“Hem i Toktok Long Olgeta Long Parabol Nomo”

“Ol samting ya, Jisas i talemaot long ol man long parabol. Long ol tok ya blong hem, hem i toktok long olgeta long parabol nomo.”—MATIU 13:34.

1, 2. (a) ?From wanem yumi no save fogetem ol gudfala pijatok? (b) ?Jisas i yusum wanem kaen pijatok, mo wanem tufala kwestin we yumi save askem long saed blong olgeta? (Lukluk futnot tu.)

 ?YU YU save rimemba yet wan pijatok we yu bin harem plante yia finis, maet long wan pablik tok long saed blong Baebol? Yumi no save fogetem ol gudfala pijatok. Wan man blong raetem ol buk i talem se taem yumi harem ol pijatok, “sora blong yumi i kam olsem ae, mo yumi luk ol pija long tingting blong yumi.” Plante taem, bren i wok moagud sipos wan pija i stap long tingting blong yumi. Taswe, taem yumi harem wan pijatok, i isi moa blong kasem save long poen we i joen wetem. Ol pijatok oli mekem toktok i laef, mo oli tijim yumi long ol lesen we yumi no save fogetem.

² I no gat wan tija long wol samtaem we i gat gudhan blong yusum ol pijatok, olsem Jisas Kraes. Nating se hem i talem ol parabol ya klosap tu taosen yia bifo, be i isi yet blong yumi rimemba olgeta. * ?From wanem Jisas i yusum fasin ya oltaem blong tijim ol man? ?Mo from wanem ol pijatok blong hem oli gud?

?From Wanem Jisas i Yusum Ol Parabol?

3. (a) ?Olsem Matiu 13:34, 35 i talem, wanem faswan risen from wanem Jisas i yusum ol pijatok? (b) ?Wanem i soemaot se Jeova i tinghae long fasin ya blong tijim ol man?

³ Baebol i talem tu risen from wanem Jisas i yusum ol parabol. Faswan se, taem hem i yusum parabol hem i mekem wan profet tok i kamtru. Aposol Matiu i raetem se: “Ol samting ya, Jisas i talemaot long ol man long parabol. Long ol tok ya blong hem, hem i toktok long olgeta long parabol nomo. Hem i mekem olsem blong mekem tok ya i kamtru we profet i bin talemaot bifo, we God i talem se, ‘Bambae mi mi talemaot ol tok blong mi long parabol.’ ” (Matiu 13:34, 35) “Profet” we Matiu i tokbaot, hem i man we i raetem Ol Sam 78:2. Plante handred yia bifo we Jisas i bon, tabu spirit blong God i pulum man ya blong raetemdaon tok ya. ?Yu yu sapraes we plante handred yia bifo we Jisas i bon, Jeova i gat tingting finis se Pikinini blong hem bambae i yusum ol pijatok mo parabol blong tijim ol man? !I klia we Jeova i tinghae long fasin ya blong tij!

4. ?Jisas i talem se hem i yusum ol parabol from wanem?

⁴ Jisas hem wan i talem seken risen. Hem i eksplenem se hem i yusum ol parabol blong seraotem ol man we hat blong olgeta i no wantem obei, long ol man we hat blong olgeta i stret. Wan taem, “plante man” oli hivap wanples, nao hem i talem parabol blong man we i planem sid. Biaen, ol disaepol blong hem oli askem se: “?Yu yu stap toktok long olgeta long parabol from wanem?” Jisas i ansa se: “From we yufala ya, God i openem rod long yufala, blong yufala i save ol tok haed blong fasin ya we hem i stap kam King blong ol man blong hem. Be olgeta ya, hem i no openem rod long olgeta olsem. Taswe mi stap toktok long olgeta long parabol, from we oli lukluk, be oli no luksave, mo oli stap lesin, be oli no harem, mo oli no haremsave tu. Fasin blong olgeta i mekem tok ya i kamtru we Profet Aesea i bin talemaot long ol man bifo, we God i talem se, ‘Bambae yufala i harem, harem, harem, be bambae yufala i no save haremsave tok blong mi samtaem. Bambae yufala i luk, luk, luk, be bambae yufala i no save luksave samtaem. . . . Tingting blong olgeta i kam strong finis.’ ”—Matiu 13:2, 10, 11, 13-15; Aesea 6:9, 10.

