?Yu Mas Stap Tru Long Hu?

“Kantri blong yumi: . . . I gud sipos hem i stret oltaem; be nating sipos hem i stret no hem i rong, bambae hem i stap oltaem olsem kantri blong yumi.”—Stephen Decatur, wan kapten blong sip long ami blong Yunaeted Stet, 1779-1820.

PLANTE man oli bilif se fasin blong stap tru long kantri blong olgeta i impoten tumas. Sam narafala oli laekem moa sipos tok blong Stephen Decatur i talem se, ‘Skul blong mi, i gud sipos hem i stret oltaem, be nating sipos hem i stret no hem i rong, bambae hem i stap oltaem olsem skul blong mi.’

I tru se, weswan kantri no weswan skul we bambae yumi stap tru long hem i dipen bigwan long ples we yumi bon long hem. Be disisen ya long saed blong hu nao we yumi mas stap tru long hem, i impoten tumas, taswe yumi no save tekem disisen ya olbaot nomo. Nating se i olsem, taem yu gruap wetem tingting ya se yu mas stap tru long wan kantri no skul, i no isi blong lego tingting ya. Taswe taem wan man i wantem skelem sipos disisen blong hem long saed ya i stret, hem i nidim fasin no fraet mo hem i save kasem sam traem from.

?Stap Tru Long Hu?

Wan woman we i gruap long Sambia i talem se: “Stat taem we mi mi pikinini yet, mi intres long skul blong mi. Mi gruap wetem fasin we mi prea evri dei long fored blong aedol we i stap long haos blong mifala, mi joen long ol lafet blong ol tabu  dei, mo mi go oltaem long tempol. Skul mo wosip blong mi i joen bigwan wetem kastom, komuniti, mo famle blong mi.”

Be, taem woman ya i gat samwe long 19 yia, hem i stat blong stadi Baebol wetem ol Witnes blong Jeova, mo i no longtaem biaen hem i mekem disisen blong jenisim skul blong hem. ?Hemia i min se hem i no gat fasin blong stap tru long skul blong hem?

Zlatko i gruap long Bosnia, mo taem faet i kamaot long kantri blong hem, hem i bin joen long faet ya. Hem tu i stat blong stadi Baebol wetem ol Witnes blong Jeova. Naoia hem i no moa wantem joen long eni faet. ?Samting ya i min se hem i no gat fasin blong stap tru long kantri blong hem?

Ansa blong yu i dipen long tingting blong yu. Woman ya we yumi tokbaot hem antap i talem se: “Long komuniti blong mi, ol man oli no save fogivim man we i jenisim skul blong hem. Long tingting blong olgeta, man ya i no gat fasin blong stap tru, i olsem we hem i lego famle mo komuniti blong hem.” Long sem fasin, ol fren blong Zlatko we oli soldia, oli tingbaot man we i no wantem joen long faet blong olgeta olsem man we i no sapotem kantri blong hem. Be woman ya mo Zlatko tu, tufala i bilif se fasin blong stap tru long God i antap moa long ol narafala samting mo hemia nao i stap lidim tufala long ol disisen we tufala i mekem. Mo samting we i impoten moa hemia se, ?Wanem tingting blong God long saed blong olgeta we oli wantem stap tru long hem?

Trufala Fasin Blong Stap Tru i Stanap Long Lav

King Deved i talem long Jeova God se: “Yu yu stap tru long olgeta we oli stap tru long yu oltaem.” (2 Samuel 22:26, NW ) Hibru tok we long ples ya oli tanem i kam ‘stap tru oltaem’ i karem tingting ya se kaengud fasin mo lav i pulum man blong fasgud long wan samting gogo kasem samting ya i mekem wok blong hem fulwan. Tingting blong Jeova i olsem wan mama we i fasgud long smol pikinini blong hem. Lav i pulum Jeova blong fasgud long olgeta we oli stap tru long hem oltaem. Hem i talem long ol man long nesen blong Isrel bifo we oli stap tru long hem se: “?Olsem wanem? ?Woman i save fogetem pikinini blong hem? ?Yufala i ting se hem i save tanem baksaed long pikinini blong hem, we hem nomo i bonem? Maet i gat woman we i save mekem olsem, be mi bambae mi no save mekem olsem long yufala samtaem.” (Aesea 49:15) Olgeta we oli wantem stap tru long God fastaem, oli save sua se Jeova i lavem olgeta mo i kea long olgeta.

