Laef Stori

“!Bambae Mi No Jenisim Wan Samting!”

GLADYS ALLEN I TALEM STORI YA

Samtaem, sam man oli askem long mi se, “?Sipos yu gat janis blong statem laef blong yu bakegen, bambae yu jenisim wanem long laef we yu bin gat bifo?” Mi glad blong ansa se, “!Bambae mi no jenisim wan samting!” Bambae mi eksplenem long yu from wanem mi glad long laef blong mi.

LONG hot taem blong 1929, taem mi gat tu yia blong mi, wan nambawan samting i hapen long laef blong papa blong mi, Matthew Allen. Hem i kasem buklet ya Millions Now Living Will Never Die!, we ol Intenasnal Baebol Studen (hemia nem blong ol Witnes blong Jeova long taem ya) oli wokem. Papa i ridim sam pej nomo nao hem i talem se: “!Neva bifo mi bin ridim wan buk we i gud olsem hemia!”

Smol taem biaen, Papa i kasem sam narafala buk bakegen blong ol Baebol Studen. Kwiktaem nomo hem i stat tokbaot ol samting we hem i lanem wetem ol man we oli laef raonabaot long mifala. Be long vilej blong mifala afsaed long taon i no gat wan kongregesen blong ol Witnes blong Jeova. Papa i luksave se mifala i nidim blong joen wetem ol narafala Kristin oltaem, taswe long 1935 Papa i mekem ful famle i muv i go long Orangeville, Ontario, Kanada, from we long taon ya i gat wan kongregesen.

Long taem ya, oli no pulum ol pikinini blong oli joen long ol miting; plante taem, ol pikinini oli stap afsaed long ples blong miting mo oli pleplei gogo ol bigman oli finisim miting blong olgeta. Papa i no laekem fasin ya. Hem i ting se, “Sipos ol miting ya oli mekem i gud long mi, oli save mekem i gud long ol pikinini blong mi tu.” Taswe nating se mifala i niuwan, Papa i tijim brata blong mi Bob, wetem tufala sista blong mi Ella mo Ruby, mo mi tu, se mifala i mas joen wetem ol bigman long ol miting. Hemia nao samting we mifala i mekem. I no longtaem ol pikinini blong ol narafala witnes  oli joenem ol miting tu. Fasin blong go long ol miting mo givim ansa i kam wan impoten haf long laef blong mifala.

Papa i lavem Baebol, mo hem i gat wan nambawan fasin blong talemaot ol stori blong Baebol. Tru long ol stori ya hem i makem gud hat blong mifala taem mifala i yang yet, mo kam kasem naoia mi rimemba ol gudfala lesen ya. Wan lesen we mi rimemba, hemia se Jeova i blesem ol man we oli obei long hem.

Mo tu Papa i tijim mifala olsem wanem blong yusum Baebol blong tok long saed blong bilif blong mifala. Oltaem mifala i stap mekem samting ya olsem wan pleplei. Papa i save talem se, “Mi ting se taem mi ded bambae mi go long heven. Ale, pruvum long mi se mi rong.” Mi wetem Ruby mitufala i lukluk long indeks blong faenem sam vas long Baebol blong agensem tijing ya. Mitufala i ridim ol vas we mitufala i faenem, mo biaen Papa i talem se, “Samting ya i pulum intres blong mi, be mi no bilif fulwan long wanem we yufala i stap talem.” Ale, mitufala i lukluk bakegen long indeks. Plante taem, mifala i stap lukaot ol vas blong plante aoa bifo we Papa i talem se i oraet, hem i glad long ol ansa we mifala i givim long hem. From fasin ya, mi wetem Ruby mitufala i kasem wan nambawan trening long fasin blong eksplenem mo tok long saed blong ol bilif blong mifala.

Winim Fasin Blong Fraet Long Man

Nomata long ol gudfala trening we mi kasem long haos mo long ol miting blong kongregesen, i gat sam samting long Kristin laef we samtaem mi bin faenem i had blong folem. Olsem plante yangfala mi harem nogud blong stap defren long ol narafala, speseli ol yangfala we oli stap skul wetem mi. Wan long ol faswan samting we i traem bilif blong mi, hemia samting we oli kolem ol maj blong prij.

