“I No Gat Wan Man We i Save Tok Olsem Man Ya”
“I No Gat Wan Man We i Save Tok Olsem Man Ya”
“Ol man oli glad tumas long ol tok blong hem, mo oli sapraes tu from we tok blong hem i gud tumas.”—LUK 4:22.
1, 2. (a) ?From wanem ol soldia we oli go blong holem Jisas oli kambak we oli no holem hem? (b) ?Wanem i soemaot se i no ol soldia ya nomo we oli sapraes long tijing blong Jisas?
OL SOLDIA oli no mekem wok we ol lida blong olgeta oli sanem olgeta from. Oli mas holem Jisas Kraes, be oli no karem Jisas i gobak long ol lida blong olgeta. Ale, ol jif pris wetem ol Farisi oli wantem save from wanem i olsem, oli talem se: “?Weswe yufala i no tekem Jisas i kam?” ?Yes, from wanem ol soldia oli no holem man ya we i no faetbak nating blong blokem olgeta? Ol soldia oli ansa se: “!No, be i no gat man we i save tok olsem man ya samtaem!” Oli sapraes tumas long ol tijing blong Jisas, taswe oli no save mekem tingting blong olgeta i strong blong holem kwaet man ya. *—Jon 7:32, 45, 46.
2 I no ol soldia ya nomo we oli sapraes long tijing blong Jisas. Baebol i talem se fulap man oli kam lesin long Jisas from we oli wantem harem ol toktok blong hem. Ol man long ples blong hem oli sapraes mo “oli glad tumas long ol tok blong hem.” (Luk 4:22) Sam samtaem, hem i stanap long wan bot long Solwota blong Galili, mo i toktok i go long ol man we oli hivap long sanbij. (Mak 3:9; 4:1; Luk 5:1-3) Wan taem, i gat “plante man tumas” oli kam stap wetem Jisas blong sam dei, nating se oli no karem kakae wetem olgeta.—Mak 8:1, 2.
3. ?Wanem bigfala samting we i mekem se Jisas i wan nambawan tija?
3 ?Wanem i mekem se Jisas i wan nambawan tija? Bigfala risen se, hem i gat lav. * Jisas i lavem ol trutok we hem i tijim ol narafala long hem, mo hem i lavem ol man we hem i tijim olgeta. Be Jisas i tijim man long nambawan fasin tu. Long magasin ya, bambae yumi tokbaot sam fasin we Jisas i yusum blong tijim ol man, mo olsem wanem yumi save folem fasin blong hem.
Isi Mo Klia Tok
4, 5. (a) ?From wanem Jisas i yusum ol isi tok blong tijim ol man? ?Nating se hem i mekem olsem, wanem samting i kamaot from? (b) ?Olsem wanem Bigfala Toktok blong Jisas antap long Hil i givim wan eksampol blong tijim man long isi fasin?
4 Plante man we oli skul gud oli yusum ol bigfala tok we plante man oli no kasem save long olgeta. Be sipos ol narafala oli no kasem mining blong ol tok blong yumi, ol save we yumi gat bambae i no givhan long olgeta. Taem Jisas i tijim ol man, hem i neva yusum ol bigfala tok we oli no kasem save long olgeta. Tingbaot, i gat fulap fulap tok we Jisas i save long olgeta. Be, nating se hem i gat bigfala save olsem, hem i no tingbaot hem wan, be hem i tingbaot ol man we oli stap lesin long hem. Hem i save se plante long ol man ya ‘oli no gat nem mo oli no skul gud.’ (Ol Wok 4:13) Blong kasem hat blong olgeta, hem i yusum ol tok we ol man oli save long olgeta. Nating se hem i yusum ol isi tok ya nomo, be ol man oli kasem ol dip trutok from.
5 Tingbaot Bigfala Toktok blong Jisas antap long hil, we i stap long Matiu 5:3 kasem 7:27. Ating Jisas i tekem 20 menet nomo blong talem ol tok ya. Be hem i givimaot ol bigfala tijing, hem i tokbaot stamba samting we i pusum ol man blong stilim man no woman blong narafala, divos, mo ronem ol sas samting. (Matiu 5:27-32; 6:19-34) Be hem i no yusum ol bigfala, flas tok. !Yes, klosap evri tok we hem i talem, wan pikinini nomo i save kasem! !Taswe, long en blong toktok ya blong hem, ol man we oli lesin—we ating plante blong olgeta oli man blong wokem garen, man blong lukaot long sipsip, mo man blong hukum fis—“oli sapraes tumas long tok blong hem”!—Matiu 7:28.