Fasin blong stap tru oltaem long Jeova, i stanap long fasin lav. Hem i pusum man blong laekem ol samting we Jeova i laekem mo blong agens long ol rabis fasin we Jeova i no laekem. (Ol Sam 97:10) Fasin blong stap tru long God i givhan long man blong soem lav long ol narafala, from we Jeova i stamba blong fasin lav. (1 Jon 4:8) Taswe, sipos fasin blong stap tru long God i pusum man blong jenisim bilif no skul blong hem, hemia i no min se man ya i no moa lavem famle blong hem.

Stap Tru Long God i Save Mekem i Gud Long Man

Woman ya we yumi tokbaot hem antap, i tokbaot samting we hem i mekem se: “Taem mi stadi long Baebol, mi kasem save se Jeova nao i trufala God, mo mi lan blong frengud wetem hem. Jeova i defren long ol god we mi stap wosip long olgeta bifo; hem i save yusumgud ol fasin blong hem olsem lav, stret fasin, waes, mo paoa. From we Jeova i wantem se man i wosip long hem wan nomo, mi mas lego ol narafala god.

“Papa mama blong mi, tufala i talem bakegen mo bakegen se tufala i no glad nating long mi mo se mi mekem tufala i harem nogud. Hemia i had tumas, from we mi wantem se papa mama i laekem mi. Be sloslo, taem mi kasem moa save long trutok blong Baebol, jus we mi mas mekem i kam klia. Mi mi no save tanem baksaed blong mi long Jeova.

“Be, jus blong mi blong stap tru long Jeova mo lego ol kastom blong skul blong mi, i no min se mi no moa stap tru long famle blong mi. Mi traehad blong soemaot long ol toktok mo aksin blong mi we mi kasem save long filing blong olgeta. Be mi mas stap tru long Jeova, sipos no, maet mi nao mi blokem famle blong mi blong kasem save long Jeova, mo hemia i rili soemaot se mi no gat fasin blong stap tru.”

Sem mak bakegen, sipos fasin blong stap tru long God i blokem wan man blong no joen long politik mo no joen long ol faet, samting ya i no min se hem i agensem  kantri blong hem. Hemia filing blong Zlatko we i talem se: “Nating se mi gruap long wan famle we oli talem se oli Kristin, mi mared long wan woman we i no joen long Kristin skul. Taem faet i stat, tufala saed i wantem se mi stap tru long olgeta. Mi mas mekem wan jus se bambae mi sapotem saed blong ol Kristin no narafala saed. Mi joen long faet ya tri yia haf. Biaen, mi wetem waef blong mi, mitufala i ronwe i go long Kroasia. Long ples ya ol Witnes blong Jeova oli faenem mitufala.

“Stadi blong Baebol, i lanem mitufala se yumi mas stap tru long Jeova fastaem, mo hem i wantem se yumi lavem ol man raonabaot long yumi, nating se oli blong defren skul no kantri. Naoia mi mo waef blong mi, mitufala i joen tugeta long wosip blong Jeova, mo mi lanem se mi no save stap tru long God sipos mi faet agensem ol man we oli stap klosap long mi.”

Stret Save i Wokem Fasin Blong Stap Tru

From we Jeova i Man we i Wokem yumi, i stret nomo we yumi stap tru long hem fastaem i bitim olgeta narafala samting. (Revelesen 4:11) Be, blong blokem fasin blong stap tru long God blong i no kam wan nogud paoa we i save spolem man, fasin ya i mas laenap wetem stret save. Baebol i givim advaes long yumi se: “Yufala i mas kam olsem niufala man, from paoa we i stap wok long tingting blong yufala. Mo olsem klos blong yufala, yufala i mas putum niufala fasin blong laef we God i wokem olsem we hem i wantem. Fasin ya i kamaot long trufala . . . fasin blong stap tru long hem oltaem.” (Efesas 4:23, 24, NW ) Man ya we tabu spirit i pusum hem blong raetem ol tok ya, hemia Sol, we plante man oli save gud long hem. Nating se man ya i gruap wetem strong bilif long skul blong hem, hem i no fraet blong jekemap sipos samting ya we hem i stap tru long hem i stret no nogat. Save we hem i lanem i givhan long hem blong jenisim laef blong hem.

Yes, Sol i kasem bigfala traem long fasin blong hem blong stap tru, olsem plante man long taem blong yumi oli mekem. Sol i gruap long wan famle we oli strong long kastom mo hem i strong blong stap tru long skul we hem i bon long hem. Fasin blong stap tru long skul blong hem i pusum hem blong mekem raf fasin long ol man we oli no agri wetem bilif blong hem. Ol man oli savegud Sol from fasin blong hem blong go long ol haos blong ol Kristin mo karemaot olgeta blong oli kasem panis mo sam oli ded.—Ol Wok 22:3-5; Filipae 3:4-6.

