?Olsem Wanem Paoa Blong Tingting i Save Lukaot Long Yu?

OL MAN oli sapraes tumas taem oli luk ol bigfala wef, be long lukluk blong wan sela ol bigfala wef oli saen blong denja. Bigfala wota ya i save kilim olgeta i ded.

Long sem fasin, ol man blong God maet oli fesem sam bigfala traem we i save winim olgeta. Maet yu bin luk finis plante defren traem we oli foldaon wan afta narawan long ol Kristin. Ating yu gat strong tingting blong blokem olgeta, blong mekem we bilif blong yu i no foldaon. (1 Timoti 1:19) Paoa blong tingting blong yu bambae i givhan plante blong winim faet ya. ?Wanem ya ‘paoa blong tingting,’ mo olsem wanem yu save kasem hem?

Hibru tok ya mezim·mahʹ we oli tanem se “paoa blong tingting” i kamaot long wan tok we i min se “mekem plan.” (Ol Proveb 1:4) Taswe, sam Baebol oli tanem tok ya mezim·mahʹ se “fasin blong lukaotgud” no “fasin luksave.” Sam man blong stadi dip long Baebol, Jamieson, Fausset, mo Brown, oli tokbaot mezim·mahʹ se “waes blong luksave olsem wanem blong ronwe long ol samting nogud mo folem gud fasin.” Hemia i min se man i tingbaot ol frut we bambae hem i kasem smoltaem biaen, no longtaem biaen, long samting we hem i mekem. Taem yumi yusum paoa blong tingting blong yumi, yumi tingting gud fastaem long ol samting we i save kamaot biaen, speseli sipos yumi mas tekem sam impoten disisen.

Taem wan man we i gat paoa blong tingting i tekem sam disisen long saed blong fiuja blong hem no long saed blong wan samting we hem i mekem naoia, hem i luklukgud fastaem long wanem kaen trabol we maet i save kasem hem from disisen ya. Taem hem i luksave ol denja we maet i save kamaot, hem i save faenem wan rod blong blokem olgeta, mo i tingbaot paoa we ol man no ol samting raonabaot long hem i save gat long hem. Nao hem i save mekem wan plan we bambae i karem gudfala frut, no wan plan we maet bambae Jeova i blesem. I gud yumi luk sam eksampol we oli save givhan long yumi blong yusum gud paoa blong tingting.

Blokem Fasin Ya Blong Slip Olbaot

Samtaem strongfala win i save sakem ol bigbigfala wef oli go fas long fored blong wan sip (long Inglis oli kolem head sea). Sipos wan sela i no lidimgud sip blong hem blong i go stret agensem ol bigfala wef, sip blong hem i save kafsaed.

Sem samting i stap hapen long yumi: yumi laef long wan wol we oltaem i tingbaot seks. Evri dei yumi mas fesem sam rabis tingting mo sam rabis pija we i olsem bigfala wef. Yumi no save talem se ol samting ya i no gat paoa long ol filing blong yumi long saed blong seks. Yumi mas yusum paoa blong tingting blong yumi mo gat strong tingting blong winim traem ya i bitim we yumi letem ol rabis fasin ya oli pulum yumi i go long trabol.

Eksampol, plante taem ol Kristin man oli stap wok wetem sam man we oli no gat respek long ol woman, oli ting se ol woman oli gud blong seks nomo. Taem oli storian maet ol man ya oli talem sam doti tok plei. Ol fasin olsem i save mekem we sam nogud tingting i stat gru insaed long hat blong wan Kristin.

Wan Kristin woman tu maet i nidim blong wok, taswe maet hem i fesem sam traem. Maet hem i wok wetem sam man mo woman we oli no tinghae long fasin blong stap klin olsem hem. Maet wan man we  i wok wetem hem i intres long hem. Fastaem, maet man ya i gat gud fasin wetem hem mo i soem respek long hem from ol bilif blong hem. Nao from we man ya i kaen tumas mo tufala i stap wok tugeta oltaem, samting ya i save pulum Kristin woman ya blong wantem frengud moa wetem hem.