6. Talem sam isi tok we Jisas i bin yusum we oli gat bigfala mining.
6 Plante taem, Jisas i yusum ol sot tok we i klia nomo, be hem i talem samting we i gat bigfala mining. Nating se ol man oli no raetem plante buk yet long taem blong Jisas, be i olsem we Jisas i raetem ol tok blong hem i klia nomo long hat mo tingting blong ol man we oli lesin long hem. Tingbaot sam eksampol blong ol tok olsem: “I no gat man we i save wok blong tu masta wantaem. . . . Yufala i no save mekem we God i bos blong yufala, be long semtaem nomo, mane tu i bos blong yufala.” “Bambae yufala i no jajem narafala man, i nogud God i jajem yufala.” “Bambae yufala i save makem ol man ya long frut blong laef blong olgeta.” “Man we i no sik, hem i no nidim dokta, be man we i sik, yes, hem i nidim dokta.” “Man we i stap tekem naef blong faet, hem bambae i ded long naef blong faet.” “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” “Man we i stap givim presen i go, hem i save harem gud moa, i winim man we i stap kasem presen blong hem.” * (Matiu 6:24; 7:1, 20; 9:12; 26:52; Mak 12:17; Ol Wok 20:35) Tede, klosap 2,000 yia afta we Jisas i talem ol tok ya, i isi yet blong yumi rimemba ol bigfala tijing ya blong hem.
Yusum Ol Kwestin
7. ?From wanem Jisas i askem plante kwestin?
7 Jisas i yusum gud ol kwestin. Plante taem, ating i kwik moa sipos hem i jes talemaot poen we hem i wantem tijim narafala long hem, be hem i no mekem olsem. Hem i askem ol kwestin. ?From wanem? Sam kwestin we hem i askem, oli satem maot blong ol man we oli agensem hem, from we oli stikim olgeta nao rabis tingting blong olgeta i kam long klia ples. (Matiu 12:24-30; 21:23-27; 22:41-46) Be, plante taem, Jisas i askem ol kwestin blong tijim ol man long trutok, nating se samting ya i tekem moa taem. Ol kwestin oli pulum ol man blong talemaot wanem i stap long hat blong olgeta, mo oli wekemap tingting mo tijim tingting blong ol disaepol blong hem. Bambae yumi tekem tu eksampol, tufala evriwan oli joen wetem aposol Pita.
8, 9. ?Olsem wanem Jisas i yusum ol kwestin blong givhan long Pita blong kasem stret tingting long bisnes ya blong pem takis long tempol?
8 Faswan, hemia taem we ol man blong tekem mane blong takis oli askem long Pita se Jisas i no save pem takis long tempol. * Pita, we plante taem i hareap tumas blong toktok, i ansa se: “Si, hem i save pem.” Be, smoltaem biaen, Jisas i mekem Pita i tingting gud, i se: “ ‘Saemon, yu traem tingbaot. ?Ol king blong wol ya oli stap tekem takis long hu? ?Oli stap kasem mane blong olgeta long hu? ?Long ol man blong olgeta, no long ol strenja we oli stap long ples blong olgeta?’ Pita i talem se: ‘Long ol strenja.’ Nao Jisas i talem se: ‘Yes, hemia i min se ol man blong king oli no save pem.’ ” (Matiu 17:24-27) Ating Pita i luksave klia from wanem Jisas i askem ol kwestin ya. ?From wanem hem i mas luksave?
9 Long taem blong Jisas, ol famle blong king oli no pem takis. Taswe, Jisas i no nid blong pem takis, from we hem i stret Pikinini blong King ya long heven we ol man oli mekem wosip long hem long tempol. Be makem gud se Jisas i no jes talem stret ansa long Pita. Wetem kaen fasin, hem i yusum ol gudfala kwestin blong givhan long Pita blong luksave stret ansa—mo ating blong halpem Pita blong luksave se hem i mas tingting fastaem, bifo we hem i stap toktok.