Long ol maj ya ol grup blong brata sista oli hangem ol bigfala saen long fored mo baksaed blong olgeta, we i gat toktok long olgeta, nao oli wokbaot sloslo folem ol bigfala rod blong taon. Long taon blong mifala we i gat klosap 3,000 man long hem, olgeta man oli savsave olgeta. Wan dei mi joenem wan maj blong prij, mi stap wokbaot biaen long ol narawan wetem wan bigfala saen we i talem se “Ol Skul Oli Wan Trap Mo Oli Blong Trikim Ol Man Nomo.” Sam long ol yangfala we oli skul wetem mi oli luk mi, mo kwiktaem nomo oli biaenem mi mo oli stap singsing “God i Sevem King” (hemia nasnal singsing blong Kanada). ?Mi mekem wanem? Mi prea strong long Jeova blong i givim paoa long mi blong mi gohed. Taem maj ya i finis, mi spid i go long Haos Kingdom blong karemaot saen ya mo gobak long haos. Be brata we i stap lukaot long maj i talem long mi se bambae oli statem wan narafala maj, mo oli nidim wan moa man blong karem wan saen. Ale mi go mekem maj ya bakegen, mo mi prea strong moa long Jeova. Be, ol yangfala we oli skul wetem mi oli les mo oli gobak hom finis. !Ale, mi no nid blong prea blong kasem paoa, be mi prea blong talem tangkiu long Jeova!—Ol Proveb 3:5.

Oltaem mifala i welkamem ol paenia long haos blong mifala. Ol paenia oli hapi oltaem, mo mifala i rili glad tumas blong lukaot long olgeta. Long olgeta samting we mi save rimemba, mi rimemba we oltaem papa mama blong mifala i bin tokbaot wok blong paenia olsem beswan wok we mifala i save mekem.

Mi folem advaes blong olgeta, mo long 1945 mi statem wok blong paenia. Biaen mi go prij wetem Ella, sista blong mi we i stap paenia long London, Ontario. Long ples ya mi stat mekem wan haf blong wok blong prij we sipos oli bin talem long mi bifo, bambae mi neva ting se mi naf blong mekem. Oltaem ol brata sista oli stap go long ol wanwan tebol insaed long ol ba, blong seremaot ol Wajtaoa mo Consolation (we naoia oli kolem Wekap!). !Laki se oli mekem wok ya long Sarede aftenun, taswe mi  gat ful wik blong prea long Jeova blong hem i givim strong tingting long mi blong mekem wok ya! I tru se wok ya i no isi long mi, be mi kasem blesing from.

Mo tu, mi lanem olsem wanem blong seremaot sam spesel magasin blong Consolation we oli tokbaot ol bigfala traem we ol brata blong yumi oli fesem long ol rabis kalabus blong ol Nasi, speseli taem mi storian wetem sam impoten bisnesman blong Kanada mo wetem ol presiden blong ol bigfala kampani tu. Ol yia oli pas, mo mi luk se oltaem Jeova i sapotem ol man we oli trastem hem olsem Man we i save givim paoa long olgeta. Oltaem Papa i bin talem se, Jeova i blesem olgeta man we oli stap obei long Hem.

Mi Go Prij Long Quebec

Long Julae 4, 1940, gavman i putum tabu long wok blong ol Witnes blong Jeova long Kanada. Biaen oli karemaot tabu ya bakegen be Katolik provins blong Quebec i gohed yet blong agensem strong mifala. Nao mifala i mekem wan spesel kampen blong soemaot long olgeta man se ol brata blong yumi oli fesem hadtaem long ples ya. Long kampen ya mifala i yusum wan traket we ol tok blong hem oli strong (Quebec’s Burning Hate for God and Christ and Freedom Is the Shame of All Canada). Nathan H. Knorr, wan memba blong Hed Kampani blong ol Witnes blong Jeova, i mekem miting wetem plante handred paenia long taon ya Montreal blong eksplenem wanem i save hapen long mifala taem mifala i mekem wok ya. Brata Knorr i talem long mifala se sipos mifala i agri blong joen long kampen ya, mifala i mas save se maet ol man bambae oli holem mifala mo putum mifala long kalabus. !Samting ya i tru tumas! Polis i holem mi 15 taem. Taem mifala i go prij, oltaem mifala i karem wan tutbras mo wan kom wetem mifala, olsemia mifala i rere finis sipos polis i holem mifala mo putum mifala wan naet long kalabus.