?Olsem wanem paoa blong tingting i save givhan long yumi ol Kristin taem samting olsem i hapen? Faswan samting, paoa blong tingting i wonem yumi long ol denja long saed blong spirit, mo seken samting, hem i pulum yumi blong mekem plan blong folem gudfala rod. (Ol Proveb 3:21-23) Long taem olsem, maet yumi nidim blong talemaot klia long ol man mo woman we oli wok wetem yumi se ol rul we yumi folem oli defren long olgeta from we bilif blong yumi i stanap long Baebol. (1 Korin 6:18) Ol toktok mo ol aksin blong yumi oli mas laenap wetem wanem we yumi talemaot. Antap long samting ya, maet yumi mas lukaot blong no spenem tumas taem wetem sam man no sam woman we oli wok wetem yumi.

Be i no long ples blong wok nomo we yumi save fesem ol traem olsem. Trabol i save kamaot tu sipos hasban mo waef, tufala i letem ol problem oli spolem fasin joengud blong tufala insaed long mared. Wan seket elda i talem se: “Mared we i brokdaon i no hapen kwiktaem. Sloslo nomo, hasban mo waef i stat seraot, tufala i no moa toktok plante tugeta, tufala i no moa spenem taem tugeta. From we mared blong tufala i no hapi maet tufala i stat wantem kasem plante samting long saed blong bodi. Mo from we oli no moa serem naesfala tok tugeta, oli stat lukluk ol narafala man no woman.”

Brata ya we i bin mekem wok blong seket plante yia finis i gohed i se: “Wanwan taem, man mo woman we i mared tufala i mas sidaon tugeta mo tokbaot ol samting we maet i stap spolem fasin frengud blong tufala. Tufala i mas mekem plan se wetaem tufala i save stadi, prea, mo prij tugeta. Bambae tufala i harem gud tumas sipos tufala i toktok tugeta ‘taem oli stap long haos, taem oli wokbaot, taem oli go slip mo taem oli girap bakegen,’ olsem ol papa mama oli mekem wetem ol pikinini blong olgeta.”—Dutronome 6:7-9.

Taem Wan Kristin i No Mekem Kristin Fasin

Paoa blong tingting i givhan long yumi taem yumi fesem ol traem long saed blong seks, be i save givhan tu taem yumi gat ol smosmol problem wetem wan Kristin brata no sista. Samtaem win i sakem ol wef long baksaed blong sip (long Inglis oli kolem samting ya se following sea). Ol wef ya oli save leftemap baksaed blong sip ya, mo karem hem i go wansaed. Hemia i min se naoia, wan saed blong sip ya i fesem ol wef, mo oli save kilim sip ya isi nomo.

Yumi tu yumi save fesem denja we yumi no bin tingbaot se i save kamaot. Yumi mekem wok blong Jeova ‘we solda blong yumi i joen long solda blong’ plante Kristin brata sista we oli stap tru long God. (Sefanaea 3:9, NW ) Sipos wan long olgeta ya i gat fasin we i no fasin blong wan Kristin, maet yumi lusum tras long olgeta mo yumi save harem nogud from. ?Olsem wanem paoa blong tingting i save givhan long yumi blong no lusum fasin blong skelem gud ol samting, mo no letem problem ya i mekem yumi harem nogud bitim mak?

I gud yumi rimemba se “i no gat wan man nating long wol ya we i no mekem sin.” (1 King 8:46) Taswe yumi mo mas sapraes sipos, sam samtaem, wan Kristin brata i spolem yumi no i mekem i nogud long yumi. Taem yumi gat save long samting ya, yumi save rerem yumi mo tingbaot rod we yumi save folem sipos traem ya i kasem yumi. ?Aposol Pol i mekem wanem taem sam Kristin brata oli tok nogud mo oli no soem respek long hem? Hem i no lusum fasin blong hem blong skelgud long saed blong spirit, mo hem i tinghae moa blong mekem Jeova i glad long hem i winim we i traehad blong mekem man i glad long hem. (2 Korin 10:10-18) Sipos yumi folem eksampol blong Pol bambae yumi no hareap tumas blong ansa no mekem samting taem wan brata i mekem yumi harem nogud.

