man ya i mas holem wan pensel mo raetem ol leta blong alfabet, wok ya i had we i had blong hem i mekem. I gat sam we oli kasem soa long fingga blong olgeta taem oli traehad tumas blong lan blong holem pensel mo raetem ol leta long pepa. Blong plante wik, oli traehad blong holem mo kontrolem pensel taem oli raet, mo biaen sam studen oli smael mo oli talem se: “!I isi nomo blong mi muvmufum han blong mi long pepa!” Taem ol tija oli luk se ol studen oli gohed gud, olgeta tu oli glad. Wan tija i talem se: “Mi harem gud tumas blong tijim klas ya, mo plante taem, ol studen oli soem bigfala tangkiu blong olgeta from program ya we Jeova i stanemap nao oli klaphan taem klas i finis.”

Ol Witnes ya we naoia oli save rid mo raet, mo ol misinari tu, olgeta evriwan oli glad tumas. ?From wanem oli glad? From we naoia oli save yusum fasin ya blong rid mo raet blong givim ona long Jeova.

[Tok blong pija long pej 8, 9]

Ol yangfala mo ol olfala tu oli haremgud long ol klas blong rid mo raet