Fastaem mifala i mekem bighaf blong wok blong prij long naet, blong ol man oli no luksave tumas wok blong mifala. Oltaem mi fulumap wan bag wetem plante traket mo mi hangem bag ya raon long nek blong mi, aninit long kot blong mi. Bag ya i bigwan lelebet, mekem se ol man oli ting se mi gat bel. Be samting ya i givhan long mi taem mi klaem long ol pablik transpot we oli fulap long man. Plante taem, sam man we oli gat kaen fasin oli givim ples blong olgeta long mi from we oli ting se mi mi “gat bel.”

Taem i pas, mo mifala i stat seremaot ol buk long dei. Mifala i givimaot ol traket long tri no fo doa, mo biaen mifala i livim ples ya blong go long wan narafala teritori. Plante taem, fasin ya i wokgud. Be, sipos i gat wan Katolik pris long ples we mifala i wok long hem, mifala i save se bambae mifala i kasem trabol. Wan dei, wan pris i biaenem 50 no 60 bigman wetem sam pikinini tu, blong oli sakem ol tomato mo ol eg long mifala. Mifala i go haed long haos blong wan Kristin sista, mo mifala i mas spenem fulnaet long ples ya we mifala i slip long floa nomo.

Oli nidim plante paenia blong prij long ol man we oli toktok Franis long Quebec, taswe long Disemba 1958, mi wetem Ruby, sista blong mi, mitufala i stat lanem blong toktok Franis. Biaen oli sanem mitufala long plante defren eria blong provins ya we ol man blong hem oli toktok Franis. Long evri ples we mitufala i go long hem, mitufala i fesem samting we i defren. !Long wan ples, mitufala i go long ol haos wanwan blong eit aoa evri dei, be blong tu yia we mitufala i mekem olsem i neva gat wan man i kamaot blong toktok wetem mitufala! Ol man oli jes kam long doa, oli lukluk tru long kaliko blong windo mo taem oli luk hu i stap, oli satem kaliko. Nating se i olsem, mitufala i no lego wok ya. Tede, i gat tu kongregesen long taon ya, mo oli stap gru.

Jeova i Sapotem Mifala Long Evri Rod

Long 1965 mitufala i statem wok blong spesel paenia. Long wan eria we oli sanem mitufala i go prij long hem, mitufala i kasem save fulwan tok blong Pol long 1 Timoti 6:8 we i se: “Sipos yumi gat kakae blong yumi mo klos blong yumi, hemia i naf, yumi save harem gud.” Mitufala i mas lukaot gud long mane blong mitufala blong mekem se mitufala i naf blong pem samting we mitufala i nidim. Taswe, mitufala i putum sam mane i stap blong pem oel blong hita we i hotem haos long koltaem, rent blong haos, lektrik, mo kakae. Taem mitufala i karemaot mane ya finis, i gat samting olsem 34 vatu nomo i stap blong finisim manis.

From we mane blong mitufala i no plante, mitufala i save putum hita blong hotem rum blong mitufala blong sam aoa nomo long naet. Taswe tempraja long bedrum blong mifala i neva bitim 15 digri mo plante taem i kolkol moa. Wan dei,  pikinini boe blong wan woman we i stadi wetem Ruby i kam visitim mitufala long haos blong mitufala. Ating boe ya i gobak long haos blong hem mo i talem long mama blong hem se ples blong mitufala i kolkol tumas, from we biaen, mama blong hem i stat sanem ten dola, klosap 1.400 vatu long mitufala evri manis blong mitufala i save pem inaf oel blong mekem hita i wok oltaem long bedrum blong mitufala. Mitufala i neva harem se mitufala i sot long wan samting. Mitufala i no rij, be mitufala i gat ol stamba samting blong laef. Mitufala i harem se evri samting we mitufala i kasem we maet i fulap lelebet, i wan presen we Jeova i givim. !Ol tok blong Ol Sam 37:25 oli tru tumas se: “Neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot”!