Be, taem Sol i kasem stret save long Baebol, hem i mekem samting we ol fren blong hem oli ting se i no stret. Hem i jenisim skul blong hem. Sol, we biaen ol man oli save hem olsem aposol Pol, i jus blong stap tru long God i bitim we hem i stap tru long fasin blong laef we hem i gruap long hem. Fasin blong stap tru long God i stanap long stret save. Samting ya i pusum Sol blong gat longfala tingting, lav, mo blong leftemap fasin we i stret, hemia i defren olgeta long fasin blong hem bifo, we i krangke nomo mo i spolem man.

?From Wanem Yumi Mas Stap Tru?

Sipos ol rul blong God oli lidim yumi long saed blong fasin blong stap tru, bambae yumi kasem blesing from. Eksampol, long 1999, wan ripot we i kamaot long Australian Institute of Family Studies i talem se sam long ol mared we oli hapi mo oli stap longtaem oli stanap long fasin blong “trastem narafala mo blong stap tru . . . [mo] blong intres long ol samting long saed blong spirit.” Semfala stadi ya i faenem se “ol gudfala mared we oli stanap strong” oli givhan long ol man mo woman blong stap hapi, helti, mo laef longtaem moa. Mo tu, ol  pikinini we oli bon long ol mared we oli stanap strong oli gat gudfala janis blong haremgud long wan laef we i hapi.

Long wol tede we ol samting oli stap jenis oltaem, fasin blong stap tru i olsem wan rop we kru blong sip oli sakem i go long wan man we i stap draon. Sipos “man ya we i stap draon” i neva gat fasin blong stap tru long wan samting, bambae ol wef blong solwota mo win oli karem hem i go. Mo tu, sipos hem i stap tru long ol samting we oli rong, i olsem we rop we hem i holem, i fas long wan sip we i stap draon. Olsem Sol, maet hem i faenem se hem i stap mekem sam samting we i blong spolem man. Be, fasin blong stap tru long Jeova, we i stanap long stret save, i olsem rop ya we i holemtaet yumi blong yumi no go olbaot mo i lidim yumi i go blong kasem sef.—Efesas 4:13-15.

Jeova i givim promes ya long olgeta we oli stap tru long hem se: “Hae God i laekem ol fasin we i stret, mo i no save lego ol stret man ya we tingting blong olgeta i stap strong long hem [“stap tru long hem,” NW ]. Hem bambae i stap lukaot gud long olgeta gogo i no save finis.” (Ol Sam 37:28) I no longtaem, olgeta we oli stap tru long Jeova bambae oli kasem laef long wan paradaes long wol. Long taem ya, bambae fasin blong harem nogud mo soa long bodi i finis. Ol man bambae oli haremgud tumas from we oli save gat ol gudfala fren we oli stap longtaem mo oli no seraot from skul mo politik.—Revelesen 7:9, 14; 21:3, 4.

Naoia tu, plante milian man raonabaot long wol oli faenem se trufala glad i kamaot nomo from fasin blong stap tru long Jeova. I gud sipos yu letem ol Witnes blong Jeova oli halpem yu blong skelem sipos tingting blong yu long saed blong fasin blong stap tru i laenap wetem laet we i kamaot long trutok blong Baebol. Baebol i talem se: “I gud yufala nomo i traem luklukgud long laef blong yufala, yufala nomo i jajem yufala. Yufala i mas traem faenemaot se yufala i stap holem yet fasin blong bilif, no yufala i no moa holem.”—2 Korin 13:5.

I nidim fasin no fraet blong jekemap bilif blong yumi mo blong faenemaot from wanem yumi stap tru long bilif ya. Be traehad ya i no blong nating, from we frut we i save kamaot hemia se yumi kam klosap moa long Jeova God. Woman ya we yumi tokbaot fastaem i tokbaot filing blong plante man, taem hem i talem se: “Mi lanem se fasin blong stap tru long Jeova mo ol rul blong hem i halpem yumi blong mekem i stret long famle blong yumi mo blong kam ol man blong komuniti we oli moa gud. Nomata we ol traem oli strong tumas, sipos yumi gohed blong stap tru long Jeova, hem bambae i stap tru long yumi olwe.”

[Tok blong pija long pej 6]

Stret save i pusum Sol blong jenisim samting we hem i stap tru long hem

[Tok blong pija long pej 7]

I gud yu skelem sipos samting we yu stap tru long hem i laenap wetem laet blong trutok blong Baebol

[Foto Credit Line blong pija long pej 4]

Churchill, upper left: U.S. National Archives photo; Joseph Göbbels, far right: Library of Congress