10, 11. ?Taem Pita i katemaot wan saed sora blong wan man long naet blong Pasova long 33 K.T., Jisas i mekem wanem? ?Olsem wanem samting ya i soemaot se Jisas i luksave bigfala wok we ol kwestin oli mekem blong tijim man?
10 Seken eksampol, hemia samting we i kamaot long naet blong Pasova long 33 K.T. * Taem wan grup blong man i kam blong holem Jisas, ol disaepol oli askem long Jisas sipos hem i i wantem se oli faet blong blokem olgeta. (Luk 22:49) Pita i no wet blong harem ansa blong Jisas. Hem i girap, i tekemaot naef blong faet blong hem, i katemaot wan saed sora blong wan man (ating Pita i wantem blong givim kil we i bigwan moa long hemia). Samting we Pita i mekem, i no stret long tingting blong Jisas, from we Jisas i rere blong letem olgeta oli holem hem. ?Ale, Jisas i mekem wanem? Olsem oltaem, Jisas i gat longfala tingting. Hem i askem tri kwestin long Pita, i se: “?Kap ya we Papa blong mi i givim long mi, i no stret we mi dring long hem?” ‘?Yu ting se mi no save singaot long Papa blong mi blong i givhan long mi, i sanem ol enjel we oli moa long twelef kampani blong ol soldia, blong oli kam lukaot long mi? ?Be sipos mi mekem olsem, ol tok ya blong Baebol we i talem se ol samting ya i mas kamtru, bambae i kamtru olsem wanem?’—Jon 18:11, NW; Matiu 26:52-54.
11 Tingbaot stori ya blong smoltaem. Wan bigfala hip blong man we oli kros tumas, oli raonem Jisas. Jisas i save se smoltaem biaen bambae hem i ded, mo se hem nao i mas tekemaot doti we ol man oli bin sakem long nem blong Papa blong hem, mo hem nao i mas sevem ol man. Nating se i olsem, hem i tektaem blong askem sam kwestin long Pita, blong tijim hem long sam impoten trutok. ?I klia long tingting blong yu se Jisas i luksave bigfala wok we ol kwestin oli mekem blong tijim man?
Pijatok We i Bitim Samting We i Tru
12, 13. (a) ?Wanem narafala rod we Jisas i yusum blong tijim ol man? (b) ?Olsem wanem Jisas i yusum rod ya blong soemaot se i krangke blong faenem ol smosmol poen long ol brata blong yumi?
12 Plante taem, Jisas i yusum wan narafala rod blong tijim gud ol man. Hem i yusum pijatok we i bitim samting we i tru, blong makem wan poen long tingting blong ol man. Long rod ya, hem i pulum ol man blong mekem wan pija long tingting blong olgeta we oli no save fogetem. Tingbaot sam eksampol.
13 Long Bigfala Toktok blong Jisas antap long Hil, hem i wantem talem klia long ol man se oli ‘no mas jajem’ narafala. Ale, hem i talem se: “?From wanem yu stap tokbaot smol doti ya we i stap long ae blong brata blong yu, be yu no save luk bigfala wud ya we i stap long ae blong yu?” (Matiu 7:1-3) ?Yu save mekem wan pija blong samting ya long tingting blong yu? Wan man we i stap faenem poen long narafala oltaem i wantem tekemaot wan smol doti nomo long “ae” blong brata blong hem. Man ya i stap talem se brata blong hem i no save lukluk gud, taswe hem i stap jajem nogud ol man. Be, man ya we i stap faenem poen oltaem, hem wan i no save jajem gud narafala from we hem i gat wan “bigfala wud” i stap long ae blong hem—olsem wan timba no plang we oli yusum blong bildim haos. !Jisas i yusum pijatok ya we man i no save fogetem, blong soem klia se i krangke nomo blong faenem ol smosmol poen long ol brata blong yumi, be maet yumi wan i gat ol bigbigfala poen long yumi!
14. ?From wanem pijatok blong Jisas se oli tekemaot anis long dring be solemdaon kamel, i olsem wan strong advaes?