Hemia i lelebet olsem taem yumi wokbaot nao leg blong yumi i kikim wan ston. Blong wan no tu menet, maet tingting blong yumi i no stap kwaet. Be afta we soa i godaon, yumi save tingting gud mo gohed blong wokbaot. Long sem fasin, i moa gud yumi no hareap tumas blong givimbak sipos wan brata i tok nogud no i spolem yumi. Defren olgeta, i gud yumi wet smol mo yumi tingbaot ol frut we i save kamaot sipos yumi givimbak sem fasin.

Malcolm i bin wok olsem wan misinari blong plante yia. Hem i eksplenem wanem we hem i mekem taem wan brata i mekem hem i harem nogud i se: “Fastaem, mi askem sam kwestin long mi wan olsem se: ?Mi kros long brata ya from we fasin  blong hem i no sem mak long fasin blong mi? ?Ol samting we hem i talem oli rili impoten? ?Maet malaria i mekem se ol filing blong mi oli kam antap kwiktaem tumas? ?Sipos mi letem sam taem i pas, maet bambae mi harem moa gud?” Plante taem, Malcolm i luksave se problem ya i no bigwan tumas mo hem i save lego nomo. *

Malcolm i ademap se: “Samtaem, nating se mi traehad blong stretem problem be narafala brata i gohed yet mo i no soem kaen fasin long mi. Mi traem blong no letem fasin ya i gat paoa long mi. Taem mi bin traem evri samting blong stretem rao ya, nao mi luk trabol ya long wan fasin we i defren. Long tingting blong mi, problem ya i no impoten bitim mak, hem i stap be i no blokem mi. Bambae mi no letem problem ya i kam antap mo i spolem fasin fren blong mi wetem Jeova no wetem ol brata blong mi.”

Olsem Malcolm, yumi no mas letem ol nogud fasin blong narafala i gat paoa long yumi bitim mak. Long evri kongregesen yumi gat plante gudfala brata sista we oli stap tru long Jeova. Yumi harem gud tumas taem yumi evriwan yumi wokbaot tugeta long Kristin rod “olsem wan tim nomo.” (Filipae 1:27) Mo tu taem yumi rimemba we Papa blong yumi long heven i stap sapotem yumi wetem lav, samting ya i givhan blong yumi gohed blong skelem gud ol samting.—Ol Sam 23:1-3; Ol Proveb 5:1, 2; 8:12.

No Laekem Ol Samting Blong Wol

Paoa blong tingting i save givhan long yumi tu blong fesem wan narafala traem. Samtaem win i sakem ol wef oli go agens long saed blong wan sip (hemia oli kolem beam sea long Inglis). Taem weta i gud, ol wef olsem oli save pusum wan sip i gowe sloslo long rod blong hem. Be sipos i gat wan bigfala win, ol wef ya oli save kafsaedem sip ya.

Long sem fasin, sipos yumi foldaon long trap ya blong wantem harem gud long ol samting blong rabis wol, fasin blong laekem tumas ol samting blong bodi i save pusum yumi blong gowe long rod  long saed blong spirit. (2 Timoti 4:10) Sipos yumi no lukaot gud long samting ya, lav blong wol i save pulum yumi sloslo blong lego Kristin rod. (1 Jon 2:15) ?Olsem wanem paoa blong tingting i save givhan long yumi?

Faswan samting, paoa blong tingting bambae i halpem yumi blong faenemaot wanem ol denja we oli save kamap agensem yumi. Wol ya i yusum ol defdefren kaen trap blong trikim yumi. Oltaem hem i leftemap wan fasin blong laef we evri man i mas traehad blong kasem—fasin flas blong ol rij man we oli kasem paoa mo hae nem. (1 Jon 2:16) Wol ya i talem se sipos yumi kasem wan laef olsem, evri man raonabaot long yumi bambae oli leftemap yumi. Paoa blong tingting bambae i halpem yumi blong blokem giaman tok ya, bambae hem i mekem yumi rimemba se yumi no mas “laekem mane tumas” from we Jeova i promes se ‘hem i no save livim yumi’ samtaem.—Hibrus 13:5.