5. ?Olsem wanem ol parabol blong Jisas oli seraotem ol man we oli gat flas tingting long olgeta we oli gat tingting daon?

⁵ ?Wanem samting long ol parabol blong Jisas we i mekem se ol man nogud oli seraot long ol gudfala man? Long plante parabol, man i mas askem kwestin blong kasem ful mining blong olgeta. Ol man we oli gat tingting daon, oli askem Jisas blong givim moa save long olgeta. (Matiu 13:36; Mak 4:34) Ale, ol parabol blong Jisas oli mekem trutok i kam klia long tingting blong ol man we oli wantem tumas blong save trutok. Be ol man we oli gat flas tingting, i olsem we ol parabol blong Jisas oli haedem trutok ya long olgeta. !Tru ya, Jisas i wan nambawan tija! Naoia, bambae yumi tokbaot sam samting we i mekem se ol parabol blong hem oli gud tumas.

No Tokbaot Plante Tumas Smosmol Poen

6-8. (a) ?Ol man we oli lesin long Jisas long faswan handred yia oli no gat wanem samting blong givhan long olgeta blong tingbaot ol tok blong hem? (b) Talem sam eksampol blong soemaot se Jisas i no tokbaot plante tumas smosmol poen.

⁶ Traem tingbaot ol disaepol long faswan handred yia we oli lukluk Jisas stret, mo oli harem tijing we i kamaot stret long maot blong hem. I tru, oli gat wan bigfala blesing blong harem prapa voes blong Jisas. Be, yumi no mas fogetem se, i no gat ol buk long taem ya, blong oli save ridim bakegen ol tok blong hem. Oli mas holem ol tok blong Jisas long tingting mo hat blong olgeta. Ol nambawan parabol we Jisas i yusum oli mekem i isi moa blong olgeta oli rimemba ol tijing blong hem. ?Olsem wanem oli mekem samting ya?

⁷ Jisas i no tokbaot plante tumas smosmol poen long ol parabol blong hem. Hem i talem ol smosmol poen nomo we oli impoten, no we hem i nidim blong makem wan trutok long tingting blong ol man. Taswe long wan parabol, hem i talem hamas sipsip stret oli stap, taem man blong olgeta i go lukaotem wan sipsip we i lus. Long wan narafala parabol, hem i talem hamas aoa stret ol man oli wok long garen. Mo long narawan bakegen, hem i talem hamas vatu stret we masta i givim long ol man blong hem blong oli holem i stap blong hem.—Matiu 18:12-14; 20:1-16; 25:14-30.

⁸ Be, Jisas i no talem ol smosmol samting we oli no impoten, we maet oli mekem i had blong ol man oli kasem mining blong ol parabol. Olsem, long parabol blong man we i no fogivim narafala, hem i no talem wanem samting we slef ya i mekem blong gat wan bigfala kaon blong plante milian vatu (60 milian denari). Jisas i wantem tijim ol man se oli mas fogivim narafala. Nomata wanem samting slef i mekem blong gat kaon ya, bigfala samting i long saed blong fasin fogif we masta i soemaot long hem, mo fasin we slef ya i mekem long wan narafala slef we i kaon long hem blong smol mane nomo. (Matiu 18:23-35) Sem mak bakegen long parabol blong boe we i lusum rod. Jisas i no talem from wanem sekenbon boe i girap i askem papa blong hem blong seraot olting blong hem long tufala pikinini blong hem. Mo  hem i no talem wanem samting i mekem we boe ya i go spolem ol mane blong hem long rabis fasin. Be Jisas i talem plante samting long saed blong filing blong papa blong boe ya, mo fasin blong papa ya taem pikinini blong hem i tanem tingting blong hem mo i kambak. Ol smosmol save long saed blong fasin blong papa ya i impoten blong soemaot tijing we Jisas i wantem givimaot, hemia se Jeova i stap fogivim man “long plante bigfala sin.”—Aesea 55:7, NW; Luk 15:11-32.

