Wan Kwestin

?Baebol i talem wanem long saed blong trening we wan papa no wan mama i mas givim long pikinini blong hem sipos hem i wan Witnes blong Jeova be hasban no waef blong hem i no bilif?

I gat tu stamba rul we Baebol i givim long wan papa no wan mama we i Witnes, blong i trenem pikinini blong hem sipos waef no hasban blong hem i no bilif. Wan rul i talem se: ‘Yumi i mas obei long God fastaem, hem i hae jif blong yumi. Yumi no save obei long ol man nomo.’ (Ol Wok 5:29, NW ) Narafala rul i talem se: “Man i hed blong woman blong hem, olsem we Kraes i hed blong [“kongregesen,” NW ].” (Efesas 5:23) Namba tu rul ya i tru long ol waef we oli mared wetem wan Witnes, mo i tru tu long ol waef we hasban blong olgeta i no bilif. (1 Pita 3:1) ?Olsem wanem wan papa no wan mama we i Witnes i save folem ol rul ya wetem waes fasin taem hem i trenem pikinini blong hem?

Sipos hasban i wan Witnes blong Jeova, hem i mas lukaot long famle blong hem long saed blong spirit mo long saed blong bodi tu. (1 Timoti 5:8) Nating se mama we i no bilif i spenem moa taem wetem ol pikinini, papa we i Witnes hem i mas trenemgud ol pikinini blong hem long saed blong spirit taem oli stap long haos, mo i mas karem ol pikinini i go long ol Kristin miting. Long ples ya nao ol pikinini oli kasem tijing long saed blong ol gudfala fasin, mo oli kampani wetem sam gudfala man.

?Olsem wanem nao sipos waef blong hem we i no bilif, i wantem tumas blong karem ol pikinini blong tufala i go long jos blong hem, no hem i wantem tijim prapa bilif blong hem long ol pikinini? Maet ol loa blong kantri i givim raet long hem blong mekem samting ya. Sipos ol pikinini oli wantem joen no oli no wantem joen long wosip blong mama blong olgeta taem oli stap long jos, hemia bambae i dipen bigwan long tijing we papa i givim. Taem ol pikinini oli gruap, save blong Baebol we oli bin kasem from papa blong olgeta i save givhan long olgeta blong oli folem ol rul blong Tok blong God. !Bambae papa ya we i bilif i haremgud tumas taem i luk ol pikinini blong hem oli stanap long saed blong trutok!

Sipos mama i wan Witnes blong Jeova, hem i mas soem respek long hed blong famle, mo long semtaem hem i mas tingbaot fiuja blong ol pikinini blong hem. (1 Korin 11:3) Plante taem, hasban we i no bilif i agri nomo we waef blong hem i tijim ol pikinini long ol gudfala fasin mo wosip, mo i save letem ol pikinini blong hem oli joen long ol miting wetem ol man we oli wosipim Jeova. Wan mama i save halpem man blong hem blong luk ol gudfala frut we ol pikinini blong tufala oli save kasem from nambawan edukesen we ogenaesesen blong Jeova i givim. Wetem kaen fasin, hem i save soemaot se i gud we ol pikinini blong tufala oli folem ol rul blong Baebol long saed blong stret fasin, from we oli stap long wan wol we fasin blong hem i stap kam nogud moa.

Nating se i olsem, maet hasban ya i wantem se ol pikinini blong hem oli folem jos blong papa, i tekem olgeta i go long jos wetem hem mo i tijim olgeta long ol bilif blong hem. No samtaem wan hasban i agensem ol jos evriwan, mo i no wantem se ol pikinini blong hem oli kasem tijing long saed blong God. From we hem i hed blong famle, hem nao i gat raet blong tekem disisen ya. *

Nomata se waef i mas soem respek long hasban blong hem olsem hed blong famle, be waef ya we i bin givim laef blong hem i go long Jeova, i mas rimemba fasin ya blong aposol Pita mo Jon, we tufala i talem se: “Bambae mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” (Ol Wok 4:19, 20) Wan mama we i Witnes i tingbaot ol gudfala samting we pikinini blong hem i  nidim long saed blong spirit, taswe bambae hem i faenem wan wei blong lidim olgeta long rod ya. Long fored blong Jeova hem i gat wan wok blong mekem: hem i mas tijim trutok long olgeta man mo hemia i minim ol pikinini blong hem tu. (Ol Proveb 1:8; Matiu 28:19, 20) ?Wan Kristin mama i save mekem wanem long saed blong problem ya?

Eksampol, traem tingbaot fasin blong bilif long God. Maet waef we i Witnes i no save stadi Baebol stret wetem ol pikinini blong hem, from we hasban blong hem i no wantem. ?Be samting ya i save blokem hem, nao hem i no tokbaot Jeova nating long ol pikinini blong hem? Nogat. Ol tok mo ol fasin blong hem oli mas soem se hem i bilif long God we i wokem yumi. I sua se bambae ol pikinini oli askem sam kwestin long hem long saed blong God. Hem i raet blong waef blong tokbaot skul blong hem mo talemaot bilif we hem i gat long God we i wokem yumi, ale hem i save tokbaot ol samting ya long ol pikinini blong hem. Nating se mama ya i no save mekem wan Baebol stadi wetem ol pikinini blong hem, no hem i no save karem olgeta i go long ol miting, be hem i save givim save long olgeta long saed blong Jeova God.—Dutronome 6:7.

Aposol Pol i tokbaot fasin fren we i mas stap bitwin wan Witnes mo hasban no waef blong hem we i no bilif, hem i se: “Sipos wan long yufala i gat woman blong hem we i no bilif long Kraes, . . . woman ya we i no bilif, hem i olsem wan stret woman long fes blong God, from we man blong hem i Kristin. Mo sipos wan woman long yufala i gat man blong hem we i no bilif long Kraes, . . . man ya we i no bilif, hem i olsem wan stret man long fes blong God, from we woman blong hem i Kristin. Sipos i no olsem, bambae ol pikinini blong yufala oli olsem ol pikinini blong ol hiten man nomo. Be naoia, ol pikinini ya oli tabu, oli blong God.” (1 Korin 7:14) Jeova i luk fasin fren blong tufala insaed long mared olsem se i tabu from man no woman ya we i bilif, mo ol pikinini tu oli tabu long ae blong Jeova. Waef we i Witnes i mas mekem bes blong hem blong halpem ol pikinini blong hem blong oli kasem save trutok, mo hem i mas letem bisnes ya i stap long han blong Jeova.

Taem ol pikinini oli kam bigman, bambae oli save tekem disisen long wanem blong mekem. Maet bambae oli tekem wan disisen folem tok blong Jisas se: “Man we i lavem papa no mama blong hem moa, i winim we hem i lavem mi, hem i no stret blong i kam man blong mi.” (Matiu 10:37) Mo tu, Baebol i givim oda ya se: “Ol pikinini. Yufala i mas obei long papa mo mama blong yufala, from we yufala i joen long Masta blong yumi.” (Efesas 6:1) Plante yangfala oli tekem disisen blong “obei long God fastaem,” i bitim we oli obei long wan papa no wan mama we i no Witnes, nating se papa no mama ya i save harem nogud from. !Hem i wan nambawan blesing taem papa no mama we i Witnes i luk ol pikinini blong hem i tekem disisen blong mekem wok blong Jeova, nomata long ol hadtaem we oli fesem!

[Futnot]