Namba tu samting, paoa blong tingting i givhan long yumi blong yumi no folem olgeta ya we oli “lusum rod blong trutok finis.” (2 Timoti 2:18) I had tumas blong gohed folem stret rod taem wan we bifo yumi laekem hem mo yumi trastem hem i no moa wokbaot folem rod ya. (1 Korin 15:12, 32-34) Nating se olgeta we oli lego Kristin rod oli gat smol paoa nomo long yumi, be samting ya i save blokem yumi, bambae yumi no moa gru long spirit mo yumi stap long denja from. I olsem wan sip we i mestem rod blong hem long wan digri nomo. Nating se hem i mestem smol nomo, be taem hem i gohed long longfala trip blong hem, smol digri ya we hem i mestem i save pulum hem i go longwe olgeta long ples ya we hem i bin wantem kasem.—Hibrus 3:12.

Paoa blong tingting i save givhan long yumi blong luksave se yumi stap olsem wanem naoia mo bambae yumi stap olsem wanem long saed blong spirit. Maet yumi save se yumi mas joen moa long Kristin wok. (Hibrus 6:11, 12) Makem gud olsem wanem wan yangfala Kristin i yusum paoa blong tingting blong hem blong kasem ol mak long saed blong spirit. Hem i talem se: “Mi bin gat janis blong kasem wan gudfala wok olsem man blong raetem ol niuspepa. Mi rili wantem mekem wok ya, be mi rimemba vas blong Baebol we i talem se ‘wol ya wetem ol samting we ol man blong hem oli wantem, oli stap lus’ be ‘man we i stap mekem ol samting we God i wantem, hem bambae i no save lus samtaem.’ (1 Jon 2:17) Mi tingting gud se laef blong mi i mas laenap wetem bilif blong mi. Papa mama blong mi oli lego Kristin bilif, mo mi no wantem folem eksampol blong tufala. Taswe, mi mekemap tingting blong mi blong gat wan laef we i gat mining, mo mi joen long fultaem wok blong prij olsem wan paenia. Mi spenem fo yia finis long nambawan wok ya, mo mi save we mi bin tekem wan gudfala disisen.”

Winim Ol Bigfala Win Long Saed Blong Spirit

?From wanem i impoten tumas we yumi yusum paoa blong tingting blong yumi tede? Ol sela oli mas lukaotgud long ol saen blong denja, speseli taem i gat bigfala win i stap kam. Sipos tempraja i foldaon kwiktaem mo win i stat kam strong, ol sela oli fasemtaet ol smol doa blong sip mo oli stap rere blong fesem bigfala win mo ren we bambae i kam. Long sem fasin, yumi mas rere blong fesem ol traem we oli kam had moa long wol ya we klosap nao bambae i lus. Ol gudfala fasin long saed blong laef oli stap lus mo ‘ol man nogud oli gohed blong mekem i mowas olgeta.’ (2 Timoti 3:13) Olsem ol sela we oli lesin oltaem long radyo blong harem nius long saed blong weta, yumi mas lesin long ol woning we oli kamaot long Baebol.—Ol Sam 19:7-11.

Taem yumi yusum paoa blong tingting, yumi mekem save ya we i blong lidim yumi long laef we i no save finis, i wok long laef blong yumi. (Jon 17:3) Yumi naf blong luksave ol problem bifo we oli kamaot mo yumi save olsem wanem blong winim olgeta. Long rod ya, bambae yumi mekem tingting blong yumi i strong blong no letem wan samting i pulumaot yumi long Kristin rod, mo yumi save ‘putumgud plante gudfala samting we i olsem fandesen blong laef blong yumi’ sipos yumi putum ol mak long saed blong spirit mo traehad blong kasem ol mak ya.—1 Timoti 6:19.

Sipos yumi holemstrong long waes ya we i wok gud mo paoa blong tingting, bambae yumi no fraet long ‘ol trabol we i save kam kwiktaem nomo.’ (Ol Proveb 3:21, 25, 26) Bambae yumi harem gud long promes ya blong God we i se: “Taem fasin waes i kam insaed long hat blong yu, mo sol blong yu i harem gud long save, ale nao paoa blong tingting bambae i lukaot long yu.”—Ol Proveb 2:10, 11, NW.

[Futnot]

[Tok blong pija long pej 23]

Fasin blong toktok tugeta oltaem i mekem mared i strong