9, 10. (a) ?Long ol parabol blong Jisas, hem i tokbaot wanem samting long saed blong ol man? (b) ?Olsem wanem Jisas i mekem i isi long ol man we oli lesin long hem mo plante narafala tu, blong oli rimemba ol parabol blong hem?

⁹ Jisas i lukaot gud olsem wanem hem i tokbaot ol man we oli stap insaed long ol parabol blong hem. Hem i no talem plante samting long saed blong lukluk blong ol man ya, be hem i tokbaot moa ol fasin blong olgeta mo wanem samting oli mekem long en blong stori. Olsem long parabol blong gudfala man Sameria. Jisas i no tokbaot bodi mo fes blong man ya, be hem i tokbaot samting we i moa impoten, hemia fasin sore we i pulum hem blong givhan long wan man Isrel we i hafded long rod. Jisas i talem naf smosmol poen nomo blong tijim ol man se, sipos oli lavem ol man raonabaot long olgeta, hemia i no minim ol manples blong olgeta nomo, be oli mas laekem ol man blong ol narafala laen mo kala tu.—Luk 10:29, 33-37.

¹⁰ From we Jisas i no yusum plante tumas smosmol poen, ol parabol blong hem oli klia, oli no fasfas. Samting ya i mekem i isi long ol man we oli lesin long hem long faswan handred yia, blong oli rimemba ol parabol ya mo ol lesen we oli lanem from. Mo i mekem i isi long fulap narafala man biaen long olgeta tu, we oli ridim ol parabol ya long ol Gospel.

Ol Samting We i Hapen Long Laef Blong Man

11. Talem sam samting we Jisas i tokbaot long ol parabol blong hem, we hem i bin lukluk taem hem i stap gruap long Galili.

¹¹ Jisas i gat gudhan blong yusum pijatok blong samting we i stap hapen oltaem long laef blong ol man. Long plante parabol, i klia se hem i tokbaot ol samting we hem i luk taem hem i stap gruap long Galili. Traem tingting long laef blong hem taem hem i pikinini. Oltaem hem i luk we mama blong hem i wokem bred, mo we i tekem wan smol pis flaoa we i solap finis, i putum gud i stap blong yusum nekis taem hem i mekem bred. (Matiu 13:33) Oltaem, Jisas i lukluk ol man blong pulum fis, we oli saksakem net blong olgeta long klia, blu, Solwota blong Galili. (Matiu 13:47) Oltaem hem i luk ol pikinini oli stap pleplei long open ples long vilej, maet long maket ples. (Matiu 11:16) Ating Jisas i bin makem plante narafala samting long laef tu we hem i tokbaot long ol parabol blong hem, olsem, man we i saksakem sid olbaot long garen, gladtaem long ol lafet blong mared, garen blong wit we san i bonem mo kakae blong hem i rere.—Matiu 13:3-8; 25:1-12; Mak 4:26-29.

12, 13. ?Olsem wanem parabol blong wit mo rabis gras i soemaot se Jisas i save gud ol samting we i hapen long ples blong hem?

 ¹² Taswe, yumi no sapraes we ol parabol blong Jisas oli fulap long ol samting we ol man oli stap mekem oltaem long laef, mo ol samting we oli hapen oltaem. Be blong kasem save moa olsem wanem ol parabol ya oli mekem tijing blong Jisas i gud tumas, i gud we yumi tingbaot mining we ol man Isrel oli kasem taem oli harem ol parabol blong hem. Bambae yumi luk tu parabol.