14 Wan narafala taem bakegen, Jisas i tok agensem ol Farisi se: “Yufala i man blong lidim man, be yufala i blaen. Taem yufala i dring wota, yufala i save tekemaot anis ya we i stap long hem, be yufala i stap solemdaon buluk ya [“kamel ya,” NW ] we i stap long hem, we yufala i no luk.” (Matiu 23:24) Pijatok ya i givim sam strong advaes. ?From wanem yumi talem olsem? From we wan anis i smosmol olgeta, be kamel i bigwan bitim ol narafala anamol we ol man long taem blong Jisas oli save long olgeta. !Samfala oli talem se, yumi mas hivimap 70 milian anis blong kasem sem kilo olsem wan kamel! Mo tu, Jisas i save se ol Farisi oli folem fasin blong kafsaedem waen blong olgeta i gotru long wan kaliko. Ol man ya we oli strong blong folem ol rul, oli mekem olsem blong oli no solemdaon wan anis we Loa i talem se i save mekem oli kam doti long ae blong God. Be i olsem we oli solemdaon wan kamel we hem tu i no klin long ae blong God. (Levitikas 11:4, 21-24) Tijing we Jisas i wantem givimaot, i klia nomo. Ol Farisi oli strong blong folem ol smosmol haf blong Loa, be oli sakemaot ol bigfala fasin olsem, “man i mas mekem i stret, mo i mas gat sore long man.” (Matiu 23:23) !Jisas i mekem prapa fasin blong olgeta i kam long klia ples nomo!
15. ?Wanem sam lesen we man i save lanem long ol pijatok blong Jisas?
15 Plante taem, Jisas i yusum ol pijatok ya we oli bitim samting we i tru, taem hem i tijim ol man. Tingbaot sam moa eksampol: ‘Bilif we i smol nomo olsem [smosmol] sid blong tri ya mastad,’ i save seftem wan bigfala hil. Ating i no gat wan rod we i moa gud blong makem long tingting blong ol man we Jisas i tijim olgeta, se nating we bilif blong olgeta i smol nomo, be oli save mekem plante bigfala samting. (Matiu 17:20, NW ) Wan bigfala kamel i traem blong pastru long ae blong wan nidel—pijatok ya i soemaot gud olsem wanem i had long wan rij man blong mekem wok blong God mo long semtaem, gohed blong holem fasin ya blong ronem ol sas samting (Matiu 19:24) ?Yu yu no sapraes long ol gudfala pijatok ya we Jisas i yusum, mo sot tok nomo we hem i yusum blong tijim man long ol bigfala trutok?
Soemaot Poen i Klia Gud
16. ?Oltaem Jisas i yusum bigfala waes blong hem long wanem fasin?
16 From we bren blong Jisas i stret gud olgeta, hem i gat nambawan fasin blong soemaot ol poen i klia gud. Be, hem i neva yusum fasin ya long rod we i nogud. Long ol tijing blong hem, oltaem hem i yusum bigfala waes blong hem blong leftemap trutok. Sam samtaem, hem i soemaot wan poen i klia gud, blong ansa long ol giaman tok blong ol lida blong skul. Mo tu, hem i soemaot poen i klia gud, blong tijim ol disaepol blong hem long sam impoten lesen. Bambae yumi luk nambawan fasin ya blong Jisas blong soemaot ol poen i klia gud.
17, 18. ?Olsem wanem Jisas i soemaot poen i klia gud, taem hem i ansa long ol giaman tok blong ol Farisi?
