?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Wanem ya fasin blong kasem save filing blong narafala, mo from wanem wan Kristin i mas gat fasin ya?

Hemia i min se yumi traem tingbaot se i olsem wanem sipos laef blong yumi i sem mak long narafala, yumi harem save soa blong man ya long hat blong yumi. Baebol i givim advaes long ol Kristin se oli mas gat ‘sore, lav, mo mekem i gud long narafala.’ (1 Pita 3:8) Jeova i soemaot nambawan eksampol long yumi long fasin ya blong kasem save long filing blong narafala. (Ol Sam 103:14; Sekaraea 2:8) Yumi save wokem fasin ya taem yumi lesingud, yumi lukluk save samting, mo yumi pijarem yumi wan long ples blong narafala.—4/15, pej 24-26.

• ?Blong kasem trufala glad, from wanem man i mas kam gud long saed blong spirit bifo we God i stretem ol problem blong handikap?

Plante man we bodi blong olgeta i helti gud, oli no hapi, oli gat plante tumas problem. Defren olgeta, plante Kristin we haf blong bodi blong olgeta i nogud oli glad mo oli harem gud long wok blong Jeova. Olgeta we oli kasem blesing long saed blong spirit bambae oli gat janis blong stap long niufala wol taem God i finisim ol problem blong ol handikap.—5/1, pej 6-7.

• ?From wanem Hibrus 12:16 i talem se fasin blong Esao i sem mak long fasin blong slip olbaot?

Baebol i talem se fasin blong tingting blong Esao i nogud olgeta, hem i no save wet blong kasem ol samting we hem i wantem mo i no tinghae long ol samting we oli tabu. Tede, sipos wan man i wokem wan fasin blong tingting olsem, samting ya i save pulum hem blong mekem sam bigfala sin, olsem fasin blong slip wetem wan man no wan woman bifo mared.—5/1, pej 10-11.

• ?Hu ya man ya Tertullian, mo from wanem plante man oli savegud hem?

Hem i wan man blong raetem buk mo wan tija blong skul we i laef long ol yia wan handred. Ol man oli save gud hem from ol buk we hem i raetem blong tok long saed blong ol skul we oli talem se oli Kristin. Taem hem i tok long saed blong ol Kristin, hem i ademap sam tingting mo waes blong wol we biaen oli kam stamba blong ol giaman bilif, olsem Triniti.—5/15, pej 29-31.

• ?From wanem yumi save talem se i no ol genes nomo we oli stamba blong ol sik, fasin blong man, mo ded?

Ol sayentis we oli stadi long saed ya oli ting se ol genes we man i kasem taem hem i bon oli stamba blong sam sik, mo sam sayentis oli ting tu se ol genes oli biaenem fasin blong yumi. Be, Baebol i givim save long saed blong man se oli kam wea, mo olsem wanem sin i spolem olgeta man. Nating se ol genes oli save biaenem sam fasin blong yumi, be sin wetem ol samting raonabaot long yumi oli gat bigfala paoa tu long yumi.—6/1, pej 9-11.

• ?Olsem wanem smol pis blong skrol we oli faenem long Oxyrhynchus, Ijip, i givim moa save long fasin blong yusum nem blong God?

Smol pis skrol ya i wan haf blong Job 42:11, 12 we i kamaot long Grik Septuagint, mo i gat nem blong God i stap we oli raetem wetem ol fofala leta long lanwis Hibru. Hemia wan narafala pruf we i soem se oli yusum Hibru nem blong God long Septuagint, wan Baebol we plante taem ol man blong raetem Grik Haf blong Baebol oli bin yusum.—6/1, pej 30.

• ?Raf fasin blong ol man blong faet we oli stap kilkilim olgeta i ded long ol bigfala stad long taem blong ol man Rom, hem i olsem wanem kaen spot blong tede?

I no longtaem i pas, oli mekem wan eksibisen long wan bigfala stad blong Rom, long Itali, we nem blong hem Colosseum. Eksibisen ya i mekem ol man oli luksave sam samting tede we i sem mak long ol rabis gem ya blong bifo. Oli soem video blong man we i faet wetem bul, ol gem blong boksing, ol nogud akseden we i kamaot long ol resis blong trak no motobaek, mo ol nogud faet bitwin ol man we oli stap wajem spot. Ol faswan Kristin oli tinghae long tingting blong Jeova se hem i no laekem nating raf fasin mo ol man we oli laekem tumas blong mekem faet. Ol Kristin tede tu, oli mas sem mak. (Ol Sam 11:5)—6/15, pej 29.

• ?Olsem wanem eksampol blong Esra i tijim yumi blong mekem tijing blong yumi i karem moa frut?

Esra 7:10 (NW ) i makemaot fo defren samting we Esra i mekem, we yumi tu mas traehad blong mekem. Vas ya i talem se: “Esra i [1] mekemrere hat blong hem finis [2] blong ridimgud loa blong Jeova, mo [3] blong mekem hem i wok, mo [4] blong tijim ol man Isrel long ol rul mo long stret fasin.”—7/1, pej 20.

• ?Wetaem i stret long wan Kristin woman blong hem i kavremap hed blong hem?

Wan long tufala taem ya, hemia taem hem i lidim famle blong hem. Wan Kristin woman we i kavremap hed blong hem long taem olsem, hem i luksave se i wok blong hasban blong hem nao blong prea mo tijim Baebol. Wan narafala taem hemia taem hem i mekem sam wok blong kongregesen. Woman i mas soemaot se hem i luksave se Baebol i givim raet nomo long ol man we oli baptaes blong oli tijim mo oli lidim kongregesen. (1 Korin 11:3-10)—7/15, pej 26-27.

• ?From wanem ol Kristin oli luksave se yoga i no wan eksasaes nomo be hem i denja?

Mak blong yoga hemia blong trenem man blong i save kam wan nomo wetem wan bigfala paoa no spirit man. Yoga i blokem tingting blong i no moa wok hem wan, mo hemia i no laenap nating wetem tijing blong God.Defren olgeta long tijing blong God, man we i mekem yoga i mas blokem tingting blong hem blong i no moa wok hem wan. (Rom 12:1, 2) Yoga i save pulum man blong i stap aninit long paoa blong ol rabis spirit. (Dutronome 18:10, 11)—8/1, pej 20-22.