¹³ Faswan, hemia parabol blong wit mo rabis gras. Jisas i storian long saed blong wan man we i planem ol gudfala sid blong wit long garen blong hem, be “wan enemi” i kam, i planem ol sid blong rabis gras long garen ya tu. ?From wanem Jisas i jusum wan rabis wok olsem? Yumi mas rimemba se, Jisas i talem parabol ya long ol man we oli stap klosap long Solwota blong Galili. Ol man Galili ya, oli man blong wokem garen. ?Yu ting se i gat wan samting i save spolem moa wan man blong wokem garen, i winim we wan enemi i kam long fasin haed, i planem ol rabis gras long medel blong ol gudfala kakae? Sam loa we oli stap long taem ya oli soemaot se trabol ya i bin hapen. I klia we Jisas i yusum samting ya from we ol man we oli stap lesin, oli kasem save gud long hem.—Matiu 13:1, 2, 24-30.

14. ?Long parabol blong gudfala man Sameria, from wanem Jisas i tokbaot rod we i aot ‘long Jerusalem i godaon long Jeriko’?

¹⁴ Seken parabol, hemia long saed blong gudfala man Sameria. Jisas i statem toktok blong hem olsem: “I gat wan man i aot long Jerusalem, i stap godaon long Jeriko. Nao long rod, sam man blong stil oli kam holem hem. Ol man ya oli stilim olgeta samting blong hem, mo oli kilim hem long stik, nao oli livim hem i stap long rod, we i hafded, mo oli girap oli ronwe long hem.” (Luk 10:30) Makem gud we Jisas i tokbaot rod we i aot ‘long Jerusalem i godaon long Jeriko.’ Taem hem i talem parabol ya, hem i stap long wan ples long Judia we i no longwe long Jerusalem. Taswe, ating ol man we oli stap lesin long hem oli save gud rod ya. Oli save se rod ya i denja tumas, antap moa, sipos wan man i stap wokbaot hem wan. Rod ya i pastru long ol ples we i no gat man nating i stap long olgeta. From samting ya, i gat plante ples we ol man blong stil oli save haed blong kilim man.

15. ?Long parabol blong gudfala man Sameria, from wanem ol man oli no save mekem eskius from fasin blong pris mo Livaet we tufala i no gat sore?

¹⁵ Yumi makem wan narafala samting long saed blong rod ya we i aot ‘long Jerusalem i godaon long Jeriko.’ Long parabol ya, wan pris i folem rod ya fastaem, mo biaen, wan Livaet. Be i no gat wan long tufala ya we i givhan long man ya we i hafded long rod. (Luk 10:31, 32) Ol pris oli wok long tempol long Jerusalem, mo ol Livaet oli givhan long olgeta. Plante pris mo Livaet oli stap long Jeriko taem oli no stap wok long tempol. Jeriko i no longwe long Jerusalem, samwe 23 kilometa nomo. Ale, i klia se oli folem rod ya oltaem. Makem tu se pris mo Livaet ya oli “aot long Jerusalem.” Hemia i min se oli kamaot long  tempol, oli stap gohom. * From samting ya, ol man we oli lesin long Jisas oli no save mekem eskius from fasin blong tufala ya blong no gat sore. Oli no save talem se: ‘Tufala i no givhan long man we i slip long rod from we tufala i ting se man ya i ded, mo sipos tufala i tajem wan dedbodi, bambae tufala i no klin blong smoltaem, mo bambae i tabu blong tufala i mekem wok long tempol.’ (Levitikas 21:1; Namba 19:11, 16) Yes, i klia se parabol ya blong Jisas i tokbaot ol samting we ol man long taem ya oli save gud long olgeta.

Ol Samting We God i Wokem

16. ?From wanem Jisas i gat bigfala save long ol samting we God i wokem?

¹⁶ Plante pijatok mo parabol blong Jisas oli soemaot se hem i gat save long saed blong ol flaoa, tri, ol anamol, mo ol samting olsem win, ren, mo san. (Matiu 6:26, 28-30; 16:2, 3) ?Olsem wanem hem i kasem save ya? Taem hem i stap gruap long Galili, hem i gat plante janis blong lukluk ol samting we Jeova i wokem. Antap long hemia, Jisas i “fasbon long ol samting we God i wokem,” mo hem i olsem “nambawan wokman” blong Jeova we i givhan long Hem blong wokem olgeta samting. (Kolosi 1:15, 16, NW; Ol Proveb 8:30, 31, NW ) Hemia nao from wanem Jisas i gat bigfala save long ol samting we God i wokem. Bambae yumi luk olsem wanem hem i yusum save ya blong tijim gud ol man.