17 Tingbaot man ya we i blaen mo i no save toktok from we wan devel i stap long hem. Jisas i girap i ronemaot devel ya. Nao taem ol Farisi oli harem nius ya, oli talem se: “Man ya i stap ronemaot ol devel long man, long paoa blong Bielsebul [Setan] nomo, we i jif blong ol devel.” Yu luk, ol Farisi oli agri se i nidim paoa we i bitim paoa blong man blong ronemaot devel. Be, oli no wantem se ol man oli bilif long Jisas, taswe oli talem se paoa ya i kamaot long Setan. Be Jisas i soem long ol Farisi se oli no stap tingting klia long poen ya. Hem i ansa se: “Sipos ol man blong wan jif oli seraot, nao haf i agens long narafala haf, ol wok blong jif ya i mas foldaon. Mo i no gat wan vilej no wan haos we ol man blong hem oli seraot, haf i agens long narafala haf, we bambae hem i save stap gud. Mo sipos Setan i stap ronemaot ol devel long man, hemia i min se hem nomo i stap agens long hem bakegen. ?Olsem wanem bambae hem i save holem ol man blong hem?” (Matiu 12:22-26) I olsem we Jisas i stap talem se: ‘Sipos tok blong yufala i tru, se mi mi wan man blong Setan we i stap stretem trabol we Setan nomo i mekem, hemia i min se Setan i stap agensem hem wan bakegen, mo ol wok blong hem i no save stanap.’ ?Yu no ting se klia fasin ya blong Jisas blong soemaot poen ya i gat paoa?
18 Jisas i pulum olgeta blong tingting moa yet. Hem i save se sam disaepol blong ol Farisi tu oli bin ronemaot devel. Ale, hem i askem wan kwestin we i isi nomo, be i daonem gud olgeta: “?Sipos i tru we mi mi stap ronemaot ol devel long man long paoa blong Bielsebul, be olsem wanem long ol man [disaepol] blong yufala? ?Oli stap ronemaot devel long man long paoa blong hu?” (Matiu 12:27) I olsem we Jisas i stap talem se: ‘Sipos i tru se mi mi yusum paoa blong Setan blong ronemaot devel, ale ol disaepol blong yufala tu oli stap yusum paoa ya.’ ?Ol Farisi oli save talem wanem bakegen? Oli no save agri se ol disaepol blong olgeta oli yusum paoa blong Setan blong mekem wok blong olgeta. Ale, taem Jisas i soemaot poen ya i klia gud, hem i pruvum se ol tok agens we oli sakem, i krangke nomo.
19, 20. (a) ?Olsem wanem Jisas i soemaot poen i klia gud, blong tijim ol man long ol gudfala trutok? (b) ?Taem ol disaepol blong Jisas oli askem long hem blong tijim olgeta blong prea, olsem wanem hem i pulum olgeta blong tingbaot fasin we i ‘gud moa’?
19 Be Jisas i no soemaot poen i klia gud, jes blong satem maot blong ol man we oli agens long hem. Nogat. Hem i yusum fasin ya blong pulum ol man tu, mo blong tijim olgeta long ol gudfala trutok blong Jeova we oli mekem man i harem gud. Plante taem hem i pulum ol man blong tingbaot fasin we i ‘gud moa,’ blong halpem olgeta blong gat moa bilif long wan trutok we oli save finis long hem. Bambae yumi luk tu eksampol blong samting ya.
20 Taem ol disaepol blong Jisas oli askem long hem blong tijim olgeta blong prea, Jisas i talem pijatok blong wan man we i “gohed blong askem,” gogo hem i pulum wan fren blong givhan long hem, nating se fren ya i no wantem. Mo tu, Jisas i tokbaot fasin blong ol papa mama we oli glad blong “givim ol gudgudfala samting” long ol pikinini blong olgeta. Nao long en blong tok blong hem, hem i se: “Nating we yufala i man nogud, be yufala i save givim ol gudgudfala samting long ol pikinini blong yufala. Be papa blong yufala long heven, fasin blong hem i gud moa i winim fasin blong yufala. Mo hem i save givim Tabu Spirit long ol man we oli askem long hem.” (Luk 11:1-13) Tijing ya we Jisas i givimaot, i no stanap long tu samting we tufala i sem mak, be long tu samting we tufala i defdefren. Sipos wan man i save pulum fren blong hem we i no wantem givhan long hem blong givim samting we hem i nidim, mo sipos wan papa we i sinman i save givim samting we pikinini blong hem i nidim, ale Papa blong yumi long heven we i gat lav i save go moa olgeta. !Yes bambae hem i glad tumas blong givim tabu spirit long ol gudfala man blong hem we oli prea long hem wetem tingting daon!