Nating se mitufala i fesem hadtaem, mi harem gud tumas taem mi luk plante man we mi stadi Baebol wetem olgeta oli kasem wan gudfala save blong trutok. Sam blong olgeta oli kam paenia, mo samting ya i rili mekem mi mi haremgud.

Sam Narafala Traem Bakegen

Long 1970, oli sanem mitufala i go long Cornwall, Ontario. Klosap wan yia afta we mitufala i kam long Cornwall, Mama i stat sik. Papa i ded long 1957 finis, ale mi wetem tufala sista blong mi, mifala i lukaot long Mama gogo kasem hem i ded long 1972. Ol sista we oli spesel paenia wetem mitufala, Ella Lisitza mo Ann Kowalenko, tufala i kaengud mo i sapotem mifala long taem ya. Tufala i lukaot long ol Baebol stadi mo ol narafala wok blong mifala taem mifala i stap wetem Mama. !Tok blong Ol Proveb 18:24 i tru tumas i se: “Samfala [fren] oli save mekem i gud moa long yu, i winim ol brata blong yu”!

I tru, laef i fulap long ol defdefren kaen traem. Mi mi naf blong fesem ol traem we mi kasem from we Jeova i givhan long mi mo i sapotem mi wetem lav. Mi stap haremgud yet blong wok olsem fultaem paenia. Bob i ded long 1993. Hem i bin spenem 20 yia long wok blong paenia, mo 10 long ol nambawan yia ya hem i stap paenia wetem Doll, waef blong hem. Ella, bigfala sista blong mi, hem i ded long Oktoba 1998. Hem i bin gohed long wok blong paenia blong 30 yia mo oltaem hem i kipim wan strong tingting long wok ya. Long 1991, ol dokta oli faenem se Ruby, narafala sista blong mi, i gat wan kansa. Nomata long sik ya, hem i yusum smol paoa blong hem blong talemaot gud nius. Hem i holem fasin blong hem blong mekem fani gogo kasem moning ya we hem i ded, long Septemba 26, 1999. Mi lusum sista blong mi, be mi gat wan famle blong brata sista long saed blong spirit we oli halpem mi blong mi haremgud yet.

 Taem mi lukluk bak long laef blong mi, i no gat wan samting we mi wantem jenisim. Mi neva mared, be mi kasem blesing from we mi gat wan papa mo wan mama we tufala i lavem mi, mo wan brata mo tu sista we olgeta evriwan oli putum trutok long fasples long laef blong olgeta. Mi wantem tumas blong luk olgeta evriwan taem bambae oli laef bakegen. Naoia finis, mi save tingbaot taem ya we bambae papa blong mi i sakem han blong hem i goraon long mi mo bambae mi luk mama blong mi we wota blong ae blong hem i ron taem mifala i holholem mifala. Long taem ya mi sua se bambae Ella, Ruby, mo Bob oli jamjam from glad.

Be bifo long taem ya, mi gat strong tingting blong gohed mo yusum helt mo paoa blong mi blong presem Jeova mo givim ona long hem. Wok blong paenia i wan nambawan laef we i karem plante blesing. Olsem man blong raetem Sam i talem taem i tokbaot olgeta we oli folem rod blong Jeova se: “Oltaem, long olgeta laef blong yu, bambae yu yu harem gud, yu glad.”—Ol Sam 128:1, 2.

[Tok blong pija long pej 26]

Papa i laekem Baebol. Hem i tijim mifala olsem wanem blong toktok long saed blong bilif blong mifala

[Tok blong pija long pej 28]

Stat long lefsaed i go long raetsaed: Ruby, Mi, Bob, Ella, Mama, mo Papa long 1947

[Tok blong pija long pej 28]

Long fored, stat long lefsaed i go long raetsaed: Mi, Ruby, mo Ella long Distrik Asembli, 1998