17, 18. (a) ?Olsem wanem tok blong Jisas long Jon japta 10 i soemaot se hem i save gud fasin blong ol sipsip? (b) ?Ol man we oli go luk ol kantri we Baebol i tokbaot, oli luksave wanem fasin fren we ol man blong lukaot long sipsip oli gat wetem ol sipsip blong olgeta?

¹⁷ Parabol blong Jisas we i pulum filing blong plante man, hem i stap long Jon japta 10. Parabol ya i soemaot se Jisas i laekem tumas ol man blong hem, olsem we wan man blong lukaot long sipsip i laekem ol sipsip blong hem. Ol tok ya blong Jisas i soem se hem i save gud fasin blong ol sipsip. Hem i tokbaot we ol sipsip oli letem narafala i lidim olgeta, mo se oli folem gud man we i lukaot long olgeta. (Jon 10:2-4) Ol man we oli wokbaot i go long ol kantri we Baebol i tokbaot, oli luksave spesel fasin fren ya we ol man blong lukaot long sipsip oli gat wetem ol sipsip blong olgeta. Man ya H. B. Tristram, we hem i stadi long ol tri mo anamol long ol yia 1800, hem i talem se: “Wan taem, mi bin wajem wan man blong lukaot long sipsip we i stap pleplei wetem ol sipsip blong hem. Hem i ronwe long olgeta, ale ol sipsip oli ron biaen long hem gogo oli kasem hem, nao oli raonem hem. . . . Lashaf blong pleplei ya, ol sipsip oli raonem gud hem, nao oli jamjam mo danis raon long hem.”

¹⁸ ?From wanem ol sipsip oli biaen long man blong lukaot long olgeta? Jisas i talem se: “From we oli save voes blong hem.” (Jon 10:4) ?Olsem wanem? ?Ol sipsip oli rili haremsave voes blong man we i lukaot long olgeta? Long buk ya, The Historical Geography of the Holy Land George A. Smith i tokbaot samting we hem wan i bin luk, i se: “Long  medel dei, sam samtaem mifala i spel klosap long wan wel long Judia. Maet tri no fo man blong lukaot long sipsip oli kam long ples ya wetem ol sipsip blong olgeta. Ol sipsip oli joen wanples, sidaon tugeta, mo mifala i no moa save olsem wanem wanwan man blong lukaot long sipsip bambae i seraotem ol prapa sipsip blong hem long ol narafala sipsip. Be taem ol sipsip oli dring mo pleplei finis, ol man blong lukaot long olgeta oli go wanwan long ol defdefren saed blong vali, nao oli singaot long ol sipsip blong olgeta, evriwan long spesel fasin blong hem. Ale, ol sipsip oli serseraot oli go long prapa man blong olgeta. Oli wokbaot i go long ol wanwan grup blong olgeta olsem oli bin kam.” Ating i no gat wan parabol we Jisas i save yusum we i moa gud i winim hemia, blong soemaot poen we hem i wantem tijim ol man long hem. Hemia se, sipos yumi luksave mo obei long ol tijing blong “gudfala man ya blong lukaot long sipsip” mo folem gud hem, ale hem bambae i lukaot gud long yumi wetem lav mo kaen fasin.—Jon 10:11.

Ol Samting We i Hapen Finis We Ol Man Oli Save Gud

19. ?Blong daonem wan giaman tingting, olsem wanem Jisas i yusum gud wan akseden we i bin kasem sam man long ples blong hem?