21, 22. (a) ?Olsem wanem Jisas i mekem man i tingting gud taem hem i givim advaes ya blong no tingting tumas long ol samting blong laef? (b) ?Naoia we yumi tingting bak finis long sam fasin we Jisas i yusum blong tijim ol man, wanem tingting blong yumi?
21 Jisas i yusum semfala fasin ya taem hem i givim advaes se man i no mas tingting tumas long ol samting blong laef. Hem i se: “Yufala i luk ol pijin ya. Olgeta oli no planem garen, oli no karem kakae i kam, mo oli no gat haos no ples blong putumgud ol kakae blong olgeta. Be God i stap givim kakae long olgeta. Mo long fes blong hem, yufala i gud moa, i winim ol pijin. Yufala i traem tingbaot ol flaoa ya we oli stap gru. Olgeta oli no wok mo oli no somap klos blong olgeta. . . . Ol flaoa ya i blong wan dei nomo, tumora bambae ol man oli bonem long faea, be God i stap flasemgud olgeta. ?Yufala i ting se bambae hem i no save [“hem i no glad moa blong,” NW ] givim klos long yufala? Man, bilif blong yufala i smol tumas.” (Luk 12:24, 27, 28) !Yes, sipos Jeova i lukaot gud long ol pijin mo ol flaoa, bambae hem i mekem i gud moa long ol man blong hem! Ol toktok ya we Jisas i talem wetem kaen fasin blong pulum man blong tingting gud, i gat paoa, mo i klia se i tajem hat blong ol man we oli lesin long hem.
22 Afta we yumi lukluk bak long sam fasin blong Jisas blong tijim ol man, yumi luksave se ol soldia we oli kam blong holem Jisas, oli no giaman taem oli talem se: “!I no gat man we i save tok olsem man ya samtaem!” Be ating fasin we ol man oli save moa long saed blong tijing blong Jisas, hemia ol parabol mo pijatok we hem i yusum. ?From wanem hem i yusum rod ya blong tij? ?Mo from wanem ol parabol blong hem oli tijim gud man? Bambae yumi ansa long ol kwestin ya long nekis stadi.
[Ol Futnot]
^ Ating ol soldia ya oli wok blong hae kot ya Sanhedrin, mo ol jif pris oli bos blong olgeta.
^ Lukluk stadi ya “Mi Mi Putum Wan Eksampol Blong Yufala” mo ‘Evri Dei Yufala i Mas Biaen Long Mi,’ long Wajtaoa blong Ogis 15, 2002.
^ Laswan vas ya, yumi faenem long Ol Wok 20:35. Aposol Pol nomo i talem bakegen tok ya blong Jisas, be tingting we i stap insaed long ol tok ya, yumi faenem long ol Gospel. Maet wan man i bin talem ol tok ya stret long Pol (maet wan disaepol we i harem Jisas i talem tok ya, no maet Jisas hem wan i talem long Pol afta we hem i laef bakegen long ded) no maet God nomo i putum tok ya long tingting blong Pol.—Ol Wok 22:6-15; 1 Korin 15:6, 8.
^ Evri yia, ol man Isrel oli mas pem tu drakma (pei blong wan man we i wok blong tu dei) olsem wan takis blong tempol. Oli yusum mane ya blong fiksimap eni samting we i brok long tempol, blong pem olgeta we oli wok long ples ya, mo pem ol sakrefaes we oli mekem evri dei from evriwan long nesen ya.
^ K.T. i minim Kristin Taem.
?Yu Yu Tingbaot?
• ?Wanem sam eksampol blong soem se Jisas i yusum ol klia, isi tok, blong tijim ol man?
• ?From wanem Jisas i askem plante kwestin taem hem i tijim ol man?
• ?Wanem ya wan pijatok we i bitim samting we i tru, mo olsem wanem Jisas i yusum ol pijatok ya blong tijim ol man?
• ?Olsem wanem Jisas i soemaot poen i klia gud, taem hem i tijim ol disaepol long ol trutok blong Jeova we oli mekem man i harem gud?
[Kwestin]
[Tok blong pija long pej 9]
Jisas i yusum ol isi tok we ol man olbaot oli kasem save long hem
[Tok blong pija long pej 10]
Ol Farisi oli ‘tekemaot anis ya be oli solemdaon kamel’