¹⁹ Wan gudfala pijatok, maet hem i wan samting we i hapen finis no wan eksampol we man i save lanem lesen from. Wan taem, Jisas i wantem daonem giaman bilif ya se trabol we i kasem sam man i olsem wan panis from rong blong olgeta. Ale, hem i tokbaot samting we i bin hapen long ples blong hem. Hem i se: “?Olsem wanem long ol eitin man ya long Saeloam, we haos ya we i hae i foldaon long olgeta, i kilim olgeta i ded? ?Yufala i ting se samting ya i soemaot we olgeta ya oli nogud moa [mekem moa sin], i winim ol narafala man long Jerusalem?” (Luk 13:4) Jisas i soemaot gud se God i no stap makemaot ol samting we i hapen long laef blong ol man. Ol 18 man ya oli no ded from we oli mekem wan bigfala sin nao God i panisim olgeta. Nogat. Oli ded from wan akseden we i kamaot olsem nomo, wan samting we man i no tingbaot mo we i save kamaot enitaem nomo. (Prija 9:11) Ale, blong daonem wan giaman tijing, Jisas i tokbaot wan samting we i bin hapen we olgeta man oli save long hem.

20, 21. (a) ?Ol Farisi oli jajem ol disaepol blong Jisas from wanem? (b) ?Wanem stori blong Baebol we Jisas i yusum blong soemaot se Jeova i no wantem we ol man oli bitim mak long Sabat loa? (c) ?Bambae yumi tokbaot wanem long nekis stadi?

²⁰ Taem Jisas i stap tijim ol man, hem i yusum plante eksampol we oli kamaot long Baebol tu. Tingbaot taem ya we ol Farisi oli jajem ol disaepol blong hem from we oli pulum sam hed blong wit blong kakae long Sabat dei. Ol disaepol ya oli no rili brekem Loa blong God, be oli brekem loa we ol Farisi oli putumap, long saed blong wanem wok i stret mo wanem wok i no stret blong mekem long Sabat dei. Ale, Jisas i soemaot se taem God i givim loa ya blong Sabat, hem i no wantem se ol man oli bitim mak long loa ya, olsem ol Farisi oli stap mekem. Hem i yusum wan stori we i stap long 1 Samuel 21:3-6, long saed blong Deved mo ol man blong hem. Olgeta ya oli hanggri, nao oli stop smol long haos tapolen, oli kakae sam bred we ol pris oli givim i go long God finis mo oli karemaot blong putum ol niufala bred. Oltaem oli putum ol olfala bred ya i stap blong ol pris nomo oli kakae. Be Deved mo ol man blong hem oli hanggri, ale oli girap oli kakae bred ya, mo God i no jajem olgeta from. Samting we yumi makem, hemia se i gat wan stori nomo long Baebol we i talem se ol man we oli no pris oli kakae ol olfala bred ya. Yes, Jisas i save stret stori blong yusum, mo i sua se ol man Isrel we oli lesin long hem oli save gud stori ya.—Matiu 12:1-8.

²¹ !Tru ya, Jisas i wan Bigfala Tija! Yumi sapraes bigwan long nambawan fasin blong hem blong tijim ol man long ol impoten trutok, mo olsem wanem oli kasem save gud long ol tijing ya. ?Be, olsem wanem yumi save tij olsem hem? Bambae yumi tokbaot samting ya long nekis stadi.

[Ol Futnot]

?Yu Yu Rimemba?

• ?From wanem Jisas i yusum ol parabol blong tijim ol man?

• ?Wanem eksampol i soemaot se Jisas i yusum ol parabol we ol man long faswan handred yia oli kasem save gud long olgeta?

• ?Long ol parabol blong Jisas, olsem wanem hem i yusum save blong hem long saed blong ol samting we God i wokem?

• ?Olsem wanem Jisas i yusum ol samting we oli hapen finis we ol man oli save long olgeta?

[Kwestin]

[Tok blong pija long pej 15]

Jisas i tokbaot wan slef we i no wantem fogivim narafala from wan smol kaon nomo mo wan papa we i fogivim boe blong hem we i bin spolem olgeta samting we hem i gat

[Tok blong pija long pej 16]

?Jisas i tijim ol man long wanem samting long parabol blong gudfala man Sameria?

[Tok blong pija long pej 17]

?Ol sipsip oli rili haremsave voes blong man we i lukaot long olgeta?